„A no ben taki nanga den sma sondro fu fruteri wan agersitori”

„Yesus gebroiki agersitori fu fruteri den sma ala den sani disi. Iya, a no ben taki nanga den sma sondro fu fruteri wan agersitori.”​—MATEYUS 13:34.

1, 2. (a) Fu san ede meki sma no e frigiti bun agersitori so makriki? (b) Sortu agersitori Yesus ben e gebroiki, èn sortu aksi e opo kon di abi fu du nanga a fasi fa a ben e gebroiki den? (Luku a futuwortu sosrefi.)

YU KAN memre wan agersitori di yu ben yere, kande na ini wan publikitaki someni yari pasa? Bun agersitori na sani di wi no e frigiti so makriki. Wan skrifiman ben taki dati agersitori „e meki yesi tron ai fu di a de leki den arkiman man si den sani di den e yere.” Disi de so fu di furu tron wi man frustan wan sani moro bun te a gersi leki wi e si a sani e pasa leti na wi fesi. Fu dati ede, agersitori kan meki taki wi man frustan sani moro makriki. Agersitori kan meki den wortu di wi e yere kon na libi gi wi, èn den e leri wi prenspari sani di wi no sa frigiti.

² Nowan leriman na grontapu ben sabi fa fu gebroiki agersitori moro bun leki fa Yesus Krestes ben gebroiki den. Ala den sortu anansitori di Yesus ben e gebroiki fu leri sma wan sani, na tori di sma e memre na wan makriki fasi srefi na ini a ten disi, iya, sowan tu dusun yari baka di a ben tyari den kon na fesi. * San meki taki Yesus ben e wroko so furu nanga a fasi disi fu gi leri? San ben meki taki den agersitori fu en ben abi so furu krakti tapu sma?

Fu san ede Yesus ben e gebroiki agersitori fu gi sma leri?

3. (a) San Mateyus 13:34, 35 e kari leki wan fu den prenspari sani di e sori fu san ede Yesus ben e gebroiki agersitori? (b) San e sori taki Yehovah musu e si a fasi disi fu gi leri leki wan prenspari sani?

³ Bijbel e kari tu prenspari sani di e sori fu san ede Yesus ben e gebroiki agersitori. Na a fosi presi, a ben meki profeititori kon tru fu di a du dati. Na apostel Mateyus ben skrifi: „Yesus gebroiki agersitori fu fruteri den sma ala den sani disi. Iya, a no ben taki nanga den sma sondro fu fruteri wan agersitori, so taki den sani di a profeiti taki ben kan kon tru, namku:  ’Mi sa opo mi mofo fu taki agersitori’” (Mateyus 13:34, 35). „A profeiti” di Mateyus e taki fu en na a sma di skrifi Psalm 78:2. Someni yarihondro bifo Yesus ben gebore, Gado ben meki a psalm skrifiman skrifi a sani disi nanga yepi fu en santa yeye. A de wan tumusi aparti sani taki Yehovah ben taki someni hondro yari na fesi kaba, taki a Manpikin fu en ben o gi sma leri nanga yepi fu agersitori! We, a no de fu taki dati Yehovah musu e si a fasi disi fu gi leri leki wan tumusi warti sani!

4. San Yesus ben taki fu sori fu san ede a ben e gebroiki agersitori?

⁴ Leki di fu tu sani, dan Yesus srefi ben taki dati a ben e gebroiki agersitori fu tyari kon na krin suma no ben wani opo den ati fu teki den leri fu en. Baka di a ben fruteri wan „bigi ipi” fu sma a tori di abi fu du nanga a saiman, dan den disipel fu en aksi en: „Fu san ede yu e taki nanga den nanga yepi fu agersitori?” Yesus ben piki: „Na unu e kisi a grani fu frustan den santa kibritori fu a kownukondre fu hemel, ma den sma dati no e kisi a grani disi. Dati meki mi e taki nanga den nanga yepi fu agersitori, bika aladi den e luku, den e luku fu soso, èn aladi den e yere, den e yere fu soso, èn den no e frustan san a wani taki; èn ini a tori fu den, a profeititori fu Yesaya e kon tru di e taki: ’Te unu e yere, unu sa yere, ma unu no sa man frustan en kwetikweti, èn te unu e luku, unu sa luku, ma unu no sa si kwetikweti. Bika na ati fu a pipel disi kon tranga.’”—Mateyus 13:2, 10, 11, 13-15; Yesaya 6:9, 10.

5. Fa den agersitori di Yesus ben fruteri den arkiman fu en ben tyari kon na krin suma ben abi sakafasi èn suma ben abi heimemre?

⁵ Fa den agersitori fu Yesus ben tyari kon na krin san ben de na ini na ati fu sma? Son leisi a ben de so taki den arkiman fu en ben abi fu ondrosuku sani fu kon sabi san den wortu fu Yesus ben wani taki trutru. Dati ben meki taki sma di ben abi sakafasi ben e aksi Yesus fu fruteri moro fini san den tori dati ben wani taki (Mateyus 13:36; Markus 4:34). Na a ten dati, den agersitori fu Yesus ben e tyari tru tori kon na krin gi den sma di ben abi sakafasi èn di ben e angri fu yere dati; na a srefi ten den agersitori fu Yesus ben e kibri den tru tori fu Gado gi den wan di ben abi heimemre. Fu tru, Yesus ben de wan tumusi bun leriman! Meki wi go luku wan tu sani now di meki taki den agersitori fu en ben abi so furu krakti tapu sma.

A no ala ten a ben e fruteri a fini fu wan tori

6-8. (a) San den arkiman fu Yesus na ini a fosi-yarihondro no ben abi ete fu yepi den fu memre den tori fu Yesus? (b) Sortu eksempre e sori taki a no ala ten Yesus ben e fruteri a fini fu den agersitori di a ben e fruteri sma?

⁶ Oiti yu aksi yusrefi fa den fosi-yarihondro disipel ben feni en fu de drape fu yere fa Yesus ben e gi leri? Den disipel fu Yesus ben abi a bigi grani fu yere a sten fu en. Ma fu di den sani di Yesus ben taki no ben skrifi na tapu papira ete, meki den no ben man leisi den baka fu memre den na sani di den ben yere. Na presi fu dati, den ben abi fu hori den wortu fu Yesus na ini den ati èn na ini a frustan fu den. Fu di Yesus ben man gebroiki agersitori na so wan koni fasi, meki a ben kon moro makriki gi den disipel fu en fu memre den sani di a ben e leri den. Fa so?

⁷ A no ala ten Yesus ben e fruteri a fini fu wan tori. Te wan spesrutu prakseri na ini wan tori ben de prenspari noso te a prakseri dati ben de fanowdu fu poti krakti tapu a sani di a ben wani leri sma, dan Yesus ben e sorgu taki a fruteri a fini fu a pisi tori dati. Fu dati ede, a ben taki soifri omeni skapu ben tan abra di a skapuman ben go fu suku a wan skapu di ben lasi pasi. Wi e leisi tu dati a ben taki soifri omeni yuru den wrokoman ben wroko na ini a droifidyari, èn omeni talenti wan basi ben gi na den wrokoman fu en fu den ben kan luku a gudu dati gi en.—Mateyus 18:12-14; 20:1-16; 25:14-30.

⁸ Na a srefi ten, Yesus ben sorgu taki a no ben e taki a fini fu wan agersitori te dati ben kan meki taki a no ben o de krin moro san na agersitori ben wani taki. Prakseri a tori di a ben fruteri fu a srafu di no ben abi sari-ati gi wan tra srafu leki ensrefi. Yesus no ben fruteri fa a du kon taki a srafu dati ben kon abi wan paiman fu 60.000.000 denari. Yesus ben wani sori nomo o prenspari a de fu gi trawan pardon. Fu dati ede, a no ben de fanowdu fu sabi fa a ben du kon taki a srafu kon abi a paiman dati. San ben prenspari na san en fu en sei ben du nanga wan tra srafu di no ben musu pai en so furu moni srefi, aladi ensrefi no ben abi fu pai a bigi paiman fu en moro (Mateyus 18:23-35). So a de tu nanga na agersitori fu a manpikin di ben lasi. Na ini na agersitori dati Yesus no fruteri tu fu san ede a moro yongu manpikin wantronso ben wani a pisi fu a famirigudu di a ben abi reti na tapu. A no e fruteri sosrefi fu san ede a yonkuman disi frumorsu a gudu di a ben kisi. Ma na  a tra sei Yesus fruteri finifini fa a papa ben e firi èn san a du di a si taki en manpikin ben kon kenki èn taki a ben drai kon baka na oso. A fasi fa Yesus ben fruteri finifini fa a papa ben tyari ensrefi, ben de tumusi prenspari fu meki den arkiman fu en frustan krin san Yesus ben wani leri den, namku taki Yehovah e gi sma „furu pardon”.—Yesaya 55:7; Lukas 15:11-32.

9, 10. (a) Na san Yesus ben poti prakseri moro furu te a ben e taki fu den sma na ini den agersitori fu en? (b) Na sortu fasi Yesus ben meki a kon moro makriki gi den arkiman fu en èn gi tra sma sosrefi fu memre den agersitori fu en?

⁹ Yesus ben e gebroiki koni sosrefi te a ben e taki fu den sma na ini den agersitori fu en. Na presi fu fruteri finifini fa den sma ben tan, noso fa den fesi ben de, dan moro furu Yesus ben poti prakseri na den sani di den ben du èn na a fasi fa den ben tyari densrefi na ini den tori di a ben e fruteri. Sobun, di Yesus fruteri fu a bun Samariaman, dan a no fruteri finifini fa a man fesi ben tan èn sortu krosi a ben weri. Na presi fu dati a poti prakseri na wan sani di ben de moro prenspari. A fruteri fa a man disi ben sori sari-ati fu di a yepi wan Dyu di ben didon na sei pasi nanga hebi mankeri. Na ini na agersitori disi, Yesus taki soso fu sani di ben de fanowdu fu leri wi taki wi musu sori lobi sosrefi gi tra sma di no de fu wi eigi kondre noso fu wi eigi lo.—Lukas 10:29, 33-37.

¹⁰ Fu di Yesus ben abi a gwenti fu luku bun o ten a ben e fruteri a fini fu wan tori èn o ten a no ben e du dati, meki den agersitori fu en ben syatu èn makriki fu frustan. Na a fasi dati, a ben meki a kon moro makriki gi den fosi-yarihondro arkiman fu en fu memre den agersitori disi, èn fu tan hori na prakseri san den ben leri fu den. Baka ten furu sma di ben o leisi den Evangelietori di skrifi nanga yepi fu santa yeye, ben o kisi wini sosrefi fu den agersitori disi.

A ben e taki fu sani fu na aladei libi

11. Gi wan tu eksempre fu sani di Yesus ben gebroiki na ini den agersitori fu en, sani di abi fu du nanga na aladei libi èn di a ben si na a pisi ten di a ben e gro kon bigi na ini Galilea.

¹¹ Yesus ben abi a koni fu gebroiki agersitori di ben abi fu du nanga na aladei libi fu den arkiman fu en. Furu fu den agersitori fu en, ben abi fu du kande nanga sani di a ben si di a ben e gro kon bigi na ini Galilea. Prakseri pikinso fa a libi fu en ben de di a ben yongu ete. A no de fu taki dati a ben si furu leisi fa en mama ben e teki pikinso blon di ben kon swa èn fa a ben moksi dati nanga nyun blon di a ben e masi fu meki brede. A si sosrefi taki en mama ben e gebroiki a blon dati leki srudeki fu meki a lala brede sweri (Mateyus 13:33). Someni leisi a si fa fisiman ben e saka den fisinèt fu den na ini a moi blaw watra fu a Se fu Galilea (Mateyus 13:47). Someni leisi a si fa pikin ben e prei na wowoyo (Mateyus 11:16). We, soleki fa a sori, dan Yesus ben poti prakseri sosrefi na tra sani di sma ben gwenti du na ini na aladei libi, èn a gebroiki den sani dati na ini den agersitori fu en. A ben taki fu siri di sma ben e sai, fu prisiri trowfesa di sma ben e hori, èn fu gron pe sma ben e prani siri  nyanyan di ben e kon lepi na ini a son.—Mateyus 13:3-8; 25:1-12; Markus 4:26-29.

12, 13. Fa a tori di Yesus fruteri fu a tarwe nanga a takru wiwiri, e sori krin taki a ben sabi fa a libi fu sma na ini a ten dati ben de?

¹² A no e fruwondru wi fu dati ede taki difrenti sani fu na aladei libi, de fu feni baka na ini den furu agersitori fu Yesus. Sobun, fu frustan moro krin na sortu koni fasi a ben e gebroiki a fasi disi fu gi leri, dan a bun efu wi go luku fosi san den sani di a ben e fruteri ben wani taki gi den Dyu arkiman fu en. Meki wi go luku tu eksempre.

¹³ A fosiwan na a tori fu a tarwe nanga a takru wiwiri. Na ini na agersitori disi Yesus ben fruteri fu wan man di ben sai tarwe na ini a gron fu en. Ma baka dati „wan feanti” fu en pasa go na ini a srefi gron dati fu sai takru wiwiri na mindri a tarwe. Fu san ede Yesus ben gebroiki so wan tori leki eksempre? We, hori na prakseri taki a ben e fruteri na agersitori disi krosibei fu a Se fu Galilea èn no frigiti taki moro furu fu den sma di ben e libi drape ben de gronman. San moro takru gi wan gronman leki te wan feanti fu en e go na wan kibrikibri fasi na ini a gron pe a gronman prani tarwe, fu sai takru wiwiri na mindri a tarwe? Wet di sma ben meki na ini a ten dati, e sori taki a sani disi ben e pasa trutru. A de krin taki Yesus gebroiki wan sani di den arkiman fu en ben man frustan heri bun na ini a ten dati.—Mateyus 13:1, 2, 24-30.

14. Fu san ede a de so wan moi sani taki Yesus gebroiki a pasi „di ben saka komoto fu Yerusalem fu go na Yerikow” fu poti krakti tapu san a ben wani leri sma nanga na agersitori fu en?

¹⁴ A di fu tu eksempre na a tori fu a bun Samariaman. Yesus ben bigin a tori fu en na a fasi disi: „Wan man ben saka komoto fu Yerusalem fu go na Yerikow di fufuruman ròs en; den puru en krosi na en skin èn den fon en, dan den gowe libi en dededede” (Lukas 10:30). San moi, na taki Yesus gebroiki a pasi „di ben saka komoto fu Yerusalem fu go na Yerikow” fu meki den arkiman fu en frustan san a ben wani leri den. Di Yesus ben e fruteri na agersitori disi, dan a ben de na ini Yudea, no tumusi fara fu Yerusalem. Sobun, a musu de taki den arkiman fu en ben sabi a pasi di a ben e taki fu en. Ala sma ben sabi taki a pasi dati ben de wan ogri pasi fu waka, spesrutu te wan sma ben sa de en wawan. A pasi ben abi furu boktu èn a ben e pasa na ini kontren pe nowan sma no ben e libi. Fu dati ede a ben makriki gi fufuruman fu seti luru drape gi sma.

15. Fu san ede nowan sma no ben kan taki dati a priester nanga a Leifisma ini Yesus agersitori fu a bun Samariaman, ben abi leti fu no yepi a man di ben e didon na tapu a pasi?

¹⁵ Ete wan tra sani de di prenspari srefisrefi na ini a tori di Yesus taki fu a pasi „di ben saka komoto fu Yerusalem fu go na Yerikow”. Soleki fa a tori e sori, dan wan priester èn baka dati wan Leifisma sosrefi ben e waka pasa na a pasi dati. Ma nowan fu den tu man disi du wan sani fu yepi a man di ben e didon na tapu a pasi (Lukas 10:31, 32). Den priester ben e du wroko na ini a tempel na Yerusalem èn den Leifisma ben e yepi den. Furu fu den priester nanga den Leifisma ben e tan na Yerikow te den no ben abi fu wroko na ini a tempel. Den ben du dati fu di Yerikow ben  de soso 23 kilometer fu Yerusalem. Sobun, dati e sori taki a ben de a gwenti fu den sma disi fu waka pasa na a pasi dati. Luku sosrefi taki a priester nanga a Leifisma ben e waka na a pasi di ben „saka komoto fu Yerusalem”, sobun den ben e waka gowe fu a tempel. * Dati wani taki dati nowan sma no ben kan taki dati den man disi ben abi leti fu waka pasa a man di ben e didon na tapu a pasi. Nowan sma ben kan taki: ’Iya, ma kande den man disi no yepi a man di ben kisi mankeri, fu di a ben gersi leki a ben dede, èn efu den ben o fasi wan dedeskin, dan dati ben o meki taki fu wan pisi ten den no ben o de krin fu dini na a tempel’ (Lefitikus 21:1; Numeri 19:11, 16). A no de krin taki den agersitori fu Yesus ben abi fu du nanga sani di den arkiman fu en ben sabi?

Agersitori di ben abi fu du nanga den sani di Yehovah meki

16. Fu san ede a no e fruwondru wi taki Yesus ben sabi so furu fu den sani di Gado meki?

¹⁶ Wan tu fu den agersitori di Yesus ben e gebroiki e sori taki Yesus sabi furu fu bromki, meti, èn fu sani leki alen nanga winti (Mateyus 6:26, 28-30; 16:2, 3). Fa a ben kon sabi den sani dati? A no de fu taki dati di Yesus ben e gro kon bigi na ini Galilea, a ben abi na okasi fu luku den sani di Yehovah meki. Moro fara a de so tu taki Yesus na a „fosi geborewan fu ala den sani di Gado meki”, èn Yehovah gebroiki en leki a „tumusi bun wrokoman” fu meki ala sani (Kolosesma 1:15, 16; Odo 8:30, 31). A e fruwondru wi dan taki Yesus ben sabi so furu fu den sani di Gado meki? Meki wi go luku fa a gebroiki a sabi disi na wan koni fasi te a ben e gi trawan leri.

17, 18. (a) Fa den wortu fu Yesus di de fu feni na ini Yohanes 10 e sori taki a ben sabi heri bun fa skapu ben e tyari densrefi? (b) San sma di ben go fisiti den kondre di Bijbel e taki fu den, ben taki fu a banti di skapuman abi nanga den skapu fu den?

¹⁷ Wan fu den moro moi agersitori fu Yesus na a wan di de fu feni na ini Yohanes kapitel 10. Drape a e agersi a tranga banti di a abi nanga den bakaman fu en, nanga a banti di wan skapuman abi nanga den skapu fu en. Den wortu fu Yesus e sori krin taki a ben sabi heri bun fa den osometi disi ben e tyari densrefi. A ben e sori taki skapu de klariklari fu meki wan sma tiri den, èn taki den e tan waka baka a skapuman fu den (Yohanes 10:2-4). Sma di go fisiti den kondre di Bijbel e taki fu den, ben man si sortu moi banti skapuman abi nanga den skapu fu den. Na ini a di fu 19 yarihondro H. B. Tristram, wan man di e ondrosuku sani soleki meti, bromki, nanga tra sani di abi libi, ben taki: „Wan leisi mi ben si fa wan skapuman ben e prei nanga den skapu fu en. A ben du leki a o lon gowe; den skapu fu en lon na en baka èn den lontu en. . . . Te fu kaba, ala den skapu ben de lontu en, èn den ben e dyompodyompo fu prisiri.”

¹⁸ Fu san ede meki skapu e waka na baka a skapuman fu den? Fu di „den sabi en sten”, Yesus ben taki (Yohanes 10:4). A de so trutru taki skapu sabi a sten fu a skapuman fu den? Na ini a buku The Historical Geography of the Holy Land wan man di nen George A. Smith ben skrifi san a ben si nanga en eigi ai. A ben taki: „Son leisi a ben de so taki te brekten wi ben e go rostu pikinso na wan fu den watrapeti na Yudea.  Drape dri noso fo skapuman ben e kon nanga den ipi skapu fu den. Ala den skapu ben e moksi nanga makandra èn wi ben e aksi wisrefi fa ibriwan fu den skapuman ben o feni en eigi skapu baka. Ma baka di den skapu ben kaba dringi watra èn ben kaba prei, dan wan fu wan den skapuman waka go na wan tra pisi fu a lagipresi, èn ibriwan fu den ben kari den skapu fu en leki fa a ben gwenti kari den, èn na wan moi fasi den ipi skapu ben e waka go miti den skapuman fu den.” Wan moro betre agersitori no ben de di Yesus ben kan gebroiki fu tyari kon na krin san a ben wani leri sma. Efu wi e agri nanga den sani di a leri wi èn efu wi e gi yesi na den leri dati, aladi wi e suku a tiri fu en, dan wi sa kon na ondro a lobi-ati sorgu fu a „bun skapuman”.—Yohanes 10:11.

Agersitori di ben abi fu du nanga sani di ben pasa trutru

19. Fa Yesus gebroiki wan rampu di ben feni presi na ini a kontren pe a ben de, fu tyari wan falsi leri kon na krin?

¹⁹ Bun agersitori kan abi fu du son leisi nanga ondrofenitori noso nanga sani di pasa èn di wi kan leri fu dati. Wan leisi Yesus ben gebroiki wan sani di ben pasa no so langa na fesi, leki agersitori. A ben gebroiki a tori dati fu sori taki a no tru taki ogri e miti sma soso te den e frudini dati. A ben taki: „San unu denki fu den tina-aiti sma di a toren fu Siloam ben fadon na den tapu, kiri den; unu denki taki den ben abi moro paiman [moro furu sondu] leki ala den tra sma di e libi na ini Yerusalem?” (Lukas 13:4) Na wan tumusi moi fasi Yesus ben taki-go-taki-kon nanga den sma, fu sori den taki a no yoisti fu denki taki a fasi fa a libi fu wan sma e waka seti na fesi kaba. Den 18 sma dati no ben dede fu di na Gado ben strafu den fu wan sondu di den ben du. Ma soleki fa a sori, dan a sari fasi fa den dede ben abi fu du nanga ten nanga sani di e pasa èn di sma no sabi na fesi (Preikiman 9:11). Sobun, Yesus ben gebroiki wan sani di ben pasa trutru èn di ala den arkiman fu en ben sabi heri bun, fu sori taki san den sma ben e bribi ben de wan falsi leri.

20, 21. (a) Fu san ede den Fariseiman ben krutu den disipel fu Yesus? (b) Sortu Bijbel tori Yesus gebroiki leki agersitori, fu sori taki Yehovah noiti no ben abi na prakseri taki a Wet fu a Sabadei ben musu hori na so wan tranga fasi? (c) Fu san wi sa taki na ini na artikel di e kon?

²⁰ Te Yesus ben e gi leri, dan a ben e gebroiki furu eksempre fu Bijbel sosrefi. Memre a ten di den Fariseiman ben krutu den disipel fu en fu di den ben piki èn ben nyan siri nyanyan na wan Sabadei. Te yu luku en bun, dan a no ben de so taki den disipel fu Yesus ben pasa a Wet fu Gado. Na presi fu dati a ben abi fu du nomo nanga a fasi fa den Fariseiman ben fruklari a Wet fu Gado. Den ben e poti den eigi Wet fu sortu wroko sma no ben musu du na a Sabadei. Fu sori taki Gado noiti no ben abi na prakseri taki sma ben musu hori a Wet fu a Sabadei na so wan tranga fasi, dan Yesus ben gebroiki a tori di skrifi na ini 1 Samuel 21:3-6, leki eksempre. Di angri ben e kiri David nanga den man fu en, dan den ben go na a tabernakel èn den nyan den santa brede di den priester ben gwenti fu poti na fesi Yehovah, ma di den priester ben puru kaba fu di den ben poti tra brede na den presi. Te yu luku en bun, dan den priester wawan ben kan nyan den brede disi di puru fu na fesi Yehovah. Toku a ben de so taki na a okasi disi, David nanga den man fu en no ben kisi strafu di den nyan den brede dati. Fu taki en leti, dati na a wan-enkri presi na ini Bijbel di e sori taki sma di no ben de priester, ben nyan den brede dati. Yesus ben sabi soifri sortu pisi fu Bijbel a ben musu gebroiki èn a ben sabi taki den Dyu arkiman fu en ben sabi a tori dati tu.—Mateyus 12:1-8.

²¹ Fu tru, Yesus ben de wan Gran Leriman! Te wi e luku a fasi fa a ben man leri sma tumusi prenspari tru tori, èn te wi e si fa a ben man doro na ati fu den arkiman fu en, dan wi musu fu fruwondru fu a bigi koni di a ben abi. Fa wi kan teki na eksempre fu en na ini a fasi fa wi e gi leri? Wi sa taki fu a tori disi na ini na artikel di e kon.

[Futuwortu]

Yu e memre disi ete?

• Fu san ede meki Yesus ben e gi leri nanga yepi fu agersitori?

• Sortu eksempre e sori taki Yesus ben e gebroiki agersitori di den arkiman fu en na ini a fosi-yarihondro ben man frustan heri bun?

• Fa Yesus ben man gebroiki a sabi di a abi fu den sani di Gado meki, na wan bun fasi na ini den agersitori fu en?

• Na sortu fasi Yesus e gi leri nanga yepi fu sani di ben pasa èn di den arkiman na ini a ten fu en ben sabi?

[Aksi fu a tori disi]

[Prenki na tapu bladzijde 15]

Yesus ben fruteri fu wan srafu di ben weigri fu gi wan trawan pardon di ben abi fu pai en pikinso moni nomo èn fu wan papa di gi en manpikin pardon aladi a ben frumorsu a pisi fu a famirigudu di a ben kisi

[Prenki na tapu bladzijde 16]

San Yesus ben wani leri sma nanga yepi fu a tori fu a bun Samariaman?

[Prenki na tapu bladzijde 17]

A de so trutru taki skapu sabi a sten fu a skapuman fu den?