Wi e kisi furu wini te wi e waka a pasi fu Yehovah

OITI yu kren wan hei bergi? Efu a de so, dan kande yu ben prisiri srefisrefi, bika te yu e tanapu na tapu a bergi-ede dan yu e firi neleki yu de na a moro hei presi fu grontapu. Yu ben lobi a krin loktu, yu ben man si presi di de farawe, èn yu ben prisiri fu den moi sani na yu lontu! Kande den aladei sorgu nanga broko-ede di yu ben abi na oso, no ben gersi so prenspari moro.

Furu sma no abi na okasi fu go kren bergi, ma efu yu na wan getrow Kresten, a kan de so taki wan pisi ten kaba yu e waka na tapu wan bergi na yeye fasi. Sondro tweifri, yu begi neleki a psalm skrifiman fu owruten: „Meki mi kon sabi den pasi fu yu, o Yehovah; leri mi den pasi fu yu” (Psalm 25:4). Yu e memre ete fa yu ben firi di yu kren go na tapu a bergi fu na oso fu Yehovah, èn ben bigin waka na tapu hei presi? (Mika 4:2; Habakuk 3:19) A no de fu taki dati heri esi yu ben kon si taki a waka di yu e waka na tapu den pasi disi di hei moro ala tra pasi, ben e kibri yu gi ogri èn taki a ben e gi yu prisiri. Yu ben firi leki fa a psalm skrifiman ben firi: „Koloku fu a pipel di sabi a prisiri babari. O Yehovah, ini a leti fu yu fesi den e tan waka.”—Psalm 89:15.

Ma son leisi den sma di e kren bergi, musu feti fu waka den langa pasi, noso den musu kren pisi fu den bergi di hei srefisrefi. Den futu fu den e bigin hati den, èn den e kon weri. Wi srefi kan kisi fu du nanga problema na ini wi diniwroko gi Gado. A kan de so, taki no so langa pasa wi kon weri pikinso. Fa wi kan kisi krakti baka fu tan waka nanga prisiri? Wan prenspari sani na fu frustan taki a pasi fu Yehovah bun moro leki ala tra pasi.

Den tumusi bun wet fu Yehovah

A pasi fu Yehovah ’hei moro den pasi fu libisma’, èn na anbegi fu en ’poti steifi na tapu na ede fu den bergi, èn a opo hei na tapu den pikin bergi’ (Yesaya 55:9; Mika 4:1). A koni fu Yehovah na „a koni fu tapusei” (Yakobus 3:17). Den wet fu en bun moro ala tra wet di de. Fu eksempre, na a ten di den Kanansma ben e du na ogri-ati sani fu òfer pikin-nengre, dan Yehovah ben gi den Israelsma wet di ben e leri den fa fu tyari densrefi na a yoisti fasi. Den wet disi ben sori den tu taki den musu abi sari-ati gi tra sma. A ben taigi den: „Unu no musu desko den mofinawan, èn unu no musu lobi wan prenspari sma moro leki trawan. . . . A dorosei-sma . . . musu tron gi unu leki wan sma di gebore na ini un kondre; èn unu musu lobi en leki unsrefi.”—Lefitikus 19:15, 34.

Tinafeifi yari baka dati, Yesus ben gi tra eksempre fu a ’tumusi bun wet’ fu Yehovah (Yesaya 42:21). Na ini a Bergitaki, Yesus ben taigi den disipel: „Tan lobi den feanti fu unu èn tan begi gi den wan di e frufolgu unu, so taki unu kan sori taki unu na manpikin fu un Tata di de na hemel” (Mateyus 5:44, 45). „Ala sani, fu dati ede, di unu wani  fu sma du gi unu, unu musu du gi den sosrefi”, na so a ben taki moro fara. „Fu taki en leti, dan disi na san a Wet nanga den Profeiti wani taki.”—Mateyus 7:12.

Den tumusi bun wet disi abi krakti tapu den ati fu sma di e gi yesi na den, fu di den e pusu sma fu tyari densrefi neleki a Gado di den e anbegi (Efeisesma 5:1; 1 Tesalonikasma 2:13). Prakseri fu a kenki di Paulus ben kon kenki. A fosi leisi di Bijbel e taki fu Paulus, dan a „ben feni en bun taki den ben kiri” Stefanus, èn a ben „handri nanga a gemeente na wan ogri-ati fasi”. Soso wan tu yari baka dati, a ben e sori switifasi gi den Kresten na ini Tesalonika, neleki fa „wan mama di e gi pikin bobi e boboi den eigi pikin fu en”. A leri di Paulus ben kisi fu Gado, ben meki taki a kenki fu wan frufolguman kon tron wan lobi-ati Kresten (Tori fu den Apostel 8:1, 3; 1 Tesalonikasma 2:7). A ben de nanga tangi na ati trutru, taki a leri fu Krestes ben yepi en fu kenki den fasi fu en (1 Timoteyus 1:12, 13). Fa wisrefi kan abi so wan warderi di kan yepi wi fu tan waka a pasi fu Gado di hei moro ala tra pasi?

Fa fu waka a pasi nanga warderi

Den sma di e kren bergi, lobi fu luku den moi presi lontu te den e tanapu na tapu wan hei presi. Den e leri sosrefi fu teki ten fu luku den pikin sani di de na seipasi, soleki wan aparti ston, wan moi bromki, noso wan busimeti di e lon pasa. Na ini na anbegi fu wi, wi musu poti prakseri na den blesi di wi e kisi fu di wi e waka nanga Gado, awinsi den blesi disi bigi noso pikin. Te wi e prakseri den blesi disi, dan dati kan gi wi krakti baka fu tan go doro, èn na presi taki a waka di wi e waka sa meki wi kon weri, dan wi sa kisi moro nanga moro krakti. Wi sa taki den srefi wortu leki David: „Meki mi yere yu lobi bun-ati na mamanten, bika na ini yu mi poti mi frutrow. Meki mi kon sabi a pasi di mi musu waka.”—Psalm 143:8.

Mary, di waka a pasi fu Yehovah furu yari kaba, e taki: „Te mi e luku den sani di Yehovah meki, dan mi e si a frekti fasi fa den sani meki, ma a no dati wawan. Mi e si tu taki Gado na wan sma di abi lobi. Ibri sani, efu na wan meti, wan fowru, noso wan insekt, den alamala abi den eigi moi sani di e fruwondru mi srefisrefi. Na so mi e prisiri tu, te mi kon frustan den tori na ini Bijbel di e kon na krin moro nanga moro.”

Fa wi kan kisi moro warderi? Wan sani na taki wi musu sori warderi gi den sani di Yehovah e du gi wi èn no si den leki pikin sani. „Begi doronomo”, na so Paulus ben skrifi. „Gi tangi gi ala sani.”—1 Tesalonikasma 5:17, 18; Psalm 119:62.

Te wi e studeri a Bijbel, dan dati kan yepi wi fu sori warderi gi den sani di wi e kisi. Paulus ben gi den Kresten na ini Kolose a deki-ati: „Tan waka na ini wánfasi nanga [Krestes Yesus], . . . abi bribi pasa marki, aladi unu e taki wortu fu tangi” (Kolosesma 2:6, 7). Te wi e leisi a Bijbel èn te wi e denki dipi fu den sani di wi leisi, dan dati e tranga a bribi fu wi èn a e yepi wi sosrefi fu kisi wan moro tranga banti nanga a Gran Skrifiman fu Bijbel. A heri Bijbel abi prenspari pisi tori di warti srefisrefi èn den kan gi wi deki-ati fu ’taki Gado furu tangi’.

Wan tra sani di kan meki a kon moro makriki gi wi fu waka a pasi fu Yehovah, na fu dini En makandra nanga den brada nanga sisa fu wi. A psalm skrifiman ben taki fu ensrefi: „Mi de wan patna fu ala den wan di e frede yu trutru” (Psalm 119:63). Wan tu fu den sani di e gi wi furu prisiri, na te wi e kon makandra nanga den brada nanga sisa fu wi na den bigi Kresten konmakandra, noso te wi abi demakandra na tra okasi. Wi e frustan taki na Yehovah meki a warti Kresten famiri fu wi na heri grontapu kon de, fu di a leri den a pasi fu en di hei moro ala tra pasi di sma e waka.—Psalm 144:15b.

Boiti taki wi musu abi warderi, dan a de prenspari tu taki wi sabi tyari frantwortu, fu di dati e gi wi deki-ati fu tan go na fesi na tapu a pasi fu Yehovah di hei moro leki ala tra pasi.

 Fa fu waka na wan fasi di e sori taki wi sabi tyari frantwortu

Den sma di e kren bergi musu waka na wan fasi di e sori taki den sabi tyari frantwortu. Den sma disi sabi taki den musu luku bun fa den e waka, so taki den no e lasi pasi, noso taki den no e waka tumusi krosibei fu wan hei presi pe den kan fadon. Leki sma di abi wan fri wani, Yehovah gi wi na okasi fu du san wisrefi wani èn fu teki wi eigi bosroiti. Ma a fri di wi de fri fu du den sani disi, wani taki tu dati wi musu sabi tyari frantwortu aladi wi e du den plekti fu wi leki Kresten.

Fu eksempre, Yehovah e fruwakti fu den futuboi fu en taki den e du den plekti fu den na wan fasi di e sori taki den sabi tyari frantwortu. A no e taigi wi o furu wi musu du, èn o furu ten wi musu gebroiki na ini a Kresten diniwroko. A no e taigi wi tu omeni moni noso tra sani wi musu gi fu horibaka gi a diniwroko disi. Na presi fu dati, den sani di Paulus ben taigi den Korentesma, e fiti wi alamala: „Meki ibriwan sma du soleki fa a bosroiti na ini en ati.”—2 Korentesma 9:7; Hebrewsma 13:15, 16.

Wan Kresten di sabi tyari frantwortu, e prati a bun nyunsu nanga trawan. Wan tra fasi fu sori taki wi sabi tyari frantwortu, na te wi e gi moni fu horibaka gi a Kownukondre wroko na heri grontapu. Gerhardt, wan owruman, ben fruteri taki en nanga en wefi ben bigin fu gi moro furu moni leki san den ben e gi leki bijdrage fosi, baka di den ben fisiti wan kongres na ini Oost-Europa. A e taki: „Wi ben si taki den brada nanga sisa fu wi drape no abi furu sani; ma den abi so furu warderi gi den Bijbel publikâsi fu wi, taki wi bosroiti fu gi so furu bijdrage leki wi man, fu man yepi den pôti brada nanga sisa na ini tra kondre.”

San wi musu du fu man horidoro

Te wan sma e kren wan bergi, dan a abi krakti fanowdu so taki a no e kon weri esi-esi. Den sma di e kren bergi e gebroiki ibri okasi di den abi fu du sani fu meki a skin kon tranga. Furu fu den sma disi e waka syatu pasi, so taki den sa de srekasreka fu waka langa pasi. Na a srefi fasi, Paulus ben gi wi a rai fu du furu na ini a diniwroko fu wi, so taki wi kan tan tranga na yeye fasi. Paulus ben taki dati den wan di wani „waka na wan fasi di warti gi Yehovah” èn di wani „kon tranga”, musu tan ’tyari froktu ini ibri bun wroko’.—Kolosesma 1:10, 11.

Te wan sma e kren wan bergi, dan a musu sabi fu san ede a e du dati, fu di dati kan gi en deki-ati fu horidoro. Fa so? Te a sma e tan luku go na wan marki di a kan si krin, soleki wan bergi di de bun fara, dan dati kan gi en deki-ati fu horidoro. Te a sma e doro na den presi di sma poti leki marki gi den wan di e kren, dan a sma kan kon sabi o fara a musu go ete fu doro a presi pe a musu de. Te a e si o fara a doro kaba, dan dati e gi en prisiri.

Na a srefi fasi, a howpu di wi abi fu kisi têgo libi e gi wi krakti nanga deki-ati fu horidoro (Romesma 12:12). Na a srefi ten, te wi e waka a pasi fu Yehovah, dan wi sa man horidoro te wi e poti marki di wi wani doro na ini a Kresten anbegi, èn te wi e du muiti fu doro den marki dati. Wi e prisiri trutru te wi e prakseri den furu yari di wi ben du getrow diniwroko. A e gi wi prisiri srefisrefi tu te wi e si fa wi kon kenki den fasi nanga maniri fu wi!—Psalm 16:11.

Den sma di e waka langa pasi, musu luku bun fa den e waka so taki den no e kon weri esi-esi, ma taki den man waka go doro sondro fu tapu. Na a srefi fasi, te wi abi a bun gwenti fu go na den konmakandra doronomo èn fu du a preikiwroko doronomo, dan dati sa yepi wi fu tan poti wi prakseri na a marki di wi wani doro. Fu dati ede, Paulus ben gi tra Kresten a deki-ati: „Meki wi tan waka na wan orde fasi na ini a srefi gwenti disi.”—Filipisma 3:16.

Soleki fa wi kan frustan, dan a no de so taki wi wawan e waka na tapu a pasi fu Yehovah. „En meki wi zorgoe vo makandra toe, tee vo meki da lobbi nanga ala boen wroko kom moro tranga” (Hebrewsma 10:24, Njoe Testament nanga dem Psalm). Te wi e waka nanga sma di tranga na yeye fasi, dan dati sa de wan yepi gi wi fu tan waka go doro makandra nanga tra bribiman.—Odo 13:20.

Te fu kaba, a moro prenspari sani di wi no musu frigiti noiti, na a krakti di Yehovah e gi. Den sma di e kisi krakti fu Yehovah, sa „waka go doro, aladi den sa kisi moro nanga moro krakti” (Psalm 84:5, 7). Aladi problema e miti wi son leisi, toku wi kan basi den problema dati nanga a yepi fu Yehovah.