„Yu na wan tumusi bun uma”

Nanga den wortu disi den ben prèise wan yongu uma fu Moab. A ben de wan weduwe di ben nen Rut. A ben trow nanga wan manpikin fu wan uma fu Israel di ben nen Naomi. Rut ben e libi sowan 3000 yari pasa na ini Israel, na a ten di den krutuman ben e tiri. Na uma disi ben meki wan tumusi bun nen gi ensrefi (Rut 3:11). Fa a ben du kisi a bun nen disi? Suma kan leri fu na eksempre fu en?

Fu di Rut no ben de wan sma di e nyan „a brede fu lesiman”, meki a ben e wroko bun tranga. A ben e go piki den sani di sma ben libi na den gron fu den, baka di a bigi kotiwroko ben pasa kaba. A ben e du dati nanga so furu faya taki den ben prèise en fu dati. Srefi di den ben wani lekti a wroko gi en pikinso, toku a tan wroko bun tranga èn a du moro leki san a ben musu du srefi. Fu dati ede den sani di Bijbel e taki fu wan uma di koni èn di e wroko tranga, ben fiti en srefisrefi.—Odo 31:10-31; Rut 2:7, 15-17.

Rut ben abi sakafasi, a ben gi ensrefi fu a bun fu trawan sondro fu prakseri ensrefi èn a ben abi trutru lobi. Iya, a fasi fa a ben tyari ensrefi na yeye fasi ben de a moro prenspari sani di meki taki a ben abi wan bun nen na sma. A ben gowe libi en papa nanga mama nanga a kondre fu en, èn a tan nanga Naomi, aladi a no ben abi nowan dyaranti taki a ben sa man trow baka. Na a srefi ten, Rut sori taki a ben angri trutru fu dini Yehovah, a Gado fu a mama fu en masra di ben kon dede. Bijbel e sori o warti Rut ben de fu di wi e leisi na ini taki Rut ben „moro bun [gi Naomi] leki seibi manpikin”.—Rut 1:16, 17; 2:11, 12; 4:15.

Rut ben fiti fu kisi prèise fu a fasi fa a tyari ensrefi na mindri tra sma. Toku san ben moro prenspari ben de taki Gado ben e si a fasi fa a ben e tyari ensrefi leki wan warti sani, èn taki fu dati ede a ben gi en a bigi grani fu tron wan fu den afo fu Yesus Krestes (Mateyus 1:5; 1 Petrus 3:4). Fu tru wi kan taki dati Rut a nowan bun eksempre nomo gi Kresten uma, ma sosrefi gi ala sma di e taki dati den e anbegi Yehovah!