Yu e meki kruktubribi abi krakti tapu yu libi?

SMA na heri grontapu abi kruktubribi. Son leisi sma e si kruktubribi leki tumusi prenspari sani di abi fu du nanga a kulturu fu den. Noso sma kan si den leki aladei sani di no wani taki noti, ma di e meki sma abi moro prisiri na ini a libi. Na ini den Westsei kondre, sma furu tron no e broko den ede tumusi nanga kruktubribi. Ma na tra presi, soleki Afrika, kruktubribi kan abi bigi krakti tapu a libi fu sma.

A kulturu fu Afrika abi furu fu du nanga kruktubribi. Felem, radio programa, nanga buku di meki na ini Afrika furu tron e poti prakseri na kruktubribi èn na dangra tori. Den tori disi abi fu du nanga sani soleki bonu, na anbegi di sma e anbegi den afo fu den, èn sosrefi nanga den tapu di sma abi. Fu san ede kruktubribi abi so furu krakti tapu sma, èn pe den kruktubribi disi e komoto?

Pe kruktubribi e komoto?

Furu tron sma abi kruktubribi fu di den e frede den yeye fu den dedewan, noso iniwan sortu yeye. Sma e denki taki te spesrutu sani e pasa, dan dati wani taki dati den yeye disi e pruberi fu taigi libisma wan sani, èn fu dati ede den yeye disi e tapu skreki gi den, den e warskow den, noso den e meki sani waka bun gi den.

Sma abi furu kruktubribi sosrefi te a abi fu du nanga a yepi di den e suku fu kon betre baka, èn nanga den dresi di den e gebroiki. Furu sma na ini den pôti kondre no man pai gi den dresi di datra e taigi den fu gebroiki, èn furu tron den dresi disi no de fu feni srefi. Fu dati ede, furu sma di e suku wan fasi fu kon betre baka, noso wan fasi fu tan gosontu e du sani di den afo fu den ben gwenti fu du, den e du afkodrei, èn den e du sani di abi fu du nanga kruktubribi. Boiti dati, den sma disi e firi moro bun te den e kisi yepi fu wan bonuman na presi fu wan datra. Dati de so fu di a bonuman sabi a kulturu fu den èn a e taki a srefi tongo leki den. A sani disi e meki taki sma e tan nanga den kruktubribi fu den.

Sma di abi kruktubribi e denki taki te sma e siki èn te sma e kisi mankeri, dan dati a no aladei sani di kan pasa nanga iniwan sma. Den sma disi e bribi taki den yeye na den wan di e meki taki den sani disi e pasa nanga libisma. Bonuman kan feni taki wan sani e trobi wan dede afo. Noso sma di de leki asi fu den ogri yeye kan taigi wan sma taki a e siki noso taki a kisi mankeri fu di wan sma meki wan tra bonuman kroi en.

Bun furu difrenti kruktubribi de na heri grontapu, èn furu tron a de so taki den gwenti di sma abi na ini wan libimakandra, fositen tori, noso sani di e pasa e meki taki den kruktubribi disi e panya. Ma a kruktubribi di furu sma abi, na taki den musu du wan sani fu plisi wan sma, noso wan sani fu a yeye kondre.

Kruktubribi na sani di no e du wi ogri?

Furu osofamiri breiti trutru te a mama e kisi wan twelengi. Ma den sma di abi kruktubribi kan si a sani dati leki wan marki di e sori taki wan sani o pasa. Gi furu sma na ini wan tu kontren na a  Westsei fu Afrika a sani disi wani taki dati tu gado gebore, èn fu dati ede den e anbegi den twelengi disi. Efu wán noso ala tu fu den twelengi disi dede, dan den sma disi e meki pikin popki fu prenki den twelengi disi, èn na osofamiri musu tyari nyanyan leki ofrandi gi den kruktu gado disi. Na tra presi, sma e si en leki wan fluku te twelengi e gebore, èn son papa nanga mama e kiri wan fu den pikin disi srefi. Fu san ede? We, den sma dati e bribi taki efu ala tu pikin e tan na libi, dan den pikin dati sa kiri a papa nanga mama fu den wan dei.

Den sortu eksempre disi e sori taki aladi son kruktubribi e sori fu de dangra tori nomo di kan fruwondru wi pikinso, toku trawan fu den kan poti sma libi na ini kefar, den kan meki sma lasi den libi srefi. Te wan sma abi wan kruktu denki fu wan aladei sani di pasa, dan den kan kenki na aladei sani dati di no wani taki noti, kon tron wan sani di e poti sma libi na ini kefar.

Iya, fu taki en leti, den sma di abi kruktubribi e dini a gado fu den nanga den bribi dati. Fu di wi sabi taki kruktubribi kan tyari kefar kon gi wi, meki a fiti fu aksi: Suma wi e dini te wi abi kruktubribi èn te wi e du sani di abi fu du nanga den sortu bribi dati?

A sma fu pe kruktubribi e komoto

Aladi buweisi de taki Satan èn sosrefi ogri yeye de trutru, toku son sma e taki dati disi no tru. Ma na a ten fu orloku, dan soso rampu ben kan miti wi te wi no wani bribi taki wi abi wan ogri-ati feanti. Dati ben kan pasa tu te den feanti fu wi na yeye di tranga moro libisma, bika na apostel Paulus ben skrifi: ’Wi e feti . . . nanga den ogri yeye.’—Efeisesma 6:12.

Aladi wi no man si den ogri yeye, toku den de trutru. Bijbel e fruteri taki wan yeye di Efa no ben man si ben gebroiki wan sneki èn a ben du neleki a sneki ben taki nanga a fosi uma, namku Efa, èn a yeye disi meki taki na uma opo ensrefi teige Gado. (Genesis 3:1-5). Bijbel e kari a yeye sma disi „a fosi sneki, a wan di den e kari Didibri nanga Satan, di e kori ala sma na heri grontapu” (Openbaring 12:9). A yeye dati, namku Satan, ben abi bun bakapisi di a ben gi tra engel deki-ati fu opo densrefi teige Gado (Yudas 6). Den ogri-ati engel disi tron ogri yeye, dati wani taki, feanti fu Gado.

Yesus ben puru ogri yeye na sma tapu, èn den disipel fu en ben e du dati tu (Markus 1:34; Tori fu den Apostel 16:18). Den yeye disi a no dede afo, bika den dedewan „no sabi notinoti” (Preikiman 9:5). Na presi fu dati, den yeye dati na  den engel di ben opo densrefi teige Gado fu di Satan ben kori den. Wi no musu denki taki nowan ogri sa miti wi te wi e suku yepi na den yeye disi, noso te wi e meki den abi krakti na wi tapu. Fu taki en leti, den yeye dati wani du wi ogri ala ten, neleki fa a fesiman fu den, Satan Didibri, wani du dati (1 Petrus 5:8). Den wani meki wi drai baka gi a wan enkri sani di kan yepi libisma, èn dati na a Kownukondre fu Gado.

Bijbel e tyari wan fu den fasi kon na krin fa Satan nanga den ogri yeye fu en e kori sma: „Satan srefi e tan kenki ensrefi na ini wan engel fu leti” (2 Korentesma 11:14). Satan wani kori wi fu denki taki a kan gi wi wan moro bun libi. Fu dati ede, a kan gersi fu wan syatu pisi ten leki ogri yeye e tyari wini kon gi wi. Ma den no man lusu den problema fu wi fu ala ten (2 Petrus 2:4). Den trutru no man gi nowan enkri sma têgo libi, èn heri esi densrefi sa kisi pori (Romesma 16:20). Wi Mekiman na a wan-enkri sma di kan gi wi têgo libi nanga trutru koloku, èn En na a moro bun Sma di kan kibri wi fu ogri yeye.—Yakobus 4:7.

Gado e krutu den sma di e du afkodrei soso fu di den abi yepi fanowdu (Deuteronomium 18:10-12; 2 Kownu 21:6). Den sma dati abi demakandra nanga a feanti, fu di den e wroko makandra nanga den yeye di tori Gado! Te yu e leisi horoskoop, e suku yepi na wan bonuman fu a lo fu yu, noso te yu e du sani di abi fu du nanga kruktubribi, dan dati ben sa wani taki dati yu e gi den ogri yeye okasi fu abi krakti tapu den bosroiti di yu e teki na ini yu libi. Dati na a srefi leki te yu e opo yusrefi teige Gado makandra nanga den.

Wan fasi de fa wi kan sorgu taki ogri no e miti wi?

Ade * na wan man di e libi na ini Niger. Wan furuten preikiman fu Yehovah Kotoigi ben e studeri Bijbel nanga a man disi. Ade ben fruteri fu san ede a ben abi wan tapu na ini a wenkri fu en: „Mi abi furu feanti”. A Kotoigi di ben e gi Ade leri fu Bijbel, sori en taki Yehovah wawan trutru kan kibri wi. A leisi Psalm 34:7 gi Ade, pe skrifi: „Na engel fu Yehovah e seti ensrefi lontu den wan di e frede en, èn a e frulusu den.” Disi na san Ade ben abi fu taki: „Efu Yehovah trutru kan kibri mi, dan mi sa puru a tapu na ini mi wenkri.” Now, furu yari baka dati, a e dini leki wan owruman èn  sosrefi leki wan furuten dinari. Nowan fu den feanti fu en du en ogri.

Bijbel e sori taki ten nanga sani di e pasa èn di sma no sabi na fesi, e miti wi alamala, efu wi abi kruktubribi, noso efu wi no abi den (Preikiman 9:11). Ma Yehovah noiti e tesi wi nanga takru sani (Yakobus 1:13). Wi de sondu sma èn wi e dede fu di wi kisi sondu fu Adam (Romesma 5:12). Leki bakapisi fu dati, ibri sma e siki wawan leisi èn den e meki fowtu sosrefi di kan tyari takru bakapisi kon gi den. Fu dati ede, a no ben o bun fu taki dati ogri yeye de frantwortu gi ala siki noso problema di e miti wi. Te wi ben o abi a bribi dati, dan dati ben kan tron wan tesi gi wi, fu di wi ben kan pruberi fu suku wan fasi fu plisi den yeye. * Te wi siki, dan wi musu suku a yoisti yepi na wan datra, èn wi no musu suku rai na Satan Didibri di de „wan leiman èn a tata fu lei” (Yohanes 8:44). Sma ben ondrosuku sani èn den kon sabi taki den sma di e libi na ini kondre pe furu sma e bribi den kruktubribi fu den afo fu den, no e libi moro langa leki sma na ini tra kondre. Den sma di abi den kruktubribi dati no abi wan moro bun libi tu leki den sma di e libi na ini tra kondre. Fu dati ede, a de krin fu si taki kruktubribi no sa meki taki wi abi wan moro bun gosontu.

Gado makti moro leki iniwan ogri yeye, èn a wani taki sani waka bun nanga wi. „Den ai fu Yehovah de na tapu den regtfardikiwan, èn den yesi fu en e arki den tranga begi fu den” (1 Petrus 3:12). Begi en fu kibri yu èn fu gi yu koni (Odo 15:29; 18:10). Meki muiti fu frustan en Santa Wortu, a Bijbel. Soifri sabi fu Bijbel na a moro bun sani di kan kibri wi. A sa yepi wi fu kon si fu san ede takru sani e pasa èn san wi kan du fu sorgu taki na Almakti Gado feni wi bun.

Winimarki di wi e kisi te wi sabi Gado

Soifri sabi fu Yehovah èn fu den prakseri fu en, na den moro prenspari sani di kan meki taki wi trutru e kisi kibri. Wi no sa kisi kibri te wi no sabi Yehovah èn te wi abi kruktubribi. A tori fu Jean, wan man fu Benin, e sori disi krin. Kruktubribi ben rutu dipi na ini a famiri fu Jean. Soleki fa den sma fu a lo fu Jean ben e bribi, dan wan uma di ben kisi wan pikin no so langa pasa, ben musu tan neigi dei na ini wan pikin kampu di ben meki spesrutu gi en. Efu a ben kisi wan umapikin, dan a ben sa musu tan seibi dei na ini a pikin kampu dati.

Na ini 1975, a wefi fu Jean kisi wan moi beibi boi, èn den gi en a nen Marc. Fu di Jean nanga en wefi ben sabi Bijbel, meki den no ben wani abi noti fu du nanga ogri yeye. Ma Jean ben o frede, èn a ben o meki sma dwengi en fu meki en wefi tan na ini a pikin kampu, soleki fa den sma dati ben e bribi taki dati ben musu pasa? Nôno, den no du san a lo fu den ben fruwakti fu den.—Romesma 6:16; 2 Korentesma 6:14, 15.

Wan ogri miti na osofamiri fu Jean? Furu yari pasa sensi a ten dati, èn Marc e dini now leki wan dinari ini a diniwroko na ini a gemeente fu Yehovah Kotoigi na ini a birti pe a e tan. A heri famiri breiti taki den no meki kruktubribi abi krakti tapu a libi fu den èn den breiti sosrefi taki den no meki kruktubribi poti a yeye fasi fu den na ini kefar.—1 Korentesma 10:21, 22.

Tru Kresten no musu abi noti fu du nanga den ogri sani di sma e du leki bakapisi fu den kruktubribi di den abi, èn den musu teki a yeye leti di a Mekiman, Yehovah, èn sosrefi en Manpikin, Yesus Krestes e gi den. Na so fasi den kan de sondro broko-ede, fu di den sabi taki den e du san bun na ini Gado ai.—Yohanes 8:32.

[Futuwortu]

[Faki/Prenki na tapu bladzijde 5]

Wan tu fu den kruktubribi di de na heri grontapu

• Te tu tiki di sma e gebroiki fu nyan, e tanapu leti-opo na ini wan komki nanga aleisi, dan dati wani taki dati wan sma o dede

• Te wan sma e si wan owrukuku te deiten, dan dati sa tyari takru bakapisi kon gi en

• Te wan kandra e dede na a ten fu wan seremonia, dan dati wani taki dati ogri yeye de krosibei

• Te wan sma e meki wan prasoro fadon na tapu a gron, dan dati wani taki dati wan sma o kiri wan trawan na ini na oso

• Te wan sma e poti wan ati na tapu wan bedi, dan dati sa tyari takru bakapisi kon

• Wan dyendyen di e loi e yagi ogri yeye gowe

• Te wan sma man bro ala den kandra kiri wantron di de na tapu wan friyari kuku, dan a winsi fu en sa kon tru

• Te wan sibi e tanapu na sei wan bedi, dan dati e gi ogri yeye di de na ini a sibi na okasi fu wisi a bedi

• Te wan blaka pusipusi e koti yu pasi, dan dati wan taki dati sani no sa waka bun gi yu

• Te wan sma e meki wan forku fadon na gron, dan dati wani taki dati wan mansma sa kon na en oso

• Wan fowtow fu asaw di anga na a skotu, sa tyari bun bakapisi kon te a fowtow de leti abrasei fu wan doro

• Te wan sma e anga wan isri fu asi futu, na tapusei fu wan doro, dan dati sa tyari bun bakapisi kon

• Te wan sortu prani di sma e kari ivy e gro na a oso skin, dan dati e kibri sma gi ogri yeye

• Te wan sma e waka na ondro wan trapu, dan dati e tyari takru bakapisi kon

• Te wan sma e broko wan spikri, dan dati wani taki dati sani no sa waka bun gi en seibi yari langa

• Te yu e meki blaka pepre fadon, dan dati wani taki dati yu nanga yu mati sa kisi trobi

• Te wan sma e meki sowtu fadon, dan sani no sa waka bun gi en efu a no e trowe pikinso sowtu abra a skowru fu en kruktu-anu

• Te wan sma e meki wan sturu sekiseki aladi a no e sidon na ini, dan a sma dati e kari ogri yeye fu sidon na ini

• Te wan sma e libi den susu fu en drai tapu, dan dati sa tyari takru bakapisi kon

• Te wan sma dede, dan den fensre musu opo so taki a sili fu a dedesma kan go na dorosei

[Faki na tapu bladzijde 6]

Kruktubribi no abi krakti na en tapu moro

Yehovah Kotoigi ben e preiki na ini wan kontren na Zuid-Afrika. Di den Kotoigi naki na tapu wan doro, dan a sma di opo a doro ben de wan uma di ben e weri sani di wan Sangoma (wan uma di e du bonu) gwenti fu weri. Den Kotoigi ben wani gowe fu drape, ma na uma ben wani nomonomo taki den fruteri en a boskopu fu den. Wan fu den Kotoigi leisi Deuteronomium 18:10-12 fu sori en san Bijbel e taki fu afkodrei. Na uma di ben e du bonu, arki a boskopu èn a ben wani wan bijbelstudie. A taki dati efu a bijbelstudie ben o overtoigi en taki Yehovah no ben feni en bun taki a ben de wan Sangoma, dan a ben o tapu nanga a wroko dati.

Baka di a gebroiki Bijbel fu studeri kapitel 10 fu a buku Joe kan libi foe tego na ini wan paradijs na grontapoe, dan a bron ala den sani fu en di ben abi fu du nanga bonuwroko, èn a bigin go na den konmakandra na ini a Kownukondre zaal. Boiti dati, a trow nanga a patna fu en, aladi en nanga a man dati ben prati 17 yari langa. Now den ala tu na Kotoigi fu Yehovah di gi densrefi abra na en, èn di teki dopu sosrefi.

[Prenki na tapu bladzijde 6]

Wan „Sangoma” e trowe bonyo fu kon sabi nanga yepi fu afkodrei fu san ede wan sma siki

[Prenki na tapu bladzijde 7]

Soifri sabi fu Gado trutru e kibri wi èn wi sa de koloku