Wan sani di ben warti moro leki den gudu fu Egepte

MOSES na wan fu den moro prenspari sma fu owruten. Na ini fo Bijbel buku, namku fu Exodus te go miti Deuteronomium, wi kan leisi furu fu a fasi fa sani ben e waka na mindri Gado nanga Israel na a ten di Moses ben de a fesiman fu a pipel disi. Moses ben kisi a frantwortu fu tyari den komoto na ini Egepte, a ben meki taki den ben kisi a Wetfrubontu, èn a ben tyari Israel go na a lanki fu a Pramisi Kondre. Moses ben kweki ini na osofamiri fu Farao, ma Gado ben meki a tron fesiman fu a pipel fu en. Boiti dati, a ben tron sosrefi profeiti, krutuman, nanga skrifiman di ben skrifi sani nanga yepi fu a santa yeye fu Gado. Toku a ben de sosrefi ’a moro safri-ati sma fu ala libisma’.—Numeri 12:3.

Furu fu den sani di Bijbel e fruteri fu Moses, abi fu du nanga den lasti 40 yari fu en libi, dati wani taki, fu a pisi ten di Israel ben komoto na ini katibo, teleki a pisi ten di Moses dede di a ben abi 120 yari. Fu sensi a pisi ten di a ben abi 40 yari, teleki di a ben tron 80 yari, a ben de wan skapuman na ini Midian. Ma wán buku e taki dati „a pisi fu en libi di e hari a prakseri fu moro furu sma na kande den fosi 40 yari fu en libi, ma wi sabi pikinso nomo fu a pisi ten dati. Den 40 yari dati na a pisi ten fu sensi di a gebore te go miti a ten di a lowe komoto fu Egepte”. Ma san wi kan kon sabi fu a pisi ten dati? Fa a fasi fa Moses ben kweki, ben meki taki a tron a sma di a ben de? Sortu sani kande ben abi krakti na en tapu? Sortu tyalensi ben miti en? Èn san wi kan leri fu ala den sani disi?

Katibo na ini Egepte

A buku Exodus e fruteri taki wan Farao bigin frede den Israelsma di ben e libi na ini Egepte, fu di den ben e kisi bun furu pikin, èn leki bakapisi fu dati a pipel dati ben e gro kon bigi heri esi. A Farao disi ben denki taki a ben o du sani na wan „koni fasi”, efu a ben sorgu taki a nomru fu Israelsma no ben e kon moro bigi. Fu dati ede, a meki den du srafuwroko di ben hebi seryusu, èn den ben e kisi fonfon sosrefi fu den wrokobasi fu den. Den Israelsma ben musu tyari hebi lai, den ben musu moksi santi, watra, nanga karki kon makandra fu man meki ston, èn den ben musu meki wan spesrutu nomru fu ston ibri dei.—Exodus 1:8-14; 5:6-18.

Den sani disi di ben e pasa na ini Egepte na a ten di Moses ben gebore, e kruderi soifri nanga den owruten tori di sma feni leki buweisi fu dati. Owruten papirus e taki fu a fasi fa srafu na ini a di fu tu yarihondro b.G.T. noso bifo a ten dati, ben e meki ston fu tokotoko. A sani disi de fu si tu na ini den prenki di sma meki na ini wan owruten grebi. Den wrokobasi di ben musu sorgu taki ston ben e meki, ben e tyari hondrohondro srafu kon na wan, èn den ben e poti den na ini grupu fu siksi te go miti tina-ati sma.  Ibriwan fu den grupu disi ben abi wan fesiman. Den srafu ben musu diki kleidoti fu meki ston èn den ben musu tyari drei grasi go na a presi pe den ston ben e meki. Den srafu di ben de fu difrenti kondre ben musu tyari watra kon, èn den ben e gebroiki tyapu fu moksi a watra disi nanga klei èn nanga drei grasi. Den ben e meki rei baka rei fu langa fokanti ston. Te a son ben drei den ston, dan den wrokoman ben e tyari den go na a presi pe den ben e bow. Den ben e tyari den ston na ini baskita di ben anga na tyatyari di den poti na tapu den skowru èn son leisi den ben musu kren go fu doro a presi pe a bow-wroko ben e du. Den fesiman di ben de Egeptesma, ben e sidon noso den ben e waka e luku fa a wroko ben e go, èn den ben abi wan baleta fu fon den srafu.

Wan owruten dokumenti e taki dati 602 wrokoman ben meki 39.118 ston, èn dati wani taki dati ibri wrokoman ben e meki sowan 65 ston ibri leisi te a ben de na wroko. Èn wan dokumenti fu a di fu 13 yarihondro b.G.T. e taki: „Ibri dei den mansma e meki a nomru fu ston di den musu meki.” Den tori disi e sori soifri sortu wroko den Israelsma ben musu du, soleki fa a buku Exodus e fruteri dati.

Aladi a Hebrew pipel ben e kisi kwinsi, toku a nomru fu den ben e tan gro. A ben de so, taki „o moro den ben e kwinsi den, o moro a nomru fu den ben e gro . . . , so taki den ben e kisi wan bigi frede gi den manpikin fu Israel leki bakapisi fu dati” (Exodus 1:10, 12). Fu dati ede, den Hebrew uma di ben abi a wroko fu yepi tra uma di ben de fu kisi pikin, ben de den fosiwan di ben kisi na komando fu a Farao fu kiri ibri nyun gebore manpikin fu den Israelsma. Baka dati a heri pipel fu Egepte kisi a komando disi. Na a ten di den ogri-ati sani disi ben e pasa, dan Jokebed nanga Amram kisi wan moi beibi boi, èn dati ben de Moses.—Exodus 1:15-22; 6:20; Tori fu den Apostel 7:20.

Den kibri en, den feni en, èn wan sma teki en leki en eigi pikin

Moses en papa nanga mama no ben wani taki sma kiri a manpikin fu den soleki fa a Farao ben komanderi dati, èn fu dati ede den kibri a pikin boi fu den. A tru taki den ben du dati aladi spion nanga tra sma ben kon luku na ini den oso fu si efu pikin-nengre ben de drape? Wi no sabi soifri efu dati ben de so. Awansi fa a no fa, dri mun baka dati, Moses en papa nanga mama no ben man kibri en moro langa. Fu di Moses en mama no ben sabi moro san fu du, meki a frekti wan baskita, a tapu den olo fu en nanga tara so taki watra no ben man kon na ini, èn a poti en manpikin na ini. Te yu e luku en bun, dan na wan fasi Jokebed ben gi yesi na a komando di a Farao ben gi fu fringi ibri nyun gebore Hebrew manpikin na ini a Nijl-liba. A wan-enkri difrenti ben de taki Jokebed no ben du dati nanga a marki fu kiri a pikin. Miryam, a bigi sisa fu Moses, ben tan luku krosibei fu si san ben e pasa nanga en brada.—Exodus 1:22–2:4.

Wi no sabi efu Jokebed ben wani taki na umapikin fu Farao ben musu feni Moses te a ben kon fu wasi na ini a liba, ma na dati pasa. A prinses ben si taki a pikin disi ben de wan Hebrew pikin. San a ben o du? A ben o meki sma kiri en fu di a ben wani gi yesi na a komando fu en papa? Nôno, a du a srefi sani di furu tra uma ben o du. A sori sari-ati gi a pikin.

A no ben teki langa baka dati bifo Miryam ben de na a prinses en sei. ’Mi sa go kari wan Hebrew uma fu  gi a pikin bobi gi yu?’ na so a ben aksi. Ma a sani di pasa now, e kenki a tori krinkrin, bika Moses en sisa ben handri tra fasi leki fa a Farao ben wani. A Farao nanga den raiman fu en ben meki mofo fu handri na wan „koni fasi” nanga den Hebrewsma. A no de fu taki, dati a prinses ben musu agri fosi nanga san Miryam ben wani du. Dan fosi sani trutru ben o waka bun nanga Moses. Farao en umapikin ben piki: „Go!”, èn Miryam wantewante go teki en mama. Na a tumusi aparti fasi disi, Jokebed kisi a wroko fu kweki en eigi pikin, èn nowan sma ben kan du a pikin ogri fu di a prinses ben e horibaka gi en.—Exodus 2:5-9.

Fu di a prinses ben sori sari-ati gi Moses, meki a trutru ben handri heri tra fasi leki en papa di ben abi ogri-atifasi. A ben sabi soifri sortu pikin dati ben de. Fu di a ben de wan lobi-ati sma, meki a ben abi sari-ati gi a pikin nanga en heri ati, èn a teki en leki en eigi pikin. Te wi e luku taki a ben gi wan Hebrew uma primisi fu sorgu a pikin, dan a de krin taki a no ben abi a srefi denki di en papa ben abi fu den Israelsma.

A fasi fa Moses kweki èn a leri di a kisi

Jokebed „teki a pikin èn a gi en bobi. Èn a pikin gro kon bigi. Baka dati [na uma] tyari en go na a umapikin fu Farao, so taki a ben kan tron en manpikin” (Exodus 2:9, 10). Bijbel no e taki o langa Moses ben libi nanga en eigi mama nanga papa. Son sma feni taki a musu ben tan nanga den teleki a no ben de na bobi moro, dati wan taki teleki a ben abi tu noso dri yari. Ma a ben kan de moro langa srefi. Exodus e taki nomo dati a „gro kon bigi” di a ben de na en papa nanga mama, èn dati wani taki dati a ben kan doro iniwan libimarki. Awansi fa a no fa, a ben musu de so taki Amram nanga Jokebed gebroiki a ten dati fu meki a manpikin fu den kon sabi moro fu a Hebrew pipel fu pe a ben komoto, èn fu leri en fu Yehovah. Ten wawan ben o sori efu a muiti di den ben du fu meki Moses kisi wan tranga bribi èn sosrefi lobi gi regtfardikifasi, ben abi bun bakapisi.

Baka di Amram nanga Jokebed tyari Moses go baka na a umapikin fu Farao, dan a kisi leri „na ini ala koni fu den Egeptesma” (Tori fu den Apostel 7:22). Dati ben sa wani taki dati a ben e kisi a leri di a ben abi fanowdu fu man de wan tiriman. Wan tu fu den someni sani di a ben leri na ini Egepte ben de wiskunde, meetkunde, fa fu seti sani fu meki bigi bow-wroko, fa fu du bow-wroko, èn sosrefi tra sortu koni nanga sabidensi. A ben kan de so, taki a kownufamiri fu a Farao ben wani tu taki a ben musu kisi leri fu a bribi fu den Egeptesma.

Kande Moses ben kisi a tumusi aparti leri disi makandra nanga tra pikin fu a kownu famiri. Wan tu fu den pikin di ben kisi wini fu so wan hei leri ben de „den pikin fu tiriman fu dorosei kondre di ben seni go drape noso di ben tyari go na Egepte nanga tranga so taki den ben kan kisi ’bun maniri’, èn baka dati den ben musu drai go baka na a kondre fu den fu tron tiriman” di ben musu de getrow na a Farao (The Reign of Thutmose IV, by Betsy M. Bryan). Den oso fu den Farao ben abi presi sosrefi pe sma ben e sorgu gi pikin èn den ben e gi den pikin disi leri sosrefi. A sori taki sma ben e sreka pikin na den presi disi fu dini a Farao na ini en paleisi. * Sma ben feni sani di skrifi na tapu ston, èn den sani disi abi fu du nanga a di fu erfu, a di fu twarfu, èn sosrefi nanga a di fu 18 te go miti a di fu 20 kownukondre fu Egepte. Den sani disi e tyari kon na krin taki furu fu Farao en eigi dinari nanga heihei tiriman ben e tan tyari a lespeki nen fu „Pikin fu Farao en pikin-nengre skoro” srefi di den ben de bigisma kaba.

A libi na ini na oso fu Farao ben o de wan tesi gi Moses. Drape a ben abi wan gudu libi, wan switi libi, èn a ben abi makti sosrefi. Ma a libi disi ben de wan tesi tu ini a fasi fa a ben tyari ensrefi. San Moses ben o du? Pe na ati fu en ben o de? A ben o sori taki a ben de wan trutru anbegiman fu Yehovah, wan brada fu den Hebrewsma di ben e kisi kwinsi, noso a ben o sori taki  a ben wani ala den sani di a heiden kondre Egepte ben kan gi en?

Wan tumusi prenspari bosroiti

Di Moses ben abi 40 yari, dan a ’gowe fu go luku den hebi di den brada fu en ben e tyari’. Na a ten dati a ben kan de wan trutru Egeptesma kaba. Den sani di a du baka dati e sori taki a no ben go drape soso fu di a ben wani si fa sani ben e waka, ma taki a ben angri fu yepi den brada fu en. Di a si taki wan Egeptesma ben e fon wan Hebrewsma, dan a go na ini a feti, èn a kiri na Egeptesma. A sani dati di Moses ben du ben sori taki en ati ben de nanga den brada fu en. A kan taki a man di ben lasi en libi ben de wan tiriman, èn taki a ben e du a wroko fu en di Moses kiri en. Den Egeptesma ben feni taki Moses no ben abi nowan enkri reide fu no de getrow na a Farao. Ma Moses ben kiri na Egeptesma fu di a ben lobi retidu. Dati ben de fu si tu a dei baka dati di a krutu wan Hebrewsma di ben e fon a kompe fu en aladi a no ben abi reide fu du dati. Moses ben wani fri den Hebrewsma fu na ogri-ati katibo di den ben de na ini, ma di Farao kon sabi taki Moses no ben de getrow na en moro, dan a suku fu kiri en. Leki bakapisi fu dati, Moses ben musu lowe go na Midian.—Exodus 2:11-15; Tori fu den Apostel 7:23-29. *

Moses ben wani frulusu a pipel fu Gado, ma a ten no ben doro ete gi Yehovah fu du dati. Ma den sani di Moses ben du ben sori taki a ben abi bribi. Hebrewsma 11:24-26 e taki: „Fu di Moses ben abi bribi, meki di a ben gro kon bigi, a ben weigri fu sma kari en a manpikin fu na umapikin fu Farao, a ben frukisi fu nyan pina nanga a pipel fu Gado na presi fu prisiri nanga wan sondu libi di de fu wan syatu pisi ten nomo.” Fu san ede? „Bika a ben si a syen fu a Krestes leki wan moro bigi gudu leki den gudu fu Egepte, bika a ben poti ala en prakseri na tapu a pai di a ben sa kisi.” Den wortu „a Krestes”, di wan taki „a salfuwan”, gebroiki na wan aparti fasi na ini a tekst disi, èn den e fiti Moses fu di Yehovah srefi ben gi en wan spesrutu wroko fu du bakaten.

Prakseri taki Moses ben kweki na a fasi fa soso heihei Egeptesma ben e kweki. A ben kan kisi wan kefalek hei posisi èn sosrefi iniwan sani di a ben sa wani èn di ben kan gi en prisiri na ini a libi, ma toku a no ben wani nowan fu den sani dati. A ben feni taki a no ben man libi na ini a paleisi fu a Farao, a man di ben e kwinsi sma, èn na a srefi ten abi lobi gi Yehovah èn gi retidu. Moses ben sabi fu den pramisi di Gado ben gi den fositen tata fu en, namku Abraham, Isak, nanga Yakob, èn a ben denki dipi fu den pramisi disi. Dati meki a ben wani du san Gado ben wani, so taki Gado ben kan feni en bun. Leki bakapisi fu dati, Yehovah gi Moses wan tumusi bigi grani, fu di A ben man gebroiki en fu du san a ben abi na prakseri.

Wi alamala musu bosroiti san na den moro prenspari sani na ini wi libi. A kan taki yu musu teki wan muilek bosroiti tu, neleki fa Moses ben musu du dati. Yu musu tapu nanga wan tu sani di yu gwenti fu du, noso nanga wan tu sani di e sori fu tyari winimarki kon gi yu, awansi o hebi dati sa de? Efu yu musu teki so wan bosroiti, dan memre taki Moses ben feni en moro prenspari fu de wan mati fu Yehovah, leki fu abi ala den gudu fu Egepte. Èn a no ben sari fu a sani dati.

[Futuwortu]

[Faki na tapu bladzijde 11]

Kontrakti gi uma di ben e gi beibi bobimerki

Mama ben gwenti fu gi den eigi pikin bobimerki. Ma soleki fa sabiman Brevard Childs ben taki na ini a tijdschrift Journal of Biblical Literature, „dan son heihei sma [fu den Mindri-Owstusei kondre] ben e yuru wan tra uma fu gi den pikin fu den bobimerki. Sma ben gwenti fu du dati tu te wan mama no ben man gi en eigi pikin bobimerki, noso te den no ben sabi suma ben de a mama fu wan pikin. Na uma di ben musu gi a pikin fu wan trawan bobimerki, ben abi a frantwortu sosrefi fu kweki a pikin gi wan spesrutu pisi ten”. Wan tu owruten kontrakti de ete di e sori taki sma fu den Mindri-Owstusei kondre ben e yuru tra uma fu gi den pikin fu den bobimerki. Den dokumenti disi e sori taki fu sensi a pisi ten fu den Sumeriasma te na a kaba fu a pisi ten fu a Hellenisme, a ben de so taki furu sma na ini Egepte ben gwenti fu yuru trawan fu gi den pikin fu den bobimerki. Den dokumenti disi abi wan tu wortu fu den sma di ben e du a wroko disi, den ben e sori sosrefi gi o langa a kontrakti ben de, fa a sma ben musu du a wroko, fa a ben musu gi a pikin bobimerki, sortu strafu a sma ben o kisi te a no ben o hori ensrefi na a kontrakti, a pai di a ben o kisi, èn na sortu fasi a ben o kisi a pai dati. A gwenti ben de taki „den uma ben e gi den pikin bobimerki tu noso dri yari langa”, na so Childs e taki. „Na uma di ben e kisi a wroko fu kweki a pikin ben e du dati na ini en eigi oso, ma son leisi a ben musu tyari a pikin go baka na a mama fu en, so taki a mama ben kan si fa sani ben e waka nanga en pikin.”

[Prenki na tapu bladzijde 9]

Soleki fa wan owruten skedrei e sori, dan den Egeptesma na ini a ten disi e meki ston pikinmoro na a srefi fasi fa den ben e meki den na ini owruten

[Sma di abi a reti fu a prenki]

Tapusei: Pictorial Archive (Near Eastern History) Est.; ondrosei: Enrich Lessing/Art Resource, NY