Ondrofenitori

Mi kisi furu blesi fu di mi dini Gado fayafaya

SOLEKI FA WILLIAM AIHINORIA FRUTERI

A ben de mindri neti. Mi wiki di mi yere mi papa e dyeme leki fa a ben gwenti na neti te a ben abi furu pen. A ben e lolo na tapu a gron, aladi a ben e hori en bere. Mi mama, mi bigi sisa, nanga mi ben e lontu en. Di a pen ben kon saka pikinso, dan a opo sidon, a soktu, ne a taki: „Yehovah Kotoigi wawan abi vrede na ini a grontapu disi.” A sani di mi papa ben taki ben e bruya mi pikinso, ma mi noiti no frigiti a sani dati, fu di na fositron mi ben yere fu Yehovah Kotoigi. Mi ben e aksi misrefi san mi papa ben wani taki nanga dati.

A SANI dati pasa na ini 1953 di mi ben abi siksi yari. Mi kweki na ini wan osofamiri pe mi papa ben abi moro leki wán wefi. Wi ben e libi na ini Ewossa, wan dorpu na ini a mindri westsei pisi fu Nigeria pe sma e prani gron furufuru. Mi ben de a di fu tu pikin, ma a fosi manpikin na ini na osofamiri fu mi papa. Te fu kaba na osofamiri ben kon abi den dri wefi fu mi papa nanga 13 pikin. Wi ben e tan nanga mi granpapa na ini wan oso di meki fu tokotoko èn di ben abi fo kamra. A daki fu na oso ben meki fu wan sani leki tasiwiwiri. Tra sma sosrefi ben e tan na ini na oso dati soleki mi granmama, nanga den dri brada fu mi papa, makandra nanga den osofamiri fu den.

Mi yongu yari no ben switi kwetikweti. Wan fu den sani di ben meki taki a libi ben hebi gi mi, ben de a fasi fa mi papa ben e sikisiki so furu. A ben kisi wan sortu pen na en bere di tan teleki a dede te fu kaba. Sma no ben man feni san ben du en. Nowan fu den dresi di wan pôti Afrikan famiri ben kan bai ben e yepi en; awinsi efu na datra-dresi noso osodresi. Furu leisi te mi papa ben e lolo na gron fu di en bere ben e hati en, dan wi ben sidon e krei na en sei heri neti teleki kakafowru bari a tra mamanten. Furu leisi en nanga mi mama ben e teki waka go na tra presi fu go suku wan dresi gi a siki fu en. Dan den ben e libi mi nanga den brada nanga sisa fu mi na baka gi mi granmama di ben e sorgu wi.

 Fu sorgu wisrefi, dan wi osofamiri ben e prani èn ben e seri nyamsi, kasaba, nanga wan noto di den e kari kola noto. Fu di wi no ben e meki furu moni meki wi ben koti balata tu fu seri en fu kan kisi pikinso moro moni. Moro furu wi ben e nyan nyamsi. Wi ben e nyan nyamsi te mamanten, wi ben e fon a nyamsi gi a brekten nyanyan, èn te neti wi ben nyan nyamsi baka. A wan-enkri tra sani di wi ben nyan wanwan leisi ben de losi bâna.

Na anbegi fu wi afo ben de wan prenspari pisi fu wi libi. Wi osofamiri ben e tyari nyanyan leki ofrandi gi den afo fu wi. Den ben e poti a nyanyan dati na fesi wan tu tiki pe den ben tai moi skropu na tapu. Mi papa ben e anbegi wan kruktu gado tu di ben musu kibri wi gi ogri yeye nanga wisiman.

Di mi ben abi feifi yari, wi froisi komoto fu a dorpu fu wi fu go tan wan pisi ten na wan kampu pe den e prani gron, sowan 11 kilometer moro fara fu pe wi ben e tan. Drape mi papa kisi wan sortu woron na ini en skin, di meki taki a siki di a ben e siki na en bere ben kon moro ogri. Na deiten a no ben man wroko, èn den pen di a ben e kisi na en bere ben e pina en te neti. Mi ben kisi sika, noso santi loso, èn dati ben meki mi kon siki nanga wan sortu tyfus. Leki bakapisi fu dati, den tra famiriman fu wi ben abi fu sorgu wi. San den ben e gi wi, na dati nomo wi ben abi. Na presi fu dede leki bakapisi fu a pôti libi fu wi nanga a pina di wi ben pina, wi froisi go baka na wi dorpu Ewossa. Mi papa ben wani taki mi leki en fosi manpikin ben musu tron moro leki soso wan gronman di e pinapina fu sorgu ensrefi. A ben feni taki efu mi ben kisi bun skoroleri, dan dati ben kan yepi na osofamiri fu feni wan moro bun libi èn taki na a fasi dati mi ben sa kan yepi fu kweki den brada nanga sisa fu mi.

Mi kisi fu du nanga difrenti kerki

Di wi drai go baka na a dorpu fu wi, dan mi ben man bigin go na skoro. Disi ben meki taki mi ben kisi fu du nanga den kerki fu Krestenhèit. Na ini den yari baka 1950, a leri di yu ben e kisi na skoro ben abi furu fu du nanga den kerkileri fu den kondre di ben basi a kondre fu wi. Fu di mi ben e go na wan Lomsu lagiskoro, dan mi ben abi fu tron wan Lomsu tu.

Na ini 1966, mi tapu 19 yari. Ne den teki mi na a Pelgrim Baptist muloskoro na ini a foto Ewohinmi, di ben de sowan aiti kilometer fu Ewossa. Drape mi no ben kisi den srefi kerkileri di mi ben kisi fosi. Fu di mi ben de now na wan Protestant skoro, meki a Lomsu priester no ben wani taki mi ben musu teki prati na den sani di den du na ini a Lomsu kerki te sonde.

Na a pisi ten di mi ben de na a Baptist skoro mi kon feni na okasi fu leisi Bijbel. Aladi mi ben e tan go na a Lomsu kerki, toku ibri sonde misrefi ben leisi Bijbel te mi ben e komoto na kerki. Mi ben lobi den sani di Yesus Krestes ben leri sma, èn den leri dati meki mi angri fu libi wan libi pe mi ben kan dini Gado fayafaya. O moro mi ben e leisi Bijbel o moro mi ben bigin tegu fu a hoigrifasi fu den kerki fesiman, nanga a doti libi fu wan lo fu den kerkisma. Den sani di mi ben e si den sma disi e du aladi den ben e taki dati den na Kresten, ben difrenti krinkrin fu san Yesus nanga den disipel fu en ben e leri trawan, èn a ben difrenti fu a fasi fa den ben e tyari densrefi.

Wan tu sani pasa spesrutu di ben bruya mi. Wan leisi di mi go na a kerki-wenkri fu go bai wan rowskransi, dan mi ben si wan tapu e anga na a doropostu fu a wenkri. Wan tra leisi na edeman fu a Baptist skoro pruberi fu abi seks nanga mi nanga tranga. Bakaten mi kon frustan taki a ben de wan homo èn taki na difrenti tra okasi a ben du ogri nanga trawan na seks sei. Mi denki dipi fu den sani disi, aladi mi ben e aksi misrefi: ’A kan taki Gado e agri nanga kerki pe den sma fu a kerki èn srefi den fesiman kan du ogri, sondro taki den musu gi frantwortu fu den tumusi ogri sondu di den e du?

 Mi kenki a bribi fu mi

Toku mi ben lobi den tori di mi ben e leisi na ini Bijbel èn mi ben teki a bosroiti fu tan leisi en. A ben de na a ten dati taki mi go sidon prakseri fu a sani di mi papa ben taki sowan 15 yari na fesi: „Yehovah Kotoigi wawan abi vrede na ini a grontapu disi.” Ma mi ben e tweifri pikinso fu di den ben e spotu den pikin fu Kotoigi na a skoro fu mi èn son leisi den ben strafu den fu di den no ben wani teki prati na den kerki konmakandra di ben e hori te mamanten. Son sani di den ben e bribi mi no ben man frustan. Fu eksempre mi no ben man frustan fa a kan taki soso 144.000 sma e go na hemel (Openbaring 14:3). Mi ben e angri fu go na hemel tu. Fu dati ede mi ben aksi misrefi efu Gado ben teki ala den 144.000 sma kaba so taki a ben doro a nomru dati, bifo mi mama meki mi.

A ben de krin taki den Kotoigi ben e difrenti na ini a fasi fa den ben e tyari densrefi èn a fasi fa den ben e denki. Den no ben e moksi densrefi nanga a doti libi èn nanga den ogri-ati sani fu tra yonguwan na skoro. Leki fa mi ben e si a tori, dan den no ben de wan pisi fu grontapu trutru. Dati ben de soifri leki fa mi ben leisi na ini Bijbel, taki den sma musu de di abi a tru anbegi.—Yohanes 17:14-16; Yakobus 1:27.

Mi ben teki a bosroiti fu ondrosuku a tori moro fara. Na ini september fu a yari 1969, mi ben man feni a buku De waarheid die tot eeuwig leven leidt. A mun baka dati wan pionier, soleki fa den e kari den furuten dinari fu Yehovah Kotoigi, ben bigin studeri nanga mi. A fosi studie dati pusu mi fu leisi a Waarheid-buku. Mi bigin leisi a buku na wan satra neti èn a tamara fu en mi ben kaba leisi en fosi a bakadina. Wantewante mi bigin fruteri den tra studenti na skoro fu den tumusi moi sani di mi ben leisi. Den studenti nanga den skoromeester ben feni taki a nyun bribi fu mi ben e meki mi kon law. Ma mi ben sabi taki a no law mi ben e kon law.—Tori fu den Apostel 26:24.

Sma go fruteri mi papa nanga mama taki mi ben e preiki fu wan nyun bribi. Ne den aksi mi fu drai kon na oso wantewante, so taki den ben kan kon sabi san ben de mi problema. Nowan sma no ben de pe mi ben kan go fu kisi rai, fu di ala den Kotoigi ben go na a Distrikt Kongres fu den na Ilesha. Di mi doro oso, dan wantewante den fadon na mi skin nanga ala sortu aksi èn mi mama nanga tra famiriman ben e suku ala sortu fowtu na mi tapu. Mi du muiti trutru fu opo taki gi san mi ben leri fu Bijbel.—1 Petrus 3:15.

Baka di den pruberi fu sori mi na ala sortu fasi  taki Yehovah Kotoigi ben de falsi leriman sondro bun bakapisi, dan mi omu ben pruberi fu kisi mi na wan tra fasi. A ben begi mi: „Memre taki yu go na skoro fu go leri wan sani. Efu yu libi skoro fu go preiki, dan yu noiti no sa kaba a skoro. Sobun, fu san ede yu no e wakti teleki yu kaba nanga skoro, bifo yu go na ini a nyun bribi disi.” Na a momenti dati a ben gersi wan bun sani, sobun mi ben tapu fu studeri nanga den Kotoigi.

Di mi kaba skoro na ini december 1970, mi go wantewante na a Kownukondre zaal, èn fu sensi a ten dati mi tan go na den konmakandra fu Yehovah Kotoigi. Tapu 30 augustus 1971 mi teki dopu fu sori taki mi ben gi misrefi abra na Gado. Dati no ben hebi gi mi papa nanga mama nomo, ma sosrefi gi a heri libimakandra pe mi ben komoto. Fu di mi ben de a fosi sma fu a kontren fu Ewossa di ben kisi na okasi fu teki skoroleri aladi lanti pai den kostu, dan den ben feni taki mi meki den fesi fadon. Furu fu den ben fruwakti taki mi ben o du bigi sani. Den ben howpu taki mi ben o meki a libimakandra kon moro bun nanga yepi fu den sani di mi ben leri.

A bakapisi fu a kenki di mi kenki mi bribi

Den famiriman fu mi, makandra nanga den moro owru man fu a libimakandra pe mi ben e tan, ben seni wan grupu fu sma kon na mi, fu pruberi fu meki mi gowe libi a bribi fu mi. Den pruberi ala sortu sani, teleki den fluku mi srefi. Den ben taigi mi: „Efu yu no gowe libi a kerki disi, dan yu heri tamara pori. Yu no o feni wroko. Yu no o man bow yu eigi oso. Yu no o man trow èn seti wan osofamiri.”

Ma na presi taki ala den ogri sani disi pasa nanga mi, dan tin mun baka di mi kaba nanga skoro, mi feni wan wroko leki skoromeester. Na ini oktober fu a yari 1972, mi trow nanga mi lobi wefi Veronica. Bakaten, lanti leri mi fu wroko leki wan lantiman di e yepi fu orga den gronman na ini grupu èn fu yepi den nanga sani soleki fa fu seti den moni afersi fu den èn fa fu luku efu den bisnis fu den orga bun. Mi bai mi fosi wagi, èn mi bigin bow mi eigi oso. Tapu 5 november 1973 mi wefi meki wi fosi umapikin Victory, èn na ini den yari baka dati a meki Lydia, Wilfred, nanga Joan. Na ini 1986 a meki wi lasti pikin Mika. Te fu kaba den alamala kon de leki warti sani gi wi; den na trutru wan presenti fu Yehovah.—Psalm 127:3.

Te mi sidon denki fu a fasi fa mi libi ben waka, dan mi kan taki dati ala den ogri-ati sani di sma na ini a libimakandra fu mi ben winsi gi mi, tron blesi gi mi. Dati na fu san ede mi kari mi fosi umapikin Victory. No tumusi langa pasa, den sma fu a libimakandra pe mi kweki, skrifi wan brifi gi mi di e taki: „Now di Gado e blesi yu wi wani begi yu, grantangi, fu kon baka èn yepi wi fu meki a libimakandra fu wi dyaso go na fesi.”

Kweki pikin soleki fa Gado wani

Mi nanga mi wefi ben sabi taki wi no ben o man kweki wi pikin leki fa Gado wani efu wi ben o feti na baka gudu nomo. Sobun, wi leri fu libi nanga san wi abi èn fu no go suku tumusi bigi sani na ini a libi. Wi ben feni en moro bun fu libi na a fasi disi, leki fu libi na wan fasi di ben kan abi takru bakapisi gi wi.

Na a pisi fu a grontapu disi pe mi e libi, sma gwenti fu libi makandra nanga tra famiriman na ini wan oso, aladi den e gebroiki a srefi wasi-oso, a srefi kukru, kari kon. Ma wi breiti taki na ini ibri foto pe den ben seni mi fu go wroko leki lantiman, wi ben man yuru wan presi pe trawan no ben man kon tan so makriki. A tru taki den presi dati di wi ben yuru ben moro diri, ma fu di wi ben abi den tanpresi dati, meki wi ben kan sorgu taki den pikin fu wi no ben abi so furu demakandra nanga sma di ben kan pori den. Mi e taki Yehovah tangi taki na ini ala den yari di pasa, wi ben man kweki den pikin fu wi na presi di ben bun gi den na yeye fasi.

Moro fara a de so, taki a wefi fu mi no go suku wroko dorosei fu na oso, fu man de nanga den pikin èn fu sorgu den. Te mi komoto na wroko, dan wi e pruberi fu du sani makandra leki osofamiri. Ala san wi e du, wi e du makandra leki wán man. Disi wani taki sosrefi dati wi e hori wi osofamiri bijbelstudie, taki wi e sreka wisrefi èn e go na den gemeente konmakandra, taki wi e teki prati na ini a Kresten diniwroko, èn sosrefi taki wi abi wan prisiri ten noso e go koiri.

Wi pruberi fu wroko nanga a rai fu Deuteronomium 6:6, 7, di e gi papa nanga mama a deki-ati no wawan fu gi den pikin fu den leri te den de na oso, ma sosrefi na ibri tra okasi di den kisi. Disi ben yepi den pikin fu wi fu suku fu abi demakandra nanga tra Kotoigi, na presi fu go suku a demakandra dati na dorosei. Fu di den pikin si na  eksempre fu wi, dan densrefi leri nanga suma den musu abi demakandra. Mi nanga Veronica no abi demakandra nanga den wan di no abi a srefi bribi leki wi, efu dati no de trutru fanowdu.—Odo 13:20; 1 Korentesma 15:33.

A no de fu taki, dati a tiri di wi ben gi den pikin fu wi a no a wan-enkri bun sani di ben abi krakti tapu a libi fu den. Te now a de so taki na oso fu wi opo alaten gi tra Kresten di e wroko fayafaya. Furu fu den na opziener di e teki waka go na difrenti gemeente fu Yehovah Kotoigi. A ten di den lepi Kresten disi teki fu de makandra nanga wi, yepi wi pikin fu si èn fu leri fa wan sma e libi di e du sani gi trawan sondro fu prakseri ensrefi nomo. Disi ben meki taki den sani di wi leri den pikin kisi moro krakti, èn fu dati ede den meki den tru tori fu Bijbel tron wan pisi fu den libi.

Wi kisi blesi fu di wi dini Gado fayafaya

Nownowde, mi nanga mi wefi, makandra nanga fo fu den pikin fu wi de na ini a furuten diniwroko. A fosi leisi di mi bigin pionier ben de na ini 1973. Na ini ala den yari di pasa, son leisi mi ben abi fu tapu nanga a furuten diniwroko fu wan pisi ten, fu di wi ben abi moni problema. Wanwan leisi mi ben kisi a grani tu fu yepi fu gi leri na a Kownukondre Diniwroko-skoro, di e yepi Kresten opziener fu Yehovah Kotoigi fu kon sabi fa fu du den diniwroko moro bun. Na a momenti disi mi e dini na ini na Ati-oso Kontakti Komte, èn sosrefi leki a foto opziener fu Uhonmora.

Den fosi tu umapikin fu mi, Victory nanga Lydia, den ala tu trow nanga Kresten owruman èn den abi heri bun trowlibi makandra nanga den masra fu den. Den e dini makandra nanga den masra fu den na a bijkantoro fu Yehovah Kotoigi na Igieduma, na ini Nigeria. Wilfred, a moro owru manpikin fu wi e dini now leki dinari ini a diniwroko èn ten na ten Mika, a moro yonguwan, e dini leki wan yepipionier. Di Joan klari muloskoro na ini 1997, dan a bigin dini leki gewoon pionier.

Wan fu den moro warti sani di mi ondrofeni na ini mi libi ben de fu yepi trawan fu dini Yehovah Gado. Na so fasi mi ben man yepi tra famiriman tu boiti den wan fu mi eigi osofamiri. Mi papa ben meki muiti fu dini Yehovah, ma a trowlibi di a ben abi nanga moro leki wán wefi ben meki taki a no ben man go na fesi. Fu sensi pikin-nengre ten mi ben lobi fu poti prakseri na tra sma. Te mi e si taki trawan e pina, dan mi e firi leki den problema fu mi no prenspari so leki di fu den. Mi denki taki den e si taki mi wani yepi den trutru èn dati e meki kande taki a moro makriki gi den fu taki nanga mi.

Wan fu den sma di mi yepi fu kon sabi san Gado abi na prakseri, na wan yonkuman di no man opo fu en bedi fu di a siki. A ben e wroko na wan presi pe den ben e meki stroom èn wan leisi hebi stroom kon naki en aladi a ben e wroko. Disi ben meki taki a ben kon lan fu en borsu go miti en futu. A ben teki wan oso-bijbelstudie èn safrisafri a ben bigin libi akruderi den sani di a ben e leri. Di a ben teki dopu na ini wan liba krosibei fu en oso tapu 14 oktober 1995, dan a ben de a fosi leisi na ini 15 yari taki a ben komoto fu en bedi. A ben taki dati a dei dati ben de a moro prisiri dei fu en libi. Now a e dini leki wan dinari ini a diniwroko na ini a gemeente.

Fu taki en leti, a no hati mi srefisrefi taki mi teki a bosroiti 30 yari pasa fu dini Yehovah makandra nanga a pipel fu en di de na ini wánfasi. Mi kisi na okasi fu si taki den e dini Gado fayafaya èn taki den abi trutru lobi gi makandra. Awinsi a ben de so taki têgo libi no ben de wan pisi fu a howpu di Yehovah e gi den getrow futuboi fu en, toku mi ben sa wani tan libi wan libi pe mi e dini En fayafaya (1 Timoteyus 6:6; Hebrewsma 11:6). Fu di mi dini Gado fayafaya, meki taki mi libi kon de leki fa a de nownow èn dati meki taki mi libi no waka bruyabruya. A e gi mi prisiri, a e meki mi libi de na wan fasi di e meki mi firi bun, èn a e tyari koloku kon gi mi osofamiri.

[Prenki na tapu bladzijde 25]

Mi, mi wefi, nanga den pikin na ini 1990

[Prenki na tapu bladzijde 26]

Nanga mi wefi, den pikin fu mi, nanga den masra fu den umapikin fu mi