Wi musu lobi a regtfardikifasi fu Yehovah

„A sma di e suku regtfardikifasi nanga lobi bun-ati sa feni libi, regtfardikifasi nanga glori.”​—ODO 21:21.

1. Sortu fasi nanga denki fu sma tyari takru bakapisi kon?

„WAN pasi de di de reti ini na ai fu wan man, ma den pasi fu dede na a kaba fu en te fu kaba” (Odo 16:25). A Bijbel odo disi e fruteri soifri fa bun furu sma e tyari densrefi na ini a ten disi! Furu sma wani du soso san densrefi feni bun èn den no e poti prakseri srefi na den moro prenspari sani di tra sma abi fanowdu (Odo 21:2). Den sma disi e taki dati den e lespeki den wet fu a kondre, aladi den e suku fu feni okasi pe den no abi fu hori densrefi na den wet disi. Leki bakapisi fu dati, a libimakandra kon prati èn a kon bruya.—2 Timoteyus 3:1-5.

2. San de tranga fanowdu fu a bun fu libisma?

² Wi abi wan regtfardiki wet noso wan markitiki tranga fanowdu di sa de fu wi eigi bun èn di sa tyari vrede nanga seikerfasi kon gi ala libisma. A musu de wan wet noso wan markitiki di ala sma sa wani teki èn sa wani hori. A de krin fu si taki nowan wet noso markitiki di wan libisma meki, kan tapu a nowtu dati, awinsi o koni noso opregti a sma dati de (Yeremia 10:23; Romesma 3:10, 23). Efu so wan markitiki de, dan pe wi ben kan feni en, èn san ben o de a markitiki dati? Kande a ben o moro bun fu aksi: Yu ben o breiti nanga so wan markitiki, èn yu ben o de klariklari fu hori yusrefi na en?

Fa fu feni a regtfardiki markitiki

3. Suma na a moro bun sma di kan gi wan markitiki di bun gi ala sma, èn fu san ede dati de so?

³ Fu man feni wan markitiki di bun gi ala sma, dan wi sa abi fu go na wan sma di no e krutu trawan fu di den de fu wan tra ras, wan tra kulturu, noso wan tra kondre. Boiti dati, a sma disi no musu de leki libisma di abi swakifasi èn di no man si sani na fesi. A no de fu taki dati a wan-enkri sma di de so na a almakti Mekiman, Yehovah Gado, di e taki: „Soleki fa den hemel hei moro grontapu, na so den pasi fu mi hei moro den pasi fu unu, èn den denki fu mi hei moro den  denki fu unu” (Yesaya 55:9). Boiti dati, Bijbel e taki dati Yehovah na „wan Gado fu getrowfasi, èn na en nowan kruktudu de; regtfardiki èn opregti a de” (Deuteronomium 32:4). Na ini a heri Bijbel wi kan feni den wortu „Yehovah regtfardiki” (Exodus 9:27; 2 Kroniki 12:6; Psalm 11:7; 129:4; Kragisingi 1:18; Openbaring 19:2). Iya, wi kan frutrow na tapu taki Yehovah kan gi wi a moro bun markitiki di de, fu di a de getrow, fu di a de opregti, èn fu di a regtfardiki.

4. San a wani taki te wan sma abi regtfardikifasi?

⁴ Furu sma no lobi en kwetikweti te wan sma e denki taki a regtfardiki moro trawan. Ma te Bijbel e taki dati wan sma abi regtfardikifasi, dan dati wani taki dati a sma ’bun, opregti; a de sondro fowtu, sondro sondu; a e libi akruderi den wet fu Gado, noso akruderi yoisti markitiki; èn a e handri na wan reti fasi’. Yu no ben o breiti nanga so wan wet noso wan markitiki di e meki sma tyari densrefi na so wan bun fasi?

5. San na regtfardikifasi, soleki fa Bijbel e sori dati?

⁵ Wan buku (Encyclopaedia Judaica) e taki fu regtfardikifasi: „Regtfardikifasi a no wan sani di sma abi nomo, ma a wani taki dati wan sma e handri na wan reti fasi ala ten.” Fu eksempre, a regtfardikifasi fu Gado a no wan fasi di a abi nomo, soleki a santafasi nanga a krinfasi fu en. Tra fasi leki dati, a e gebroiki a regtfardikifasi fu en fu sori sma fa a de, fu di a e du sani na wan reti fasi ala ten. Fu di Yehovah de santa, meki a fiti fu taki dati ala sani di a e du èn ala sani di e komoto na en, de regtfardiki. Soleki fa Bijbel e taki, dan „Yehovah de regtfardiki na ini ala den pasi fu en èn a de loyaal na ini ala den wroko fu en”.—Psalm 145:17.

6. San Paulus ben taki fu wan tu fu den Dyu di no ben abi bribi, èn fu san ede a ben taki dati?

⁶ Na apostel Paulus ben poti krakti tapu a tori disi na ini a brifi di a ben skrifi gi den Kresten na ini Rome. Disi na san a ben taki fu wan tu fu den Dyu di no ben abi bribi: „Fu di den no ben sabi a regtfardikifasi fu Gado, ma ben e pruberi fu seti den eigi regtfardikifasi, meki den no ben saka densrefi na ondro a regtfardikifasi fu Gado” (Romesma 10:3). Fu san ede Paulus ben taki dati den sma disi „no ben sabi a regtfardikifasi fu Gado”? Den no ben kisi leri fu a Wet, noso fu den regtfardiki markitiki fu Gado? Iya, den ben kisi leri fu dati. Ma furu fu den Dyu ben si regtfardikifasi soso leki wan bun fasi di wan sma ben kan kisi te a ben e hori ensrefi soifri na ala den wet fu a bribi fu en. Den no ben si regtfardikifasi leki wan markitiki di ben musu sori den fa fu handri nanga trawan. Neleki den kerki fesiman na ini a ten fu Yesus, den sma disi no ben e frustan kwetikweti san retidu nanga regtfardikifasi ben wani taki.—Mateyus 23:23-28.

7. Fa a regtfardikifasi fu Yehovah de fu si?

⁷ Heri tra fasi leki den Dyu dati, a regtfardikifasi fu Yehovah de fu si na ini ala san a e du. Aladi a regtfardikifasi fu Gado e meki taki a no e tapu en ai gi den sondu fu sma di e pasa den wet fu en fu espresi, toku dati no wani taki dati a de wan Gado di no e broko en ede nanga sma. A no de so tu taki a e aksi tumusi furu fu wi, taki wi musu frede gi en, noso taki wi musu abi noti fu du nanga en. Tra fasi leki dati, den regtfardiki sani di a du, meki taki libisma kan kweki wan banti nanga en èn den kan kisi frulusu sosrefi fu den takru bakapisi fu sondu. Fu dati ede a fiti srefisrefi taki Bijbel e kari Yehovah „wan regtfardiki Gado nanga wan Frulusuman”.—Yesaya 45:21.

Regtfardikifasi nanga frulusu

8, 9. Na sortu fasi a Wet ben tyari a regtfardikifasi fu Gado kon na krin?

⁸ Fu man frustan san Gado en regtfardikifasi abi fu du nanga a lobi-ati sani di a du fu frulusu sma, dan wi musu luku a Wet di a ben gi a nâsi Israel nanga yepi fu Moses. A no de fu tweifri taki a Wet ben de regtfardiki. Di Moses ben e taki nanga den Israelsma fu a lasti leisi, dan a memre den: „Sortu bigi nâsi de di abi regtfardiki wet nanga krutu bosroiti leki a heri wet disi di mi e poti na un fesi tide?” (Deuteronomium 4:8) Hondrohondro yari baka dati, Kownu David fu Israel fruklari: „Den krutu bosroiti fu Yehovah de tru; den alamala makandra sori fu de regtfardiki.”—Psalm 19:9.

⁹ Nanga yepi fu a Wet, Yehovah ben tyari kon na krin san a ben feni bun èn san a no ben feni bun. A Wet ben sori finifini fa den Israelsma ben  musu tyari densrefi na ini afersi di ben abi fu du nanga a bribi fu den. Boiti dati, a ben sori tu fa den ben musu tyari densrefi na ini bisnis afersi, na ini a trowlibi fu den, san den ben musu nyan èn fa den ben musu sori krinfasi na ini den aladei libi. Wan tra prenspari sani di a Wet ben sori finifini sosrefi, na fa den ben musu teki krutu bosroiti. A Wet ben e sori sosrefi sortu hebi strafu wan sma ben musu kisi te a ben broko wan wet, èn son leisi wan sma ben kan kisi dedestrafu srefi. * Ma a tru taki den regtfardiki markitiki fu Gado, soleki fa den ben skrifi na ini a Wet, ben de wan hebi gi a pipel? Den markitiki dati ben e tapu den fu du san den ben wani, soleki fa furu sma na ini a ten disi e taki?

10. Fa den sma di ben lobi Yehovah ben denki fu den wet fu en?

¹⁰ Den sma di ben lobi Yehovah, trutru ben lobi den regtfardiki wet nanga komando fu en. Teki fu eksempre, Kownu David. Soleki fa wi si, dan David no ben agri nomo taki den krutu bosroiti fu Yehovah ben bun èn taki den ben regtfardiki, ma a ben lobi den trutru èn a ben warderi den sosrefi. A ben taki fu den wet nanga den krutu bosroiti fu Yehovah: „A wet fu Yehovah de volmaakti, a e tyari a sili kon baka. A frumane fu Yehovah de getrow, a e meki a sma di no abi ondrofeni kon koni. Sma musu angri fu dati moro leki gowtu, iya, moro leki furu gowtu di meki kon krin, èn a switi moro leki oni èn na oni di e lon fu den oni-oso. Sosrefi yu eigi futuboi kisi warskow fu den; furu pai de gi den sma di e hori den.”—Psalm 19:7, 10, 11.

11. Fa a Wet ben de wan ’leriman di e tyari sma go na Krestes’?

¹¹ Hondrohondro yari baka dati, Paulus ben poti prakseri na wan tra sani di e sori fu san ede a Wet ben de so prenspari. Paulus ben skrifi na ini a brifi gi den Galasiasma: „Fu dati ede a Wet tron wi leriman di e tyari wi go na Krestes, so taki a ben sa kan fruklari wi regtfardiki fu a bribi fu wi ede” (Galasiasma 3:24). Na ini a ten fu Paulus, a sma di ben e gi trawan leri ben de wan futuboi noso wan srafu na ini wan bigi osofamiri. A sma dati ben musu kibri den pikin gi ogri èn a ben musu tyari den go na skoro. Na so a Wet ben e kibri den Israelsma tu gi den takru sani di den sma fu den birtikondre ben e du na ini den aladei libi èn na ini na anbegi fu den (Deuteronomium 18:9-13; Galasiasma 3:23). Boiti dati, a Wet ben meki den Israelsma frustan taki den ben abi sondu èn taki den ben musu suku fu kisi pardon nanga frulusu fu den sondu fu den (Galasiasma 3:19). Den srakti-ofrandi di den ben musu tyari ben sori den taki den ben abi wan frulusu-ofrandi fanowdu, èn nanga yepi fu den ofrandi dati den ben o kon sabi suma ben de a tru Mesias (Hebrewsma 10:1, 11, 12). Sobun, di Yehovah ben sori a regtfardikifasi fu en nanga yepi fu a Wet, dan a du dati fu di a ben abi a bun fu a pipel na prakseri èn fu di a ben wani gi den têgo frulusu.

Den sma di Gado e si leki regtfardiki sma

12. Sortu winimarki den Israelsma ben kan kisi efu den ben hori densrefi soifri na a Wet?

¹² Fu di a Wet fu Yehovah ben de wan trutru regtfardiki wet, meki den Israelsma ben kan tron regtfardiki sma ini Gado ai, efu den ben gi yesi na a Wet dati. Leti bifo den Israelsma ben de  fu go na ini a Pramisi Kondre, dan Moses memre den: „A sa wani taki dati wi abi regtfardikifasi, te wi e sorgu taki wi e hori ala den komando disi na fesi Yehovah wi Gado, soleki fa a komanderi wi” (Deuteronomium 6:25). Boiti dati, Yehovah ben pramisi: „Unu musu hori den wet fu mi nanga den krutu bosroiti fu mi, bika efu wan sma e hori den, dan a sa libi nanga yepi fu den. Mi na Yehovah.”—Lefitikus 18:5; Romesma 10:5.

13. A de so taki Yehovah no ben de regtfardiki di a aksi a pipel fu en fu hori a Wet di ben bun dorodoro? Tyari disi kon na krin.

¹³ A de wan sari sani taki a nâsi Israel no ben „hori ala den komando disi na fesi Yehovah”, èn fu dati ede den no kisi den blesi di Gado ben pramisi den. Den no ben man hori ala den komando fu Gado, bika a Wet fu Gado ben bun dorodoro, ma den sma srefi ben abi sondu. A sani disi wani taki dati Gado no ben de regtfardiki? Kwetikweti. Paulus ben skrifi: „San wi sa taki dan? Kruktudu de na Gado? Dati no musu pasa noiti!” (Romesma 9:14) A tru tori de, taki srefi bifo den Israelsma ben kisi a Wet èn sosrefi baka di den ben kisi en, dan Gado ben si spesrutu sma leki regtfardiki sma, aladi den ben abi fowtu èn aladi den ben de nanga sondu. Wan tu fu den sma disi di ben abi frede gi Gado ben de Noa, Abraham, Yob, Rakab, nanga Danièl (Genesis 7:1; 15:6; Yob 1:1; Esekièl 14:14; Yakobus 2:25). Ma a sani di wi kan aksi wisrefi now, na: Fu san ede den sma disi ben de regtfardiki ini Gado ai?

14. Te Bijbel e taki dati wan libisma „regtfardiki”, dan san dati wani taki?

¹⁴ Te Bijbel e taki dati wan sma de „regtfardiki”, dan dati no wani taki dati a sma de sondro sondu. Nôno. Wan regtfardiki sma na wan sma di e du den plekti di a abi na Gado èn na tra libisma. Fu eksempre, Bijbel e kari Noa wan „regtfardiki man” èn sosrefi wan man di ben de „sondro fowtu na mindri den sma fu en ten” fu di a „ben du ala san Gado ben komanderi en. A ben du leti so” (Genesis 6:9, 22; Maleaki 3:18). Sakaria nanga Elisabet, a papa nanga mama fu Yohanes a Dopuman, „ben de regtfardiki na fesi Gado fu di den ben e tyari densrefi sondro fowtu akruderi ala den komando nanga wet fu Yehovah” (Lukas 1:6). Èn Bijbel e taki fu Kornelius, wan legre ofsiri fu Italiakondre di no ben de wan Dyu, taki a ben de „wan regtfardiki man èn a ben e frede Gado”.—Tori fu den Apostel 10:22.

15. Nanga san regtfardikifasi abi furu fu du?

¹⁵ Moro fara, a regtfardikifasi fu libisma abi furu fu du nanga san de ini wan sma ati. A no musu de so nomo taki wan sma e du san Gado e aksi fu en, ma a sma dati musu bribi sosrefi na ini Yehovah, a musu abi warderi gi en, èn a musu lobi en sosrefi. A sma musu abi den srefi firi disi gi den sani di Yehovah pramisi. Den Buku fu Bijbel e taki dati Abraham „ben bribi na  ini Yehovah; èn fu dati ede A ben si en leki wan regtfardiki sma” (Genesis 15:6). Boiti taki Abraham ben bribi taki Gado de, a ben bribi sosrefi na ini a pramisi fu en di abi fu du nanga a „siri” (Genesis 3:15; 12:2; 15:5; 22:18). A bribi disi di Abraham nanga tra getrow sma ben abi, èn sosrefi den sani di den ben du leki bakapisi fu dati, ben meki taki Yehovah ben kan abi wan banti nanga den sma disi, èn a ben kan blesi den sosrefi. Yehovah ben du dati aladi den sma disi ben abi fowtu.—Psalm 36:10; Romesma 4:20-22.

16. San a bribi di sma e sori na ini a lusu-paiman abi leki bakapisi?

¹⁶ Te fu kaba, fu man de regtfardiki ini Gado ai, dan sma musu sori bribi na ini a frulusu-ofrandi fu Yesus Krestes. Na apostel Paulus ben taki fu den Kresten na ini a fosi yarihondro: „Na wan presenti di Gado gi den fu soso, taki a sori den bun-ati èn taki a fruklari den regtfardiki nanga yepi fu a lusu-paiman di Yesus Krestes ben pai fu meki den kon fri” (Romesma 3:24). Na ini a tekst dati Paulus ben e taki nanga den sma di ben o tron kownu makandra nanga Krestes na ini a hemel Kownukondre. Ma a frulusu-ofrandi fu Yesus ben opo a pasi sosrefi gi milyunmilyun tra sma fu man kisi wan bun nen na Gado leki regtfardiki sma. Na apostel Yohanes ben si wan fisyun pe „wan bigi ipi, di nowan sma ben man teri . . . e tanapu na fesi a kownusturu èn na fesi a Pikin Skapu, èn den ben weri langa weti krosi”. Den weti krosi wani taki dati den de krin èn taki den de regtfardiki ini Gado ai, fu di „den wasi den langa krosi fu den èn meki den kon weti na ini a brudu fu a Pikin Skapu”.—Openbaring 7:9, 14.

Wi musu lobi a regtfardikifasi fu Yehovah

17. Sortu sani wi musu du fu man tron regtfardiki sma?

¹⁷ Aladi Yehovah gi en Manpikin, Yesus Krestes, na wan lobi-ati fasi fu man yepi sma fu kisi wan bun nen na en leki regtfardiki sma, toku dati kwetikweti no e pasa fu ensrefi. Wan sma musu sori bribi na ini a lusu-paiman, a musu meki a libi fu en kruderi nanga a wani fu Gado, a musu gi ensrefi abra na Yehovah, èn a musu teki dopu na ini watra. Baka dati, a musu tan du muiti fu de regtfardiki, èn fu tyari ensrefi na tra fasi di e fiti wan Kresten. Timoteyus, wan dopu Kresten di ben kisi a kari fu libi na hemel, ben kisi a seryusu rai fu Paulus: „Suku regtfardikifasi, suku fu gi yusrefi na ini a dini fu Gado, suku bribi, suku lobi, suku fu horidoro, èn suku fu abi safri-atifasi” (1 Timoteyus 6:11; 2 Timoteyus 2:22). Yesus ben poti krakti na tapu sosrefi taki wi musu tan du muiti. A ben taki: „Tan suku fosi a kownukondre nanga en regtfardikifasi.” Kande wi e du bun furu muiti fu kisi den blesi fu a Kownukondre fu Gado. Ma wi e du bun furu muiti tu fu du san Yehovah feni bun?—Mateyus 6:33.

18. (a) Fu san ede a no makriki fu de wan regtfardiki sma? (b) San wi kan leri fu na eksempre fu Lot?

¹⁸ A no de fu taki dati a no makriki fu de wan regtfardiki sma. Dati e kon fu di wi alamala abi fowtu èn fu di a sondu skin fu wi wani du sani di no de regtfardiki (Yesaya 64:6). Boiti dati, wi e libi na mindri sma di no e broko den ede kwetikweti nanga den regtfardiki markitiki fu Yehovah. A situwâsi fu wi gersi a di fu Lot di ben libi na ini a kefalek ogri foto Sodom. Na apostel Petrus ben tyari kon na krin fu san ede Yehovah ben wani frulusu Lot fu a pori di ben o kon. Petrus ben taki: „Den sani di a regtfardiki man dati ben si èn ben yere aladi a ben tan na den mindri dei nanga neti, ben trobi a regtfardiki sili fu en fu di den ben e du kruktu du” (2 Petrus 2:7, 8). Sobun, wi alamala musu aksi wisrefi: ’A de so taki na ini mi ati mi lobi a doti libi di furu sma na wi lontu e libi? A de so nomo taki mi no lobi fu luku den ogri-ati felem nanga sport fu a ten disi? Noso a de so taki den onregtfardiki sani dati e trobi mi neleki fa den ben trobi Lot?’

19. Sortu blesi wi kan kisi te wi lobi a regtfardikifasi fu Gado?

 ¹⁹ Te wi lobi a regtfardikifasi fu Yehovah, dan wi kan kibri wisrefi èn wi kan abi seikerfasi na ini a takru ten disi di e gi sma furu broko-ede. Kownu David ben aksi: „O Yehovah, suma sa de wan fisitiman na ini yu tenti? Suma sa tan na tapu yu santa bergi?” David srefi ben piki den aksi disi: „A sma di e waka sondro fowtu èn e du retidu” (Psalm 15:1, 2). Te wi e suku fu de regtfardiki ini Gado ai, èn te wi lobi a regtfardikifasi fu en, dan wi kan tan bun mati fu en. Boiti dati, wi sa tan kisi blesi fu en, èn a sa tan feni wi bun. Leki bakapisi fu dati, wi sa abi wan koloku libi, wi sa abi lespeki gi wisrefi, èn wi sa de sondro broko-ede. „A sma di e suku regtfardikifasi nanga lobi bun-ati sa feni libi, regtfardikifasi nanga glori”, na so Gado Wortu e taki (Odo 21:21). Boiti dati, te wi e tan du ala san wi man fu du san bun, dan wi sa abi wan bun banti nanga sma èn wi sa abi wan moro bun libi. Wi sa abi wan moro bun banti tu nanga Gado. A psalm skrifiman ben taki: „Koloku fu den sma di e hori densrefi na retidu, di e tyari densrefi na wan regtfardikifasi ala ten.”—Psalm 106:3.

[Futuwortu]

Yu kan tyari disi kon na krin?

• San na regtfardikifasi?

• San frulusu abi fu du nanga a regtfardikifasi fu Gado?

• San e meki libisma regtfardiki ini Gado ai?

• Fa wi kan kisi lobi gi a regtfardikifasi fu Yehovah?

[Aksi fu a tori disi]

[Prenki na tapu bladzijde 15]

Kownu David ben taki fa a ben lobi den wet fu Gado trutru

[Prenki na tapu bladzijde 16]

Noa, Abraham, Sakaria nanga Elisabet, èn sosrefi Kornelius ben de regtfardiki ini Gado ai. Yu sabi fu san ede?