Kownukondre preikiman e fruteri

A feni a waarheid na wan presi pe sma no ben o luku srefi

GADO wani taki „ala sortu sma musu kisi frulusu èn kon kisi wan soifri sabi fu waarheid” (1 Timoteyus 2:3, 4). Fu man doro a marki dati, dan Yehovah Kotoigi tyari milyunmilyun Bijbel kon na doro èn sosrefi Bijbel publikâsi di den e prati gi sma fu yepi den frustan a Bijbel. Son leisi, den buku disi yepi reti-ati sma fu kon sabi a waarheid na wan fasi di nowan sma no fruwakti. Fu gi wan eksempre fu dati, den Kownukondre preikiman na ini a foto Freetown, na Sièra Leon, ben fruteri na ondrofenitori disi.

Osman ben de a di fu tu manpikin fu wan osofamiri nanga neigi pikin. Fu di a gro kon bigi na ini wan osofamiri di ben de fayafaya kerkisma, meki a ben e go doronomo na kerki fu anbegi makandra nanga en papa. Ma Osman ben broko en ede nanga san a kerki fu en ben leri sma fu a hel. A no ben man frustan fa wan sari-ati Gado ben sa meki ogri sma pina na ini faya. Sma ben du ala muiti fu yepi Osman frustan a tori fu a helfaya, ma den no ben man du noti fu overtoigi en.

Wan dei, di Osman ben abi 20 yari, dan a ben si wan blaw buku e kibri na mindri a doti na ini wan dotibaki. Fu di a lobi leisi, meki a teki a buku. Di a krin en, a si a nen fu a buku: De waarheid die tot eeuwig leven leidt (A waarheid di e tyari yu go na têgo libi). *

Osman ben aksi ensrefi: ’San na a waarheid disi?’ Osman ben wani sabi moro. A tyari a buku go na oso èn a leisi a heri buku wantron. A ben breiti srefisrefi di a kon sabi taki Gado abi wan nen èn taki a nen dati na Yehovah! (Psalm 83:18) Osman ben kon sabi tu taki a moro prenspari fasi fu Gado na lobi, èn taki Gado no lobi a prakseri srefisrefi taki sma e pina na ini wan faya presi (Yeremia 32:35; 1 Yohanes 4:8). Te fu kaba, Osman ben leisi taki dyonsro Yehovah sa tyari wan paradijs kon pe sma sa man libi fu têgo (Psalm 37:29; Openbaring 21:3, 4). Dati na trutru wan moi waarheid fu wan Gado di abi sari-ati nanga lobi! Osman ben breiti srefisrefi èn a ben taki Yehovah tangi nanga en heri ati taki A meki a feni a waarheid na wan presi pe sma no ben o luku srefi.

Wan tu dei baka dati, nanga yepi fu wan tu mati, Osman ben man feni a Kownukondre zaal fu Yehovah Kotoigi èn a ben go na wan konmakandra fu a fosi leisi. Di a ben de drape, a aksi wan Kotoigi fu studeri Bijbel nanga en. Aladi Osman ben kisi gens fu en famiri, toku Osman ben tan go na fesi na yeye fasi èn a ben teki dopu (Mateyus 10:36). Now a e dini leki wan owruman na ini a gemeente. A de wan kefalek moi sani taki ala den sani disi kon pasa fu di a sma disi feni wan Bijbel publikâsi na ini wan dotibaki!

[Futuwortu]