A leri di yu e gi trawan abi bun bakapisi?

AWINSI na papa nanga mama, awinsi na owruman, noso awinsi na preikiman fu a bun nyunsu, den alamala musu de leriman. Papa nanga mama e leri den pikin fu den, owruman e leri den sma fu a Kresten gemeente, èn preikiman fu a bun nyunsu e leri nyun sma di wani sabi moro (Deuteronomium 6:6, 7; Mateyus 28:19, 20; 1 Timoteyus 4:13, 16). San yu kan du fu meki a leri di yu e gi trawan abi moro bun bakapisi? Wan sani di yu kan du, na fu teki na eksempre fu den bun leriman di Gado Wortu e taki fu den. Esra ben de wan fu den bun leriman dati.

Meki wi teki leri fu na eksempre fu Esra

Esra ben de wan priester di ben de wan bakapikin fu Aron, èn a ben libi sowan 2500 yari pasa na ini Babilon. Na ini a yari 468 b.G.T., a ben go na Yerusalem fu yepi den Dyu di ben e libi drape, fu go na fesi na ini a soifri anbegi (Esra 7:1, 6, 12, 13). Disi ben wani taki dati a ben musu leri den sma a Wet fu Gado. San Esra ben e du fu meki a leri di a ben gi trawan abi bun bakapisi? A ben e du difrenti sortu sani. Luku den sani di a ben e du, soleki fa skrifi na Esra 7:10:

„Esra srefi ben [1] sreka na ati fu en [2] fu go suku rai na a wet fu Yehovah èn [3] fu du en èn [4] fu leri sma ordru nanga retidu na Israel.” Meki wi taki syatu fu ibriwan fu den sani disi, èn meki wi luku san wi kan leri fu den.

„Esra srefi ben sreka na ati fu en”

Soleki fa a gronman e sreka a gron nanga yepi fu wan plugu fosi a e go sai den siri, na so Esra ben e begi furu leisi fu man sreka na ati fu en fu teki a wortu fu Gado (Esra 10:1). Nanga tra wortu, a ben ’beni en ati go’ na a leri fu Yehovah.—Odo 2:2.

Bijbel e fruteri taki Kownu Yosafat sosrefi ben „sreka [en] ati fu suku a tru Gado” (2 Kroniki 19:3). Tra fasi leki dati, Bijbel e taki fu wan grupu sma fu Israel „di no ben sreka na ati fu den”, taki den ben de sma „di ben tranga-ede èn di ben meki opruru” (Psalm 78:8). Yehovah e si „a fasi fa wan sma de trutru na ini en ati” (1 Petrus 3:4). Iya, „a sa leri den safri-atiwan a pasi fu en” (Psalm 25:9). Fu dati ede, a de tumusi prenspari taki leriman na ini a ten disi e teki na eksempre fu Esra fu di den e begi fosi, so taki den man sreka na ati fu den fu teki leri!

„Fu go suku rai na a wet fu Yehovah”

Fu man de wan bun leriman, dan Esra ben suku rai na ini Gado Wortu. Prakseri taki yu musu go  na wan datra fu aksi rai. Yu no ben o poti yesi arki bun san a sa taigi yu? Yu no ben o du muiti fu kon sabi finifini san na a dresi di a e gi yu? A no de fu taki dati yu ben o du dati, bika yu wani tan gosontu. A de moro prenspari srefi, taki wi e poti bun prakseri na den sani di Yehovah e taigi wi nanga yepi fu en Wortu, Bijbel, èn nanga yepi fu „a getrow èn koni srafu”. A de fanowdu taki wi e du dati, bika a rai fu Yehovah kan yepi wi fu tan na libi! (Mateyus 4:4; 24:45-47) Soleki fa wi kan frustan, wan datra kan meki fowtu, ma „a wet fu Yehovah de volmaakti” (Psalm 19:7). Noiti wi sa abi fu aksi wan tra sma efu a rai di wi kisi fu En na bun rai.

Den Bijbel buku Kroniki (di Esra ben skrifi fosi leki wán enkri buku) e sori taki Esra trutru ben de wan sma di ben e ondrosuku sani dorodoro. Fu man skrifi den buku dati, dan a ben e ondrosuku furu buku èn sosrefi furu pisi tori di tra sma ben skrifi. * Den Dyu ben komoto fu Babilon no so langa pasa, èn den ben musu kon sabi a historia fu a nâsi fu den. Den no ben sabi nofo fu den fesa di abi fu du nanga na anbegi fu den. Den no ben abi nofo sabi tu fu a diniwroko di ben musu du na ini a tempel, èn fu a wroko di den Leifisma ben musu du. Den nen fu ala den famiri fu a nâsi ben de wan tumusi prenspari sani di den ben musu kon sabi. Esra ben poti spesrutu prakseri na den afersi dati. So langa a Mesias no ben kon, dan den Dyu ben musu tan leki wan nâsi nanga en eigi kondre, nanga wan tempel, wan priestergrupu, èn wan tiriman. Fu di Esra ben skrifi ala sani finifini, meki a nâsi ben man tan na ini wánfasi nanga makandra èn na ini a tru anbegi.

Fa a de nanga yu? Yu e studeri soleki fa Esra ben e studeri? Te yu e studeri a Bijbel fayafaya, dan dati sa yepi yu fu de wan bun leriman fu Bijbel.

„Suku rai na a wet fu Yehovah” leki osofamiri

A no de so taki wan sma musu suku rai na ini a wet fu Yehovah, soso te ensrefi e studeri. Na osofamiri studie na wan heri bun okasi tu fu du disi.

Jan nanga Julia, wan trowpaar na ini Bakrakondre, leisi buku gi den tu manpikin fu den sensi den pikin gebore. Ivo abi 15 yari now èn Edo abi 14 yari. Wan leisi ibri wiki den e hori na osofamiri studie fu den ete. Jan e fruteri: „A no de so taki wi wani studeri furu tori nanga makandra nomo. Wi wani taki den boi e frustan den sani di wi e studeri nanga makandra.” A e taki moro fara: „Den boi e ondrosuku furu sani. Te den no sabi san wan spesrutu wortu wani taki, dan den e ondrosuku dati moro fara. Den e ondrosuku sosrefi ala san den man fu den sma di kari na ini Bijbel, soleki pe den sma dati ben e tan, suma den ben de, sortu wroko den ben e du, èn wan lo tra sani. Sensi den ben sabi leisi, dan den gebroiki buku soleki Inzicht in de Schrift, sosrefi buku di e fruklari wortu, nanga buku di sma kan gebroiki fu ondrosuku spesrutu tori. Disi e meki na osofamiri studie tron wan moro prisiri sani. Den boi lobi na osofamiri studie, fu dati ede den de klariklari ala ten fu studeri.” Wan tra winimarki di kon fu dati, na taki ala tu boi sabi den difrenti tongo di den e kisi na skoro, moro bun leki den tra pikin na ini a klas fu den.

John nanga Tini, wan tra trowpaar na ini Bakrakondre, ben studeri nanga a manpikin fu den, Esli (di abi 24 yari now èn di de pionier na ini wan tra gemeente), èn nanga na umapikin fu den, Linda (di abi 20 yari now èn di trow nanga wan yongu brada di abi trutru bun fasi). Ma na presi taki den ben abi wan aksi-nanga-piki takimakandra nanga yepi fu wan spesrutu buku, dan den ben e hori na osofamiri studie na so wan fasi taki den ben e yepi den pikin nanga san den abi fanowdu, akruderi omeni yari den pikin ben abi. Fa den ben e du na osofamiri studie fu den?

John e fruteri taki a manpikin nanga na umapikin fu en ben e teki wan moi tori komoto fu „Aksi fu leisiman” (fu A Waktitoren) èn wan tori di e taki fu „De zienswijze van de bijbel” (fu Ontwaakt!). Bakaten, den pikin ben e fruteri san den ondrosuku, èn leki bakapisi fu dati wi ben abi moi takimakandra nanga na osofamiri ala ten. Na so wan fasi den yonguwan ben kisi ondrofeni fa fu ondrosuku sani, èn sosrefi fa fu taki nanga trawan fu den sani di den ben kon sabi. Yu e „suku rai na a wet fu Yehovah” nanga den pikin fu yu? Te yu e du dati, dan a no sa de so nomo taki yusrefi e kisi moro koni fu leri trawan, ma a sa yepi den pikin fu yu tu fu tron moro bun leriman.

 „Fu du en”

Esra ben du san a ben leri. Fu eksempre, di a ben de na ini Babilon ete, dan kande a ben abi wan switi libi sondro furu broko-ede. Ma di a si taki a ben kan yepi a pipel fu en na ini a tra kondre, dan a gowe libi a switi libi na ini Babilon èn a go na a foto Yerusalem di ben de farawe. Na ini a foto dati, Esra no ben abi ala den sani di a ben abi fosi, èn a libi drape ben lai problema nanga kefar. Soleki fa a sori, dan Esra no ben e tyari Bijbel tori kon na wan fu skrifi Bijbel buku nomo, ma a ben de klariklari tu fu du san a ben leri.—1 Timoteyus 3:13.

Bakaten, di Esra ben e libi na ini Yerusalem, a ben sori ete wan leisi taki a ben de wan man di ben e du san ensrefi ben leri èn san a ben e leri trawan tu. Disi ben de krin fu si, di Esra yere taki wan tu mansma fu Israel ben trow nanga uma fu dorosei kondre. Bijbel e fruteri wi taki a ’ben priti en krosi nanga en skowrudyakti èn a ben bigin hari wiwiri puru na en ede èn na en barba, èn a ben tan sidon te na mofoneti fu di a no ben man bribi a tori’. A ben ’firi syen nanga sari fu opo en fesi’ go na Yehovah.—Esra 9:1-6.

A studeri di a ben studeri a Wet fu Gado ben abi kefalek bigi krakti na en tapu! Esra ben sabi soifri san ben o de den takru bakapisi fu di a pipel ben trangayesi Gado. A grupu Dyu di ben drai kon baka na a kondre fu den ben de wan pikin grupu. Efu den ben o trow nanga sma fu dorosei kondre, dan a ben kan de so taki den ben o kon de wán nanga den heiden nâsi na den lontu te fu kaba. Efu dati ben o pasa, dan makriki a soifri anbegi ben kan lasi gowe fu grontapu!

Koloku taki Esra ben de wan sma di ben e sori frede gi Gado èn di ben de fayafaya gi a soifri anbegi, bika na eksempre fu en ben gi den Israelsma deki-ati fu du a yoisti sani. Den ben seni den wefi disi di den ben teki, baka na den kondre fu den. Na ini a pisi ten fu dri mun so, ala sani ben kon bun baka. Fu di Esra srefi ben e hori ensrefi soifri na a Wet fu Gado, meki a leri di a ben e gi ben abi bun bakapisi.

Na so a de tu na ini a ten disi. Wan Kresten papa ben taki: „Pikin-nengre no e du san yu e taki; den e du san yu e du!” Disi de so tu na ini a Kresten gemeente. Owruman di e gi wan bun eksempre, kan fruwakti taki a gemeente sa du soleki fa den e leri den.

„Fu leri sma ordru nanga retidu na Israel”

Ete wan tra sani ben meki taki a leri di Esra ben e gi trawan ben abi bun bakapisi. Esra no ben e leri trawan en eigi denki, ma a ben e leri den sma „ordru nanga retidu”. Dati wani taki den markitiki, noso den wet, fu Yehovah. Dati ben de en frantwortu leki priester (Maleaki 2:7). A ben e leri sma retidu sosrefi, èn a ben gi wan bun eksempre, fu di ensrefi ben e du san a wet e taki. Ala ten a ben e du sani na wan reti fasi sondro fu teki sma partèi; a ben hori ensrefi na yoisti markitiki. Te wan tiriman e tiri na wan reti fasi, dan dati e meki taki sani e waka bun èn sma sa kisi winimarki fu dati (Odo 29:4). Na a srefi fasi, Kresten owruman, papa nanga mama, èn sosrefi Kownukondre preikiman di sabi Gado Wortu heri bun, sa yepi fu meki tra sma kon tranga na yeye fasi te den e leri trawan den wet nanga a retidu fu Yehovah. Den e du dati na ini a gemeente, na ini den osofamiri fu den, èn sosrefi te den e leri den sma di wani sabi moro fu Bijbel.

Yu no e agri taki a leri di yu e gi tra sma sa abi moro bun bakapisi te yu e du krinkrin san a getrow man Esra ben e du? Fu dati ede, ’sreka na ati fu yu, suku rai na a wet fu Yehovah, du en, èn leri sma den ordru nanga retidu fu Yehovah’.—Esra 7:10.

[Futuwortu]

[Faki/Prenki na tapu bladzijde 22]

FU SAN EDE A LERI DI ESRA BEN GI TRA SMA BEN ABI BUN BAKAPISI?

1. A ben e sreka en ati fu teki leri

2. A ben e suku rai na ini a Wet fu Yehovah

3. A ben gi wan bun eksempre fu di a ben e du san a ben leri

4. A ben e studeri fayafaya fu man leri trawan san Bijbel e leri