Luku bun taki Satan no e bedrigi yu!

BEDRIGIFASI na wan sani di pikinmoro de leti so langa leki libisma de na grontapu. Wan fu den fosi tori di ben skrifi fu sani di ben pasa na ini owruten, ben abi fu du nanga bedrigifasi. A tori dati e fruteri fa Satan ben bedrigi Efa na ini a dyari fu Eden.—Genesis 3:13; 1 Timoteyus 2:14.

Sensi a ten dati, bedrigifasi ben lai na grontapu, ma na ini a ten disi a panya srefisrefi. Bijbel ben taki na fesi fu a ten fu wi, èn a ben gi libisma a warskow disi: „Ogrisma nanga bedrigisma sa kon moro ogri, aladi den sa kori sma èn trawan sa kori den.”—2 Timoteyus 3:13.

Sma e bedrigi trawan na ala sortu fasi. Bedrigiman e bedrigi trawan fu man kisi moni fu den. Son politiekman e bedrigi den sma di e stem na den tapu, fu di den wani tan hori a posisi fu den nomonomo, awansi san e pasa. Son sma e bedrigi densrefi tu. Na presi taki den e si san sa de den takru bakapisi fu sani di den e du, dan den e overtoigi densrefi taki noti no sa pasa nanga den te den e smoko, te den e gebroiki drugs, noso te den e du seks hurudu.

Ma sma e bedrigi densrefi tu nanga a bribi fu den. Den kerki fesiman na ini a ten fu Yesus ben e kori a pipel. Yesus ben taki fu den bedrigiman dati: „Den na breni tyariman. Efu now wan breniman e tyari wan breniman, dan den ala tu sa fadon go na ini wan olo” (Mateyus 15:14). Boiti dati, sma e bedrigi densrefi nanga a bribi di den abi. Odo 14:12 e taki: „Wan pasi de di de reti ini na ai fu wan man, ma den pasi fu dede de bakaten a kaba fu en.”

Neleki fa a ben de na ini a ten fu Yesus, na so furu sma na ini a ten disi e bedrigi densrefi nanga a bribi fu den, èn a sani dati no e fruwondru wi kwetikweti! Na apostel Paulus ben taki dati Satan „breni a frustan fu sma di no e bribi, so taki a krin leti fu a glori bun nyunsu fu Krestes, di de a prenki fu Gado, no ben sa skèin kon doro”.—2 Korentesma 4:4.

Efu wan sma bedrigi wi nanga moni, dan wi e lasi moni. Efu wan politiekman e bedrigi wi, dan a kan taki wi no sa man du ala sani moro di wi ben sa wani du. Ma efu Satan e bedrigi wi so taki wi no e teki a waarheid di abi fu du nanga Yesus Krestes, dan wi no sa kisi têgo libi! Sobun luku bun taki Satan no e bedrigi yu! Opo yu frustan nanga ati gi a wan-enkri buku di e fruteri wi soifri fa wi musu anbegi Gado. A buku dati na Bijbel. Wi ben kan lasi furu sani te wi no ben o du dati.—Yohanes 17:3