’De klariklari fu gi makandra pardon’

YU E bribi taki Gado gi yu pardon fu den sondu fu yu? A gersi taki furu sma ini Amerkankondre e bribi dati. Datra Loren Toussaint, wan datra di e ondrosuku fu san ede wan sma e du sani na wan spesrutu fasi, ben teki fesi ini wan ondrosuku di ben du na a University of Michigan Institute for Social Research. A e fruteri taki den ben poti na aksi di skrifi na tapusei gi 1423 sma fu Amerkankondre. Sowan aiti fu ibri tin sma di pasa 45 yari kaba ben taki dati Gado gi den pardon fu den sondu fu den.

Toku, a de wan tumusi aparti sani taki soso 811 sma fu a grupu disi fu 1423 sma ben taki dati densrefi e gi trawan pardon. A sani dati e meki wi prakseri den wortu di Yesus ben taki ini a Bergitaki fu en: „Efu unu e gi sma pardon fu den sondu fu den, dan un hemel Tata sa gi unu pardon tu; ma efu unu no e gi sma pardon fu den sondu fu den, dan un Tata no sa gi unu pardon tu fu den sondu fu unu” (Mateyus 6:14, 15). Iya, taki Gado e gi wi pardon fu den sondu fu wi, e anga fu wan tu sani. Wan fu den sani disi na taki wisrefi musu de klariklari fu gi trawan pardon.

Na apostel Paulus ben memre den Kresten na ini Kolose na a gronprakseri disi. A ben gi den a deki-ati: „Tan frudrage makandra èn gi makandra pardon na wan fri fasi efu a wan abi wan sani fu kragi fu a trawan. Soleki fa Yehovah gi unu pardon na wan fri fasi, na so unu musu du tu” (Kolosesma 3:13). A tru taki a no ala ten disi de makriki fu du. Fu gi wan eksempre, efu wan sma taki wan sani fu yu sondro fu denki, noso a taki wan sani di e hati yu srefisrefi, dan a kan de muilek gi yu fu gi a sma dati pardon.

Toku, a e tyari furu wini kon fu gi trawan pardon. Datra David R. Williams di e ondrosuku sani fu a libimakandra, ben taki fu na ondrosuku di a ben du: „Wi kon sabi wan moi sani fu Amerkansma di pasa 40 yari kaba, namku taki a koloku firi di den abi, abi furu fu du nanga a gi di den e gi trawan pardon.” Disi e kruderi nanga den wortu fu a koni Kownu Salomo, di ben skrifi sowan 3000 yari pasa: „Wan korostu ati na a libi fu den pisi fu a skin” (Odo 14:30). Fu di a matifasi di wi abi nanga Gado èn nanga tra sma e kon moro bun efu wi wani gi pardon, dan dati meki wi abi bun reide fu de klariklari fu gi makandra pardon nanga wi heri ati.—Mateyus 18:35.