Aksi fu leisiman

Abel ben sabi taki wan meti-ofrandi ben de fanowdu fu kisi a bun-ati fu Gado?

A Bijbel tori di e fruteri fu den ofrandi di Kain nanga Abel ben tyari, no langa srefisrefi. Na Genesis 4:3-5, wi e leisi: „Baka wan pisi ten, a ben pasa taki Kain ben go fu tyari wan tu froktu fu a gron leki wan ofrandi gi Yehovah. Ma Abel, fu en sei, en tu ben tyari wan tu fu den fosiwan fu en ipi, iya, den fatu pisi fu den. Now, aladi Yehovah ben e luku nanga bun-ati na Abel nanga na ofrandi fu en, A no ben luku nanga nowan bun-ati na Kain èn na den ofrandi fu en.”

Fosi a sani disi ben pasa dan na nowan presi na ini Bijbel Yehovah ben fruteri sma taki den ben musu tyari ofrandi; a no ben fruteri den sosrefi sortu ofrandi a ben e feni bun. Sobun, disi e sori taki Kain nanga Abel ben tyari den ofrandi fu den, fu di densrefi ben wani du dati. Den no ben man go baka na ini a Paradijs dyari pe a papa nanga mama fu den ben de fosi; den ben bigin firi a bakapisi fu sondu; èn den no ben de bun moro nanga Gado. A musu de taki a sondu nanga a sari di den ben kon de na ini, ben meki taki den ben e firi taki a de tranga fanowdu fu go suku yepi na Gado. Neleki fa a sori, dan densrefi ben wani òfer wan presenti gi Gado, fu suku a bun-ati fu En.

San ben pasa te fu kaba, na taki Gado ben teki na ofrandi fu Abel, aladi a no ben teki a di fu Kain. Fu san ede? A de so taki Gado ben du dati fu di Abel ben pristeri En a yoisti sani, aladi Kain no ben du dati? Wi no kan taki seiker dati san Gado du no ben abi noti fu du nanga a sortu ofrandi di den tyari, bika Gado no ben taigi nowan fu den tu man disi, sortu ofrandi ben bun èn sortuwan no ben bun. Ma neleki fa a sori, dan ala tu ofrandi ben bun. Soleki fa a ben skrifi na ini a Wet di Yehovah ben gi den Israelsma te fu kaba, dan Gado no ben feni en bun nomo taki den ben tyari meti-ofrandi noso ofrandi fu pisi meti, ma den ben kan òfer losi karu sosrefi, sani di de neleki aleisi, fini blon, sani di den ben baka, nanga win (Lefitikus 6:19-23; 7:11-13; 23:10-13). Sobun a no a sortu ofrandi di Kain nanga Abel ben tyari ben meki taki Gado ben teki a wan ofrandi, aladi a no ben teki a trawan.—Teki gersi Yesaya 1:11; Amos 5:22.

Moro leki fo dusun yari baka dati, na apostel Paulus ben taki: „Fu di Abel ben abi bribi meki a tyari wan ofrandi gi Gado di ben warti moro leki di fu Kain, èn fu a bribi dati ede kotoigi ben gi taki a ben de regtfardiki, fu di Gado ben kan kotoigi fu den presenti di a ben gi” (Hebrewsma 11:4). Sobun, Gado ben fruklari Abel regtfardiki fu di a ben abi bribi. Ma na ini san a ben abi bribi? A ben abi bribi na ini a pramisi fu Yehovah taki A ben o gi a Siri di ben o ’masi na ede fu a sneki’, èn taki A ben o sorgu dati libisma ben o man libi baka na ini a vrede nanga a volmaakti fasi di ben de fosi. Di Abel yere taki a sneki ben o ’masi a Siri na en bakafutu’, dan a kan taki baka di a go denki fu a tori, a kon frustan taki fu man du dati wan ofrandi ben o de fanowdu pe brudu ben sa musu lon (Genesis 3:15). Awinsi fa a no fa, san wi sabi na taki a bribi fu Abel ben meki taki a ben tyari wan ofrandi gi Gado di ben warti moro leki di fu Kain.

Na a srefi fasi wi kan taki dati a no de so taki Gado no ben feni na ofrandi fu Kain bun fu di a no ben tyari a yoisti sortu ofrandi, ma taki Gado no teki na ofrandi fu Kain fu di a ben e tyari ensrefi na wan fasi di ben e sori taki a no ben abi bribi. Yehovah ben taigi Kain krinkrin: „Efu yu go du baka san bun, mi no sa teki yu baka dan?” (Genesis 4:7) A no de so taki Gado no ben feni Kain bun fu di A no ben breiti nanga a ofrandi di Kain ben tyari. Na presi fu dati a ben de fu di „den wroko fu en ben ogri”. Kain ben dyarusu, a ben abi bita-ati gi en brada, èn te fu kaba a kiri en. Na fu den sani disi ede, meki Gado ben drai en baka gi Kain.—1 Yohanes 3:12.