O ten Yehovah e blesi den tranga muiti di wi e du?

„LUSU mi, bika dei broko kaba.”

„Mi no sa lusu yu teleki yu blesi mi fosi.”

„Fa yu nen?”

„Yakob.”

„Yu nen no sa de Yakob moro, ma Israel, fu di yu strei nanga Gado èn nanga libisma, so taki yu wini te fu kaba.”—Genesis 32:26-28.

A tumusi aparti takimakandra dati ben de a bakapisi fu wan strei di Yakob, di ben abi 97 yari, ben e strei neleki wan aswaman. Aladi Bijbel no e taki dati Yakob ben de wan sportman, toku a ben aswa wan heri neti langa nanga wan engel. Fu san ede? Yakob ben broko en ede trutru nanga san Yehovah ben pramisi a fositen tata fu en, namku a yeye gudu di a ben o kisi.

Furu yari na fesi Yakob en brada Esau ben lasi en reti leki fosi geborewan, fu di a kenki a reti dati nanga Yakob gi wan komki nanga stofu nyanyan. Now Yakob yere taki Esau de na pasi e kon nanga 400 mansma. A no de fu taki dati Yakob e broko en ede trutru nanga a fasi fa sani ben o waka. Dati meki a wani sabi ete wan leisi efu a pramisi fu Yehovah sa kon tru, efu sani sa waka bun nanga en osofamiri na ini a kondre abrasei fu a Yordanliba. Yakob e du sani now di e kruderi nanga san a ben aksi Gado na ini begi. A e seni furu presenti go na Esau di de na pasi e kon. Fu di Yakob denki taki Esau e kon fu du en ogri, meki Yakob e bigin prati a kampu fu en sosrefi na ini tu grupu, èn a e meki den wefi nanga den pikin fu en waka na ini a lagi watra fu a Yabokliba go abrasei fu a liba. Nanga furu muiti èn nanga furu watra-ai a e span ensrefi gi wan tra sani now. A e strei heri neti nanga wan engel, so taki „a ben man kisi a blesi fu na engel”.—Hosea 12:4; Genesis 32:1-32.

Luku na eksempre fu Rakel, a di fu tu wefi fu Yakob. Dati na a wefi di a ben lobi moro furu. Rakel sabi heri bun taki Yehovah ben pramisi fu blesi Yakob. Rakel en sisa Lea, a fosi wefi fu Yakob, e kisi fo manpikin, ma Rakel no man kisi pikin (Genesis 29:31-35). Ma Rakel no e sidon e firi sari gi ensrefi nomo. Na presi fu dati, a e tan begi Yehovah fu yepi en, èn a e du sani di e kruderi nanga den begi fu en. Neleki fa en fositen mama Sara ben du nanga Hagar, na so Rakel e tyari en uma-futuboi Bilha gi Yakob fu a tron wan wefi gi en. Soleki fa Rakel srefi e taki, dan na a fasi disi „misrefi kan abi  pikin komoto fu na uma dati”. * Bilha e meki tu manpikin gi Yakob, dati na Dan nanga Naftali. Te Naftali gebore, dan Rakel e fruteri o tranga a ben feti nanga den firi fu en: „Mi aswa nanga mi sisa nanga ala mi krakti. Èn mi wini te fu kaba!” Rakel e kisi moro blesi fu di ensrefi e kisi tu manpikin, Yosef nanga Benyamin.—Genesis 30:1-8; 35:24.

Fu san ede Yehovah ben blesi a muiti di Yakob èn sosrefi Rakel ben e du fu kisi san den ben wani? Den ben e poti ala den prakseri na a wani fu Yehovah, èn den ben e warderi a gudu fu den trutru. Den ben e begi Gado fayafaya fu a blesi den, èn baka dati den ben e du sani di kruderi nanga a wani fu Gado èn sosrefi nanga san den ben aksi en na ini begi.

Neleki Yakob nanga Rakel, furu sma na ini a ten disi trutru kan taki dati tranga muiti de fanowdu fu man kisi blesi fu Yehovah. Furu tron den sma disi ben e krei watra-ai, den ben lasi-ati, èn den no ben sabi san fu du. Wan Kresten mama di nen Elizabeth, e memre o furu muiti a ben musu du fu bigin go baka na den Kresten konmakandra doronomo, baka di a no ben go wan langa pisi ten. Dati ben de wan problema gi en trutru, fu di a ben abi feifi boi di ben yongu ete. Boiti dati, en masra no ben de na bribi, èn a ben musu rei 30 kilometer fu go na a moro krosibei Kownukondre zaal. „Furu leisi mi ben musu dwengi misrefi trutru fu go na den konmakandra, ma mi ben sabi taki disi ben de wan bun sani gi mi èn sosrefi gi den boi fu mi. Disi ben yepi den fu frustan taki den konmakandra warti srefisrefi fu go na den.” Yehovah ben blesi den muiti di a sisa disi du. Dri fu den manpikin fu en e dini Gado fayafaya na ini a Kresten gemeente, èn tu fu den dri disi de na ini a furuten diniwroko. A sisa disi, di prisiri srefisrefi fu si fa den boi fu en e go na fesi na ini na anbegi fu Gado, e taki: „Den gro na yeye fasi, moro esi leki mi.” Disi na trutru wan moi blesi gi a tranga muiti di a sisa disi du!

Den tranga muiti di Yehovah e blesi

Te wi e meki muiti srefisrefi èn te wi e wroko tranga, dan dati trutru sa abi winimarki. O moro wi e meki muiti fu du wan wroko, o moro wi e prisiri fu dati. Na so Yehovah meki wi. Kownu Salomo ben skrifi: „Ibriwan sma musu nyan èn dringi trutru èn si a bun fu ala en tranga wroko. A de a presenti fu Gado” (Preikiman 3:13; 5:18, 19). Ma efu wi wani kisi blesi fu Yehovah, dan wi musu du muiti gi sani di prenspari trutru. Fu gi wan eksempre: Yu denki taki Yehovah sa blesi wi efu wi e libi wan libi pe yeye afersi e kon na a di fu tu presi? Yu denki taki wan Kresten di gi ensrefi abra na Yehovah, kan fruwakti taki Yehovah sa blesi en te a e teki wan wroko di o meki taki a no man go doronomo na den Kresten konmakandra pe a kan kisi deki-ati fu trawan na ini a gemeente èn kan kisi leri di e bow a bribi fu en?—Hebrewsma 10:23-25.

Wan sma kan wroko tranga en heri libi langa fu kisi moro bigi frantwortu na wrokope, noso fu meki moro moni. Ma dati no wani taki ete taki a sma sa „si a bun” fu en wroko efu a e du dati sondro fu poti prakseri na yeye afersi. Nanga na agersitori fu a saiman, Yesus ben sori san na a bakapisi te wan sma e du muiti gi sani di no de prenspari. Yesus ben taki dati a siri di „sai na mindri den makabon”, na „a sma di e yere a wortu, ma den broko-ede fu a grontapu disi nanga a bedrigi fasi fu gudu, e kiri a wortu, èn a no abi bun bakapisi” (Mateyus 13:22). Paulus ben warskow wi gi a srefi trapu disi. Boiti dati, a ben taki dati den sma di e suku fu kon gudu nomo „e kon ini wan tesi èn wan trapu èn furu don èn takru lostu, di e meki  sma fadon go na ini pori”. San wi musu du fu wai pasi gi so wan fasi fu libi di kan pori wi na yeye fasi? Paulus ben taki moro fara: ’Lon gi den sani disi èn no poti a howpu fu yu tapu gudu di no e gi seikerfasi, ma tapu Gado di e gi wi ala sani bogobogo fu prisiri fu den.’—1 Timoteyus 6:9, 11, 17.

Awinsi omeni yari wi abi, awinsi o langa wi e dini Yehovah kaba, toku wi alamala kan kisi wini te wi e du tranga muiti tu soleki fa Yakob nanga Rakel ben e du dati. Aladi den ben e suku fu kisi a blesi fu Gado, toku den ben hori na prakseri ala ten san na a gudu di den ben o kisi. Den ben e du dati, awinsi den sani di den ben e ondrofeni ben e frede den, noso ben e meki den brokosaka. Na ini a ten disi, a kan de so tu taki wi e kisi fu du nanga tesi èn nanga problema di e frede wi, di e bruya wi, noso di e meki wi brokosaka srefi. Den sani dati ben kan meki taki wi no man horidoro èn taki wi e gi abra makriki. Na so fasi wi ben o lasi a strei di Satan e strei nanga wi fu kisi wi. Satan kan gebroiki ala san a man fu meki wi lasi a strei. A kan gebroiki sani soleki poku nanga felem, sani di wi e du na ini wi prisiri ten, sport noso tra sani di wi lobi fu du. A kan gebroiki sosrefi a lostu di sma abi fu kisi biginen, noso a lostu fu kon gudu. Sma furu tron e pramisi wi taki wi sa abi bun bakapisi te wi e feti baka den sani disi, ma nofotron wi no man kisi san wi wani. Den sma di e fadon na ini a trapu fu feti baka den sani disi, furu tron e lasi-ati te fu kaba fu di den no e feni san den ben fruwakti. Meki wi de neleki Yakob nanga Rakel fu owruten. Meki wi du muiti fu tron wan sma di trutru e suku fu wini Satan, so taki a no man kisi wi nanga den triki fu en.

Didibri ben o lobi en srefisrefi efu wi ben o gi abra fu di wi lasi-ati krinkrin. Didibri wani meki wi bribi taki ’howpu no de moro, taki nowan fasi no de fu lusu den problema fu wi. A wani meki wi bribi taki a ben o de fu soso efu wi ben o horidoro na ini a strei. Fu dati ede, a de tumusi prenspari taki wi e luku bun taki wi no e go denki sani, soleki ’nowan sma no lobi mi’, èn ’Yehovah frigiti mi’, bika dati kan meki wi lasi a strei. Te wi e tan prakseri den sortu sani disi nomo, dan wi e du wisrefi ogri. A ben kan de so taki wi gi abra? A ben kan de so taki wi no e strei moro teleki wi e kisi wan blesi? Hori na prakseri taki Yehovah e blesi den tranga muiti di wi e du.

Tan strei fu kisi blesi fu Yehovah

Fu man tan tranga na yeye fasi, dan wi musu frustan tu prenspari sani di abi fu du nanga a libi fu wi leki wan futuboi fu Yehovah. (1) Nowan sma man sabi san na den problema, siki, noso broko-ede di a ben kan kisi na ini en libi, èn (2) Yehovah e arki den tranga begi fu den wan di trutru e aksi en fu yepi den èn fu blesi den.—Exodus 3:7-10; Yakobus 4:8, 10; 1 Petrus 5:8, 9.

Srefi te den problema fu yu bigi srefisrefi, èn srefi te yu e firi taki yu no man du san yu wani du, toku yu no musu gi yusrefi abra na „a sondu di e kisi wi makriki”, namku fu lasi bribi (Hebrewsma 12:1). Horidoro na ini a strei teleki yu e kisi wan blesi. Hori pasensi, aladi yu e hori na prakseri taki a grani man Yakob ben aswa heri neti fu man kisi wan blesi. De neleki a gronman di e sai na ini lente èn di e wakti teleki a ten doro fu koti a nyanyan. Wakti nanga pasensi tapu a blesi di Yehovah sa gi yu fu a diniwroko di yu e du gi en, awinsi yu e firi taki a diniwroko fu yu no furu (Yakobus 5:7, 8). Boiti dati, hori den wortu fu a psalm skrifiman na prakseri ala ten: „Den wan di e sai nanga watra-ai, den sa koti srefi nanga bigi prisiri” (Psalm 126:5; Galasiasma 6:9). Tanapu kánkan, èn tan na mindri den wan di e du tranga muiti fu wini a strei.

[Futuwortu]