„Den sungu go na ondro”

„Den krasi watra ben tapu den; den sungu go na ondro na ini a dipi neleki wan ston.”

NANGA den wortu disi Moses nanga den Israelsma ben bari singi fu prisiri fu di den ben kisi frulusu komoto fu a Redi Se èn fu di den ben si a pori di den feanti fu den ben kisi. Den ben si san pasa nanga Farao èn nanga a legre fu Egepte di ben e suku fu kisi den.—Exodus 15:4, 5.

A no de fu taki dati iniwan sma di ben si a tumusi fruwondru sani dati, ben man frustan heri bun san dati ben wani taki. Nowan sma kan tyalensi noso kakafutu gi a makti fu Gado èn toku tan na libi. Toku a de so taki soso wan tu mun baka di den feanti fu den Israelsma ben kisi pori, dan wan tu prenspari sma fu Israel, Korak, Datan, Abiram, nanga ete 250 man di ben e hori baka gi den, ben opo densrefi krinkrin kontrari a makti di Gado ben gi Moses nanga Aron.—Numeri 16:1-3.

Neleki fa Yehovah ben taki, na so Moses warskow den Israelsma fu komoto na den tenti fu den man disi di ben opo densrefi teige Yehovah. Na wan fasi di e sori taki den ben tyari doro-ai, Datan nanga Abiram, makandra nanga den osofamiri fu den, ben weigri fu kenki a fasi fu den. Ne Moses meki bekènti taki na wan aparti fasi Yehovah ben sa sori a pipel krinkrin taki den man disi ’no ben sori lespeki gi En’. Ne Yehovah priti a gron opo na ondro den futu. „Na so den saka go na ondro, den nanga ala sma di ben de nanga den, den saka go libilibi na ini Syeol, èn a doti ben tapu den.” Fa a waka nanga Korak nanga den tra sma di ben opo densrefi? „Wan faya ben komoto fu Yehovah èn a ben bron den tu hondro nanga feifitenti man di ben e bron switismeri leki ofrandi.”—Numeri 16:23-35; 26:10.

Farao nanga en legre, èn sosrefi ala den sma di ben opo densrefi na ini a gran sabana, den alamala ben lasi den libi fu di den no ben sori lespeki gi a makti fu Yehovah. Den no ben e hori na prakseri taki Yehovah ben e luku san e pasa nanga a pipel fu en. Fu dati ede a de tumusi prenspari taki ala den sma di e si fa Yehovah e kibri wi na ini den ogri lasti dei disi musu leri fu Yehovah; den musu gi yesi na en leki „a Moro Heiwan” èn leki „na Almaktiwan”. Te den e du dati dan den kan frutrow tapu den wortu fu Yehovah di e gi wi trowstu: „Wán dusun sma sa fadon leti na yu sei èn tin dusun na yu reti-anusei; ma a no sa kon krosibei fu yu. Nanga yu ai nomo yu sa luku èn yu sa si a strafu srefi di den ogriwan sa kisi. Fu di yu taki: ’Yehovah na mi kibripresi,’ yu meki a Moro Heiwan srefi tron yu tanpe.”—Psalm 91:1, 7-9.