„Noiti ete wan tra sma taki na so wan fasi”

„Ala sma bigin taki bun fu en èn den ben fruwondru fu den moi sani di a ben taki.”​—LUKAS 4:22.

1, 2. (a) Fu san ede meki den skowtu di sma ben seni go fu grabu Yesus ben drai baka nanga leigi anu? (b) San e sori taki den skowtu no ben de den wan-enkri sma di ben e fruwondru fu a fasi fa Yesus ben e gi leri?

DEN skowtu no ben man du a wroko di den ben kisi fu du. Sma ben seni den go fu grabu Yesus Krestes, ma den drai baka nanga leigi anu. Den edeman fu den priester nanga den Fariseiman ben wani sabi: „Fu san ede unu no tyari en kon dya?” Iya, fu san ede meki den man disi no grabu wan man di no ben o kakafutu gi den? Den skowtu ben piki: „Noiti ete wan tra sma taki na so wan fasi.” Den ben fruwondru sote fu a fasi fa Yesus ben e gi leri, taki den no ben man si fu san ede den ben musu sroto a man disi di no ben e du trawan ogri. *—Yohanes 7:32, 45, 46.

² Ma den skowtu no ben de den wan-enkri sma di ben fruwondru fu a fasi fa Yesus ben e gi leri. Bijbel e sori wi taki ipi-ipi sma ben e kon na en fu arki fa a e taki. Den sma fu a foto pe a ben gebore ben fruwondru „fu den moi sani di a ben taki” (Lukas 4:22). Moro leki wan leisi a ben go na ini wan boto fu man taki nanga bigi grupu fu sma di ben kon makandra na a syoro fu a Se fu Galilea (Markus 3:9; 4:1; Lukas 5:1-3). Wan leisi wan „bigi ipi sma” ben tan nanga en fu wan tu dei, aladi den no ben abi noti fu nyan srefi.—Markus 8:1, 2.

3. San ben de a prenspari sani di ben meki taki Yesus ben de so wan kefalek bun leriman?

³ San ben meki taki Yesus ben de so wan bun leriman? Lobi ben de a prenspari sani di ben meki taki a ben de so wan bun leriman. * Yesus ben lobi den tru tori di a ben e leri sma, èn a ben lobi den sma di a ben e gi leri. Ma Yesus ben sabi heri bun tu fa fu gebroiki difrenti fasi fu gi sma leri. Na ini den studie-artikel fu a Waktitoren disi wi sa taki fu wan tu fu den bun fasi disi fa a ben e gi leri, èn fa wisrefi kan gebroiki den fasi dati fu gi leri.

Den sani di a ben e taki ben makriki fu frustan

4, 5. (a) Fu san ede Yesus ben e taki na wan fasi di ala sma ben man frustan te a ben e gi leri, èn fu san ede dati ben de so wan aparti sani? (b) Na sortu fasi a Bergitaki na wan moi eksempre fu a makriki fasi fa Yesus ben e gi sma leri?

⁴ Furu leisi a de so, taki sma di kisi hei skoroleri e taki na wan fasi di den arkiman fu den di no kisi a srefi leri dati no man frustan. Ma efu wi no e taki na wan fasi di tra sma man frustan, dan fa den sa man kisi wini fu a sabi fu wi? Leki leriman, Yesus noiti no taki na wan fasi di sma no ben man frustan. Prakseri taki Yesus ben musu sabi furu kefalek wortu di a ben kan gebroiki. Toku a ben de so taki, aladi a ben abi furu sabi, a no ben prakseri ensrefi nomo, ma a ben prakseri den sma di ben e arki en. A ben sabi taki furu fu den ben de sma di „no ben sabi leisi noso skrifi èn taki den ben de neleki ala tra sma” (Tori fu den Apostel 4:13). Fu man doro na ati fu den sma disi, dan a ben gebroiki wortu di den ben man fu frustan. Ma aladi den sani di Yesus ben taki  ben makriki frustan, toku a ben de so taki den tru tori di a ben tyari kon na fesi ben de dipi tori.

⁵ Prakseri leki eksempre san skrifi na ini a Bergitaki di de fu feni na ini Mateyus 5:3–7:27. A kan de so taki Yesus ben hori a Bergitaki dati na ini soso 20 miniti. Ma den leri fu en na dipi tori di e poti prakseri finifini na afersi soleki sutadu, brokotrow, nanga a lobi di sma lobi gudu pasa marki (Mateyus 5:27-32; 6:19-34). Ma te yu luku den tori disi bun, yu no sa si nowan wortu di tranga fu frustan. Fu taki en leti, wan pikin-nengre srefi ben o man frustan pikinmoro ala den sani di Yesus ben taki! Fu dati ede a no e fruwondru wi taki na a kaba fu a Bergitaki, a heri ipi sma di ben e arki en, soleki gronman, skapuman, nanga fisiman, „ben fruwondru fu a fasi fa a [ben] e gi leri”!—Mateyus 7:28.

6. Gi wan tu eksempre fu sani di Yesus ben taki èn di no ben tranga fu frustan, ma di ben abi wan prenspari boskopu na ini?

⁶ Furu tron Yesus no ben e gebroiki furu wortu, ma den sani di a ben e taki ben de krin fu frustan. Na so wan fasi a ben tyari sani kon na fesi di ben makriki fu frustan, ma di ben abi wan prenspari boskopu na ini. Na ini a pisi ten dati pe sma no ben e druk buku ete, Yesus ben e poti a boskopu fu en go dipi na ini na ati nanga a frustan fu den arkiman fu en. Luku wan tu eksempre: „Nowan sma kan dini tu masra leki srafu; . . . unu no kan dini Gado nanga Gudu na a srefi ten leki srafu.” „No krutu sma moro, so taki sma no kan krutu unu.” „Na den froktu fu den unu sa kon sabi den sma dati trutru.” „Sma di de gosontu, no abi wan datra fanowdu, ma den sikiman abi wan datra fanowdu.” „Ala den wan di e teki a feti-owru, sa lasi den libi nanga a feti-owru.” „Pai Caesar den sani baka di de fu Caesar, ma Gado den sani di de fu Gado.” „Wan sma sa de moro koloku te a e gi sani, leki te a e kisi sani” * (Mateyus 6:24; 7:1, 20; 9:12; 26:52; Markus 12:17; Tori fu den Apostel 20:35). Te na ini a ten disi, sowan 2000 yari baka di Yesus ben taki den sani disi, dan sma de ete di e memre den krakti wortu disi di a ben taki.

A fasi fa a gebroiki aksi

7. Fu san ede meki Yesus ben e poti aksi?

⁷ Na wan tumusi moi fasi Yesus ben e gebroiki aksi te a ben e gi sma leri. Furu tron a poti aksi, srefi te a ben o de moro makriki fu fruteri den arkiman wanten san a ben wani taki. Fu san ede a ben e poti aksi dan? Son leisi a ben poti aksi gi den gensman fu en fu tyari kon na krin san den sma disi ben abi na prakseri trutru, èn na a fasi dati Yesus ben meki taki den no ben man taki noti moro (Mateyus 12:24-30; 21:23-27; 22:41-46). Ma furu leisi, a ben de so taki Yesus ben e teki a ten fu poti aksi gi den arkiman fu en fu tyari den tru tori fu Gado kon na krin èn fu meki den fruteri san de na ini den ati. Yesus ben e poti aksi sosrefi fu yepi den disipel fu en fu denki fu den sani di a ben e leri den, èn fu sori den fa fu du san a ben leri den. Meki wi luku tu eksempre di abi fu du nanga na apostel Petrus.

8, 9. Fa den aksi di Yesus ben gebroiki ben yepi Petrus fu kon frustan efu a de wan yoisti sani, taki Yesus ben musu pai edemoni na a tempel?

 ⁸ Na a fosi presi, prakseri fu na okasi di sma di ben e piki lantimoni ben aksi Petrus efu Yesus ben e pai edemoni na a tempel. * Petrus, di son leisi ben e taki sani sondro fu denki fosi, ben piki: „Iya.” Ma wan syatu pisi ten baka dati, dan Yesus taki nanga en fu a tori: „’San yu prakseri, Simon? Fu suma den kownu fu grontapu e kisi edemoni noso lantimoni? Fu den manpikin fu den noso fu den freimdesma?’ Di a ben taki: ’Fu den freimdesma’, dan Yesus ben taigi en: ’Sobun, dan den manpikin no abi fu pai lantimoni’” (Mateyus 17:24-27). A no de fu taki dati Petrus ben frustan krin fu san ede Yesus ben poti den aksi dati. Fu san ede wi kan taki dati?

⁹ Na ini a ten fu Yesus, a ben de so taki sma di ben de memre fu na osofamiri fu wan tiriman noso kownu, no ben abi fu pai lantimoni. Sobun Yesus, leki a wan-enkri gebore Manpikin fu a Kownu fu hemel di den sma ben e anbegi na ini a tempel, no ben abi fu pai edemoni. Prakseri taki Yesus no ben gi Petrus a yoisti piki nomo. Na presi fu dati a ben gebroiki aksi na wan tumusi bun fasi fu yepi Petrus fu kon frustan san a ben wani leri en. Kande a ben gebroiki den aksi sosrefi fu yepi Petrus fu kon si taki a de fanowdu fu denki bun bifo a ben e taki wan sani.

10, 11. San Yesus ben du di Petrus ben koti a yesi fu wan man puru na a neti fu a Paskafesa fu 33 G.T., èn fa disi e sori wi taki Yesus ben sabi o prenspari a de fu poti aksi gi sma te yu e gi leri?

¹⁰ A di fu tu eksempre ben abi fu du nanga wan sani di ben pasa a neti fu a Paskafesa fu 33 G.T., di wan grupu ogri-ati sma ben suku fu grabu Yesus fu tyari en go sroto. Den disipel ben aksi Yesus efu den musu feti gi en (Lukas 22:49). Petrus no wakti srefi fu meki Yesus piki na aksi dati, ma a grabu en feti-owru èn a koti a yesi fu wan fu den man puru (a kan taki Petrus ben abi na prakseri fu du wan moro ogri sani nanga a man srefi). Petrus ben tyari ensrefi na wan fasi di no ben e kruderi nanga a wani fu en masra, fu di Yesus ben de klariklari fu go nanga den man di ben kon fu grabu en. San Yesus ben du? Nanga ala pasensi a poti dri aksi gi Petrus: „Mi no musu dringi a sani di a Tata gi mi fu dringi?” „Yu denki taki mi no man aksi mi Tata fu gi mi moro leki twarfu bigi legre fu engel nownowde? Ma efu dati ben o pasa, dan fa den Buku fu Bijbel ben sa kon tru, di e taki dati sani musu pasa na a fasi disi?”—Yohanes 18:11; Mateyus 26:52-54.

¹¹ Prakseri a tori disi pikinso. Wan grupu fu ogri-ati sma ben e lontu Yesus. A ben sabi taki a ten ben de krosibei taki a ben o dede èn taki a ben musu krin a nen fu en Tata. A ben sabi sosrefi taki a ben e tyari a hebi frantwortu fu frulusu a libisma famiri. Toku a de so taki a ben teki a ten na a momenti dati srefi, fu poti aksi gi Petrus fu meki a kon frustan wan tu prenspari tru tori. A de krin taki Yesus ben sabi o prenspari a de fu poti aksi gi sma te yu e gi leri.

Tori di noiti no ben kan de so trutru

12, 13. (a) Fu san ede sma e taki wan tori son leisi na wan fasi di noiti no kan de so trutru? (b) Fa Yesus gebroiki a fasi disi fu gi leri fu poti krakti na tapu o don a de fu krutu wi brada fu den pikinpikin fowtu di den e meki?

¹² Na ini a diniwroko fu en, Yesus ben gebroiki  wan tra bun fasi fu gi sma leri. Furu tron a ben e taki sani na wan fasi di noiti no ben kan de so trutru. Disi a ben e du fu espresi te a ben wani poti krakti tapu wan tori fu hari a prakseri fu den arkiman. Te Yesus ben e taki na so wan fasi, dan a ben gersi leki den arkiman fu en ben kan si fa a sani di Yesus e taki e pasa leti na den fesi. Meki wi go luku wan tu eksempre.

¹³ Di Yesus fruteri na ini a Bergitaki fu en, taki a prenspari fu „no krutu” trawan moro, dan a ben taki: „Fu san ede dan yu e luku a splentri na ini yu brada ai, ma yu no e si a postu na ini yu eigi ai?” (Mateyus 7:1-3) Yu man si a sani disi di Yesus ben taki? Wan sma di lobi krutu trawan e taki dati a wani yepi fu puru a splentri di de na ini na „ai” fu a brada fu en. A sma dati feni taki a brada fu en no man si sani krin nofo fu man krutu wan afersi na wan yoisti fasi. Ma ensrefi no man si so bun fu di a abi wan „postu” na ini en eigi ai, dati wani taki wan postu di sma kan gebroiki fu hori a daki fu wan oso. Disi na trutru wan tumusi bun fasi fu sori taki a de wan don sani fu krutu trawan fu ala sortu pikinpikin fowtu di den e meki aladi a kan taki wisrefi abi bun bigi fowtu!

14. Fu san ede meki a sani di Yesus taki, dati sma ben e seif a maskita puru, ma ben e swari a kameili, ben abi so furu krakti?

¹⁴ Na wan tra okasi, Yesus ben krutu den Fariseiman taki den ben de „breniman di wani sori trawan a pasi; [sma di] e seif a maskita puru, ma [di] e swari a kameili” (Mateyus 23:24). Disi ben de wan krakti fasi fu taki wan sani di noiti no kan de so trutru. Fu san ede wi kan taki dati? Wan kameili ben de wan fu den moro bigi meti di den arkiman fu Yesus ben sabi, èn a difrenti na mindri wan pikin maskita nanga wan kameili ben bigi srefisrefi. Soleki fa sma taki, dan wan kameili e wegi a srefi leki 70 milyun maskita! Yesus ben sabi sosrefi taki den Fariseiman ben abi a gwenti fu seif a win fu den nanga wan pisi krosi. Den man disi ben e hori densrefi soifri na a Wet te na ini den moro pikin afersi srefi. Den ben e seif a win fu den fu di den no ben wani swari wan maskita, bika dati ben o meki taki den no de krin akruderi a Wet. Ma toku a ben de so taki na wan agersi fasi den ben e swari a kameili, wan meti di no ben de krin tu (Lefitikus 11:4, 21-24). San Yesus ben wani taigi den ben de krin fu frustan. Den Fariseiman ben hori densrefi finifini na a Wet, ma den no ben e poti prakseri na den moro prenspari sani, soleki „retidu nanga sari-ati nanga getrowfasi” (Mateyus 23:23). Na wan tumusi bun fasi Yesus ben tyari kon na krin sortu sma den man disi ben de trutru!

15. San na wan tu sani di Yesus ben leri sma nanga yepi fu tori di noiti no ben kan de so trutru?

¹⁵ Te Yesus ben e du a diniwroko fu en, dan a ben e taki sani na difrenti fasi. Furu tron a gebroiki tori di noiti no ben kan de so trutru. Luku wan tu eksempre. Yesus ben e taki fu sma di abi „bribi di bigi neleki wan pikin mosterdsiri” ma di kan opo wan bergi poti na wan tra presi. Te yu luku en bun, dan wan moro bun fasi no ben de fa Yesus ben kan poti krakti na tapu san wan sma kan du awinsi a abi pikinso bribi srefi (Mateyus 17:20). Na agersitori fu wan bigi kameili di e pruberi fu kwinsi ensrefi go na ini wan nanai-olo e sori krin taki a no makriki srefisrefi gi wan gudusma di e pruberi fu dini Gado, aladi a wani tan libi na wan fasi di e sori taki a lobi gudu pasa marki! (Mateyus 19:24) Yu no e fruwondru fu a tumusi moi fasi fa Yesus ben man taki sani, èn fu a fasi fa a ben man meki sma frustan sani nanga wan tu wortu nomo?

A ben e tyari krinkrin buweisi kon na fesi

16. Fa Yesus ben e gebroiki a koni di a ben abi?

¹⁶ Fu di Yesus ben abi wan volmaakti frustan, meki a ben sabi fa fu taki-go-taki-kon nanga sma na wan tumusi bun fasi. Toku a noiti no gebroiki a koni dati na wan fowtu fasi. Ala ten te a ben e gi sma leri, dan a ben e gebroiki a koni di a ben abi fu meki sma frustan den tru tori fu Gado. Son leisi a ben e taki-go-taki-kon na so wan fasi, taki den arkiman srefi ben kan si krin taki den sani di den kerki gensman ben e taki fu en no ben de tru. Furu tron a tyari krin buweisi kon na fesi fu leri den disipel fu en wan tu prenspari sani. Meki wi go luku a tumusi bun fasi fa Yesus ben man gebroiki krinkrin buweisi fu gi sma leri.

17, 18. Sortu krakti buweisi Yesus tyari kon na fesi fu sori taki den sani di den Fariseiman ben taki fu en no ben tru?

¹⁷ Prakseri na okasi pe Yesus dresi wan man di ben abi wan ogri yeye na en tapu. A man disi ben breni, èn a no ben man taki. Di den Fariseiman yere a tori dati, dan den taki: „A man disi e yagi ogri yeye puru na sma tapu soso nanga [yepi fu] Beèlsebub [Satan], a tiriman fu den ogri yeye.”  Luku taki den Fariseiman ben agri taki sma abi krakti fanowdu di tranga moro leki di fu libisma fu man puru den ogri yeye fu Satan na sma tapu. Ma fu di den no ben wani taki a pipel ben musu poti bribi na ini Yesus, meki den ben taki dati a krakti di Yesus ben abi ben komoto fu Satan. Fu sori den Fariseiman taki den no ben prakseri bun fu san den ben taki èn taki den no ben abi krinkrin buweisi tu, dan Yesus ben taigi den: „Ibri kownukondre pe pratifasi de na ini, sa fadon èn nowan foto noso oso pe pratifasi de na ini, sa man tan. Sosrefi, efu Satan e yagi Satan puru, dan ensrefi prati tu; dan fa a kownukondre fu en sa man tan?” (Mateyus 12:22-26) Te yu luku en bun, dan Yesus ben e taki: ’Efu mi ben de wan wrokoman fu Satan, soleki fa unu e taki, namku wan sma di e pori ala a wroko di Satan du kaba, na a fasi dati Satan ben o pori en eigi wroko èn dan heri esi ensrefi ben o fadon.’ Disi na tumusi krin buweisi di a ben tyari kon na fesi, a no so?

¹⁸ Dan Yesus taki-go-taki-kon moro fara nanga den fu a tori disi. A ben sabi taki son wan fu den Fariseiman srefi ben yagi ogri yeye puru na sma tapu. Fu dati ede a poti wan aksi gi den nomo di ben e bruya den srefisrefi: „Efu mi e yagi ogri yeye puru na sma tapu nanga [yepi fu] Beèlsebub, dan nanga [yepi fu] suma den manpikin [noso den disipel] fu unu e yagi ogri yeye puru na sma tapu?” (Mateyus 12:27) Te yu luku en bun, dan Yesus ben wani taigi den: ’Efu a de so taki mi e yagi ogri yeye puru na sma tapu nanga yepi fu Satan, dan den disipel fu unu musu e du en nanga a srefi krakti dati tu.’ San den Fariseiman ben kan taki now? Noiti den no ben o taki dati den disipel fu den ben yagi ogri yeye puru nanga a krakti fu Satan. Fu di Yesus ben taki-go-taki-kon nanga den na so wan fasi, meki den kragi fu den Fariseiman kon tron lafutori.

19, 20. (a) Na sortu bun fasi Yesus ben gebroiki krinkrin buweisi fu gi leri na trawan? (b) Fa Yesus ben gebroiki den wortu ’o moro dan’, fu leri den disipel fu en fa fu begi?

¹⁹ Boiti taki Yesus ben e gebroiki krinkrin buweisi di ben e meki taki den gensman fu en no ben man taki noti moro, dan a ben gebroiki buweisi leki dati tu fu overtoigi sma, fu leri trawan den tru tori fu Yehovah di kan gi sma deki-ati. Furu tron, a ben gebroiki den wortu ’o moro dan’ fu taki-go-taki-kon nanga sma. Na so fasi a ben gebroiki den tru tori di den arkiman fu en ben sabi kaba, fu yepi den fu meki a bribi fu den kon moro tranga. Meki wi go luku soso tu eksempre.

²⁰ Di den disipel fu Yesus ben aksi en fu leri den fa fu begi, dan a ben fruteri wan agersitori fu wan man di ben e aksi wan mati fu en fu yepi en nanga wan sani. Na a bigin a mati no ben wani. Ma te fu kaba a mati ben du san a man disi ben aksi, fu di a man „ben tan aksi en nomonomo”. Yesus ben sori sosrefi taki papa nanga mama de klariklari fu „gi bun presenti” na den pikin fu den. Te fu kaba a ben taki: „Efu unu leki ogri sma, sabi fa fu gi bun presenti na den pikin fu unu, o moro dan a Tata na hemel, sa gi santa yeye na den wan di e aksi en fu dati!” (Lukas 11:1-13) Dyaso Yesus e gebroiki sani di no de a srefi, ma di de kontrari fu makandra. Wan mati di na a bigin no ben wani yepi wan trawan, ben du wan sani te fu kaba fu gi yepi fu di a trawan dati ben tan aksi en nomonomo. Libisma papa nanga mama di no de volmaakti e sorgu fu den sani di den pikin fu den abi fanowdu. We, efu den sma disi srefi kan du den sani dati, o moro dan wi lobi-ati hemel Tata sa gi santa yeye na getrow anbegiman, te den e aksi en fu dati nanga sakafasi na ini begi!

21, 22. (a) Fa Yesus ben taki-go-taki-kon nanga sma te a ben e gi den rai fu sori den san den musu du te den abi problema na moni sei? (b) San wi kon frustan baka di wi luku den difrenti fasi fa Yesus ben e gi leri?

²¹ Yesus ben taki-go-taki-kon na a srefi fasi, di a ben e gi rai fu sori sma san den musu du te den abi  problema na moni sei. A ben taki: „Luku den fowru bun; den no e sai, den no e koti nyanyan èn den no abi maksin, noso wan presi fu kibri nyanyan, ma toku Gado e gi den nyanyan. Unu no warti moro den fowru? Luku bun fa den leili e gro; den no e wroko tranga èn den no e brei titei . . . We, efu Gado e meki den bromki di e gro na sabana weri so moi, bromki di de tide ma tamara sma e trowe den go na ini onfu, dan a no sa sorgu unu moro betre fu di a e gi unu sani fu weri, unu di no e bribi nofo?” (Lukas 12:24, 27, 28) Iya, efu Yehovah e sorgu gi den fowru nanga den bromki, dan a sa sorgu moro bun srefi gi den futuboi fu en! A no de fu taki dati a lobi-ati ma krakti fasi fa Yesus ben e taki-go-taki-kon nanga sma, ben naki na ati fu den arkiman fu en.

²² Baka di wi luku den fasi fa Yesus ben e gi sma leri, dan a makriki gi wi now fu si taki den skowtu di sma ben seni go fu grabu Yesus èn di no ben du dati, ben abi leti di den taki: „Noiti ete wan tra sma taki na so wan fasi.” Ma sma ben sabi Yesus leki wan man di ben gebroiki furu agersitori te a ben e gi sma leri. Fu san ede meki a ben e gi leri na a fasi dati? San ben e meki taki den agersitori fu en ben abi so furu krakti tapu a libi fu sma? Wi sa piki den aksi disi na ini na artikel di e kon.

[Futuwortu]

Yu e memre disi ete?

• Sortu eksempre e sori taki Yesus ben e gi sma leri na wan fasi di ben makriki èn krin fu frustan?

• Fu san ede Yesus ben gebroiki aksi te a ben e gi sma leri?

• San na wan tori di taki na wan fasi di noiti no kan de so trutru, èn fa Yesus ben gebroiki a fasi dati fu gi leri?

• Fa Yesus ben e gebroiki krinkrin buweisi te a ben leri den disipel fu en den tumusi moi tru tori fu Yehovah di e gi sma deki-ati?

[Aksi fu a tori disi]

[Prenki na tapu bladzijde 9]

Yesus ben e taki na so wan fasi taki sma di no ben kisi hei skoroleri, ben man frustan en na wan makriki fasi

[Prenki na tapu bladzijde 10]

Den Fariseiman ben ’e seif a maskita puru, ma den ben e swari a kameili’