Wan tu fu den kruktu denki di sma abi fu dede
Wan tu fu den kruktu denki di sma abi fu dede
NA INI ala den yarihondro di pasa, libisma kon bruya èn den kon frede fu di den sabi taki den kan dede wan dei, èn a sani dati a no wan switi sani fu prakseri kwetikweti. Boiti dati, wan tu falsi kerkileri, gwenti, nanga kruktu denki di rutu dipi na ini libisma, meki taki libisma kisi wan moro bigi frede gi dede. A problema de taki te sma frede gi dede, dan dati kan tapu den fu abi prisiri na ini a libi, èn a kan meki den denki taki den e libi fu soso.
Spesrutu den bigi kerki sorgu taki sma kisi wan tu kruktu denki di abi fu du nanga dede. Wi sa ondrosuku wan tu fu den denki disi nanga yepi fu Bijbel, so taki yu kan kon si efu den denki di yu abi fu dede na tru tori.
Kruktu denki 1: Ala sma sa musu dede wan dei.
„Wi alamala musu dede wan dei”, na so a buku Death—The Final Stage of Growth e taki. Te sma e taki den sortu sani disi dan wi e si taki sma e bribi taki ala libisani sa musu dede wan dei. Fu di sma e bribi dati, meki furu sma abi a denki taki sma e libi fu soso, èn furu sma no e syen fu kisi wini gi densrefi fu di sma abi a denki disi.
Ma a tru taki ala sma musu dede wan dei? A no ala ondrosukuman e bribi dati. Fu gi wan eksempre, Calvin Harvey na wan biologiaman di e ondrosuku fa a du kon taki libisma e kon owru. A man disi ben taki na ini wan interview taki a no e bribi taki libisma „meki nanga a marki taki den musu dede”. William Clark, wan sabiman di e ondrosuku fu san ede libisma e kon siki, ben taki: „A no abi fu de so taki libisma musu dede.” Sosrefi Seymour Benzer, fu na Institute of Technology (wan organisâsi fu sabiman), feni taki „wi no musu agersi na owru di sma e kon owru nanga wan oloisi, ma a moro bun fu agersi en nanga wan situwâsi pe difrenti sani e pasa baka makandra, èn di wi sa man kenki kande”.
Te sabiman e studeri a fasi fa libisma meki, dan den no man fruklari dati. Den e kon sabi taki wi kisi someni koni di wi sa man gebroiki wan moro langa pisi ten leki den 70 noso 80 yari di furu fu wi e tan na libi. Fu gi wan eksempre, sabiman kon sabi taki na edetonton fu libisma man memre bun furu sani. Wan ondrosukuman taki dati a sabi di wi edetonton kan hori, na a srefi leki ala a sabi di de fu feni na ini „tutenti milyun buku, èn dati na leti so furu leki ala den buku di de na ini den moro bigi bibliotheek na grontapu”. Wan tu sabiman di e ondrosuku fa wi edetonton e wroko, e bribi taki na ini a pisi ten di wan sma de na libi, dan a e gebroiki wan pikin pisi nomo fu na edetonton fu en. A pisi di a e gebroiki no doro wán procent srefi. A fiti fu aksi a sani disi: ’Fu san ede wi abi so wan bigi edetonton di kan hori so furu sabi, te wi e gebroiki wan pikin pisi nomo fu en na ini a pisi ten di wi de na libi?’
Prakseri sosrefi fa libisma abi muiti nanga a dede di sma e dede! Furu sma e kisi bun bigi sari te a wefi, a masra, noso a pikin fu den dede. Dati kan de a moro hebi sani di wan sma e ondrofeni na ini a libi. Sma no e kaba firi sari wan langa pisi ten baka di wan lobiwan fu den dede. Srefi den sma di feni taki ala sma sa musu dede wan dei, no man bribi taki a dede fu den sa tyari wan kaba kon na ala sani. A tijdschrift British Medical Journal ben taki dati „furu sabiman e bribi taki ibri sma wani tan na libi so langa leki dati kan”.
Soleki fa wi si kaba, dan furu sma abi muiti nanga a dede di sma e dede. Wi si sosrefi taki libisma man memre èn man leri bun furu sani, èn wi si tu taki libisma e angri fu tan na libi fu ala ten. Te wi e luku ala den sani disi, dan a no de krin fu si taki libisma meki fu tan na libi? Iya, Gado no meki libisma nanga a marki taki den musu dede te fu kaba, ma a meki den nanga a fruwakti fu tan na libi fu ala ten. Luku san Gado ben abi na prakseri gi a fosi libisma paar: „Un meki pikin èn un kon furu èn un furu grontapu èn un poti en na un ondro, èn poti na un ondro den fisi fu se nanga den hemel mekisani di e frei, nanga ibri libi mekisani di e buweigi na grontapu” (Genesis 1:28). Dati na trutru wan kefalek moi libi di no sa abi wan kaba!
Kruktu denki 2: Gado e meki sma dede so taki den kan de nanga en.
Wan mama di ben abi 27 yari ben de fu dede, èn a ben o libi dri pikin na baka. Na uma disi taigi wan Lomsu non: „No kon taigi mi taki san e pasa nanga mi na Gado wani. . . . Mi no lobi en kwetikweti te wan sma e taigi mi dati.” Ma na disi furu kerki e leri sma te a abi fu du nanga dede. Den e leri sma taki Gado e meki sma dede so taki den kan de krosibei na en.
A tru taki a Mekiman de so wan ogri-ati Gado, taki a ben o meki dede miti wi, aladi a sabi taki a sani disi e gi wi so furu sari? Nôno, a Gado fu Bijbel no de so. Soleki fa 1 Yohanes 4:8 e sori, dan „Gado na lobi”. Luku taki a tekst no e taki dati Gado abi lobi, noso taki a de wan lobi-ati Gado, ma a e taki dati Gado na lobi. A lobi fu Gado de so tranga, so soifri, èn so tru, èn a de fu si na ini ala den fasi fu en èn na ini ala den sani di a e du. Fu dati ede wi kan taki nanga leti taki ensrefi na lobi. A Gado disi no e meki sma dede so taki den kan de krosibei na en.
Falsi bribi meki taki furu sma no sabi soifri pe den dedewan de èn san pasa nanga den. Wan tu fu den presi pe sma e bribi taki den dedewan e tan, na Hemel, hel, vagevuur (wan presi pe sma e kisi skin-ati gi wan pisi ten nomo), èn Limbo (wan presi pe sma e go fu kisi strafu te den no dopu). Sma no man frustan kwetikweti san na den presi disi, èn sonwan fu den presi disi e meki sma frede srefisrefi. Ma Bijbel e sori wi taki den dedewan no sabi noti; fu taki en leti, a de neleki den e sribi (Preikiman 9:5, 10; Yohanes 11:11-14). Sobun, neleki fa wi no e broko wi ede nanga wan sma di e sribi dipi, na so wi no abi fu broko wi ede nanga san e pasa nanga wi baka te wi dede. Yesus ben taki fu wan ten te „ala sma di de na ini den memregrebi” sa „kon na doro” fu kisi nyun libi na tapu wan paradijs grontapu.—Yohanes 5:28, 29; Lukas 23:43.
Kruktu denki 3: Gado e meki pikin-nengre dede, so taki den kan tron engel na ini hemel.
Elisabeth Kübler-Ross, wan umasma di ondrosuku sma di e siki so seryusu taki den o dede te fu kaba, ben taki fu wan tra denki di furu kerkisma abi. A ben e fruteri wan sani di ben pasa trutru, èn dati meki a taki dati „a no bun fu taigi wan nyofi pikin di a brada fu en dede, taki Gado lobi pikin boi sote taki a teki en brada fu de nanga en na ini hemel”. Te wi e taki so wan sani, dan wi e gi sma wan takru denki fu Gado, bika Gado no de so èn a no e du so tu. Datra Kübler-Ross e taki go moro fara: „Di a pikin meisje disi gro kon tron wan uma, dan a tan abi na atibron di a ben firi gi Gado, èn di en eigi pikin boi dede dri tenti yari baka dati, dan a sani dati meki taki a lasi en frustan.”
Fu san ede Gado ben o teki wan pikin fu man abi ete wan engel na ini hemel, neleki Gado ben sa abi wan pikin moro fanowdu leki a papa nanga a mama fu a pikin dati? Efu Gado trutru ben teki pikin, dan a no ben o de wan Mekiman di no lobi libisma èn di e prakseri ensrefi nomo? Kontrari fu a denki dati, Bijbel e taki: „Lobi e kon fu Gado” (1 Yohanes 4:7). Wan Gado fu lobi ben o meki sma lasi wan pikin, aladi srefi libisma nanga pikinso bun-ati nomo no ben o si dati leki wan bun sani?
Ma fu san ede pikin e dede? Na Preikiman 9:11, Bijbel e meki wi kon sabi san na wan fu den sani di e meki taki dati e pasa: „Ten nanga sani di e pasa èn di sma no sabi na fesi, e miti den alamala.” Sosrefi Psalm 51:5 e taigi wi taki wi alamala de nanga sondu, fu sensi a ten di wi meki, èn leki bakapisi fu dati, difrenti sani de di e meki taki libisma e dede. Son ten pikin e dede te den de na ini den mama bere, èn leki bakapisi fu dati wan mama e kisi wan dede pikin. Tra pikin e dede fu di wan rampu miti den, noso fu di wan ongoloku e pasa nanga den. A no Gado e meki den sani disi pasa nanga den.
Kruktu denki 4: Son sma e kisi skin-ati baka te den dede.
Furu kerki e leri sma taki takru sma sa go na wan faya hel pe den sa kisi skin-ati fu têgo. A leri disi tru? Bijbel e leri wi dati? Furu sma e libi 70 noso 80 yari nomo. Srefi te wan sma ben du bun furu ogri en heri libi langa, dan a ben o de wan leti sani te Gado ben o meki a sma dati kisi skin-ati fu têgo? Nôno. A no ben o de wan leti sani kwetikweti fu strafu wan man fu têgo gi den sondu di a du na ini a syatu pisi ten di a ben de na libi.
Gado wawan kan meki wi kon sabi san e pasa nanga libisma baka te den dede, èn a du dati na ini a Wortu fu en di skrifi, namku Bijbel. Disi na san Bijbel e taki: „Soleki fa [meti e dede], na so [libisma] e dede; èn den alamala abi wán yeye nomo . . . Den alamala e go na wán presi. Den alamala e kon fu doti, èn den alamala e drai go baka na doti” (Preikiman 3:19, 20). Den tekst disi no e taki fu wan faya hel. Libisma e tron doti baka, èn dati wani taki dati den no sa de moro te den dede.
Wan sma musu sabi san e pasa nanga en, fu man firi skin-ati. Den dedewan sabi san e pasa nanga den? Bijbel e gi wi wan piki baka: „Den libiwan sabi ete, taki den sa dede; ma fu a sei fu den dedewan, den no sabi notinoti, èn den no abi wan paiman moro, bika sma frigiti srefi fu memre den” (Preikiman 9:5). Den dedewan no man firi nowan skin-ati, fu di den „no sabi notinoti”.
Kruktu denki 5: Te wi dede dan dati wani taki dati wi noiti no sa de moro.
A tru taki wi no sa de moro te wi dede, ma a no abi fu de so taki wi noiti sa de moro. A getrow man Yob ben sabi taki a ben o go na grebi, Syeol, te a ben o dede. Ma luku san a ben begi Gado: „O, taki yu ben sa kibri mi na ini Syeol, taki yu ben sa kibri mi, teleki na atibron fu yu gowe, taki yu ben o poti wan ten gi mi èn ben sa memre mi! Efu wan man di gosontu èn di tranga na skin fasi dede, a kan libi baka? . . . Yu sa kari, èn misrefi sa piki yu.”—Yob 14:13-15.
Yob ben e bribi taki efu a ben tan getrow te na dede, dan Gado ben o memre en, èn a ben o gi en wan opobaka te fu kaba. Ala den fositen futuboi fu Gado ben e bribi a sani disi. Yesus srefi ben sori taki a howpu disi tru, èn a ben taki dati Gado ben o gebroiki en fu gi den dedewan wan opobaka. Den wortu di Krestes srefi ben taki e gi wi a dyaranti disi: „A yuru e kon pe ala sma di de na ini den memregrebi, sa yere [Yesus] en sten èn sa kon na doro, den wan di ben du bun sani, fu kisi wan opobaka fu libi, den wan di ben du tegu sani, fu kisi wan opobaka fu krutu.”—Yohanes 5:28, 29.
Dyonsro Gado sa puru ala ogridu èn a sa seti wan nyun grontapu di sa abi wan hemel tirimakti (Psalm 37:10, 11; Danièl 2:44; Openbaring 16:14, 16). A bakapisi fu dati sa de taki a heri grontapu sa tron wan paradijs, èn sma di e dini Gado sa libi na tapu. Wi e leisi na ini Bijbel: „Mi ben yere wan tranga sten di komoto na a kownusturu, e taki: ’Luku! A tenti fu Gado de na libisma, èn a sa tan nanga den, èn den sa de en pipel. Èn Gado srefi sa de nanga den. Èn a sa figi puru ala watra na den ai, èn dede no sa de moro, nowan sari, nowan babari, nowan pen no sa de moro. Den fositen sani pasa kaba.’”—Openbaring 21:3, 4.
Wi no sa frede moro
Te yu kisi sabi fu na opobaka howpu èn fu a Sma di sa sorgu gi a seti dati, dan yu kan kisi trowstu fu dati. Yesus ben pramisi: „Unu sa sabi a waarheid, èn a waarheid sa meki unu kon fri” (Yohanes 8:32). Wi sa kon fri sosrefi fu a frede di wi abi gi dede. Yehovah na a wan-enkri sma di trutru kan sorgu taki wi no e kon owru moro èn taki wi no e dede moro, èn en wawan kan meki wi libi fu têgo. Yu kan bribi den pramisi fu Gado? Iya, yu kan du dati bika Gado Wortu ala ten e kon tru (Yesaya 55:11). Wi e gi yu deki-ati fu kon sabi moro fu den prakseri di Gado abi gi a libisma famiri. Yehovah Kotoigi sa feni en wan prisiri fu yepi yu.
[Prenspari pisi na tapu bladzijde 6]
Te wan sma frede gi dede, dan dati kan tapu en fu abi prisiri na ini a libi
[Boksu na tapu bladzijde 7]
WAN TU KRUKTU DENKI DI SAN DEN BUKU FU BIJBEL
FURU SMA ABI FU DEDE E TAKI?
● Ala sma sa musu dede wan dei Genesis 1:28; 2:17;
● Gado e meki sma dede so taki Yob 34:15; Psalm 37:11, 29;
den kan de nanga en 115:16
● Gado e meki pikin-nengre dede, so Psalm 51:5; 104:1, 4;
taki den kan tron engel na ini hemel Hebrewsma 1:7, 14
● Son sma e kisi skin-ati baka te Psalm 146:4;
den dede Preikiman 9:5, 10; Romesma 6:23
● Te wi e dede dan dati wani taki Yob 14:14, 15;
dati wi noiti no sa de moro Yohanes 3:16; 17:3;
[Prenki na tapu bladzijde 8]
Te wi sabi soifri san e pasa nanga den dedewan, dan dati e meki taki wi no e frede moro
[Sma di abi a reti fu a prenki na tapu bladzijde 5]
Barrators—Giampolo/The Doré Illustrations For Dante’s Divine Comedy/Dover Publications Inc.