Kownukondre preikiman e fruteri

’A Wortu fu Gado abi krakti’

NA TAPU a Kribisi èilanti Yamaika, pe a son e skèin krinkrin ala ten, furu fu den sma sabi wan tu sani fu Bijbel kaba. Fu taki en leti, dan na Ingrisitongo vertaling fu a King James Version de fu feni na ini pikinmoro ibri oso, èn son sma ondrofeni taki „a wortu fu Gado de libilibi èn a abi krakti” (Hebrewsma 4:12). A krakti disi kan kenki a libi fu sma, soleki fa na ondrofenitori di e kon e sori.

Syatu baka di wan man di nen Cleveland ben kon na oso baka di a komoto na wroko, dan wan Kotoigi fu Yehovah ben kon na en. Baka di a Kotoigi fruteri Cleveland wan tu penti fu Bijbel, dan a Kotoigi gi en a buku di nen Sabi di e tjari joe go na têgo libi, wan buku di de wan yepisani fu studeri Bijbel. Cleveland no ben sabi o furu krakti a Wortu fu Gado ben o abi ini en libi.

Cleveland ben gwenti fu begi dri leisi wán dei, èn dan a ben e aksi Gado fu yepi en feni a yoisti fasi fu anbegi En. A ben abi na overtoigi taki a papa nanga mama fu en no ben e anbegi Gado na a yoisti fasi, ma a ben kon lasi-ati baka di a ondrosuku tra bribi. A ben yere wan tu sani kaba fu Yehovah Kotoigi, ma a ben e tweifri efu den ben abi a tru anbegi trutru. Aladi a ben tweifri so, toku Cleveland ben wani fu studeri Bijbel nanga a Kotoigi di ben kon na en oso. Fu san ede? Fu di a ben wani sori taki den Kotoigi no ben e anbegi Gado na a yoisti fasi!

Heri esi Cleveland ben kon sabi taki a hurudu libi di a ben abi nanga tu uma ben de sani di Gado no ben e feni bun kwetikweti (1 Korentesma 6:9, 10). Cleveland ben teki a deki-ati fu tapu nanga den uma, baka di a brada studeri tu leisi nomo nanga en. A ben bigin sosrefi fu go na den Kresten konmakandra na a Kownukondre zaal. Ma disi ben de wan tra tyalensi gi en.

Cleveland ben de wan fayafaya memre fu a futubal grupu fu a birti fu en, èn den ben e prei futubal na a srefi ten di den konmakandra ben e hori. San a ben o du? Aladi den tra memre fu a futubal grupu fu en, a trainer èn sosrefi den mati fu Cleveland ben begi en fu no gowe libi a grupu, toku a ben du dati. Iya, a Wortu fu Gado ben bigin fu abi krakti, so taki Cleveland ben wani du san bun!

A ben de krin fu si taki Gado Wortu abi krakti di Cleveland ben bigin fu fruteri trawan san a ben kon sabi fu Bijbel (Tori fu den Apostel 1:8). A bakapisi fu dati ben de taki tu fu den memre fu a futubal grupu di a ben de na ini fosi, ben bigin go na den konmakandra fu Yehovah Kotoigi. Baka di Cleveland doro den marki fu tron wan preikiman fu a bun nyunsu, dan a ben prisiri srefisrefi fu du a preikiwroko, èn a ben gebroiki Gado Wortu fu yepi trawan.

Fu di Gado Wortu ben tan abi krakti na en tapu, meki Cleveland te fu kaba ben sori taki a gi ensrefi abra na Yehovah, fu di a ben teki dopu. A abi a grani now fu dini leki wan furuten dinari èn leki wan dinari ini a diniwroko ini a gemeente.

Dusundusun sma na Yamaika èn na heri grontapu kon sabi taki Gado Wortu trutru „de libilibi èn a abi krakti”.

[Karta/Prenki na tapu bladzijde 8]

(Efu yu wani si pe den sani disi skrifi, luku a tijdschrift)

YAMAIKA

[Sma di abi a reti fu a karta]

Karta nanga grontapu: Mountain High Maps® Copyright © 1997 Digital Wisdom, Inc.