Wan ten fu tyari wan frutrow afersi kon na krin

Efu wi e hori son frutrow afersi gi wisrefi, dan dati kan tyari vrede kon, ma efu wi no e du dati, dan kesekese nanga strei kan kon. Ma a de so taki wan yoisti ten de fu tyari frutrow afersi kon na krin? Luku san a profeiti Amos e taki fu en Gado: „Yehovah no sa du noti, sondro fu tyari en frutrow afersi kon na krin gi den futuboi fu en, den profeiti” (Amos 3:7). Den wortu disi e leri wi wan sani fu frutrow afersi. Sontron Yehovah kande e hori frutrow afersi gi ensrefi fu wan pisi ten, èn te fu kaba a e tyari den afersi dati kon na krin gi son sma. Fa wi kan handri na a srefi fasi leki Yehovah te wi kisi fu du nanga frutrow afersi?

Sontron den skapuman di den poti na wroko ini a Kresten gemeente e feni taki a moro bun fu no tyari wan spesrutu afersi kon na krin (Tori. 20:28). Fu gi wan eksempre, kande den skapuman disi teki a bosroiti, nanga a bun fu a gemeente na prakseri, taki den no sa tyari den finifini tori fu wan tu seti kon na krin ete. Noso kande den bosroiti taki den no sa taki fu den kenki di kon ini den frantwortu di ibriwan fu den leki skapuman e tyari, teleki a yoisti ten doro fu du dati.

Efu dati de so, dan toku a de prenspari taki den sma di abi fu du nanga na afersi musu kon sabi efu na afersi dati sa tyari kon na krin, o ten dati o pasa èn na sortu fasi den sa du dati. Efu sma sabi o ten wan afersi sa tyari kon na krin dan dati sa yepi den fu hori na afersi dati gi densrefi.—Odo 25:9.