A krakti di kruktubribi abi tapu a libi fu sma

YU E tuka nanga wan sma na a ten di yu e gowe libi yu oso. Yu e stotu yu futu na wan ston. Wan spesrutu sortu fowru e bari te neti. Yu e dren a srefi sani ibritron baka. Gi furu sma, den sani disi na aladei sani di no wani taki noti. Ma son pipel fu a Westsei fu Afrika e si den sani disi leki marki fu sani di o pasa, noso leki boskopu di den yeye e seni kon gi den. Furu tron den sma disi e bribi taki den marki disi e sori den na fesi taki sani sa waka bun gi den, noso taki rampu o kon.

A no de fu taki, dati sma na tra kondre abi kruktubribi tu. Furu yari langa, den sma na ini China èn na ini a Sovyet Unie fu fosi, ben musu libi na ondro tirimakti di no ben e gi okasi taki sma anbegi Gado. Toku bun furu fu den sma disi abi wan lo kruktubribi ete. Na ini den Westsei kondre, furu sma e leisi horoskoop (sani di koranti noso buku e skrifi fu fruteri sma fa den stari sa abi krakti tapu a libi fu den), den e frede te a di fu 13 dei fu a mun e fadon tapu wan freida fu di den e denki taki wan takru sani o pasa nanga den, èn den e tan fara fu blaka pusipusi sosrefi. Son sma fu den kondre di de bun fara na a Noordsei fu grontapu e si a noorderlicht (a moi leti di de fu si na hemel son leisi na a Noordsei fu grontapu), leki wan marki di e sori taki feti o broko èn taki ipi-ipi sma o kon siki. Na ini India, mansma di e rei truck e panya na AIDS siki fu di den e bribi taki te den abi seks nanga wan uma, dan dati sa kowru den skin tapu den dei te a son faya. Na ini Yapan, den mansma di abi a wroko fu meki tunnel (ondrogron pasi) e bribi taki te wan uma e kon na ini wan tunnel bifo den kaba meki en, dan dati sa tyari takru bakapisi kon. Pôpi sportman abi bun furu kruktubribi tu. Wan volleybal sportman ben taki srefi dati a grupu fu en ben wini difrenti plèi baka makandra, fu di a ben weri blaka kowsu na presi fu weti wan. Bun furu tra kruktubribi de ete.

Fa a de nanga yu? Wan sani de di e frede yu, sondro taki yu sabi fu san ede? Yu e bribi na ini wan sani noso yu e du spesrutu sani sondro taki yu kan fruklari fu san ede? A piki di yu e gi tapu den aksi disi, sa sori efu kruktubribi abi krakti tapu yu libi.

Wan sma di e meki kruktubribi abi krakti tapu den bosroiti di a e teki èn tapu den sani di a e du na ini en aladei libi, e meki sani di a no e frustan so bun, basi a libi fu en. A sani disi de wan koni sani fu du? Wi musu meki wan sani di wi no man frustan èn di kan du wi ogri srefi, abi krakti na wi tapu? A de so taki kruktubribi na wan swakifasi di no e du wi ogri, noso a de wan sani di kan poti wi na ini kefar?