Fa yu e si dede?

DEDE na wan sani di e meki wi sari na ini wi aladei libi, awansi fa wi skin tranga èn awansi fa wi gudu. Wi kan dede te wi e koti wan strati abra noso te wi e didon na ini wi bedi. Tapu 11 september 2001, ogri-ati sma di ben suku fu gens a tirimakti fu Amerkankondre, meki taki bigi rampu pasa na ini New York City nanga Washington, D.C. Den sani disi e meki wi kon frustan taki a „lasti feanti”, dede, e teki ala sortu sma, gudusma nanga pôtisma, yongusma nanga owrusma, èn son leisi a e teki dusundusun sma na ini wan tu miniti nomo.—1 Korentesma 15:26.

Aladi dede e gi furu sari èn a e meki sma frede, toku a e hari a prakseri fu sma. Nowan-enkri tori no e meki moro sma bai koranti noso e meki den luku telefisi, leki tori di abi fu du nanga dede, èn dati de so spesrutu te ipi-ipi sma dede na wan ogri-ati fasi. Sma no man kaba arki noso leisi dedetori, awansi den tori disi abi fu du nanga sma di dede leki bakapisi fu feti, fu rampu soleki bigi winti, gronseki noso tra sani, fu ogridu, noso fu siki. A de fu fruwondru trutru te wi e si a bigi sari di sma e firi èn a krei di den e krei te prenspari sma noso pôpi sma e dede. A sani disi e sori krin taki libisma e poti tumusi furu prakseri na dede.

A tru taki dede abi krakti tapu sma na difrenti sortu fasi. Sma e tan poti furu prakseri na dede, spesrutu a dede fu trawan. Ma sma frede fu prakseri den eigi dede. Dati na a wan-enkri tori di furu fu wi no wani prakseri kwetikweti.

A dede di libisma e dede e trobi yu?

Wi no wani prakseri wi eigi dede, èn dati sa tan so ala ten. Fu san ede dati de so? Dati de so fu di Gado meki wi nanga wan angri fu tan na libi. „A ben seti dem jari foe teego na ini dem hati toe”, na so Preikiman 3:11 e taki na ini Da Bijbel na ini Sranantongo. Fu di libisma sabi taki den sa musu dede, meki den e tan feti nanga a denki dati. A sani disi meki taki den bigin bribi ala sortu sani, soso fu man feni wan fasi fu libi nanga a denki dati, èn fu man libi a libi fu den so bun leki den man. Den bigin bribi na ini a kerkileri di e taki dati a sili no man dede èn den bigin bribi sosrefi taki sma e nasi.

Awansi fa a no fa, dede na wan sani di e trobi èn e frede sma srefisrefi, èn sma na heri grontapu abi a frede disi. Fu dati ede, a no musu fruwondru wi taki libisma e frede fu poti prakseri na den eigi dede. Dati de so fu di a dede di libisma e dede, e meki sma frustan taki te den e libi soso fu feti na baka gudu noso fu kisi makti, dan a libi dati sa de fu soso te fu kaba.

Sma di de fu dede furu tron de den wawan

Fosi a ben de so, taki te wan sma ben siki seryusu, noso ben kisi seryusu mankeri, dan a sma dati furu tron ben e kisi okasi fu dede na ini en  eigi oso pe a ben e firi moro bun. Na so a ben de na ini Bijbel ten, èn a de so ete na ini wan tu libimakandra (Genesis 49:1, 2, 33). Te wan sma dede na ini den libimakandra dati, dan na osofamiri e kon makandra, èn den pikin e kisi primisi tu fu teki prati na a takimakandra. A sani disi e gi ibri memre fu a famiri a firi taki a no en wawan e firi sari, èn den e trowstu makandra èn e yepi makandra na ini a situwâsi disi.

Disi de heri tra fasi leki san e pasa na ini wan libimakandra pe sma no abi a gwenti fu taki fu dede, fu di den feni taki a no bun. Na ini den libimakandra disi pikin no e kisi den tori disi fu yere, fu di sma feni taki dati ben o de tumusi hebi gi den. Na ini a ten disi, sma di e dede e ondrofeni dati na wan heri tra fasi, èn furu tron den de den wawan te a dedeyuru fu den doro. Furu sma ben sa wani dede na ini den eigi oso pe den e firi moro bun, èn pe a famiri fu den e sorgu gi den na wan lobi-ati fasi. Ma a de so taki wan lo sma e kisi a takru ondrofeni taki den musu dede na ini wan ati-oso pe furu tron den de den wawan aladi den abi skin-ati sosrefi, èn pe wan lo sani fasi na den skin di musu yepi fu hori den na libi. Na a tra sei, milyunmilyun sma e dede sondro taki trawan sabi den, fu di den e dede leki wan fu den ipi-ipi sma di trawan kiri fu di den ben de fu wan spesrutu ras. Boiti dati, sma e dede fu di angriten de, fu di den ben abi AIDS, fu di wan borgu orloku ben de, noso fu di den ben pôti sote.

Wan tori di wi musu prakseri

Bijbel no e taki dati a no bun fu poti prakseri na dede. Fu taki en leti, Preikiman 7:2 e taigi wi: „A moro bun fu go na a oso pe sari de, leki fu go na a oso pe wan fesa de, bika dati na a kaba fu ala libisma.” Te dede miti wi, dan kande dati sa meki wi poti moro prakseri na a lespeki di wi musu abi gi a libi, fu di wi e libi wan syatu ten nomo. Disi kan yepi wi fu abi wan moro bun marki na ini a libi, na presi taki wi e libi fu soso.

Fa yu e si dede? Yu poti prakseri na a dede di yu sa dede wan dei? Fa yu e denki fu a tori disi? San yu e bribi, san yu e fruwakti, èn san e frede yu?

Neleki fa sma no man fruklari èn frustan a libi dorodoro, na so den no man fruklari èn frustan a dede di libisma e dede dorodoro tu. A wan-enkri sma di kan taki san tru fu a tori disi, na wi Mekiman. En na a sma „fu pe libi e komoto”, èn „den pasi di e puru sma fu dede” na fu en (Psalm 36:9; 68:20). Aladi a sa fruwondru wi kande, toku wi sa si taki wi e kisi trowstu nanga deki-ati te wi e ondrosuku san Gado Wortu e taki fu wan tu fu den sani di sma e bribi te a abi fu du nanga dede. Wi sa si taki dede no abi fu de a kaba fu ala sani.

[Prenspari pisi na tapu bladzijde 4]

Fu di wi sabi taki wi kan dede wan dei, dan dati e yepi wi fu abi wan moro bun marki na ini a libi