Boiti taki unu e horidoro, unu musu dini Gado na wan getrow fasi tu
Boiti taki unu e horidoro, unu musu dini Gado na wan getrow fasi tu
„Boiti taki unu e sori bribi unu musu . . . horidoro, boiti taki unu e horidoro, unu musu dini Gado na wan getrow fasi.”—2 PETRUS 1:5, 6.
1, 2. (a) Na sortu fasi wan pikin musu gro? (b) O prenspari a de fu gro na yeye fasi?
A DE prenspari taki wan pikin e gro kon bigi, ma a no en skin wawan musu gro kon bigi. En frustan musu kon lepi sosrefi, èn a musu leri fu sori den firi fu en na wan fasi di fiti lepi sma. Baka wan pisi ten a pikin sa tapu nanga den pikin-nengre fasi fu en, èn a sa gro kon tron wan bigiman noso wan bigi-uma. Na apostel Paulus ben taki fu a tori disi di a ben skrifi: „Di mi ben de wan pikin-nengre ete, mi ben taki leki wan pikin-nengre, mi ben denki leki wan pikin-nengre, mi ben frustan sani leki wan pikin-nengre; ma now di mi tron wan man, mi tapu nanga den pikin-nengre fasi.”—1 Korentesma 13:11.
2 Den wortu fu Paulus e tyari kon na krin taki a prenspari fu gro na yeye fasi. Kresten no musu tan nyofi pikin na yeye fasi, ma den musu gro kon kisi „a frustan fu bigisma” (1 Korentesma 14:20). Den musu du tranga muiti fu „gro kon bigi èn [fu] kon lepi leki Krestes”. Te den e du dati, dan den no sa de „nyofi pikin moro di sma e fringi go-kon neleki fa den skwala fu se e du dati, fu di sma e kon bruya [den] nanga ala sortu leri di de leki winti di e wai [den] go na ala sei”.—Efeisesma 4:13, 14.
3, 4. (a) San wi musu du fu tron bigisma na yeye fasi? (b) Sortu fasi di Gado feni bun wi musu sori, èn o prenspari den fasi dati de?
3 Fa wi kan tron bigisma na yeye fasi? Aladi a de so taki a skin fu wan gosontu libisma e gro kon bigi fu ensrefi, toku a de so taki wisrefi musu du muiti fu gro na yeye fasi. A fosi sani di wi musu du, na taki wi musu kisi soifri sabi fu a Wortu fu Gado èn wi musu libi akruderi den sani di wi e leri (Hebrewsma 5:14; 2 Petrus 1:3). Te wi e du dati, dan wi sa man sori taki wi abi den fasi di Gado feni bun. Neleki fa den difrenti pisi fu a libisma skin e gro kon bigi na a srefi ten, na so a de tu furu tron taki wi e kweki difrenti fasi di Gado feni bun, na a srefi ten. Na apostel Petrus ben skrifi: „Unu fu un sei musu du ala san un man fu sori bribi, èn boiti taki unu e sori bribi unu musu sori bunfasi, boiti bunfasi un musu abi sabi, boiti taki unu abi sabi unu musu dwengi unsrefi, boiti taki unu e dwengi unsrefi unu musu horidoro, boiti taki unu e horidoro unu musu dini Gado na wan getrow fasi, boiti taki unu e dini Gado na wan getrow fasi unu musu abi tranga lobi gi un brada, boiti taki un abi tranga lobi gi un brada unu musu sori lobi gi tra sma tu.”—2 Petrus 1:5-7.
4 A de tumusi prenspari taki wi e kweki ibriwan fu den fasi disi di Petrus e kari, fu di wi abi ibriwan fu den fanowdu. Petrus e taki moro fara: „Efu den sani disi de na ini unu èn de pasa marki, dan den sa tapu unu fu tron sma di no e du notinoti noso di de sondro froktu te a abi fu du nanga a soifri sabi fu wi Masra Yesus Krestes” (2 Petrus 1:8). Meki wi luku fu san ede a de fanowdu fu dini Gado na wan getrow fasi sosrefi, boiti taki wi e horidoro.
Fu san ede a de fanowdu fu horidoro
5. Fu san ede a de fanowdu taki wi horidoro?
5 Petrus nanga Paulus e sori taki wan sma musu horidoro fu man dini Gado na wan getrow fasi (1 Timoteyus 6:11). Te wan sma e horidoro dan dati no wani taki nomo taki a sma dati e kakafutu gi problema noso taki a e tan abi wan fasti bosroiti. Ma a wani taki sosrefi taki a sma dati abi pasensi, deki-ati, èn taki a e tanapu kánkan sondro fu lasi howpu te a e kisi broko-ede, problema, tesi, noso frufolgu. Fu di wi na sma di e „dini Gado na wan getrow fasi na ini wánfasi nanga Krestes Yesus”, meki wi e fruwakti taki sma sa frufolgu wi (2 Timoteyus 3:12). Wi musu horidoro fu man sori Yehovah taki wi lobi en èn fu man kweki den fasi di wan sma musu abi fu kan kisi frulusu (Romesma 5:3-5; 2 Timoteyus 4:7, 8; Yakobus 1:3, 4, 12). Efu wi no e horidoro, dan wi no sa kisi têgo libi.—Romesma 2:6, 7; Hebrewsma 10:36.
6. San wi musu du fu man horidoro te na a kaba?
6 Awansi sani e waka bun na ini a bigin, toku a sani di de moro prenspari te fu kaba, na taki wi e horidoro. Yesus ben taki: „A sma di horidoro te na a kaba, na en sa kisi frulusu” (Mateyus 24:13). Iya, wi musu horidoro te na a kaba, awinsi dati na a kaba fu wi libi noso na a kaba fu na ogri seti fu sani disi. Awinsi fa a no fa, wi musu tan du san Gado feni bun. Ma efu wi no e dini Gado na wan getrow fasi boiti taki wi e horidoro, dan Yehovah no sa feni wi bun èn wi no sa kisi têgo libi. Ma san a wani taki fu dini Gado na wan getrow fasi?
San a wani taki fu dini Gado na wan getrow fasi
7. San a wani taki fu dini Gado na wan getrow fasi, èn san dati e meki wi fu du?
7 Te wi e dini Gado na wan getrow fasi, dan dati wani taki dati wi abi lespeki gi en, èn taki wi e anbegi en. Disi wani taki sosrefi taki wi e dini Yehovah Gado fu di wi de getrow na en di de a moro heiwan fu hemel nanga grontapu. Fu man dini Yehovah na wan getrow fasi, dan wi musu kon sabi soifri suma na en, fa a e denki, èn fu san ede a e du spesrutu sani. Wi musu suku fu kon sabi Gado bun, iya, wi musu suku fu kon abi wan bun banti nanga en. Disi sa meki taki wi sa lobi en nanga wi heri ati, èn a lobi dati sa de fu si na ini den sani di wi e du èn na ini a fasi fa wi e libi. Wi musu du ala san wi man fu de leki Yehovah, dati wani taki dati wi musu du ala san wi man fu du leki en èn fu kon de leki en (Efeisesma 5:1). Iya, te wi e dini Gado na wan getrow fasi, dan dati sa meki taki wi sa wani plisi Gado na ini ala sani di wi e du.—1 Korentesma 10:31.
8. Fu san ede wi musu anbegi Gado wawan fu man dini En na wan getrow fasi?
8 Fu man dini Gado na wan getrow fasi, dan wi musu anbegi Yehovah wawan, èn wi no musu meki nowan tra sani teki a presi di Yehovah abi na ini wi ati. Fu di Yehovah na wi Mekiman, meki a abi a reti fu fruwakti taki wi lobi en wawan èn taki wi e dini en wawan (Deuteronomium 4:24; Yesaya 42:8). Toku Yehovah no e dwengi wi fu anbegi en. A wani taki wi lobi en èn taki wi dini en fu di wisrefi wani dati. Baka di wi kon sabi soifri suma na Gado, dan wi kon lobi en, èn a lobi dati e meki taki wi e du muiti fu libi wan krin libi. A lobi dati e meki sosrefi taki wi gi wisrefi abra na Gado krinkrin, èn baka dati wi e dini En soleki fa wi pramisi.
Du muiti fu kisi wan banti nanga Gado
9, 10. Fa wi kan kon kisi wan tranga banti nanga Gado èn san wi kan du fu tan abi so wan banti nanga en?
9 Baka te wi teki dopu fu sori taki wi gi wisrefi abra na Gado, dan wi musu tan du muiti fu kisi wan moro bun banti nanga Gado. Fu di wi e angri fu de sma di e dini Yehovah getrow, meki wi e tan studeri a Wortu fu en èn wi e tan denki dipi fu dati. O moro wi e gi a yeye fu Gado na okasi fu wroko tapu wi ati nanga wi frustan, o moro wi lobi gi Yehovah e kon moro tranga. A banti di wi abi nanga en e tan a moro prenspari sani na ini wi libi. Wi e si Yehovah leki a moro bun Mati di wi kan abi èn wi wani gi yesi na en ala ten (1 Yohanes 5:3). Dei fu dei wi e kisi moro prisiri fu di wi abi wan bun banti nanga Gado, èn wi de nanga tangi na ati taki a e gi wi leri na wan lobi-ati fasi èn taki a e gi wi piri-ai te dati de fanowdu.—Deuteronomium 8:5.
10 Efu wi no e tan meki muiti fu meki a tumusi prenspari banti di wi abi nanga Yehovah kon moro tranga, dan te fu kaba a banti dati kan kon swaki. Efu dati ben o pasa, dan wi no sa man taki dati na Gado du dati, fu di „a no de fara fu ibriwan fu wi” (Tori fu den Apostel 17:27). Wi breiti trutru taki Yehovah no e meki taki a tranga gi wi fu taki nanga en! (1 Yohanes 5:14, 15) A no de fu taki dati wi musu meki muiti fu tan abi wan tranga banti nanga Yehovah. Ma toku a e yepi wi fu kon kisi wan banti nanga en, fu di a e gi wi ala yepi di wi abi fanowdu fu tan dini En na wan getrow fasi (Yakobus 4:8). Fa wi kan gebroiki ala den sani di a seti gi wi na so wan lobi-ati fasi?
Tan tranga na yeye fasi
11. San na wan tu fasi fa wi kan sori taki wi e dini Gado na wan getrow fasi?
11 A trutru lobi di wi abi gi Gado sa meki wi sori taki wi e dini En na wan getrow fasi, èn taki wi e du dati nanga wi heri ati. Dati sa kruderi nanga a rai di Paulus ben gi: „Du ala san yu man fu sori 2 Timoteyus 2:15). Fu man du disi, dan wi musu abi a gwenti fu studeri Bijbel doronomo, fu go na den konmakandra, èn fu teki prati na a preikiwroko. Wi kan tan abi wan bun banti sosrefi nanga Yehovah te wi e „begi doronomo” (1 Tesalonikasma 5:17). Disi na tumusi prenspari fasi fa wi kan sori taki wi e dini Gado na wan getrow fasi. Te wi no e du den sani disi, dan dati kan meki taki wi e kon swaki na yeye fasi, èn Satan sa man kori wi moro makriki.—1 Petrus 5:8.
yusrefi na Gado leki wan sma di a feni bun, leki wan wrokoman di no abi fu syen fu noti, di e gebroiki a wortu fu a waarheid na wan reti fasi” (12. Fa wi sa man kakafutu gi tesi?
12 Te wi e tan tranga na yeye fasi èn te wi e tan wroko fayafaya, dan dati e yepi wi tu fu kakafutu gi den tesi di wi e kisi. Son tesi kan hebi srefisrefi gi wi. Te wi eigi osofamiri, famiriman, noso birtisma, na den wan di e sori mi-no-ke fasi, di e gens wi, noso di e frufolgu wi, dan a kan kon moro tranga gi wi fu kakafutu gi den tesi dati. Na wrokope noso na skoro wi kan kisi kwinsi na wan triki fasi fu poti den Kresten gronprakseri fu wi na wan sei. Te wi lasi-ati, te wi siki, noso te wi firi broko-saka, dan dati kan swaki a skin fu wi, èn a sani dati kan meki en moro tranga gi wi fu kakafutu gi den tesi di wi e kisi tapu a bribi fu wi. Ma wi sa man kakafutu gi ala tesi te wi e tan ’tyari wisrefi na wan santa fasi èn te wi e tan du sani di e sori taki wi e dini Gado na wan getrow fasi, aladi wi e fruwakti èn e hori a denoya fu a dei fu Yehovah bun na prakseri’ (2 Petrus 3:11, 12). Wi kan tan du dati nanga prisiri, aladi wi abi a frutrow taki Gado sa blesi wi.—Odo 10:22.
13. San wi musu du efu wi wani tan dini Gado na wan getrow fasi?
13 Aladi Satan e suku fu tesi den wan di e dini Gado na wan getrow fasi, toku wi no abi fu frede. Fu san ede? Fu di „Yehovah sabi fa fu puru sma di e dini En na wan getrow fasi, na ini tesi” (2 Petrus 2:9). Fu man kakafutu gi tesi so taki wi kan kisi frulusu na so wan fasi, dan wi musu ’drai wi baka gi ogridu èn gi den lostu fu grontapu èn wi musu libi nanga wan gosontu frustan èn nanga regtfardikifasi èn wi musu dini Gado na wan getrow fasi, na mindri a disiten seti fu sani’ (Titus 2:12). Fu di wi na Kresten, meki wi musu luku bun taki nowan swakifasi di abi fu du nanga den lostu fu a skin noso nanga sani di wi e du, tapu wi fu dini Gado na wan getrow fasi te fu kaba. Meki wi luku wan tu fu den sani disi now di kan gi wi problema.
Luku bun nanga sani di kan tapu yu fu dini Gado na wan getrow fasi
14. San wi musu hori na prakseri te wi de fu fadon na ini wan trapu fu di wi e feti na baka gudu nomo?
14 Furu sma fadon na ini wan trapu fu di den e feti baka gudu nomo. Ma wi kan kori wisrefi te wi „e denki taki te wan sma e dini Gado na wan getrow fasi, dan dati na wan fasi fu kisi [gudu]”. A denki dati ben kan gi wi a deki-ati fu du wan sani di no fiti, fu di wi sabi taki tra bribiman e frutrow wi (1 Timoteyus 6:5). Wi ben kan kisi a fowtu denki srefi taki a no de wan ogri sani fu dwengi wan gudu Kresten fu leni wi moni, aladi wi sabi taki wi no sa man pai en baka (Psalm 37:21). Ma a no den furu gudu di wan sma abi sa meki a ’kisi wan pramisi gi a libi fu now èn gi a libi di musu kon ete’. Nôno, a sa kisi a pramisi dati te a e dini Gado na wan getrow fasi (1 Timoteyus 4:8). Fu di ’wi no tyari noti kon na grontapu, èn fu di wi no kan tyari noti komoto na en tu’, dan meki wi abi wan moro fasti bosroiti fu ’dini Gado na wan getrow fasi èn fu prisiri nanga den sani di wi abi’ èn fu ’prisiri te wi abi nyanyan, krosi nanga wan presi fu tan’.—1 Timoteyus 6:6-11.
15. San wi kan du te wi kon si taki a prisiri ten di wi abi e suku fu tapu wi fu dini Gado na wan getrow fasi?
1 Yohanes 2:25). Na ini a ten disi, furu sma ’lobi prisiri moro leki den lobi Gado, èn den abi wan fasi fu dini Gado na wan getrow fasi, ma den no e sori fu abi a krakti fu dati’. A de fanowdu taki wi drai wi baka gi den sortu sma disi (2 Timoteyus 3:4, 5). Den wan di e si en leki wan prenspari sani fu dini Gado na wan getrow fasi, na sma di e ’kibri wan bun fondamenti gi a tamara leki wan gudu gi densrefi, so taki den kan hori a trutru libi steifi’.—1 Timoteyus 6:19.
15 Te wan sma e suku nomo fu abi prisiri, dan dati kan tapu en fu dini Gado na wan getrow fasi. A kan de so taki disi na wan kontren pe wi musu tyari kenki kon wantewante? A tru taki wi kan kisi wini te wi e oefen wi skin èn te wi abi prisiri ten. Toku den sortu wini disi no de noti te yu e teki den gersi nanga têgo libi (16. Sortu sondu lostu e tapu son sma fu libi akruderi den regtfardiki markitiki fu Gado, èn fa wi kan puru den takru lostu disi na ini wi ati?
16 Te wi dringi tumusi furu sopi, e gebroiki drugs, e du hurudu, èn te wi abi sondu lostu, dan dati kan tapu wi fu dini Gado na wan getrow fasi. Efu wi brokokindi gi den sani disi, dan dati kan tapu wi fu libi akruderi den regtfardiki markitiki fu Gado (1 Korentesma 6:9, 10; 2 Korentesma 7:1). Srefi Paulus ben musu kakafutu doronomo gi a sondu skin fu en (Romesma 7:21-25). Wi musu du tranga muiti fu puru ala takru lostu na ini wi ati. A de so taki wi musu tan krin na ini a fasi fa wi e tyari wisrefi. Paulus e taigi wi: „Kiri . . . den memre fu un skin di de na grontapu te a abi fu du nanga hurudu, libi di no krin, seks lostu, ogri lostu, nanga bigi-ai, di de a srefi leki afkodrei” (Kolosesma 3:5). Fu man kiri den memre fu wi skin te a abi fu du nanga den sondu dati, dan wi musu abi a fasti bosroiti fu puru ibri lostu gi den sani dati na ini wi ati. Te wi e tan begi Gado fayafaya, dan dati sa yepi wi fu kakafutu gi takru lostu èn fu suku regtfardikifasi. Boiti dati, wi sa man dini Gado na wan getrow fasi na ini na ogri seti fu sani disi.
17. Fa wi musu si trangaleri?
17 Te wi lasi-ati, dan dati kan meki taki wi no sa man horidoro èn dati kan tapu wi fu dini Gado na wan getrow fasi. Furu fu den futuboi fu Yehovah e lasi-ati wawan leisi (Numeri 11:11-15; Esra 4:4; Yona 4:3). Te wi lasi-ati fu di wi e mandi taki wan sma hati den firi fu wi, noso fu di wi kisi krakti piri-ai noso trangaleri, dan dati kan meki wi firi brokosaka srefisrefi. Ma te Gado e gi wi piri-ai nanga trangaleri, dan dati e sori taki A e broko en ede nanga wi èn taki a lobi wi (Hebrewsma 12:5-7, 10, 11). Wi no musu si trangaleri leki wan strafu nomo, ma wi musu si en leki wan fasi fa Gado e leri wi fu du san de regtfardiki. Te wi abi sakafasi, dan trutru wi sa warderi a rai di wi e kisi èn wi sa teki en sosrefi, fu di wi sa kon si taki „den piri-ai fu trangaleri na a pasi fu libi” (Odo 6:23). A sakafasi disi kan yepi wi fu sori moro soifri taki wi e dini Gado na wan getrow fasi.
18. San wi musu du te wi hati den firi fu trawan?
18 Te wi abi kesekese nanga trawan, noso te trawan e hati den firi fu wi, dan dati kan de wan Odo 18:1). Ma wi musu hori bun na prakseri taki te wi e tan firi atibron noso bita-ati gi trawan, dan dati kan pori a banti di wi abi nanga Yehovah (Lefitikus 19:18). Te yu luku en bun, dan „a sma di no lobi en brada di a si, no kan lobi Gado, di a no si” (1 Yohanes 4:20). Na ini a Bergitaki fu en, Yesus ben poti krakti na tapu taki wi no musu draidrai fu lusu den problema di wi abi nanga trawan. A ben taigi den arkiman fu en: „Fu dati ede, te yu e tyari yu presenti go na a altari èn drape yu e memre taki a brada fu yu abi wan sani nanga yu, dan libi yu presenti drape na fesi na altari èn gowe; suku vrede fosi nanga a brada fu yu, èn baka dati, te yu drai kon baka, òfer a presenti fu yu” (Mateyus 5:23, 24). Te wi e begi wan trawan pardon fu di wi ben taigi en wan hati sani, noso fu di wi ben du sani fu afrontu en, dan dati kan meki taki a sani di wi ben du no e hati a sma dati moro. Te wi abi trobi nanga wan sma, dan wi kan kon bun baka nanga a sma dati, te wi aksi en pardon èn te wi e agri taki a sani di wi ben du no ben fiti. Yesus ben gi tra rai tu fu sori wi fa wi kan lusu problema (Mateyus 18:15-17). Wi breiti srefisrefi te a muiti di wi du fu lusu den problema di e miti wi e tyari bun bakapisi kon!—Romesma 12:18; Efeisesma 4:26, 27.
tyalensi gi wi fu tan dini Gado na wan getrow fasi. Den sani disi kan gi wi broko-ede, noso den kan meki taki son sma e bosroiti fu hori densrefi aparti fu den yeye brada nanga sisa fu den, aladi dati no de wan koni sani fu du (Teki na eksempre fu Yesus
19. Fu san ede meki a de so prenspari taki wi teki na eksempre fu Yesus?
19 A no de fu taki dati wi sa kisi tesi, ma den no abi fu meki wi tapu nanga a streilon fu kisi têgo libi. Hori na prakseri taki Yehovah kan puru wi na ini tesi. Te wi „ e puru sosrefi ibri hebi” èn te wi „e horidoro fu lon a streilon di poti na wi fesi”, dan meki wi „luku bun na Yesus, a Moro Prenspari Fesiman èn a Sma di e meki a bribi fu wi kon bun dorodoro” (Hebrewsma 12:1-3). Te wi e ondrosuku na eksempre fu Yesus Krestes bun, èn te wi e meki muiti fu du sani soleki fa en ben du den èn fu taki soleki fa en ben taki, dan dati sa yepi wi fu tron sma di e dini Gado na wan getrow fasi èn wi sa man du dati na wan moro bun fasi srefi.
20. Sortu wini wi sa kisi te wi e meki muiti fu horidoro èn fu dini Gado na wan getrow fasi?
20 Te wi e horidoro, èn te wi e dini Gado na wan getrow fasi, dan a no sa abi misi taki wi sa kisi frulusu. Te wi e sori taki wi e du den tumusi prenspari sani disi, dan dati kan yepi wi fu tan du santa diniwroko gi Gado na wan getrow fasi. Srefi te wi e kisi tesi, wi sa de koloku fu di wi sa ondrofeni a switi fasi fa Yehovah lobi wi. A sa blesi wi sosrefi fu di wi horidoro èn fu di wi e dini En na wan getrow fasi (Yakobus 5:11). Ma boiti dati, Yesus srefi e gi wi a dyaranti: „Unu sa wini unu sili efu unu horidoro.”—Lukas 21:19.
San yu ben sa piki?
• Fu san ede a de prenspari taki wi horidoro?
• San a wani taki fu dini Gado na wan getrow fasi, èn fa wi kan sori taki wi e du dati?
• Fa wi kan kisi wan tranga banti nanga Gado, èn fa wi kan tan abi so wan banti nanga en?
• San na wan tu sani di kan tapu wi fu dini Gado getrow, èn fa wi kan sorgu taki den sani dati no e pasa nanga wi?
[Aksi fu a tori disi]
[Prenki na tapu bladzijde 12, 13]
Wi kan sori na difrenti fasi taki wi e dini Gado na wan getrow fasi
[Prenki na tapu bladzijde 14]
Luku bun nanga sani di kan tapu yu fu dini Gado na wan getrow fasi