Aksi fu leisiman

Meki wi taki dati wan sma wani teki dopu, aladi a malengri noso siki na so wan fasi taki yu no sa man dukrun en go na ondro watra so makriki. A de fanowdu fu dukrun so wan sma go na ondro watra krinkrin te yu e dopu en?

A wortu „dopu” vertaal komoto fu a Griki wortu baʹpto di wani taki „dipi go na ini” (Yohanes 13:26). Na ini Bijbel, „dopu” na a srefi leki „dukrun en go na ondro”. The Emphasised Bible di Rotherham skrifi e taki fu a dopu di Filipus dopu na eunuch fu Etiopia. A buku e taki: „Den ala tu, Filipus nanga na eunuch saka go na ini a watra, èn a ben dukrun en go na ondro” (Tori fu den Apostel 8:38). Sobun yu kan taki dati den e dipi a sma di e teki dopu go na ondro watra.—Mateyus 3:16; Markus 1:10.

Yesus ben leri den disipel fu en: „Go fu dati ede, èn meki disipel fu sma fu ala kondre, èn dopu den” (Mateyus 28:19, 20). Fu dati ede meki Yehovah Kotoigi e seti sani fu dopu sma na ini liba, na presi di sma meki fu swen, noso na tra presi pe nofo watra de fu dukrun wan sma go na ondro krinkrin. Fu di a dopu na wan sani di Bijbel e taki dati wi musu fu du, dan nowan libisma no kan taki dati wan tra sma no abi fu du dati. Dati meki wan sma musu fu dopu, srefi efu spesrutu sani abi fu seti fu man du dati. Fu eksempre, furu leisi den ben man dopu owrusma noso sma di e sikisiki, na ini wan bigi tobo. A makriki fu waran a watra na ini so wan tobo. Baka dati yu kan poti a sma di o teki dopu na ini, meki a gwenti a waran watra pikinso. Te dati kaba, dan a sma kan teki dopu.

Srefi sma di malengri srefisrefi ben teki dopu. Fu eksempre, sma de di ben abi wan siki na den neki pe datra ben abi fu koti den. Leki baka pisi fu dati datra ben abi fu libi wan olo na den neki di no sa tapu moro. Noso a de so taki datra libi na olo so taki den kan poti wan masyin gi a sma di kan yepi en fu hari bro. Ala den sortu sma disi den dukrun go na ondro watra tu. A no de fu taki dati efu so wan sma musu teki dopu, dan sani musu sreka bun na fesi. A ben sa de wan koni sani fu sorgu taki wan sma di e wroko na ini ati-oso noso wan datra de krosibei fu gi yepi te a de fanowdu. Ma furu tron a de so taki te sani seti bun na fesi, dan den sma kan teki dopu. Fu dati ede, ala sortu muiti musu meki fu dopu wan sma na ini watra efu disi na san a sma wani trutru, èn efu a sma no abi trobi nanga den bakapisi di dati kan abi gi en.