„Den tumusi moi sani di Gado du”, e meki wi du san a wani

„Wi e yere fa den e taki na ini wi eigi tongo fu den tumusi moi sani di Gado du.”​—TORI FU DEN APOSTEL 2:11.

1, 2. Sortu aparti sani pasa na ini Yerusalem na a pisi ten fu a Pinksterfesa fu 33 G.T.?

WAN mamanten na ini a fosi pisi fu a yari 33 G.T., wan tumusi moi sani pasa nanga wan grupu fu man nanga uma, disipel fu Yesus Krestes, di ben kon makandra na ini na oso fu wan sma na ini Yerusalem. „Wantronso wan babari ben kon fu hemel neleki a di fu wan tranga winti di ben e wai, èn a ben furu a heri oso pe den ben sidon na ini. Èn sani di ben gersi fayatongo ben de fu si . . . , èn den alamala ben kon furu nanga santa yeye èn den ben bigin taki na ini difrenti tongo.”—Tori fu den Apostel 2:2-4, 15.

² Wan bigi grupu fu sma ben kon makandra na fesi na oso. Na den mindri yu ben abi Dyu di ben gebore na tra kondre, ’man di ben e lespeki Gado’, di ben kon na Yerusalem fu hori a Pinksterfesa. Den ben fruwondru srefisrefi fu di ibriwan fu den ben man yere fa den disipel ben e taki na ini den eigi tongo „fu den tumusi moi sani di Gado du”. Fa dati ben kan, taki ala den disipel ben e taki na ini difrenti tongo, aladi den ben de sma fu Galilea?—Tori fu den Apostel 2:5-8, 11.

3. Sortu boskopu na apostel Petrus ben gi den sma di ben kon makandra na a Pinksterfesa?

³ Wan fu den sma fu Galilea di ben e taki na ini  tongo ben de na apostel Petrus. A ben fruteri taki wan tu wiki na fesi, wan tu onregtfardiki sma ben kiri Yesus Krestes. Ma Gado ben gi en Manpikin wan opobaka komoto fu dede. Baka dati, Yesus ben sori ensrefi na furu fu den disipel fu en, èn na a okasi dati Petrus nanga wan tu trawan ben de tu. Soso tin dei na fesi, dan Yesus ben opo go na hemel. Na En ben de a sma di ben kanti santa yeye na tapu den disipel fu en. A sani disi ben wani taki wan sani gi den sma di ben kon makandra fu hori a Pinksterfesa? Iya, a no de fu taki. A dede fu Yesus ben opo na pasi gi den fu kisi pardon fu den sondu fu den, èn fu kisi „a fri presenti fu a santa yeye”, efu den ben o poti bribi na en nomo (Tori fu den Apostel 2:22-24, 32, 33, 38). Ma san den sma di ben e si ala den sani disi du, di den yere ’den tumusi moi sani fu Gado’? Èn fa a pisi tori disi kan yepi wi fu ondrosuku wisrefi fu si fa a de nanga wi eigi diniwroko gi Yehovah?

Den kisi deki-ati fu du san Gado wani!

4. Sortuwan fu den profeititori fu Yoèl ben kon tru na a dei fu a Pinksterfesa fu 33 G.T.?

⁴ Wantewante baka di den kisi a santa yeye, den disipel na Yerusalem bigin meki a bun nyunsu fu frulusu bekènti na tra sma. Den bigin nanga den sma di ben kon makandra tapu a mamanten dati fu a Pinksterfesa fu 33 G.T. A preikiwroko fu den ben de a kontru fu wan tumusi prenspari profeititori, di Yoèl, a manpikin fu Petuèl, ben skrifi sowan aiti hondro yari na fesi: „Mi sa kanti mi yeye na tapu ibri sortu skin, èn den manpikin nanga den umapikin fu unu sa taki profeititori trutru. Èn fu a sei fu den owru man fu unu, dren den sa dren. Den yonkuman fu unu fu den sei, den sa si fisyun. Èn srefi na tapu den man-futuboi èn na tapu den uma-futuboi mi sa kanti mi yeye . . . bifo a bigi èn frede dei fu Yehovah kon.”—Yoèl 1:1; 2:28, 29, 31; Tori fu den Apostel 2:17, 18, 20.

5. Na sortu fasi den fosi Kresten ben e taki profeititori? (Luku a futuwortu.)

⁵ Ma san disi ben wani taki? A ben de so taki Gado ben o bigin seti wan heri nyun geslakti fu profeiti, mansma nanga uma-sma, sma di ben o de neleki David, Yoèl, nanga Debora? A ben wani taki dati a ben o gebroiki den sma disi fu taki na fesi san ben o pasa bakaten? Nôno. Kresten ’manpikin nanga umapikin’, man-futuboi nanga uma-futuboi’ ben o taki profeititori na a fasi disi, taki a yeye fu Yehovah ben o meki den taki fu „den tumusi moi sani” di Yehovah ben du kaba, èn fu den sani di a ben o du ete. Sobun den ben o de leki takiman gi a Moro Heiwan. * Ma san den sma di ben de drape du na tapu a sani disi?—Hebrewsma 1:1, 2.

6. San furu fu den sma di ben de na a Pinksterfesa fu 33 G.T. du, baka di den yere a takimakandra fu Petrus?

⁶ Di den sma di ben de drape yere den sani di Petrus ben fruklari, dan furu fu den ben kisi deki-ati fu du san Gado wani. Den „ben teki a wortu fu en nanga den heri ati” èn den „ben teki dopu, èn na a dei dati pikinmoro dri dusun sili ben kon moro” (Tori fu den Apostel 2:41). Fu di sonwan fu den sma dati ben de sma di ben gebore leki Dyu èn trawan ben de sma di ben teki a Dyu bribi, meki den ben sabi den prenspari tori fu Bijbel kaba. A sani disi makandra nanga a bribi di den ben poti na ini den sani di Petrus ben taki, ben meki taki den ben kan teki dopu „na ini a nen fu a Tata èn fu a Manpikin èn fu a santa yeye”  (Mateyus 28:19). Baka di den teki dopu, dan „den ben tan poti prakseri na den leri fu den apostel”. Na a srefi ten, den bigin fruteri trawan fu a nyun bribi disi di den ben feni. Fu tru, „ala dei den ben de doronomo na ini wánfasi na a tempel . . . èn den ben e prèise Gado, èn a heri pipel ben lobi den”. A bakapisi fu a preikiwroko di den ben du, ben de taki „Yehovah ben tan tyari den wan di ben kisi frulusu, kon na den” (Tori fu den Apostel 2:42, 46, 47). Na ini furu fu den kondre pe den nyun bribiman disi ben e libi, Kresten gemeente ben e opo kon. A no de fu taki dati, awinsi na pikinso nomo, a gro disi ben abi fu du nanga a tranga muiti di den bribiman disi ben du fu preiki a „bun nyunsu” di den drai go baka na oso.—Kolosesma 1:23.

A wortu fu Gado abi krakti tapu sma

7. (a) San e hari sma fu ala den pipel fu grontapu kon na a organisâsi fu Yehovah na ini a ten disi? (b) Sortu gro yu denki taki kan feni presi ete na heri grontapu èn na ini a kontren pe yu e wroko? (Luku a futuwortu.)

⁷ Fa a de nanga den wan di wani tron sma di e dini Gado na ini a ten disi? Den musu studeri a Wortu fu Gado finifini tu. Te den e du dati, dan den e kon sabi Yehovah leki wan Gado di „abi sari-ati nanga switifasi, di no e atibron esi-esi èn di abi lobi bun-ati nanga waarheid pasa marki” (Exodus 34:6; Tori fu den Apostel 13:48). Den e leri fu a lusu-paiman di Yehovah seti gi den na wan lobi-ati fasi, nanga yepi fu Yesus Krestes, a sma di kan krin den fu ala sondu nanga yepi fu a brudu fu en (1 Yohanes 1:7). Ma den breiti tu taki den sabi dati Gado taki dati „wan opobaka o de fu den regtfardikiwan nanga den onregtfardikiwan” (Tori fu den Apostel 24:15). Den ati e kon furu nanga lobi gi a Sma pe ala den „tumusi moi sani” disi e komoto, èn dati e meki taki den e preiki fu den prenspari tru tori disi. Te fu kaba den e tron futuboi fu Gado di gi densrefi abra na En, èn den e tan „gro ini a soifri sabi fu Gado”. *—Kolosesma 1:10b; 2 Korentesma 5:14.

8-10. (a) Fa na ondrofenitori fu wan Kresten uma e sori taki a Wortu fu Gado „abi krakti” tapu sma? (b) San na ondrofenitori disi leri yu fu Yehovah èn fu den sani di a e du gi den futuboi fu en? (Exodus 4:12)

⁸ A leri di den futuboi fu Gado e kisi te den e studeri Bijbel no de frafra. San den e leri e naki den ati, a e kenki a fasi fa den e denki, èn a e tron wan pisi fu den libi (Hebrewsma 4:12). Prakseri na eksempre disi fu wan uma di nen Camille. A ben e wroko leki wan sma di e sorgu owrusma. Wan fu den sma di a ben e sorgu ben de Martha, wan Kotoigi fu Yehovah. Fu di Martha ben kensi wan pisi ten kaba, meki taki ala ten wan sma ben musu de fu luku en. Sma ben abi fu memre en taki a musu nyan. Den ben abi fu memre en srefi taki a musu swari a nyanyan fu en. Ma neleki fa wi sa si, dan wán sani ben de di Martha ben e memre heri bun.

⁹ Wan dei, Martha si Camille e krei fu di a ben abi wan tu problema di ben e meki a firi brokosaka. Martha poti en anu lontu Camille èn aksi en fu studeri Bijbel makandra nanga en. Ma sma di e kensi leki Martha ben sa man studeri Bijbel nanga wan trawan? Iya, a ben man du dati! Aladi a ben de so taki a ben frigiti furu sani, toku Martha no ben frigiti a bigi Gado fu en; a no ben frigiti tu den tumusi warti tru tori di a ben leri na ini Bijbel. Di Martha ben e studeri nanga Camille, dan a ben taigi Camille fu leisi den paragraaf, fu luku den bijbeltekst di ben kari na ini den paragraaf, fu leisi na aksi na ondrosei fu a bladzijde, èn dan fu piki na aksi. Disi ben go so doro wan heri pisi ten, èn aladi Martha no ben man du so furu moro, toku Camille ben e leri moro nanga moro fu Bijbel. Martha ben frustan taki a ben de fanowdu taki Camille ben musu abi demakandra nanga tra sma di wani dini Gado tu. Nanga a sani disi na prakseri a ben gi a studenti fu en wan yapon nanga wan susu, so taki Camille ben abi krosi di fiti fu weri te a ben sa go na a fosi konmakandra fu en na ini a Kownukondre zaal.

¹⁰ A ben naki na ati fu Camille trutru fu si a lobi-ati fasi fa Martha ben e poti prakseri na en, èn fu si a bun eksempre fu en, nanga na overtoigi di a ben abi. A ben kon si taki den sani di Martha ben pruberi fu leri en fu Bijbel, ben musu de tumusi prenspari sani, fu di Martha ben frigiti  pikinmoro ala sani, boiti den sani di a ben leri fu den Buku fu Bijbel. Bakaten, di den puru Camille poti na wan tra presi pe den e luku bigisma, dan Camille ben kon frustan taki a ten ben doro taki a ben musu du wan sani now. Na a fosi okasi di a kisi, a waka go na ini wan Kownukondre zaal aladi a ben weri a yapon nanga den susu di Martha ben gi en, èn a ben aksi fu wan bijbelstudie. Camille ben tan go na fesi èn a teki dopu.

Den kisi deki-ati fu sori taki den e hori densrefi na den markitiki fu Yehovah

11. Boiti taki wi de fayafaya na ini a preikiwroko, dan na sortu tra fasi wi kan sori taki a Kownukondre boskopu naki wi ati trutru?

¹¹ Na ini a ten disi yu abi moro leki siksi milyun Kotoigi di, neleki Martha èn now Camille tu, e preiki a „bun nyunsu fu a kownukondre” na heri grontapu (Mateyus 24:14; 28:19, 20). Den „tumusi moi sani di Gado du” e naki na ati fu Kresten na ini a ten disi trutru, neleki fa a ben naki na ati fu den Kresten na ini a fosi yarihondro. Den e frustan taki a de wan bigi grani fu tyari a nen fu Yehovah èn taki a kanti a santa yeye fu en na den tapu. Fu dati ede den e du ala san den man fu „waka na wan fasi di warti gi Yehovah, fu plisi en dorodoro”, aladi den e gebroiki den markitiki fu en na ini ala san den e du. Dati wani taki sosrefi dati den e hori densrefi na den markitiki di Gado poti fu a fasi fa den musu weri krosi èn fa den musu moi densrefi.—Kolosesma 1:10a; Titus 2:10.

12. Sortu rai wi e feni na ini 1 Timoteyus 2:9 10, di abi fu du spesrutu nanga a fasi fa wi musu weri krosi èn moi wisrefi?

¹² Iya, Yehovah sori krin fa a wani taki wi musu moi wisrefi èn fa wi musu weri krosi. Na apostel Paulus ben kari wan tu fu den sani di Gado e aksi fu wi tapu a kontren disi. „Mi wani taki den umasma moi densrefi nanga krosi di fiti, nanga bescheidenfasi èn nanga gosontu frustan, no nanga modo fu brei wiwiri nanga gowtu sani noso peri noso kefalek diri krosi, ma na a fasi di e fiti  umasma di e taki dati den e lespeki Gado, dati wani taki, fu di den e du bun wroko.” * San wi e leri fu den wortu disi?—1 Timoteyus 2:9, 10.

13. (a) San a wani taki fu „weri krosi di fiti”? (b) Fu san ede meki wi kan taki dati Yehovah no e aksi tumusi furu fu wi?

¹³ Den wortu fu Paulus e sori taki Kresten musu „moi densrefi nanga krosi di fiti”. Den no musu de sma di weri syabisyabi krosi noso brokobroko krosi di doti. Pikinmoro ibriwan sma, srefi den mofinawan, kan sorgu taki den e weri bun krosi di krin, èn di fiti. Prakseri wan kondre na ini Zuid-Amerika pe a de so taki ala yari den Kotoigi e waka furu kilometer na ini busi, èn te fu kaba someni yuru nanga wan kruyara fu de na a distrikt kongres fu den. Wanwan leisi wan sma e fadon na ini a liba, noso e priti en krosi fu di wan sani na ini a busi hari en priti aladi den de na pasi e go na a kongres. Sobun te den sma disi doro na a kontren pe a kongres e hori, dan furu tron a de so taki den krosi de pikin syabisyabi. Sobun den e poti ten na wan sei fu nai knopo fasi baka di ben koti, fu meki den rits fu den krosi baka, èn fu wasi èn triki den krosi di den o weri na a kongres. Den e si a kari di den kisi fu kon nyan na a tafra fu Yehovah leki wan warti sani, èn den wani weri krosi di fiti.

14. (a) San a wani taki fu weri krosi na wan „bescheidenfasi èn nanga gosontu frustan”? (b) Fa wi musu weri efu wi wani sori taki wi na sma di abi lespeki gi Gado?

¹⁴ Paulus e fruteri moro fara taki wi musu weri krosi na wan „bescheidenfasi èn nanga gosontu frustan”. Disi wani taki dati den krosi fu wi no musu de nanga tumusi furu pranpran, den no musu de tumusi aparti, krosi di e wiki den sekslostu fu tra sma, krosi di e poti afu fu wan sma skin na doro, noso kefalek sortu modo krosi. Boiti dati wi musu weri krosi na wan fasi di e sori taki wi abi ’lespeki gi Gado’. Fu tru, dati na wan prenspari sani fu go prakseri, a no so? A no de so nomo taki wi musu weri bun krosi te wi e go na den konmakandra, èn dan te wi de na tra okasi wi e poti ala den warskow disi na wan sei. A fasi fa wi e weri krosi èn e moi wisrefi musu sori ala ten taki wi abi lespeki, fu di wi na Kresten èn sosrefi dinari fu Gado ibri momenti fu a dei. A no de fu taki dati wi e weri krosi go na wroko èn na skoro di fiti a sani di wi e go du drape. Toku wi wani weri krosi na wan bescheidenfasi èn na wan fasi di warti. Efu a de so ala ten taki wi krosi e sori krin taki wi na sma di e bribi na ini Gado, dan noiti wi no sa frede fu du okasi preiki fu di wi e syen fu a fasi fa wi weri.—1 Petrus 3:15.

’Un no musu lobi grontapu’

15, 16. (a) Fu san ede meki a prenspari taki wi no du leki grontapu na ini a fasi fa wi e weri krosi èn e moi wisrefi? (1 Yohanes 5:19) (b) Sortu bun reide wi abi fu no teki iniwan modo abra di abi fu du nanga a fasi fa wi e weri krosi noso a fasi fa wi e moi wisrefi?

¹⁵ A rai di skrifi na ini 1 Yohanes 2:15, 16 e gi wi bun tiri sosrefi, so taki wi kan sabi fa wi musu weri krosi èn moi wisrefi. Drape wi e leisi: „No lobi grontapu noso den sani na ini grontapu. Efu wan sma lobi grontapu, dan a lobi fu a Tata no de na en ini; bika ala sani na ini grontapu — a lostu fu a skin nanga a lostu fu den ai nanga a prodo di  wan sma e prodo nanga den sani di a abi fu tan na libi, no e komoto fu a Tata, ma e komoto fu grontapu.”

¹⁶ Disi na trutru bun rai di wi abi fanowdu nownow! Wi e libi na ini wan ten pe a druk fu speri e kon moro hebi. Ma wi no musu gi pasi taki a grontapu sori wi san wi musu weri. A fasi fa sma e weri krosi èn e moi densrefi kon moro ogri na ini den yari di pasa. Srefi bisnisman nanga sma di e du prenspari wroko na ini a libimakandra no kan de leki wan eksempre ini a fasi fa den e weri krosi. A no ala ten wan Kresten kan weri krosi leki fa den e du dati. Disi na ete wan prenspari sani di musu meki taki wi sorgu fu „no meki a seti fu sani disi abi krakti na [wi] tapu moro”, efu wi wani libi akruderi den markitiki fu Gado, èn efu wi wani fu „meki a leri fu wi Frulusuman, Gado, kon moi na ini ala sani”.—Romesma 12:2; Titus 2:10.

17. (a) Sortu aksi wi kan poti gi wisrefi te wi e go bai krosi, noso te wi e luku sortu modo wi e teki abra? (b) Fu san ede meki osofamiri-edeman musu poti prakseri na a fasi fa memre fu den osofamiri e weri krosi?

¹⁷ Fosi yu bai wan krosi, dan a bun fu aksi yusrefi: ’Fu san ede meki a modo disi e hari mi? Mi si a krosi disi na wan pôpi sma di ala sma sabi èn di misrefi lobi tu? A de so taki sma fu wan spesrutu grupu fu ogriman teki a modo disi abra, noso taki den sma di e weri a modo disi moro furu na sma di lobi srefidensi, èn di lobi fu opo densrefi?’ Wi musu luku bun tu fa a krosi de di wi wani bai. Efu a krosi na wan yapon noso wan koto, dan o langa a de? Fa a krosi meki? A krosi de na wan bescheidenfasi, a de wan krosi di fiti èn di warti, noso a de wan sani di span èn di e plak na yu skin? A de wan krosi di e wiki a sekslostu fu tra sma, noso a de wan krosi di de syabisyabi? Aksi yusrefi: ’Mi kan meki wan sma fadon efu mi weri a krosi disi?’ (2 Korentesma 6:3, 4) Fu san ede wi musu broko wi ede nanga den tori disi? A de fu di Bijbel e taki: ’Krestes no ben plisi ensrefi’ (Romesma 15:3). Kresten osofamiri-edeman musu luku bun fa memre fu den osofamiri e weri krosi. Fu di den osofamiri-edeman abi lespeki gi a gran Gado di den e anbegi, meki den no musu draidrai fu gi tranga leri, nanga lobi-ati rai te dati de fanowdu.—Yakobus 3:13.

18. San e gi yu a deki-ati fu poti bun prakseri na a fasi fa yu e weri krosi èn na a fasi fa yu e moi yusrefi?

¹⁸ A boskopu di wi e tyari e komoto fu Yehovah, di na a sma pe ala wartifasi nanga santafasi komoto (Yesaya 6:3). Bijbel e gi wi a deki-ati fu waka na en baka „leki lobi pikin” (Efeisesma 5:1). A fasi fa wi e weri krosi èn e moi wisrefi kan gi grani noso syen na wi hemel Tata. Ma a no de fu taki dati wi wani prisiri en ati!—Odo 27:11.

19. Sortu wini a abi gi wi te wi fruteri trawan fu den „tumusi moi sani di Gado du”?

¹⁹ Fa yu e prakseri fu den ’tumusi moi sani di yu leri taki Gado du’? Fu tru, wi musu breiti taki wi leri a waarheid! Fu di wi e poti bribi na ini a brudu fu Yesus di lon fu wi ede, meki wi e kisi pardon fu wi sondu (Tori fu den Apostel 2:38). A bakapisi na taki wi no abi fu frede fu taki nanga Gado. Wi no e frede dede, soleki fa den sma di no abi howpu e frede. Na presi fu dati, wi abi a dyaranti di Yesus ben gi wi, taki wan dei „ala den sma di de na ini den grebi, o yere en sten, èn den o komopo drape” (Yohanes 5:28, 29). Yehovah sori wi bun-ati di a tyari ala den sani disi kon na krin gi wi. Boiti dati, a kanti a santa yeye fu en na wi tapu tu. Meki a de so fu dati ede taki wi abi warderi gi den bun presenti disi di e meki taki wi abi lespeki gi den hei markitiki fu en èn meki wi prèise en na wan fayafaya fasi, aladi wi e fruteri tra sma fu den „tumusi moi sani” disi.

[Futuwortu]

San yu ben sa piki?

• Sortu „tumusi moi sani” a pipel ben yere tapu a dei fu a Pinksterfesa fu 33 G.T., èn san den ben du tapu dati?

• Fa wan sma e tron wan disipel fu Yesus Krestes èn san a wani taki sosrefi fu de wan disipel?

• Fu san ede meki a prenspari fu poti prakseri na a fasi fa wi e weri krosi èn e moi wisrefi?

• Sortu sani wi musu hori na prakseri te wi e luku sortu krosi noso sortu modo fiti gi wi?

[Aksi fu a tori disi]

[Prenki na tapu bladzijde 15]

Petrus ben meki bekènti taki Yesus ben opo baka fu dede

[Prenki na tapu bladzijde 17]

A fasi fa yu e weri krosi èn e moi yu srefi e gi grani na a Gado di yu e dini?

[Prenki na tapu bladzijde 18]

Kresten papa nanga mama musu luku bun fa den memre fu den osofamiri e weri krosi