Aksi fu leisiman

A fiti gi wan Kresten brada fu hori wan lezing na a beri fu wan sma di kiri ensrefi?

Ibri Kresten brada musu luku gi ensrefi efu a no sa kisi konsensi fonfon te a sa hori wan lezing na a beri fu wan sma di luku leki a kiri ensrefi. Te a e teki a bosroiti dati, dan a musu hori den aksi disi na prakseri: Fa Yehovah e prakseri fu a kiri di wan sma e kiri ensrefi? A sma dede fu di na ensrefi kiri ensrefi trutru? A sma kiri ensrefi kande fu di a no bun na en ede, noso a ben abi wan problema di meki a firi so brokosaka taki a no ben man denki so krin moro? Fa sma na ini a libimakandra e denki fu a kiri di wan sma e kiri ensrefi?

Leki Kresten wi wani sabi fa Yehovah e denki fu a kiri di wan sma e kiri ensrefi. Gi Yehovah a libi fu wan sma na wan tumusi warti sani èn a de wan santa sani gi en tu (Genesis 9:5; Psalm 36:9). Fu dati ede Gado no e prisiri kwetikweti nanga wan sma di kiri ensrefi fu espresi (Exodus 20:13; 1 Yohanes 3:15). Ma dati wani taki dan taki yu no sa man hori wan lezing kwetikweti na a beri fu wan sma di kiri ensrefi?

Prakseri a tori fu Kownu Saul fu Israel. Di a kon si taki a no ben o tan na libi na a lasti feti di a ben abi nanga den Filistiasma, dan fu no gi den feanti fu en na okasi fu du ogri-ati sani nanga en, meki „Saul teki en feti owru èn a trowe ensrefi na tapu”. Di den Filistiasma feni a dedeskin, dan den fasi en na a skotu fu a foto Bet-syan. Di den sma fu Yabes-Gilead kon frustan san den Filistiasma ben du, dan den puru a dedeskin èn den bron en. Baka dati den teki den bonyo fu en èn den beri den. Seibi dei langa den ben hori row, aladi den no ben e nyan srefi. Disi ben de wan gwenti fu den Israelsma (1 Samuel 31:4, 8-13; Genesis 50:10). Di David, a salfuwan fu Yehovah, ben yere san den sma fu Yabes-Gilead ben du, dan a ben taki: „Blesi fu Yehovah, bika unu sori lobi bun-ati gi a masra fu unu, gi Saul, fu di unu ben beri en. Meki a de so now taki Yehovah sori lobi bun-ati nanga getrowfasi gi unu sosrefi” (2 Samuel 2:5, 6). Den tori fu Bijbel no e sori taki den sma fu Yabes-Gilead ben kisi krutu fu di den ben du sani di wi ben kan kari kande wan beri gi Kownu Saul. Teki a pisi tori disi gersi nanga a di fu den sma di den no ben beri fu di den ben du fowtu sani (Yeremia 25:32, 33). Wan Kresten brada kan hori a tori fu Saul na prakseri te a sa bosroiti efu a kan hori wan lezing na a beri fu wan sma di kiri ensrefi.

Kande a brada wani hori na prakseri nanga sortu marki wan lezing e hori te wan sma e beri. Trafasi leki sma di e bribi taki a sili no e dede, dan Yehovah Kotoigi no e hori lezing na wan beri nanga a kruktu denki taki a dede sma go na wan tra sortu kondre. Na presi fu dati, a lezing e hori na a fosi presi fu trowstu den famiriman fu a sma di dede èn fu fruteri den tra sma di de na a beri san e pasa trutru nanga den dedewan (Preikiman 9:5, 10; 2 Korentesma 1:3-5). Wan tra prenspari sani fu san ede wi e hori lezing te wi e go beri wan sma, na fu yepi den sma di de na a beri fu kon frustan o syatu a libi fu wi de (Preikiman 7:2). Yu denki taki yu sa man doro den marki disi efu yu hori wan lezing na a beri fu wan sma di kiri ensrefi?

A tru taki son sma kan taki dati a sma kiri ensrefi fu espresi, èn taki a ben sabi heri bun taki a ben e sondu na fesi Yehovah. Ma na ala ten wi man sori krin taki a tori de trutru leki fa wi firi taki a de? A kan taki a sma du a sani na wan momenti sondro fu prakseri srefi san a e du? Son leisi son sma di suku fu kiri densrefi sari srefisrefi taki den pruberi fu du dati èn den no prakseri fu kiri densrefi moro bakaten. Ma baka te wan sma dede kaba, dan a no man taki dati a e hati en taki a du san a du.

Wan tra prenspari sani na taki furu fu den sma di kiri densrefi ben abi problema na ede sei, noso den ben brokosaka sote taki den no ben man denki so krin moro. Wi kan taki dati den sortu sma disi na sma di kiri densrefi fu di den abi den problema disi. Soleki fa wan tu ondrosuku e sori, dan 90 procent fu den wan di e kiri densrefi na sma di e siki na den ede, sma di e firi brokosaka sote taki den no man  denki so krin moro, noso sma di no man libi sondro drug. Yehovah sa gi den sortu sma disi pardon te den kiri densrefi? We, wi no man taki efu a sma disi du wan sondu gi san Yehovah no sa man gi en pardon. Kande wan Kresten brada sa wani hori na prakseri sortu problema a sma ben abi nanga a gosontu fu en, efu a ben siki na ede sei noso na skin sei. Kande dati kan yepi en te a e luku efu a kan hori wan lezing na a beri fu a sma di kiri ensrefi.

Ete wan sani de di wi wani hori na prakseri: Fa sma na ini a libimakandra e prakseri fu wan sma di kiri ensrefi èn fa den e prakseri fu a dede fu a sma disi? Disi prenspari spesrutu gi den owruman di e broko den ede nanga a fasi fa sma e denki fu gemeente fu Yehovah Kotoigi di de na ini a kontren dati. A fasi fa sma e prakseri fu wan sma di kiri ensrefi èn spesrutu a fasi fa sma e denki fu a sma di yu abi fu go beri na a momenti dati, na prenspari sani. Den sani disi kan meki taki den owruman no bari wroko gi a beri na publiki, noso a kan meki taki den no hori a beri na ini a Kownukondre zaal.

Toku a kan taki den aksi wan Kresten brada fu teki fesi na so wan beri. A kan taki a brada e bosroiti fu du dati, ma dan a no e du en leki wan sma di e teki presi gi a gemeente, ma fu di ensrefi wani. Efu a teki a bosroiti dati, dan a musu luku bun fu no taki nowan sani di e sori taki a sma sa kisi wan opobaka kande. Efu wan sma sa kisi libi na ini a ten di e kon e anga fu Yehovah. Nowan fu wi no man taki efu a dede sma sa kisi wan opobaka noso efu a no sa kisi dati. A brada di e hori a lezing kan poti krakti tapu den tru tori di Bijbel e taki fu a dede di sma e dede, èn a kan trowstu den wan di lasi a famiriman na ini dede.