San pasa nanga a faya fu hel?

SAN yu e prakseri te yu e yere a wortu „hel”? Yu e si hel leki wan trutru presi fu faya nanga swarfu? Yu e si en leki wan presi sosrefi pe sma e kisi skin-ati èn pe sma e firi pen fu têgo? Noso a de so taki hel na soso wan wortu di sma e gebroiki fu sori fa wan sma e firi, noso san wan sma e ondrofeni?

Hondrohondro yari langa, den kerki fesiman fu Krestenhèit bribi taki hel na wan presi fu faya èn taki sondari e kisi skin-ati drape na wan kefalek ogri-ati fasi. Furu tra kerki e bribi a sani disi ete. „A kan de so, taki Krestenhèit meki a wortu ’hel’ kon de wan pôpi wortu di ala sma sabi”, na so a tijdschrift U.S.News & World Report e taki, „ma a no de so taki den wawan e leri sma fu wan hel. Pikinmoro ala kerki di abi furu bakaman èn sosrefi den kerki di no abi so furu bakaman, e leri sma tu taki libisma e go na wan presi pe den e kisi skin-ati leki strafu gi den sondu fu den baka te den dede.” Hindusma, Budasma, Moslimsma, Yainasma, èn sosrefi Taoistsma, e bribi na wan noso tra fasi na ini wan hel.

Ma na ini a ten disi, sma abi wan tra denki fu hel. A tijdschrift di ben kari na fesi e taki: „Aladi furu sma e bribi ete na ini wan faya hel pe ogri sma e go baka te den dede, toku sma na ini a ten disi e bigin bribi taki a strafu di ogri sma e kisi, wani taki dati den musu tan den wawan fu ala ten na ini wan kefalek takru presi. Dati e sori taki sma e bribi taki hel no de wan trutru presi fu faya soleki fa sma ben e denki fosi.”

A Katolik tijdschrift La Civiltà Cattolica ben taki: „A no de wan bun sani kwetikweti . . . te wi e denki taki Gado e gebroiki ogri yeye fu gi den ogri sma di kisi krutu, skin-ati na wan ogri-ati fasi nanga yepi fu faya.” A ben taki moro fara: „Hel no de wan trutru presi, ma hel na a hebi pen di wan sma e firi fu di a no abi wan banti nanga Gado moro.” Paus Johannes Paulus II ben taki na ini 1999: „Hel no de wan trutru presi, ma hel na a fasi fa wan sma en libi e waka te a drai en baka gi Gado, a Sma di e gi wi libi nanga koloku.” A ben taki fu a denki di sma abi taki hel na wan faya presi: „A no de wan faya presi soleki fa sma e denki, ma a e sori fa a libi fu wan sma e waka te a no abi wan banti nanga Gado; a e sori taki wan libi sondro Gado de fu soso èn a bruya dorodoro. Efu a paus ben taki dati hel na wan presi „fu faya èn fu wan didibri nanga redi krosi di e hori wan bigi forku na en anu, dan sma no ben o bribi dati kwetikweti”, na so Martin Marty ben taki, wan sabiman fu kerki historia.

Den srefi sortu sani e pasa na ini tra kerki. A komte fu a Church of England di e poti prakseri na den kerkileri fu en, ben taki: „Hel a no wan presi pe sma e kisi têgo skin-ati, ma hel na a krin bosroiti di wan sma e teki fu libi wan libi di Gado no feni bun kwetikweti. A sma e tyari en libi na so wan takru fasi, taki a bakapisi de taki a sma no o tan na libi moro.”

A buku di abi fu du nanga den kerkileri fu na United States Episcopal Church ben taki dati hel wani taki „a dede di wi sa dede fu têgo fu di wi drai wi baka gi Gado”. Na U.S.News & World Report e taki dati moro nanga moro sma e panya a denki  taki „den ogri sma no sa pina fu têgo, ma taki den sa kisi pori. . . . [Den] e taki dati den sma di e drai den baka gi Gado te fu kaba, sa kisi pori na ini a hel ’faya di e pori ala sani krinkrin’”.

Aladi moro nanga moro sma na ini a ten disi e weigri fu bribi taki hel na wan presi fu faya nanga swarfu, toku furu sma e tan bribi taki hel na wan trutru presi pe sma e kisi skin-ati. „Bijbel e taki krin taki hel na wan trutru presi pe sma e kisi skin-ati”, na so Albert Mohler fu a Southern Baptist Theological Seminary na ini a foto Louisville, Kentucky, na ini Amerkankondre, e taki. Èn a raportu di nen The Nature of Hell (a fasi fa hel de), di na Evangelical Alliance Commission ben sreka, e taki: „Te wan sma de na ini hel, dan dati wani taki dati a sma sabi taki Gado drai en baka gi en, èn a e firi a pen nanga a sari di dati e tyari kon.” A e taki moro fara: „Na ini hel, difrenti fasi de fu strafu èn fu pina sma, akruderi den sortu sondu di den sma dati ben du na grontapu.”

Hel na wan presi fu faya pe sma e kisi têgo skin-ati, noso pe sma e kisi pori? Noso a de so taki hel na a libi di wan sma e libi sondro taki a abi wan banti nanga Gado? San na hel trutru?

[Faki/Prenki na tapu bladzijde 4]

San sma ben e bribi fu helfaya

OTEN den sma di e taki dati den na Kresten, teki a bribi fu a helfaya abra? Den ben teki a bribi dati abra wan langa pisi ten baka a ten fu Yesus Krestes nanga den apostel fu en. „Na Apocalypse of Peter (di fu tu yarihondro G.T.) ben de a fosi Kresten buku [di no e kruderi nanga Bijbel, èn di no de wan pisi fu Bijbel] di ben fruteri na sortu fasi sondari e kisi strafu nanga skin-ati na ini hel”, na so a Fransi Encyclopædia Universalis e taki.

Ma den fosi Kerki Tata no ben agri nanga makandra te a ben abi fu du nanga hel. Justinus Martyr, Clemens fu Aleksandria, Tertullianus, èn sosrefi Cyprianus ben e bribi taki hel ben de wan presi fu faya. Origines nanga Gregorius fu Nyssa, wan sabiman fu kerki tori, ben e bribi taki hel na a pina di wan sma e pina fu di a no abi wan banti nanga Gado. Na a tra sei, Augustinus fu Hippo, ben bribi taki sma e kisi trutru skin-ati na ini hel, ma a ben bribi sosrefi taki sma ben e pina tu fu di den no abi wan banti nanga Gado. Furu sma ben teki a bribi disi abra. „Na ini a di fu feifi yarihondro, bun furu sma ben e bribi a kerkileri taki sondari no sa abi na okasi moro fu kon na libi baka te den dede na ini a libi disi. Den ben e bribi sosrefi taki a faya di sa pori den sa tan fu têgo”, na so Professor J.N.D. Kelly ben skrifi.

Na ini a di fu 16 yarihondro, wan tu Protestantsma soleki Martin Luther nanga Johannes Calvijn ben e bribi taki a skin-ati di sma sa kisi na ini helfaya a no wan trutru sani di sma e ondrofeni, ma a abi fu du nanga a tan di wan sma e tan fu têgo sondro a tiri fu Gado. Ma na ini den tu yarihondro baka dati, sma ben kon bribi baka taki hel na wan presi fu faya pe sma e kisi skin-ati. Na ini a di fu 18 yarihondro, a Protestant domri Jonathan Edwards ben abi a gwenti fu tapu skreki gi den sma di ben kon fu tra kondre fu libi na Amerkankondre, fu di a ben e meki prenki di e sori san na hel.

Ma wan syatu pisi ten baka dati, dan safrisafri den kiri a faya fu hel. „Na ini a di fu 20 yarihondro, sma pikinmoro no ben bribi moro na ini a faya hel”, na so U.S.News & World Report e taki.

[Prenki]

Justinus Martyr ben e bribi taki hel ben de wan presi fu faya

Augustinus fu Hippo ben leri trawan taki sma e kisi trutru skin-ati na ini hel, èn sosrefi taki sma e pina tu fu di den no abi wan banti nanga Gado