Aksi fu leisiman

Na ini sortu situwâsi a fiti taki wan Kresten uma e weri wan sani fu tapu en ede te a musu du sani di abi fu du nanga yeye afersi?

Na apostel Paulus ben skrifi: „Ibri uma di e begi noso e taki profeititori sondro fu tapu en ede, e gi syen na a edeman fu en.” Fu san ede? Fu di a markitiki fu Bijbel di abi fu du nanga a wroko leki edeman, e taki: ’A man na a edeman fu na uma.’ Fu begi noso fu gi leri ini a Kresten gemeente na sani di wan mansma musu du. Sobun, te wan Kresten uma e du wan sani di abi fu du nanga na anbegi fu wi, wan sani di en masra noso wan mansma di teki dopu ben musu du, dan na uma musu weri wan sani fu tapu en ede.—1 Korentesma 11:3-10.

Situwâsi kan kon ini a trowlibi fu wan Kresten uma pe a musu tapu en ede. Fu gi wan eksempre, te na osofamiri e kon makandra fu studeri Bijbel noso fu nyan nanga makandra, dan a masra musu teki fesi fu gi den memre fu en osofamiri leri èn musu teki fesi ini begi gi den. Ma efu a masra no de na bribi, dan kande en wefi musu du den sani disi. Fu dati ede, te wan Kresten sisa e begi nanga wan tranga sten gi ensrefi èn gi trawan noso te a e hori wan bijbelstudie nanga den pikin fu en aladi en masra de drape, dan a fiti taki a sisa weri wan sani fu tapu en ede. Efu en masra no de drape, dan a wefi no abi fu weri wan sani fu tapu en ede, fu di Gado srefi gi en a wroko fu gi den pikin fu en leri.—Odo 1:8; 6:20.

Ma fa a de efu wan yongu manpikin fu na osofamiri na wan futuboi fu Yehovah Gado di gi ensrefi abra na En èn  teki dopu kaba? Fu di a manpikin na wan memre fu a Kresten gemeente, meki den mansma fu a gemeente musu gi en rai (1 Timoteyus 2:12). Efu a papa fu a manpikin de na bribi, dan a musu gi en boi leri. Ma efu a papa no de drape, dan a mama musu weri wan sani fu tapu en ede te a e hori wan bijbelstudie nanga en yongu manpikin di dopu kaba èn nanga den tra pikin. A mama musu bosroiti efu a o aksi a manpikin di dopu fu begi na a studie dati noso fu begi te den o nyan nanga makandra. Kande a mama feni taki a manpikin no abi nofo ondrofeni ete fu man du dati, èn kan teki a bosroiti kande fu ensrefi begi. Efu a e begi na so wan okasi, dan a musu weri wan sani fu tapu en ede.

Te Kresten uma e teki prati na ini afersi fu a gemeente, dan son leisi a de fanowdu taki den e weri wan sani fu tapu den ede. Fu gi wan eksempre, kande soso Kresten sisa de na wan fu den mindriwiki preikiwroko konmakandra, èn nowan dopu mansma de drape. Tra okasi kan de pe nowan dopu mansma de na wan gemeente konmakandra. Efu wan sisa musu du sani di wan brada ben sa musu du na wan konmakandra di a gemeente seti noso na wan preikiwroko konmakandra, dan a sisa dati musu weri wan sani fu tapu en ede.

Wan Kresten uma musu weri wan sani fu tapu en ede te a e vertaal wan publikitaki fu Bijbel noso te a musu vertaal go ini wan tongo di dofu sma e taki? Noso a musu weri wan sani fu tapu en ede te a e leisi paragraaf gi tra sma komoto fu wan bijbelstudie yepisani di wi e gebroiki na wan gemeente konmakandra? Nôno. Den sisa di e handri den afersi disi no e teki fesi gi trawan noso den no e gi trawan leri. Sisa no abi fu weri wan sani fu tapu den ede sosrefi te den e teki prati ini wan demonstrâsi, te den e fruteri ondrofenitori noso te den e teki prati na a Theokrasia Diniwroko-skoro.

Aladi dopu mansma na den wan di musu gi leri na ini a gemeente, toku mansma nanga umasma musu preiki gi sma di no de memre fu a gemeente èn den musu gi den sma dati leri (Mateyus 24:14; 28:19, 20). Sobun, te wan Kresten uma e taki fu Gado wortu nanga wan sma di no de wan Kotoigi, èn wan mansma di de wan Kotoigi fu Yehovah de drape tu, dan a sisa no abi fu weri wan sani fu tapu en ede.

Ma a situwâsi de tra fasi te wan studie e hori na a oso fu wan sma di e studeri Bijbel doronomo, aladi wan mansma di gi ensrefi abra èn teki dopu kaba de drape. Te yu luku en bun, dan disi na wan seti di sreka na fesi kaba fu gi leri, pe a sma di e hori a studie e teki fesi fu gi trawan leri. Efu sani de so, dan a studie e hori soleki fa sani musu pasa na wan gemeente konmakandra. Efu wan umasma di de wan dopu Kotoigi e hori so wan studie èn wan mansma di de wan dopu Kotoigi de drape, dan a fiti taki a sisa weri wan sani fu tapu en ede. Ma a dopu brada musu begi gi den. Wan sisa no sa begi efu wan brada di gi ensrefi abra de drape, boiti efu wan tumusi prenspari reide de fu du dati, soleki efu a brada no man taki fu di a siki.

Son leisi wan mansma di no dopu ete, ma di de wan preikiman fu a Kownukondre, e go nanga wan sisa na wan bijbelstudie. Efu a sisa wani taki a brada di no dopu ete hori a bijbelstudie, dan a kan aksi en fu du dati. Ma fu di a no fiti taki a brada dati di no dopu ete teki fesi gi a dopu sisa ini begi na Yehovah, dan a fiti taki a sisa e begi na a studie. Efu a sisa e hori a bijbelstudie èn a e begi, dan a musu weri wan sani fu tapu en ede. Aladi a mansma di de wan preikiman no teki dopu ete, toku sma di no de Kotoigi o prakseri taki a de wan memre fu a gemeente fu di a e teki prati na a preikiwroko.

„Na uma musu abi wan marki na tapu en ede di e sori taki a abi makti na en tapu, so taki den engel kan si dati”, na so na apostel Paulus ben skrifi. Iya, Kresten sisa abi a grani fu de bun eksempre gi den milyunmilyun engel di tan saka densrefi na wan getrow fasi na ondro Yehovah. A e fiti srefisrefi taki umasma di e frede Gado e hori na prakseri o prenspari a de taki den e weri wan sani fu tapu den ede te dati de fanowdu!

[Prenki na tapu bladzijde 26]

Te wan uma e weri wan sani fu tapu en ede, dan dati e sori taki a e lespeki na edeman wroko