Yu sabi o bigi a lobi fu Gado de?

WAN leisi a man Yob ben taki wan sani fu a sondu fu libisma. A ben taki: „Libisma, di wan uma meki, e libi syatu èn abi furu problema. A e opo kon leki wan bromki èn den e koti en puru, èn a e hari gowe esi-esi leki a skaduw èn a no e tan” (Yob 14:1, 2). Na a ten dati a libi fu Yob no ben switi gi en, fu di a ben lai nanga furu pina èn nanga furu sari. Oiti yu kisi a firi dati?

Aladi a kan taki a libi tranga gi wi èn taki wi abi fu du nanga furu problema, toku wi abi wan tranga howpu. A howpu disi abi fu du nanga a sari-ati nanga a lobi fu Gado. Na a fosi presi a de so taki wi sari-ati hemel Tata sorgu gi wan frulusu-ofrandi di ben kan bai a libisma famiri puru fu a sondu fasi di wi de na ini. Soleki fa Yohanes 3:16, 17 e sori, dan Yesus Krestes ben taki: „Gado ben lobi grontapu sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi. Bika Gado no ben seni en Manpikin kon na grontapu fu a krutu grontapu, ma fu grontapu ben sa kisi frulusu nanga yepi fu en.”

Hori den lobi-ati sani na prakseri tu di Gado du gi wi leki sondu libisma. Na apostel Paulus ben taki: „Fu wán sma a meki ala pipel fu libi na a heri grontapu, èn a ben poti den fasti ten nanga den fasti skotu fu a libipresi fu libisma, so taki den suku Gado, efu kande den firifiri en èn trutru feni en, aladi, te yu luku en bun, a no de fara fu ibriwan fu wi” (Tori fu den Apostel 17:26, 27). Prakseri dati pikinso! Aladi wi na sondu libisma, toku wi kan abi wan bun matifasi nanga wi lobi-ati Mekiman, Yehovah Gado.

Dati e yepi wi fu luku go na a tamara nanga frutrow, fu di wi sabi taki Gado e broko en ede nanga wi èn taki na wan lobi-ati fasi a seti sani so taki wi kan tan kisi wini gi wisrefi (1 Petrus 5:7; 2 Petrus 3:13). A no de fu taki fu dati ede dati wi abi nofo sani di e sori wi taki a prenspari gi wi fu kon sabi moro fu a lobi-ati Gado fu wi, nanga yepi fu Bijbel, a Wortu fu en.