Yehovah e moi a pipel fu en nanga leti
Yehovah e moi a pipel fu en nanga leti
„Opo, o uma, skèin leti, bika yu leti kon, èn na yu tapu a glori fu Yehovah srefi skèin go.”—YESAYA 60:1.
1, 2. (a) Fa a de nanga a libisma famiri na ini a ten disi? (b) Suma e meki taki a libisma famiri de na ini dungru?
„WI ABI sma fanowdu trutru di abi a srefi koni leki Yesaya nanga Paulus!” Disi na a kragi di na Amerkan Presidenti Harry Truman ben tyari kon na fesi wan leisi na ini wan fu den yari baka 1940. Fu san ede meki a ben taki a sani dati? A ben taki dati fu di a ben feni taki a grontapu fu en ten ben abi sma fanowdu di ben man leri trawan soifri fa fu tyari densrefi. Wan syatu pisi ten na fesi, dan a libisma famiri ben ondrofeni a di fu Tu Grontapufeti di ben de wan fu den moro ogri pisi ten fu a di fu 20 yarihondro. Aladi a feti ben kaba, toku libisma no ben de sondro broko-ede. Libisma ben tan na ini dungru. Iya, srefi 57 yari baka a feti dati, grontapu de na ini dungru ete. A no de fu taki dati efu Presidenti Truman ben de na libi tide, dan a de sondro tweifri taki te now ete a ben o feni taki libisma abi sma leki Yesaya nanga Paulus fanowdu, sma di kan leri den san na a moro bun fasi fu tyari densrefi.
2 Kande Presidenti Truman no ben sabi, ma Paulus ben taki dati a libisma famiri de na ini dungru, èn a ben warskow sma gi dati na ini den buku di a ben skrifi. Fu gi wan eksempre, a ben warskow tra bribiman: „Wi no e feti nanga brudu èn nanga skin, ma nanga den tiri, nanga tirimakti, nanga den grontapu tiriman fu a dungru disi, nanga den ogri yeye makti na den hemel presi” (Efeisesma 6:12). Nanga dati Paulus no ben sori wawan taki a ben sabi taki a grontapu disi de na ini dungru na yeye fasi, ma a ben sori sosrefi taki a ben sabi pe a dungru dati ben e komoto. A ben sabi taki den ogri yeye krakti di a ben e kari den „grontapu tiriman”, e meki taki libisma de na ini a bigi dungru disi. We, efu a de so taki den tranga ogri yeye e tyari a dungru disi kon, dan san pôti libisma sa man du fu puru a dungru?
3. Yesaya ben taki dati a libisma famiri ben o de na ini dungru, ma san a ben taki na fesi fu den getrow sma?
3 Yesaya ben taki tu fu a dungru di libisma de na ini (Yesaya 8:22; 59:9). Ma nanga yepi fu a santa yeye, a ben taki na fesi taki srefi na ini den dungru ten disi, Yehovah ben o meki den sma di lobi a leti si krin san e wakti den na ini a ten di de na den fesi. Den wortu disi ben abi fu du nanga a ten fu wi. Iya, aladi Paulus nanga Yesaya no de na wi mindri, toku wi abi den buku di den ben skrifi nanga yepi fu santa yeye, èn den buku disi kan tiri wi. Te wi e luku a profeititori fu Yesaya kapitel 60, dan wi sa si taki a tiri dati na wan trutru blesi gi den sma di lobi Yehovah.
Na uma na ini a profeititori e skèin leti
4, 5. (a) San Yehovah e komanderi wan uma fu du, èn san A e pramisi na uma? (b) Sortu tumusi moi tori skrifi na ini Yesaya kapitel 60?
4 Den fosi wortu fu Yesaya kapitel 60 abi fu du nanga wan uma, èn sani no e waka bun srefisrefi nanga na uma disi. A didon plata na gron aladi a de na ini bigi dungru. Wantronso wan leti e koti a dungru, èn Yehovah e taki nanga tranga sten: „Opo, o uma, skèin leti, bika yu leti kon, èn na yu tapu a glori fu Yehovah srefi skèin go” (Yesaya 60:1). A ten doro gi na uma fu opo tanapu èn fu skèin a leti, noso a glori fu Gado. Fu san ede? A vers di e kon now e gi wi a piki: „Luku! dungru srefi sa tapu grontapu, èn deki dungru den nationaal grupu; ma na yu tapu Yehovah sa skèin, èn na yu tapu a glori fu en sa de fu si” (Yesaya 60:2). Te na uma e gi yesi na a komando fu Yehovah, dan Yehovah e gi en a dyaranti taki sani sa waka bun gi en. Yehovah e taki: „Den pipel seiker sa go na yu leti, èn kownu sa go na a brenki fu yu leti di e skèin.”—Yesaya 60:3.
5 Den tumusi moi wortu na ini den fosi dri vers disi e fruteri wi syatu sosrefi san skrifi na ini a tra pisi fu Yesaya kapitel 60. Den vers disi e taki na fesi fu den sani di na uma na ini a profeititori ondrofeni èn den e fruklari sosrefi fa wi kan tan na ini a leti fu Yehovah, aladi a libisma famiri de na ini bigi dungru. Ma san den agersi sani di kari na ini den fosi vers disi wani taki?
6. Suma na a uma fu Yesaya kapitel 60, èn suma e teki presi gi en na grontapu?
6 Na uma fu Yesaya 60:1-3 na Sion, Yehovah en organisâsi fu yeye mekisani di de na hemel. Na ini a ten disi a fikapisi fu „na Israel fu Gado” e teki presi gi Sion na grontapu. A fikapisi disi, na a grupu fu salfu Kresten di de na heri grontapu, èn den abi a howpu fu tiri nanga Krestes na ini hemel (Galasiasma 6:16). A yeye pipel disi sa abi 144.000 memre te fu kaba, èn a disiten kontru fu a profeititori fu Yesaya kapitel 60 abi fu du nanga den wan fu a grupu disi di de na libi ete na grontapu na ini „den lasti dei” (2 Timoteyus 3:1; Openbaring 14:1). A profeititori disi abi furu fu du sosrefi nanga den kompe fu den salfu Kresten disi, namku a „bigi ipi” noso den „tra skapu”.—Openbaring 7:9; Yohanes 10:16.
7. Fa a ben de nanga Sion na ini 1918, èn san den profeititori ben taki na fesi fu a pisi tori disi?
7 Wan ten ben de di „na Israel fu Gado” ben e didon na ini dungru, soleki fa na uma na ini a profeititori ben e prenki dati na fesi? Iya, a sani disi kon tru moro leki 80 yari pasa. Na a pisi ten fu a fosi grontapufeti, salfu Kresten ben abi bigi problema fu meki a preikiwroko tan go doro. Ma na ini 1918, a lasti yari fu a feti, dan a preikiwroko di ben e du na heri grontapu, pikinmoro ben kon na wan kaba. Joseph F. Rutherford di ben e teki fesi na ini a preikiwroko di ben e du na heri grontapu, èn sosrefi wan tu tra brada di ben e yepi fu teki fesi, ben kisi bun langa strafu gi sani di den no ben du. A buku Openbaring ben taki na fesi taki den salfu Kresten disi ben o didon leki dedeskin „na tapu a bradi strati fu a bigi foto di na yeye fasi den e kari Sodom nanga Egepte” (Openbaring 11:8). Dati trutru ben de wan dungru ten gi den salfu pikin fu Sion, di e teki presi gi en na grontapu!
8. Sortu bigi kenki kon na ini 1919, èn san ben de a bakapisi fu dati?
8 Ma na ini a yari 1919 wan bigi kenki kon. Yehovah meki a leti fu en skèin na tapu Sion! Den wan di ben tan abra fu na Israel fu Gado, ben bigin skèin a leti fu Gado gi tra sma, èn den bigin baka fu preiki a bun nyunsu fayafaya (Mateyus 5:14-16). Tangi fu a faya di den Kresten disi ben kisi baka, meki moro sma kon na a leti fu Yehovah. Na a fosi presi den nyunwan disi ben salfu kon tron nyun memre fu na Israel fu Gado. Yesaya 60:3 e kari den sma disi kownu, fu di den sa tiri makandra nanga Krestes na ini a Kownukondre fu Gado na hemel (Openbaring 20:6). Bakaten, wan bigi ipi fu tra skapu bigin go na a leti fu Yehovah. Disi na den „pipel” di a profeititori e taki fu den.
Den pikin fu na uma e kon na oso baka!
9, 10. (a) Sortu tumusi moi sani na uma si, èn san disi e prenki na ini a ten disi? (b) Fu san ede Sion ben kan de nanga prisiri?
9 Efu yu e luku en bun, dan Yehovah e bigin taki moro fini now fu den tori di skrifi na ini Yesaya 60:1-3. A e gi na uma wan tra komando now. Arki san Yehovah e taigi en: „Opo yu ai èn luku lontu!” Na uma e du dati, èn den sani di a e si trutru e gi en bigi prisiri! Den pikin fu en e kon na oso. A tekst e taki moro fara: „Den tyari den alamala kon makandra; den kon na yu. Fu farawe yu eigi manpikin e tan kon, èn den umapikin fu yu, di den sa sorgu na a seibere” (Yesaya 60:4). A bariwroko fu a Kownukondre di bigin na heri grontapu na ini 1919, meki taki dusundusun nyunwan bigin dini Yehovah. Den sma disi sosrefi tron „manpikin” nanga „umapikin” fu Sion; salfu memre fu na Israel fu Gado. Na so Yehovah meki Sion kon moi fu di a tyari den lastiwan fu den 144.000 kon na a leti.
10 Yu man frustan fa Sion ben prisiri fu di a ben abi den pikin fu en baka na en sei? Ma Yehovah e taki moro sani di sa meki Sion de nanga prisiri. Wi e leisi: „Na a ten dati yu sa si èn seiker yu sa brenki, èn yu ati sa beifi trutru èn a sa kon moro bigi, bika den gudu fu a se sa kon na yu; srefi den warti sani fu den pipel sa kon na yu” (Yesaya 60:5). Neleki fa den profeiti wortu dati ben taki, dan fu sensi den yari baka 1930, ipi-ipi Kresten di abi a howpu fu libi fu têgo na grontapu, hari go na Sion. Den komoto na ini „a se” fu a libisma famiri di drai den baka gi Gado èn den e prenki den warti sani fu den pipel. Den na „den warti sani fu ala den pipel” (Hagai 2:7; Yesaya 57:20). Luku tu, taki den „warti sani” disi no e go doro fu dini Yehovah leki fa densrefi wani. Nôno, den e meki Sion kon moro moi fu di den e anbegi Gado makandra nanga den salfu brada fu den, èn den e tron „wán ipi” na ondro a tiri fu „wán skapuman”.—Yohanes 10:16.
Seriman, skapuman, nanga bisnisman e kon na Sion
11, 12. Fruteri fu den ipi-ipi sma di e go na Sion.
11 A bakapisi fu a tyari di den sma disi ben o tyari kon na wan, de taki a nomru fu sma di e prèise Yehovah kon moro bigi na wan tumusi aparti fasi. Den wortu fu a profeititori di e kon now ben taki disi na fesi. Pruberi fu si yusrefi e tanapu tapu Sionbergi nanga na uma na ini a profeititori disi. Yu e luku go na owstusei èn san yu e si? „A bigi ipi fu kameili srefi sa tapu yu, den yongu man-kameili fu Midian nanga Efa. Ala den wan di de fu Skeba, den alamala sa kon. Den sa tyari gowtu nanga switismeri-sani kon. Den sa meki a glori fu Yehovah bekènti sosrefi” (Yesaya 60:6). Ipi-ipi seriman e tiri den kameili fu den tapu den pasi di e go na Yerusalem. Iya, den kameili de leki wan frudu di e tapu a heri kondre! Den bisnisman e tyari diri presenti, den e tyari „gowtu nanga switismeri-sani”. Èn den seriman disi e kon na a leti fu Gado fu prèise en na publiki, noso ’den e meki a glori fu Yehovah bekènti’.
12 A no den seriman wawan de na pasi e kon. Ipi-ipi skapuman sosrefi e hari go na Sion. A profeititori e taki moro fara: „Ala den ipi meti fu Kedar den sa tyari kon makandra na yu fesi. Den manskapu fu Nebayot — den sa dini yu”(Yesaya 60:7a). Sma fu den lo di e libi na den boiti presi e kon na a santa foto fu gi Yehovah den moro bunwan fu den ipi meti fu den. Den de klariklari srefi fu dini Sion! San Yehovah e du te den trakondre-sma disi e kon na en? Gado srefi e piki: „Leki sma di mi feni bun den sa kon na tapu na altari fu mi, èn mi sa meki mi eigi moi oso kon moro moi” (Yesaya 60:7b). Nanga prisiri Yehovah e teki den ofrandi fu den trakondre-sma disi èn a breiti nanga a diniwroko di den e du gi en. A tempel fu en e kon moro moi fu di den de na ini.
13, 14. Sortu sani e kon fu a westsei?
13 Drai yu ede now èn luku go bun fara na a westsei. San yu e si? Farawe wan sani de di gersi wan weti wolku di e tapu a se. Dan Yehovah e poti na aksi di yu abi na prakseri: „Suma na den wan disi di e frei kon neleki wan wolku, èn neleki doifi di e go na den olo fu den doifikoi fu den?” (Yesaya 60:8) Yehovah e piki en eigi aksi: „Na mi tapu den èilanti srefi sa tan howpu, den sipi fu Tarsis tu soleki fa a ben de na a bigin, fu tyari den manpikin fu yu kon fu farawe, aladi den e kon nanga a solfru nanga a gowtu fu den, na a nen fu Yehovah, yu Gado, èn na a Santawan fu Israel, bika a sa de so taki a meki yu kon moi.”—Yesaya 60:9.
14 Yu man si a sani disi na yu fesi? A weti wolku dati kon moro krosibei èn now a gersi wan heri ipi weti sani di de farawe na westsei. A gersi wan heri ipi fowru di e frei bun lagi tapu den skwala. Ma o moro krosibei den e kon o moro yu e si taki den na sipi di span den seiri fu den so taki den kan teki winti. So furu sipi e seiri go na Yerusalem taki den gersi wan bigi ipi doifi. A bigi nomru fu sipi disi di komoto na difrenti lanpe di de farawe, e pasa esi-esi na tapu a watra, èn den e tyari bribiman kon na Yerusalem fu anbegi Yehovah.
Na organisâsi fu Yehovah e gro kon moro bigi
15. (a) Sortu gro ben o kon, soleki fa Yesaya 60:4-9 e taki? (b) Nanga sortu denki tru Kresten e du a diniwroko fu den?
15 Vers 4 te go miti 9 fu a profeititori trutru e meki wi si krin fa a nomru fu Kresten gro na heri grontapu sensi 1919! Fu san ede Yehovah blesi Sion nanga a bigi gro disi? Dati na fu di sensi 1919, na Israel fu Gado tan skèin a leti fu Yehovah na a fasi fa a ben wani den fu du dati. Ma yu no si taki den nyunwan disi e „kon na tapu na altari fu [Gado]”, soleki fa vers 7 e taki dati? Wan altari na wan presi pe sma e tyari ofrandi, èn a pisi disi fu a profeititori e memre wi taki son leisi a de fanowdu fu gebroiki sani di warti gi wi fu man du a diniwroko fu Yehovah. Na apostel Paulus ben skrifi: „Mi e begi unu . . . fu pristeri un skin leki wan srakti-ofrandi di de libilibi, di santa èn di e fiti Gado ai, wan santa diniwroko nanga a krakti fu un denki” (Romesma 12:1). Neleki fa Paulus taki, dan a no sari gi tru Kresten fu go na den konmakandra wán leisi nomo wan wiki. Den e gebroiki ala den ten, den krakti, nanga den sani di den abi fu horibaka gi a soifri anbegi. A no de so taki den getrow anbegiman disi di de na ini na oso fu Yehovah e moi na oso fu en? A profeititori fu Yesaya ben taki dati a ben o de so. Èn wi no abi fu tweifri taki den fayafaya anbegiman disi moi tu na Yehovah ai.
16. Suma ben yepi fu du a bow-wroko na ini owruten, èn suma yepi fu du dati na ini a ten disi?
16 Den nyunwan wani wroko. A profeititori e taki moro fara: „Trakondre-sma trutru sa bow den skotu fu yu, èn den kownu fu den sa dini yu” (Yesaya 60:10). Na ini a fosi kontru fu a profeititori disi na a ten di den Israelsma drai kon baka fu katibo na ini Babilon, dan a ben de so trutru taki kownu nanga sma fu tra kondre yepi fu bow a tempel nanga a foto fu Yerusalem baka (Esra 3:7; Nehemia 3:26). Na ini a disiten kontru, dan a bigi ipi horibaka gi a salfu fikapisi fu yepi den fu meki a tru anbegi gro. Den yepi fu tranga den Kresten gemeente, èn na so fasi den e meki den „skotu” fu na organisâsi fu Yehovah di de leki wan foto, kon moro tranga. Den e yepi sosrefi nanga a trutru bow-wroko, namku a bow fu Kownukondre zaal, Kongreshal, nanga Bethel-oso. Na ala den fasi disi den e yepi den salfu brada fu den fu sorgu gi den sani di na organisâsi fu Yehovah abi fanowdu, aladi a e gro kon moro bigi dei fu dei!
17. San na wan fu den fasi fa Yehovah e moi a pipel fu en?
17 Den lasti wortu fu Yesaya 60:10 e gi deki-ati trutru! Yehovah e taki: „A sa de so taki mi naki yu nanga atibron, ma nanga mi bun-ati mi sa abi sari-ati nanga yu trutru.” Iya, na ini den yari 1918 nanga 1919, Yehovah gi a pipel fu en trangaleri trutru. Ma dati pasa kaba. A ten doro now gi Yehovah fu sori sari-ati gi den salfu futuboi fu en èn sosrefi gi den kompe fu den di de fu den tra skapu. Wi e si krin taki a sani disi tru, te wi e luku taki a blesi den tu grupu disi nanga wan tumusi bigi nomru fu nyun memre. Wi kan taki dati ’a e moi den’ na a fasi dati.
18, 19. (a) San Yehovah e pramisi te a abi fu du nanga nyunwan di sa kon na ini na organisâsi fu en? (b) San den lasti vers fu Yesaya kapitel 60 e fruteri wi?
18 Ibri yari someni hondro dusun nyun „trakondre-sma” abi demakandra nanga na organisâsi fu Yehovah, èn furu tra sma sa tan kisi na okasi fu teki na eksempre fu den. Yehovah e taigi Sion: „Den portu fu yu trutru sa tan opo doronomo; den no sa tapu srefi na deiten noso na neti, so taki den kan tyari den gudu fu den pipel kon gi yu, èn den kownu fu den sa teki fesi” (Yesaya 60:11). Son gensman e suku fu tapu den „portu” dati, ma wi sabi taki den no sa abi bun bakapisi. Yehovah srefi taki dati awinsi fa a no fa, den portu sa tan opo. Na organisâsi fu en sa tan gro kon moro bigi.
19 Tra fasi de ete fa Yehovah blesi a pipel fu en, èn na so fasi a e meki den kon moi na ini den lasti dei disi. Den lasti vers fu a profeititori fu Yesaya 60 e tyari kon na krin san na den blesi dati.
Yu kan tyari disi kon na krin?
• Suma na a „uma” fu Gado, èn suma e teki presi gi en na grontapu?
• O ten den pikin fu Sion ben e didon plata na gron, o ten den „opo tanapu”, èn fa den du dati?
• Fa Yehovah ben taki na wan agersi fasi taki a nomru fu Kownukondre preikiman ben o gro?
• Na sortu fasi Yehovah meki a leti fu en skèin tapu a pipel fu en?
[Aksi fu a tori disi]
[Prenki na tapu bladzijde 10]
Na „uma” fu Yehovah e kisi a komando fu opo tanapu
[Prenki na tapu bladzijde 12]
A bigi nomru fu sipi gersi doifi di e frei farawe