A glori fu Yehovah e skèin na tapu a pipel fu en
A glori fu Yehovah e skèin na tapu a pipel fu en
„Yehovah srefi sa tron wan leti gi yu di e tan fu ala ten.”—YESAYA 60:20.
1. Fa Yehovah e blesi a pipel fu en te den e tan getrow?
„YEHOVAH e prisiri nanga a pipel fu en. A e meki den safri-ati sma kon moi fu di a e frulusu den” (Psalm 149:4). Dati na san a psalm skrifiman fu owruten ben skrifi, èn a historia sori krin taki den wortu fu en de tru. Te a pipel fu Yehovah e tan getrow na en, dan a e sorgu gi den, a e meki taki sani e waka bun gi den, èn a e kibri den. Na ini owruten a meki den wini den feanti fu den. Na ini a ten disi, a e sorgu taki den e tan tranga na yeye fasi èn a e gi den a dyaranti taki den sa kisi frulusu nanga yepi fu na srakti-ofrandi fu Yesus (Romesma 5:9). A e du disi fu di den moi na en ai.
2. Sortu dyaranti a pipel fu Gado abi, aladi den e kisi gens?
2 A no de fu taki dati den wan di e „dini Gado fayafaya” sa kisi gens, fu di a grontapu disi de na ini bigi dungru (2 Timoteyus 3:12). Toku a de so taki Yehovah e si san den gensman e du, èn a e warskow den taki: „Ibri kondre èn ibri kownukondre di no wani dini unu sa lasi gowe; èn den pipel srefi sa kisi pori krinkrin” (Yesaya 60:12). Na ini a ten disi a pipel fu Yehovah e kisi gens na difrenti fasi. Na son kondre, gensman e suku fu tapu opregti Kresten fu anbegi Yehovah na wan fri fasi, noso den e suku fu tapu na anbegi fu den krinkrin. Na tra kondre, sma di abi wan lo fromu denki e fon anbegiman fu Yehovah, noso den e feti nanga den, èn den bron den oso èn sosrefi tra sani fu den. Ma hori na prakseri taki Yehovah bosroiti kaba fa sani sa waka gi den sma di e suku fu gens a wani fu en. Gensman no sa abi bun bakapisi. Den wan di e feti nanga Sion, dati wani taki den pikin fu Sion di e teki presi gi en dyaso na grontapu, noiti sa abi bun bakapisi. Yu no feni taki a dyaranti disi di wi bigi Gado Yehovah e gi wi, na wan sani di e gi deki-ati?
Den kisi moro blesi leki san den ben fruwakti
3. San e prenki a moifasi fu den anbegiman fu Yehovah èn sosrefi taki sani e go bun nanga den?
3 Fu taki en leti, na ini den lasti dei fu a seti fu sani disi, Yehovah blesi a pipel fu en na fasi di den no ben fruwakti. Wan prenspari sani di a du, na taki safrisafri a moi a presi pe sma e go fu anbegi en, èn a moi sosrefi den sma di e anbegi en drape èn di e tyari en nen. Soleki fa a profeititori fu Yesaya e taki, dan Yehovah e taigi Sion: „A glori fu Libanon srefi sa kon na yu, a yeneverbon, na esbon nanga a cipresbon den ala makandra, fu meki a santa presi fu mi kon moi; èn mi sa gi glori na a presi pe mi poti mi futu” (Yesaya 60:13). Bergi di lai nanga moi busi na wan kefalek moi sani fu si. Sobun, bon di e gro kefalek moi, na den yoisti sani fu prenki a moifasi fu den anbegiman fu Yehovah èn fu prenki sosrefi taki sani e go bun nanga den.—Yesaya 41:19; 55:13.
4. San na a „santa presi” nanga „a presi pe [Yehovah] e poti den futu fu [en]”, èn fa den sani disi meki kon moi?
4 Yesaya 60:13 e taki fu a „santa presi” èn fu „a presi pe [Yehovah] poti [en] futu”. Ma san den wortu disi wani taki? Den wortu disi abi fu du nanga den fesidyari fu a gran yeye tempel fu Yehovah, di e prenki a sani di a seti gi libisma, so taki den kan anbegi en nanga yepi fu Yesus Krestes (Hebrewsma 8:1-5; 9:2-10, 23). Yehovah taki dati a sa gi glori na a yeye tempel dati, fu di a sa tyari sma fu ala kondre kon na wan, fu anbegi en drape (Hagai 2:7). Wan pisi ten na fesi, Yesaya srefi ben si fa ipi-ipi sma fu ala kondre ben e hari go na Yehovah en hei bergi fu anbegi (Yesaya 2:1-4). Hondrohondro yari baka dati, na apostel Yohanes kisi wan fisyun pe a ben si „wan bigi ipi, di nowan sma ben man teri èn di komoto na ala kondre nanga lo nanga pipel nanga tongo”. Den sma disi ben e tanapu „na fesi a kownusturu fu Gado . . . èn den [ben] e du santa diniwroko gi en na ini a tempel fu en” (Openbaring 7:9, 15). Den profeititori disi di kon tru na ini a ten fu wi, meki taki wi e si nanga wi eigi ai taki na oso fu Yehovah kon moi.
5. Sortu bigi kenki di den pikin fu Sion ondrofeni tyari bigi wini kon gi den?
5 A bigi kenki disi ben tyari wini kon gi Sion trutru! Yehovah e taki: „Na presi taki yu sa de wan foto di de sondro sma trutru èn di sma no wani si na ai, èn di nowan enkri sma e pasa na ini, dan mi sa meki yu tron srefi wan sani di sma kan prodo nanga dati te ten di no skotu, wan bigi prisiri gi a wan geslakti baka a trawan” (Yesaya 60:15). Na a kaba fu a Fosi Grontapufeti, dan na „Israel fu Gado” ondrofeni bigi problema trutru (Galasiasma 6:16). A ben e firi leki a ben de „sondro sma trutru”, fu di den pikin fu en di de na grontapu no ben frustan krinkrin san Gado ben abi na prakseri gi den. Baka dati, na ini 1919, Yehovah wiki den salfu futuboi fu en, èn fu sensi a ten dati a blesi den so taki ala sani e go bun nanga den na yeye fasi. Ma boiti dati, yu no feni taki a pramisi na ini a vers disi moi srefisrefi? Yehovah sa si Sion leki wan sani di „sma kan prodo nanga dati”. Iya, den pikin fu Sion, èn Yehovah srefi, sa prodo nanga Sion. A sa gi sma „bigi prisiri”, a sa meki sma prisiri srefisrefi. Dati no sa de so fu wan syatu pisi ten nomo. Sani sa tan waka bun nanga Sion, dati wani taki den pikin fu en dyaso na grontapu èn dati sa de so, „gi a wan geslakti baka a trawan”. Dati sa tan so fu ala ten.
6. Fa tru Kresten e gebroiki den gudu fu den pipel fu grontapu?
6 Arki wan tra pramisi fu Gado now. Yehovah e taigi Sion: „Yu sa soigi a merki fu den pipel trutru, èn a bobi fu kownu yu sa soigi; èn yu sa kon sabi trutru taki mi, Yehovah, na yu Frulusuman, èn taki a Maktiwan fu Yakob na a Sma di e bai yu baka” (Yesaya 60:16). Na sortu fasi Sion e dringi „a merki fu den pipel” èn na sortu fasi a e soigi „a bobi fu kownu”? We, a de so taki den salfu Kresten nanga den kompe fu den di de fu den „tra skapu”, e gebroiki den gudu fu den pipel fu grontapu fu meki a tru anbegi go na fesi (Yohanes 10:16). Den moni di sma e gi fu horibaka gi a wroko e meki taki wan bigi preikiwroko èn sosrefi wroko fu gi sma leri kan du na heri grontapu. A koni fasi fa den e gebroiki den sani di koniman meki na ini a ten disi, e meki taki Bijbel nanga tra Bijbel publikâsi kan meki moro makriki na ini hondrohondro difrenti tongo. Na ini a ten disi, moro sma kan kon sabi a waarheid fu Bijbel moro leki iniwan tra ten na ini a historia. Sma fu bun furu difrenti kondre e leri taki Yehovah, di bai den salfu bakaman fu en komoto na ini katibo na yeye fasi, na trutru a Frulusuman.
Sani e orga na wan moro bun fasi
7. Sortu tumusi moi kenki den pikin fu Sion si?
7 Yehovah moi a pipel fu en na wan tra fasi sosrefi. A blesi den fu di a sorgu taki den orga sani moro bun. Na ini Yesaya 60:17 wi e leisi: „Na presi fu kopro, mi sa tyari gowtu kon, èn na presi fu isri, mi sa tyari solfru kon, èn na presi fu udu, kopro, èn na presi fu ston, isri, èn mi sa poti vrede leki opziener gi unu, èn regtfardikifasi leki den sma di e poti unu na wroko.” Fu poti gowtu na a presi fu kopro wan taki dati yu e gebroiki wan sani now di de moro bun, èn na so a de tu nanga ala den tra sani di kari na ini a vers disi. A sani disi na wan moi kenki trutru. Na a srefi fasi, na Israel fu Gado tan si na ini den lasti dei taki Yehovah e orga sani moro bun. Luku den eksempre di e kon now.
8-10. Fruteri fu wan tu kenki di kon na ini a fasi fa sani orga fu sensi 1919 te kon miti now.
8 Bifo 1919, den sma di ben e tiri den gemeente fu a pipel fu Gado ben de owruman nanga diaken. Ala sma fu a gemeente ben kan stem fu taki sortuwan fu den brada ben musu kisi a wroko dati. Na ini a yari dati, „a getrow èn koni srafu” bigin poti brada leki diniwroko fesiman na ini ibri gemeente, so taki den ben kan orga a preikiwroko (Mateyus 24:45-47). Ma na ini furu gemeente a seti disi no ben e wroko so bun, fu di sonwan fu den brada di a gemeente ben poti leki owruman no ben e horibaka trutru gi a preikiwroko. Fu dati ede, na ini 1932, den gemeente kisi fu yere taki memre fu a gemeente no ben musu stem moro fu taki suma ben musu tron owruman nanga diaken. Na presi fu dati den ben musu stem fu taki sortuwan fu den brada ben musu dini makandra nanga a diniwroko fesiman na ini wan dienstkomte. A sani dati ben de neleki „kopro” di ben poti na presi fu „udu”. A ben de wan bigi kenki di tyari wini kon trutru!
9 Na ini 1938, den gemeente na heri grontapu agri nanga wan seti di ben moro bun. A kenki disi ben e kruderi moro nanga san Bijbel e taki. Wan brada di den ben e kari wan „groepsdienaar” (wan brada di ben e dini leki a fesiman
opziener), makandra nanga wan tu tra sma di ben e dini a gemeente, ben e kisi a frantwortu fu teki fesi na ini a gemeente. Ala den brada disi ben o de sma di a getrow èn koni srafu ben poti na wroko. Sma no ben o abi fu stem moro fu taki suma ben musu kisi frantwortu na ini a gemeente! Na so fasi den sma di ben e kisi frantwortu na ini den gemeente, ben e kisi dati na wan fasi di ben e sori taki Gado e tiri sani. Dati ben de neleki „isri” di ben poti na presi fu „ston” noso neleki „gowtu” di ben poti na presi fu „kopro”.10 Fu sensi a ten dati, difrenti tra kenki kon di tyari wini kon gi den gemeente. Fu eksempre, na ini 1972 den brada kon si taki a ben moro bun te wan skin fu owruman di poti na wroko akruderi Bijbel gronprakseri, ben e teki fesi na ini den gemeente. Nowan fu den owruman disi ben o hei moro a trawan, èn a sani disi ben e kruderi moro srefi nanga a fasi fa sani ben seti na ini den Kresten gemeente fu a fosi yarihondro. Moro fara, a de so taki sowan tu yari pasa, dan ete wan moi kenki kon. Tra brada ben o kisi a frantwortu now fu teki fesi na ini spesrutu korporâsi fu a genootschap. Leki bakapisi fu dati a Tiri Skin ben kan poti ala den prakseri na den sani di a pipel fu Gado abi fanowdu na yeye fasi, èn den no ben abi fu poti prakseri moro na aladei afersi di ben abi fu du nanga den wet fu lanti.
11. Suma de frantwortu gi den kenki di kon na ini na organisâsi fu a pipel fu Yehovah, èn san na a bakapisi fu den kenki disi?
11 Suma de frantwortu gi den kenki disi di e kon safrisafri? A no de fu taki dati Yehovah Gado de frantwortu gi dati. En na a sma di e taki: „Mi sa tyari gowtu kon.” Èn en na a sma di e taki moro fara: „Mi sa poti vrede leki opziener gi unu, èn regtfardikifasi leki den sma di e poti unu na wroko.” Iya, Yehovah e sorgu taki a pipel fu en e kisi a yoisti tiri. Soleki fa a ben taki na fesi, dan den kenki disi di kon na ini a fasi fa sani orga, na wan tra fasi fa a moi a pipel fu en. Leki bakapisi fu dati Yehovah Kotoigi kisi blesi na furu difrenti fasi. Na ini Yesaya 60:18 wi e leisi: „Sma na ini a kondre fu yu no sa yere moro fu ogri di trawan e du nanga tranga, noso fu a fufuru di sma e fufuru nanga tranga noso fu a broko di sani e broko puru na ini a kondre fu yu. Èn fu tru yu sa kari yu eigi skotu, Frulusu, èn den portu fu yu, yu sa kari Prèise.” Disi na trutru moi wortu! Ma fa den kon tru?
12. Fa a du kon taki tru Kresten abi so furu vrede?
12 Tru Kresten e tan suku rai nanga tiri na Yehovah, èn a bakapisi fu dati de soleki fa Yesaya ben taki na fesi: „Ala den manpikin fu yu sa de sma di Yehovah gi leri, èn a vrede fu den manpikin fu yu sa de pasa marki” (Yesaya 54:13). Moro fara, a de so taki a yeye fu Yehovah e wroko tapu a pipel fu en, èn wan fu den froktu fu a yeye dati na vrede (Galasiasma 5:22, 23). A vrede di a pipel fu Yehovah abi leki bakapisi fu dati, e meki taki den de wan kibripresi pe tra sma kan kisi nyun krakti na ini wan tumusi ogri grontapu. A vrede di den abi e kon fu di den na tru Kresten di lobi makandra, èn a e meki sma tesi fa a libi sa de na ini a nyun grontapu (Yohanes 15:17; Kolosesma 3:14). A no de fu taki, dati wi alamala breiti taki wi abi a vrede disi èn taki wi man yepi fu meki a vrede disi de. A vrede disi e gi glori nanga grani na wi Gado èn a de wan tumusi prenspari sani na ini a yeye paradijs fu wi!—Yesaya 11:9.
A leti fu Yehovah sa tan skèin
13. Fu san ede wi kan abi a frutrow taki a leti fu Yehovah sa tan skèin fu ala ten na tapu a pipel fu en?
13 A de so taki Yehovah sa tan skèin en leti na tapu a pipel fu en? Iya! Na ini Yesaya 60:19, 20, wi e leisi: „Gi yu a son no sa de wan leti moro na deiten, èn fu man si sani krin, a mun srefi no sa gi yu leti moro. Yehovah srefi musu tron wan leti gi yu di e tan fu ala ten, èn yu Gado sa tron a moi fu yu. A son fu yu no sa dongo moro, sosrefi a mun fu yu no sa lasi gowe; bika Yehovah srefi sa tron wan leti gi yu di e tan fu ala ten, èn den dei di yu ben de na row kon na wan kaba.” A momenti di den wan di ben de na ini katibo na yeye fasi ben komoto na ini a „row” fu den, dan a leti fu Yehovah bigin skèin na den tapu. Moro leki 80 yari baka dati Yehovah feni den bun ete, bika a leti fu en e tan skèin. Èn a leti disi no sa tapu fu skèin. Te a abi fu du nanga den anbegiman fu en, dan a Gado fu wi no sa „dongo” leki a son èn a no sa „lasi gowe” leki a mun. Na presi fu dati, a sa skèin leti na den tapu fu ala ten. Disi na trutru wan moi dyaranti gi wi di e libi na ini den lasti dei fu a dungru grontapu disi!
14, 15. (a) Na sortu fasi ala sma fu a pipel fu Gado de „regtfardiki”? (b) Sortu prenspari kontru fu Yesaya 60:21 den tra skapu e fruwakti?
14 Arki now san Yehovah e pramisi taki a sa du moro fara gi den wan di e teki presi gi Sion dyaso na grontapu, namku na Israel fu Gado. Yesaya 60:21 e taki: „A pipel fu yu, den alamala sa de regtfardiki; te ten di no skotu a kondre sa de fu den, a sproiti fu den sani di mi prani, a wroko fu mi anu, so taki mi kan kon moi.” Di den salfu Kresten ben kisi na okasi fu bigin wroko baka na ini 1919, dan den ben de wan aparti grupu fu sma. Na ini wan grontapu di lai sondu pasa marki, Gado „ben fruklari taki den de regtfardiki” fu di den ben abi wan tumusi tranga bribi na ini a frulusu-ofrandi fu Krestes Yesus (Romesma 3:24; 5:1). Baka dati, den teki a „kondre” fu den abra. Neleki den Israelsma di ben komoto na ini katibo na Babilon, na so den ben kon de na ini wan kondre na yeye fasi, noso wan kontren pe sani ben o waka bun, èn den ben kan nyan bun fu wan yeye paradijs (Yesaya 66:8). A kondre dati sa gersi wan paradijs ala ten, fu di tra fasi leki Israel fu owruten, na Israel fu Gado leki wan pipel, no sa drai den baka gi Gado. A bribi fu den, a hori di den e horidoro, nanga a faya di den abi, noiti no sa tapu fu gi grani na a nen fu Gado.
Yeremia 31:31-34). A e fruklari taki den de regtfardiki leki en „manpikin” èn a e si den leki volmaakti sma (Romesma 8:15, 16, 29, 30). Den tra skapu di e wroko makandra nanga den ben kisi pardon fu den sondu fu den tu nanga yepi fu na srakti-ofrandi fu Yesus, èn Gado e fruklari taki den de regtfardiki fu di den na mati fu en di sori taki den e bribi na ini en, neleki fa Abraham ben du dati. „Den wasi den langa krosi fu den èn meki den kon weti na ini a brudu fu a Pikin Skapu.” Boiti dati, den tra skapu disi e fruwakti ete wan tumusi moi blesi. Te den pasa „a bigi banawtu” libilibi, noso baka te den kisi wan opobaka, dan den sa si a trutru kontru fu Yesaya 60:21, te heri grontapu sa tron wan paradijs (Openbaring 7:14; Romesma 4:1-3). Na a ten dati, „den safri-ati sma srefi sa abi grontapu, èn den sa prisiri trutru nanga a vrede di sa de pasa marki”.—Psalm 37:11, 29.
15 Ala den sma fu a yeye pipel dati kon na ini a nyun frubontu. A wet fu Yehovah skrifi na ini na ati fu den alamala, èn Yehovah gi den pardon fu den sondu fu den nanga yepi fu a frulusu-ofrandi fu Yesus (A nomru fu sma e tan gro kon moro bigi
16. Sortu tumusi moi pramisi Yehovah ben meki, èn fa a pramisi dati kon tru?
16 Na ini a lasti vers fu Yesaya 60 wi e leisi a lasti pramisi di Yehovah e meki na ini a kapitel disi. A e taigi Sion: „A pikinwan srefi sa tron wan dusun, èn a wan di no abi so furu makti sa tron wan makti pipel. Misrefi, Yehovah, sa meki a go moro esi te a ten gi dati doro” (Yesaya 60:22). Na ini a ten disi Yehovah du san a ben pramisi. Di den salfu Kresten ben kisi na okasi fu bigin baka nanga a wroko fu den na ini 1919, dan den no ben de nanga furu sma. Den ben de wan „pikinwan” trutru. A nomru fu den gro di Gado tyari moro fu den Israelsma na yeye fasi kon na inisei. Baka dati, moro nanga moro sma fu den tra skapu bigin hari go na den. A vrede di a pipel fu Gado abi, èn a yeye paradijs di de na ini a „kondre” fu den, hari na prakseri fu so furu krin-ati sma, taki „a wan di no abi so furu makti” tron „wan makti pipel” fu tru. Nownowde a „pipel” disi, dati wani taki na Israel fu Gado nanga den moro leki siksi milyun „trakondre-sma”, abi moro sma leki furu fu den kondre di de na grontapu (Yesaya 60:10). Ala den sma fu a pipel disi e meki trawan si a leti fu Yehovah, èn dati e meki taki den alamala moi na en ai.
17. Sortu krakti den sani disi di tyari kon na fesi na ini Yesaya kapitel 60 abi na yu tapu?
17 Iya, a e tranga a bribi fu wi srefisrefi te wi e luku den tumusi moi penti fu Yesaya kapitel 60. A e gi wi trowstu fu si taki so langa na fesi kaba, Yehovah ben sabi taki a pipel fu en ben o go na ini katibo na yeye fasi èn taki bakaten den ben o kon fri baka. A e fruwondru wi taki Yehovah ben kan si so fara na fesi taki a nomru fu tru anbegiman na ini a ten disi ben o gro so kefalek. Boiti dati, wi e kisi deki-ati trutru fu di wi sabi taki Yehovah no sa libi wi! A e gi wi kowru-ati trutru taki den portu fu „a foto” sa tan opo fu ala ten so taki den sma di abi „a yoisti denki fu a têgo libi” kan kon na inisei te den wani! (Tori fu den Apostel 13:48) Yehovah sa tan skèin na tapu a pipel fu en. Sion sa tan wan sani di e meki sma prodo, te den pikin fu en e tan meki a leti fu den skèin moro krin (Mateyus 5:16). A no de fu taki dati wi teki wan moro fasti bosroiti leki iniwan ten na fesi, fu tan krosibei fu na Israel fu Gado èn fu warderi a grani di wi abi fu skèin a leti fu Yehovah gi tra sma!
Yu kan tyari disi kon na krin?
• Sortu dyaranti wi abi te wi e kisi gens?
• Fa den pikin fu Sion ’soigi a merki fu den pipel fu grontapu’?
• Na sortu fasi Yehovah ’tyari kopro kon na presi fu udu’?
• Na sortu tu prenspari fasi Yesaya 60:17, 21 e poti prakseri?
• Fa a „wan di no abi so furu makti” kon tron wan „makti pipel”?
[Aksi fu a tori disi]
[Faki na tapu bladzijde 18]
A PROFEITITORI FU YESAYA—Leti gi a heri libisma famiri
Den prenspari penti di skrifi na ini na artikel disi, ben tyari kon na fesi na ini wan lezing na den „Leriman fu Gado Wortu” Distrikt Kongres fu a yari 2001. Na a kaba fu a lezing, a takiman pristeri wan nyun buku di tyari kon na doro. A buku disi nen Jesaja’s profetie—Licht voor de hele mensheid, Deel twee. Disi pasa na furu presi pe a kongres disi ben e hori. A yari na fesi den ben tyari a buku A Profeititori fu Yesaya—Leti gi a Heri Libisma Famiri, Pisi wan, kon na doro. Now di den tu buku disi tyari kon na doro, dan wi kan kon sabi pikinmoro ala den vers fu a buku Yesaya moro fini, soleki fa wi e frustan sani now. Den buku disi e yepi wi heri bun fu kon frustan sani moro krin èn fu kisi moro warderi gi a profeititori disi di e meki wi kisi wan moro tranga bribi na ini a buku Yesaya.
[Prenki na tapu bladzijde 15]
’Yehovah e moi a pipel fu en fu di a e gi den frulusu’ te den e kisi gens na wan ogri-ati fasi
[Prenki na tapu bladzijde 16]
A pipel fu Gado e gebroiki den gudu fu den pipel fu grontapu fu meki na tru anbegi go na fesi
[Prenki na tapu bladzijde 17]
Yehovah blesi a pipel fu en nanga kenki di tyari wini nanga vrede kon gi na organisâsi fu den