Fa wi musu si tesi?

TESI! Problema! Den sani disi e miti ala sma. Wan tu fu den sani di kan de leki wan tesi gi wi, na kesekese, moni problema, siki, sani di e hari wi fu du san no bun, speri di e dwengi wi fu du ogri, frufolgu, tyalensi di wi e ondrofeni fu di wi no e teki partèi na ini politiek afersi noso fu di wi no e du afkodrei, èn sosrefi furu tra sani. Tesi furu tron e gi wi bigi broko-ede, awansi sortu tesi dati de. Fa wi kan kakafutu gi tesi? Sortu winimarki tesi kan abi?

A moro bun yepi di wi kan kisi

Aladi Kownu David fu owruten ben kisi tesi en heri libi langa, toku a ben tan getrow na Gado te na dede. San ben yepi en fu kakafutu gi den tesi dati? A ben sori suma ben gi en a krakti, di a taki: „Yehovah na mi Herder. Noti mi sa mankeri.” Ne a taki moro fara: „Awansi mi e waka na ini a lagipresi pe furu dungru de, toku mi no e frede nowan ogri, bika yu de nanga mi; Yu tiki nanga yu tiritiki, na den sani di e trowstu mi” (Psalm 23:1, 4). Iya, Yehovah na a sma di kan yepi wi fu kakafutu gi ala tesi di wi e kisi. Yehovah ben yepi David na a ten di a ben abi bun furu broko-ede, èn a de klariklari fu yepi wi tu te dati de fanowdu.

Fa wi kan kisi yepi fu Yehovah? Bijbel e sori wi fa wi kan kisi dati te a e taki: „Tesi èn si taki Yehovah bun” (Psalm 34:8). Den wortu disi trutru e gi wi deki-ati na wan switi fasi, ma san den wani taki? Den e gi wi deki-ati fu dini Yehovah èn fu libi soleki fa a wani wi fu libi. Fu man libi soleki fa Gado wani, dan wi no sa man du ala sani moro di wi ben sa wani du. Son leisi dati kan tyari tesi kon gi wi sosrefi, fu di sma kan frufolgu wi, noso wi kan nyan pina fu dati ede. Ma den sma di e bosroiti nanga den heri ati fu libi soleki fa Yehovah wani, noiti no abi fu firi sari taki den du dati. Yehovah sa sorgu den heri bun. A sa tiri den èn a sa sorgu gi den na yeye fasi. Te tesi e miti den, dan a sa horibaka gi den nanga yepi fu en Wortu, en santa yeye, èn a Kresten gemeente. Èn te fu kaba a sa blesi den nanga têgo libi.—Psalm 23:6; 25:9; Yesaya 30:21; Romesma 15:5.

Den sma di e drai den libi fu di den e teki a tumusi prenspari bosroiti fu dini Yehovah, e kon si taki Yehovah alaten e du san a pramisi te den e tan hori a bosroiti dati. Den Israelsma di Yosua ben tyari go na ini a Pramisi Kondre, ben ondrofeni dati tu. Di den ben koti a Yordanliba  abra, dan wantewante den ben musu kakafutu gi tesi, den ben musu feti nanga tra pipel, èn den ben musu kisi trangaleri. Ma a geslakti dati ben sori fu de moro getrow leki den afo fu den di ben komoto fu Egepte èn di dede na ini a sabana. Fu dati ede, Yehovah ben horibaka gi den wan di ben de getrow, èn Bijbel e taki fa a ben de nanga den sma dati na a kaba fu Yosua en libi: „Yehovah gi den vrede na ala sei na den lontu, akruderi ala sani di a ben pramisi den fosi tata fu den . . . No wán pramisi no ben de di no ben kon tru, fu ala den bun pramisi di Yehovah ben gi na oso fu Israel; den alamala ben kon tru” (Yosua 21:44, 45). Wi kan ondrofeni dati tu te wi e frutrow dorodoro tapu Yehovah te tesi e miti wi, èn sosrefi na ala tra ten.

San kan meki taki wi no e frutrow moro tapu Yehovah? Yesus ben kari wán sani di ben kan du dati: „Nowan sma kan dini tu masra leki srafu . . . Unu no kan dini Gado nanga Gudu na a srefi ten leki srafu” (Mateyus 6:24). Te wi e frutrow tapu Yehovah, dan wi no sa denki taki sani sa waka bun nanga wi te wi gudu, soleki fa furu sma na grontapu e denki dati. Yesus ben gi den bakaman fu en a rai disi: „Fu dati ede, tan suku fosi a kownukondre nanga en regtfardikifasi, èn ala den tra sani disi [di unu abi fanowdu] unu sa kisi tu” (Mateyus 6:33). Wan Kresten di no e feti fu kon gudu èn di e poti Gado Kownukondre na a fosi presi na ini en libi, e du a yoisti sani (Preikiman 7:12). A no de fu taki dati a sani disi kan meki a lasi wan tu sani. Kande a no sa man abi ala den gudu di a ben sa wani. Ma a sa kisi furu blesi. Èn Yehovah sa yepi en.—Yesaya 48:17, 18.

San tesi e leri wi

Ma te wi e bosroiti fu „tesi èn fu si taki Yehovah bun”, dan dati no wani taki kwetikweti taki a libi fu wi sa de sondro problema; a no wani taki tu dati wi sa kisi kibri ibri leisi te Satan noso den bakaman fu en wani du wi ogri (Preikiman 9:11). Leki bakapisi fu dati, wan Kresten sa musu sori taki a e tan tyari ensrefi na wan opregti fasi, èn taki a e tan nanga a fasti bosroiti fu dini Yehovah. Fu san ede Yehovah e gi pasi taki den sortu tesi disi e miti den anbegiman fu en? Na apostel Petrus ben skrifi den wortu disi fu sori wi fu san ede Yehovah e du dati: „Nownow fu wan syatu pisi ten, efu a musu de so, difrenti tesi e meki unu sari, so taki a bribi fu unu di kisi tesi èn di abi moro bigi waarde leki gowtu di e lasi gowe aladi faya srefi soifri en, kan kon de wan sani di sa meki wi kisi prèise nanga glori te Yesus Krestes sa tyari kon na krin” (1 Petrus 1:6, 7). Iya, tesi e gi wi okasi fu sori o tranga a bribi de di wi abi na ini Yehovah èn o tranga wi lobi en. Boiti dati, tesi e gi wi na okasi tu fu sori taki Satan na wan bedrigiman.—Odo 27:11; Openbaring 12:10.

Tesi e yepi wi sosrefi fu kweki tra fasi di Kresten musu abi. Fu gi wan eksempre, poti prakseri na den wortu fu a psalm skrifiman: „[Yehovah] e si a sakafasiwan; ma a wan di abi heimemre, a sabi soso fu farawe” (Psalm 138:6). Furu fu wi no gebore nanga sakafasi, ma tesi kan yepi wi fu kweki a prenspari fasi dati. Memre na okasi na ini a ten fu Moses di wan tu sma ini Israel ben e fuga fu nyan mana ibri wiki baka, èn ibri mun baka. Soleki fa a sori, dan a sani dati ben de wan tesi gi den, aladi a mana ben de wan sani di den ben e kisi na wan wondru fasi. Fu san ede den ben kisi a tesi dati? Moses ben taigi den: „[Yehovah] ben gi yu mana fu nyan na ini a gran sabana . . . fu meki yu kisi sakafasi èn fu tesi yu.”—Deuteronomium 8:16.

Wi kan kisi tesi tu di e gi wi na okasi fu sori taki wi abi sakafasi. Fa so? We, fa wi e feni en te  kenki e kon na ini na organisâsi? (Yesaya 60:17) Wi e horibaka nanga wi heri ati gi a preikiwroko èn gi a wroko di wi musu du fu gi sma leri? (Mateyus 24:14; 28:19, 20) Wi de klariklari fu agri nanga den fasi fa „a getrow èn koni srafu” e fruklari a waarheid fu Bijbel? (Mateyus 24:45-47; Odo 4:18). Wi e dwengi wisrefi fu no bai ibri nyun wrokosani, ibri nyun modo, noso ibri nyun sortu oto? Wan sma di abi sakafasi sa man taki dati a e dwengi ensrefi fu no du den sani dati.—1 Petrus 1:14-16; 2 Petrus 3:11.

Tesi e yepi wi tu fu tron sma di e horidoro, èn disi na ete wan tra prenspari fasi di wi musu abi. A disipel Yakobus ben taki: „Unu musu prisiri srefisrefi, mi brada, te unu e miti nanga difrenti tesi, fu di unu sabi taki a bribi fu unu di kisi tesi na a fasi disi, sa meki taki unu man horidoro” (Yakobus 1:2, 3). Te wi man kakafutu gi a wan tesi baka a trawan aladi wi e frutrow dorodoro tapu Yehovah, dan dati e meki wi tron sma di e tanapu kánkan, di de getrow, èn di e du san Gado feni bun. A sani dati sa gi wi krakti fu kakafutu tra leisi te Satan, a gado fu a grontapu disi di de nanga atibron, e suku fu du wi ogri baka.—1 Petrus 5:8-10; 1 Yohanes 5:19; Openbaring 12:12.

Abi wan yoisti denki fu tesi

A volmaakti Manpikin fu Gado, Yesus Krestes, ben kisi furu tesi di a ben de na grontapu, èn a kisi furu wini fu di a kakafutu gi den tesi dati. Paulus ben skrifi taki Yesus „ben leri fu gi yesi fu den sani ede di a ben ondrofeni” (Hebrewsma 5:8). Fu di Yesus ben de getrow te na dede, dan a meki a nen fu Yehovah kisi prèise èn a ben man gi a libi fu en di ben de sondro sondu, leki wan ofrandi gi libisma. A sani dati ben gi den wan di ben e bribi na ini Yesus na okasi fu kisi têgo libi (Yohanes 3:16). Fu di Yesus ben tan getrow aladi a ben kisi tesi, meki a de wi Gran Priester now èn sosrefi wi Kownu di poti fu tiri.—Hebrewsma 7:26-28; 12:2.

Fa a de nanga wi? Te wi de getrow na ten te wi e kisi tesi, dan dati sa tyari bigi blesi kon gi wi. Disi na san Bijbel e taki fu den wan di abi a howpu fu go na hemel: „Koloku fu a man di e tan horidoro te tesi e miti en, bika te Gado feni en bun, dan a sa kisi a kownu-ati fu libi, di Yehovah pramisi den wan di e tan lobi en” (Yakobus 1:12). Den wan di abi a howpu fu libi na grontapu abi a dyaranti taki te den e horidoro na wan getrow fasi, dan den sa kisi têgo libi na ini wan paradijs grontapu (Openbaring 21:3-6). Èn san de moro prenspari, na taki den e meki a nen fu Yehovah kisi prèise fu di den e horidoro na wan getrow fasi.

Te wi e teki na eksempre fu Yesus, dan wi kan abi na overtoigi taki wi sa man kakafutu gi ala tesi di e miti wi na ini a seti fu sani disi (1 Korentesma 10:13; 1 Petrus 2:21). Fa wi sa man du dati? Wi sa man du dati te wi e frutrow tapu Yehovah, a sma di e gi „krakti di bigi pasa marki” na den wan di e frutrow na en tapu (2 Korentesma 4:7). Meki a de so taki wi abi a srefi overtoigi leki Yob. Aladi hebi tesi ben miti en, toku a ben abi a fasti overtoigi disi: „Baka di a tesi mi, dan mi sa kon de leki gowtu srefi.”—Yob 23:10.

[Prenki na tapu bladzijde 31]

A nen fu Yehovah ben kisi prèise fu di Yesus ben de getrow di a ben kisi tesi. Wi kan du dati tu