Teki na eksempre fu a Gran Leriman

„Go fu dati ede, èn meki disipel fu sma . . . , èn leri den fu du ala den sani di mi komanderi unu.”​—MATEYUS 28:19, 20.

1, 2. (a) Fa wi alamala na leriman na wan noso tra fasi? (b) Sortu aparti frantwortu tru Kresten abi te a abi fu du nanga a tori fu gi sma leri?

YU NA wan leriman? We, na wan noso tra fasi wi alamala na leriman. Ibritron te yu e sori wan sma di lasi pasi, sortu pasi a musu teki, noso te yu e sori wan sma di e wroko makandra nanga yu fa fu du wan sani, noso te yu e sori wan pikin fa fu tai den fetre fu en susu, dan yu e gi leri. Wi e firi bun te wi man yepi trawan na den sortu fasi dati, a no so?

² Te a abi fu du nanga a tori fu gi trawan leri, dan tru Kresten abi wan aparti frantwortu. Wi kisi a komando fu „meki disipel fu sma fu ala nâsi . . . , èn [fu] leri den” (Mateyus 28:19, 20). Na ini a gemeente wi abi moi okasi tu fu gi trawan leri. Mansma di doro den markitiki fu dini leki „skapuman” èn leki „leriman”, e poti na wroko fu bow a gemeente (Efeisesma 4:11-13). Lepi Kresten uma abi wan frantwortu tu. Na ini den aladei libi den musu de sma „di e [gi] leri” na den yongu uma so taki den kan kon sabi „san bun” (Titus 2:3-5). Wi alamala e kisi a rai fu du tranga muiti fu gi makandra deki-ati. Wi kan du dati fu di wi o gebroiki Bijbel fu bow trawan (1 Tesalonikasma 5:11). Fu tru a de wan bigi grani fu de leriman fu a Wortu fu Gado èn fu man prati den moi leri fu Gado nanga trawan, so taki den kan kisi wini di e tan!

3. Fa wi kan tron moro bun leriman?

³ Ma fa wi kan tron moro bun leriman? A moro prenspari fasi fa wi kan du dati, na fu teki na eksempre fu a Gran Leriman, Yesus. Ma kande son sma e aksi densrefi: ’Fa wi kan teki na eksempre fu Yesus? En ben de volmaakti.’ A tru taki wi no man de volmaakti leriman. Ma awinsi san wi man du noso no man du, wi kan du muiti fu gi leri leki fa Yesus ben du dati. Meki wi go luku fa wi kan gebroiki fo fu den fasi fa Yesus ben e gi leri: a ben e taki sani di ben makriki fu frustan, a ben gebroiki aksi, a ben tyari krinkrin buweisi kon na fesi, èn a ben gebroiki yoisti agersitori.

Gi leri na wan fasi di makriki fu frustan

4, 5. (a) Fu san ede wi kan taki dati wan fu den moro prenspari sani fu Bijbel, na taki a skrifi na wan fasi di makriki fu frustan? (b) Fu san ede a prenspari fu luku bun sortu wortu wi e gebroiki efu wi wani gi leri na wan fasi di makriki fu frustan?

⁴ Den prenspari tru tori fu a Wortu fu Gado no frekti tumusi so taki sma no man frustan den. Na ini begi Yesus ben taki: „Mi Tata, Masra fu hemel nanga grontapu, mi e prèise yu na fesi ala sma, bika yu kibri den sani disi gi den koniwan nanga den sma di abi frustan èn yu tyari den kon na krin gi den nyofi pikin” (Mateyus 11:25). Yehovah sorgu taki den wan di abi sakafasi èn di abi wan opregti ati, kan kon sabi san a abi na prakseri èn san a sa du na ini a ten di e kon (1 Korentesma 1:26-28). Dati meki wan fu den moro prenspari sani fu Bijbel, na taki den tru tori di de na ini skrifi na wan makriki fasi.

⁵ Fa yu kan gi leri na wan fasi di makriki fu frustan, te yu e studeri nanga wan sma noso te yu e tyari gobaka? We, san wi ben leri fu a Gran Leriman? Furu fu den arkiman fu Yesus ’no ben kisi skoro èn den no ben abi furu koni’, dati meki Yesus ben abi a gwenti fu taki na wan fasi di den ben man frustan, so taki a ben man doro na ati fu den (Tori fu den Apostel 4:13). A fosi sani di prenspari fu man gi leri na wan fasi di makriki fu frustan, na taki wi musu luku sortu wortu wi e gebroiki. Wi no abi fu gebroiki furu kefalek wortu fu meki sma frustan a waarheid fu Gado Wortu moro bun. Te wi e gebroiki „tumusi furu wortu”, dan dati kan meki sma frede  pikinso, spesrutu te den no kisi hei skoroleri, noso te den no man frustan sani so esi (1 Korentesma 2:1, 2). Yesus ben sori nanga na eksempre fu en, taki te wi e gebroiki den yoisti wortu na wan fasi di makriki fu frustan, dan wi kan tyari tru tori kon na krin na wan krakti fasi.

6. Fa wi kan luku bun taki wi no bruya wan bijbelstudenti fu di wi e fruteri en tumusi furu sani na a srefi momenti?

⁶ Te wi wani gi leri na wan fasi di makriki fu frustan, dan wi musu luku bun sosrefi taki wi no bruya a bijbelstudenti fu wi fu di wi e fruteri en tumusi furu sani na a srefi momenti. Yesus ben hori den disipel fu en na prakseri, a ben sabi omeni sani den ben man teki ibritron te a ben e gi den leri (Yohanes 16:12). Wisrefi musu hori na prakseri tu omeni a studenti fu wi man teki ibritron te wi e studeri nanga en. Prakseri leki eksempre a buku Sabi di e tjari joe go na têgo libi. Te wi e studeri a buku disi nanga wan sma, dan wi no abi fu fruteri en fu ala den moro fini sani fu a tori di wi e taki nanga en. * A no de so tu taki wi musu studeri furu sani na a srefi ten. A no musu de neleki a prenspari gi wi fu kaba a pisi di wi e studeri so esi leki wi man. Na presi fu dati a prenspari fu luku fosi o gaw a studenti fu yu man frustan san a e studeri, so taki yu kan sabi o furu sani yu kan studeri nanga en na a srefi ten. A marki fu wi na fu yepi a studenti fu tron wan disipel fu Krestes èn wan anbegiman fu Yehovah. Fu dati ede wi musu teki so furu ten leki san de fanowdu fu yepi a studenti fu kon frustan krin san na den sani di a e leri. Na a fasi dati a waarheid kan naki en ati, èn a kan kisi deki-ati fu du san a e leri.—Romesma 12:2.

7. Sortu rai kan yepi wi fu gi leri na wan fasi di makriki fu frustan te wi e hori lezing na ini a gemeente?

⁷ Fa wi kan taki na wan fasi di de „makriki fu frustan” te wi e hori lezing na ini a gemeente, èn spesrutu te wi e si taki na mindri den arkiman yu abi sma di kon fu a fosi leisi? (1 Korentesma 14:9) Meki wi go luku dri sani di kan de wan yepi gi wi. A fosi sani, na taki a bun fu fruklari ala wortu di yu denki taki den arkiman no sa frustan. Di wi kon frustan a Wortu fu Gado, dan wi kon sabi furu wortu di tra sma no sabi. Te wi ben sa gebroiki wortu soleki „a getrow èn koni srafu”, den „tra skapu”, nanga „Babilon a Bigiwan”, dan a kan de fanowdu fu fruklari na wan makriki fasi san den sani disi wani taki. A di fu tu sani, na taki wi musu luku bun fu no gebroiki tumusi furu wortu fu fruklari wan sani. Efu wi e gi wan tumusi langabere fruklari te wi e fruteri wan sani, dan a kan de so taki den arkiman no sa wani arki wi moro. Sma sa man frustan wi moro krin efu wi no e gebroiki wortu di no de fanowdu. A di fu dri sani, na taki wi no musu pruberi fu taki fu tumusi furu sani na ini wan syatu pisi ten. Kande wi feni furu moi sani di wi kan gebroiki na ini a lezing fu wi. Ma a moro bun sani na fu seti a lezing na so wan fasi taki yu e poti prakseri na wan tu edeprakseri nomo, aladi yu e gebroiki soso den tori di e horibaka gi den edeprakseri dati èn di yu kan taki fu den na wan bun fasi na ini a ten di yu abi fu hori a lezing.

A fasi fa wi kan gebroiki aksi

8, 9. Fa wi kan sabi san na a yoisti aksi di wi musu poti fu hari a prakseri fu na ososma? Gi wan tu eksempre.

⁸ Memre taki Yesus ben e gebroiki aksi na wan tumusi bun fasi fu gi den disipel fu en deki-ati fu taki san den ben e prakseri, èn a yepi den sosrefi fu denki fu den sani di a ben e leri den. Nanga den aksi di Yesus ben poti gi den disipel fu en, a ben man doro na ati fu den na wan moi fasi (Mateyus 16:13, 15; Yohanes 11:26). Ma fa wi kan gebroiki aksi na wan tumusi bun fasi, neleki fa Yesus ben du dati?

⁹ Te wi e preiki oso fu oso, dan wi kan gebroiki aksi fu hari a prakseri fu sma, èn na so fasi wi e opo a pasi fu taki nanga den fu a Kownukondre fu Gado. Ma fa wi kan sabi san na a yoisti aksi di wi musu poti fu hari a prakseri fu na ososma? Wi musu de na ai fu si sani di de na wi lontu. Te yu e doro na wan oso, dan a bun fu luku fa a presi tan. Yu e si kande taki pikin-nengre  preisani e didon na tapu a prasi? Dati kan sori yu taki den sma di e tan drape abi pikin. Efu dati de so, dan wi kan aksi na ososma: ’Oiti yu aksi yusrefi fa grontapu o de te den pikin fu yu gro kon bigi?’ (Psalm 37:10, 11) A de so kande taki a fesidoro fu na oso abi furu sroto, noso taki a abi wan alarmsistema fu sorgu taki fufuruman na man kon na ini na oso? Dan wi kan aksi: ’Yu denki taki wan ten sa kon te sma leki yu nanga mi no abi fu frede moro te wi de na ini wi oso noso te wi e waka na strati?’ (Mika 4:3, 4) A de so taki a stupu na a fesisei fu na oso meki na so wan fasi taki wan sma kan kren go na tapu nanga wan rolsturu? Wi kan aksi na ososma dan: ’Yu denki taki wan ten sa kon trutru taki ibri libisma sa abi wan bun gosontu?’ (Yesaya 33:24) Wi kan feni furu rai na ini a pikin buku Fa foe bigin èn go doro nanga bijbel takimakandra. *

10. Fa wi kan gebroiki aksi fu „hari” den prakseri nanga den firi fu wan bijbelstudenti „kon na tapu”, ma san wi musu hori na prakseri te wi e du dati?

¹⁰ Fa wi kan gebroiki aksi na wan bun fasi te wi e hori oso-bijbelstudie? Wi no man si san de na ini na ati fu tra sma, leki fa Yesus ben man du dati. Ma te wi sabi fa fu poti a yoisti aksi na a yoisti momenti, dan dati kan yepi wi fu „hari” den prakseri nanga den firi fu a bijbelstudenti „kon na tapu” (Odo 20:5). Kon meki wi taki dati wi e studeri a kapitel na ini a Sabi-buku di abi leki nen: „Foe san ede libi na a fasi fa Gado wani e tjari kolokoe kon”. A kapitel dati e fruteri fa Gado e si leiman, noso fa a e denki fu hurudu, nanga tra sani. Kande a studenti man fu piki den aksi di skrifi na ondrosei fu den bladzijde. Ma a studenti e agri trutru nanga den sani di a e leri? Wi ben sa kan aksi en: ’Fa yu e feni a fasi fa Yehovah e denki fu a tori disi?’ ’Fa yu kan fiti den Bijbel gronprakseri disi na ini yu libi?’ Ma no frigiti fu sori lespeki gi a studenti, èn fu lespeki a fasi fa en e denki. Wi no ben sa wani poti aksi di kan meki a bijbelstudenti firi syen, noso aksi di kan afrontu en.—Odo 12:18.

11. Na sortu fasi den takiman di e hori publikitaki kan gebroiki aksi fu gi leri na wan bun fasi?

¹¹ Den takiman di e hori publikitaki kan gebroiki aksi na wan tumusi bun fasi tu. A takiman kan gebroiki aksi di den arkiman fu en no abi fu gi piki na tapu, ma di kan yepi den fu prakseri fu san den e yere. Ten na ten Yesus ben e gebroiki den sortu aksi dati (Mateyus 11:7-9). Baka di wan takiman taki den biginwortu fu a lezing fu en, dan a kan gebroiki aksi fu sori san na den edeprakseri di sa kon na fesi na ini a lezing. A ben sa kan taki: „Na ini a takimakandra di wi sa abi tide wi sa piki den aksi di e kon now . . . ” Dan, na a kaba fu a lezing a kan gebroiki den srefi aksi dati fu luku den edepenti syatu baka.

12. Gi wan eksempre fu sori fa Kresten owruman kan gebroiki aksi fu yepi tra bribiman fu feni trowstu nanga yepi fu a Wortu fu Gado.

¹² Te Kresten owruman e go na tra brada nanga sisa fu luku fa a e go nanga den, dan den kan gebroiki aksi sosrefi fu yepi „den sili di brokosaka” fu kisi trowstu fu a Wortu fu Yehovah (1 Tesalonikasma 5:14). Leki eksempre, fu trowstu wan sma di e sari, wan owruman kan poti en prakseri na Psalm 34:18. Drape skrifi: „Yehovah de krosibei fu den wan di den ati broko; èn den wan di masi na ini yeye, a e frulusu.” Efu na owruman wani overtoigi ensrefi taki a sma disi di lasi-ati, e frustan fa a tekst disi e fiti na en, dan na owruman ben sa kan aksi: ’Yehovah de krosibei fu suma? Yu e firi son leisi leki yu „ati broko” èn taki yu „masi na ini yeye”? Efu Bijbel e taki dati Yehovah de krosibei fu den sma dati, dan yu no denki taki a de krosibei fu yu tu?’ Te a sma di ben lasi-ati e kisi deki-ati na so wan lobi-ati fasi, dan dati kan gi en krakti baka.—Yesaya 57:15.

Gebroiki krinkrin buweisi

13, 14. (a) Fa wi kan taki-go-taki-kon nanga wan sma di e taki dati a no e bribi na ini wan Gado di a no man si? (b) Fu san ede wi no musu fruwakti taki ala sma sa agri nanga wi?

¹³ Na ini a diniwroko fu wi, wi wani doro na ati fu  sma nanga krinkrin buweisi di kan overtoigi den (Tori fu den Apostel 19:8; 28:23, 24). Ma dati wani taki dati wi musu leri fu gebroiki ala sortu kefalek buweisi, soso fu man yepi wan sma fu bribi na ini a waarheid fu a Wortu fu Gado? Kwetikweti. Te wi wani tyari buweisi kon na fesi fu overtoigi sma, dan dati no wani taki dati wi musu taki na wan kefalek frekti fasi. Furu tron a sa abi bun bakapisi te wi e tyari krinkrin buweisi kon na fesi na wan fasi di makriki fu frustan. Prakseri na eksempre disi.

¹⁴ Fa wi kan piki wan sma di e taki dati a no man bribi na ini wan Gado di a no man si? We, wi kan sori den taki noti no e kon fu ensrefi. Te wi e si wan sani, dan wi sabi taki a musu de so taki a sani ben abi wan bigin. Sobun wi kan taigi a sma: ’Kon meki wi taki dati yu de na wan farawe presi pe nowan sma e libi. Èn kon meki wi taki dati yu e si wan moi oso drape pe furu nyanyan de na ini den kukru kasi. A no de fu taki dati yu ben o agri wantewante taki wan sma bow na oso dati èn taki na en ben lai den kukru kasi nanga nyanyan, a no so? Sobun, te wi e si den kefalek moi sani di e lontu wi na grontapu èn te wi e luku a „nyanyan maksin” fu grontapu, dan dati no e meki wi frustan taki wan Sma musu de di ben meki ala den sani disi?’ Bijbel e gi wi a yoisti piki di de krin fu frustan te a e taki: „A no de fu taki dati ibri oso abi wan sma di meki en, ma a sma di meki ala sani, na Gado” (Hebrewsma 3:4). Ma awinsi o bun den buweisi de di wi e tyari kon na fesi, toku wi no kan fruwakti taki ala sma sa agri nanga wi. Bijbel e memre wi taki soso den sma di „abi a yoisti denki” sa tron bribiman.—Tori fu den Apostel 13:48; 2 Tesalonikasma 3:2.

15. Sortu fasi fu taki-go-taki-kon wi kan gebroiki fu poti prakseri na a fasi fa Yehovah de èn a fasi fa a e du sani? Sortu tu eksempre e sori krin fa wi kan gebroiki a fasi dati fu taki-go-taki-kon nanga sma?

¹⁵ Te wi e gi leri na ini a preikiwroko noso na ini a gemeente, dan wi kan gebroiki krinkrin buweisi fu poti prakseri na a fasi fa Yehovah de èn na a fasi fa a e du sani. Wan sani di Yesus ben e gebroiki ten na ten èn di e wroko heri bun tu, na wan fasi fu taki-go-taki-kon nanga sma pe a ben gebroiki den wortu ’o moro dan’ (Lukas 11:13; 12:24). A fasi disi fu taki-go-taki-kon nanga sma abi fu du nanga tu difrenti sani di yu e teki gersi nanga makandra. Te wi e gi leri na a fasi disi, dan a kan naki na ati fu sma trutru. Fu sori wan sma taki a leri fu helfaya noiti no kan tru, wi ben sa kan taki: ’Nowan papa di lobi en pikin sa hori na anu fu a pikin na ini faya fu strafu en, a no so? O moro dan a prakseri srefi fu wan helfaya, na wan tegu sani gi wi Tata na hemel!’ (Yeremia 7:31) Fu leri wan sma taki Yehovah e broko en ede nanga ibriwan fu den anbegiman fu en, wi ben kan taki: ’Efu Yehovah sabi a nen fu ala den milyardmilyard stari, o moro dan a sa broko en ede nanga libisma di lobi en èn di a ben bai nanga a diri brudu fu en Manpikin!’ (Yesaya 40:26; Tori fu den Apostel 20:28). Den sortu krinkrin buweisi disi kan yepi wi fu doro na ati fu sma.

Fa fu gebroiki a yoisti agersitori

16. Fu san ede a prenspari fu gebroiki agersitori te wi e gi leri?

¹⁶ Te wi e gebroiki den yoisti agersitori, dan dati kan gi sma moro prisiri fu arki wi te wi e gi leri. Fu san ede a prenspari fu gebroiki agersitori te wi e gi leri? Wan leriman ben taki: „A denki di libisma man denki fu wan sani di den no man si, na wan fu den moro muilek sani di libisma man du.” Agersitori e yepi wi fu si wan sani nanga wi frustan, aladi a sani dati no de fu si trutru nanga wi ai. Na so wan fasi wi e frustan moro bun san a sani di wi e yere wani taki. Yesus ben sabi heri bun fa fu gebroiki agersitori (Markus 4:33, 34). Meki wi go luku fa wi kan gebroiki a fasi disi fu gi leri.

17. San na fo sani di e meki taki wan agersitori e naki na ati fu sma?

¹⁷ San e meki taki wan agersitori e naki na ati fu sma? A fosi sani, na taki a musu fiti na den arkiman fu wi. A musu abi fu du nanga sani di den man fu frustan wantewante. Wi no musu frigiti taki Yesus gebroiki furu agersitori di ben abi fu du nanga na aladei libi fu den arkiman fu en. A di fu tu sani, na taki wan agersitori musu kruderi nanga a pisi tori di yu wani tyari kon na fesi. Efu a sani di yu wani gebroiki leki agersitori no e fiti a sani di yu wani leri den arkiman fu yu, dan na agersitori dati kan puru a prakseri fu den. Leki di fu dri sani, a no musu de so taki wan agersitori abi furu finifini tori na ini di no de prenspari. Memre taki te Yesus ben e gebroiki agersitori, dan a ben e taki soso fu sani di ben de prenspari. A no ben fruteri den pisi fu a tori di no ben de fanowdu. A di fu fo sani na taki wi musu sorgu taki sma frustan krin fu san ede wi e gebroiki a spesrutu agersitori dati. Efu wi no du dati, dan a kan taki son sma no sa frustan san na a sani di wi wani leri den.

18. Fa wi kan feni agersitori di e fiti a sani di wi wani leri sma?

 ¹⁸ Fa wi kan feni agersitori di e fiti a sani di wi wani leri sma? A no de fanowdu fu go denki langabere tori di wi kan fruteri sma. Syatu agersitori kan wroko heri bun. Pruberi fu feni eksempre di abi fu du spesrutu nanga a tori di yu e taki. Kon meki wi taki dati wi e taki nanga wan sma fu a fasi fa Gado e gi pardon, èn taki wi wani gebroiki wan agersitori fu horibaka gi a sani di e kon na fesi na ini Tori fu den Apostel 3:19, pe skrifi taki Yehovah kan „figi” den sondu noso fowtu fu wi „puru”. A sani di a tekst disi e tyari kon na fesi na wan agersitori fu ensrefi kaba. Ma sortu eksempre wi kan gebroiki fu agersi a sani disi? Kande wi kan teki na eksempre fu wan wrokosani di wan skoromeester e gebroiki fu figi wan bord na skoro. Wi ben sa kan taki: ’Te Yehovah e gi wi pardon fu sondu, dan a e figi den sondu fu wi puru, neleki fa wan skoromeester e gebroiki wan wrokosani fu figi den sani puru di ben skrifi na tapu wan bord na skoro.’ Te na agersitori fruteri na so wan makriki fasi, dan wan sma kan frustan en wantewante.

19, 20. (a) Pe wi kan feni agersitori di e fiti san wi wani leri sma? (b) San na wan tu eksempre fu agersitori di e fiti san wi wani leri sma èn di de fu feni na ini den publikâsi fu wi? (Luku a faki sosrefi.)

¹⁹ Pe wi kan feni den yoisti agersitori, èn sosrefi eksempre di abi fu du nanga na aladei libi? Meki muiti fu prakseri fu sani di yu ben ondrofeni na ini yu eigi libi, noso fu sani di pasa na ini a libi fu den difrenti brada nanga sisa fu yu. Wi kan feni agersitori na difrenti tra fasi tu, namku te wi e luku sani di no abi libi noso sani di abi libi, sosrefi sani di wi abi na ini na oso, noso aladei sani di pasa na ini a libimakandra èn di furu sma sabi. Te wi de na ai fu „luku finifini” san e pasa lontu wi na ini na aladei libi, dan dati sa yepi wi fu feni agersitori di e fiti san wi wani leri sma (Tori fu den Apostel 17:22, 23). Wan buku di e leri sma fa fu taki na fesi trawan, e fruteri: „Te wan takiman de na ai fu luku fa a libi fu libisma e waka èn e poti prakseri na den difrenti wroko di libisma e du, te a e taki nanga ala sortu sma, e ondrosuku sani finifini èn e poti aksi fu kon frustan den sani dati bun, dan a sa kon sabi furu sani di a kan gebroiki leki eksempre noso leki agersitori èn di sa de wan bigi yepi gi en na den momenti di a o abi den fanowdu.”

²⁰ Wan tra presi pe wi kan feni furu agersitori di e fiti san wi wani leri sma, na A Waktitoren, nanga Ontwaakt!, èn sosrefi tra buku di Yehovah Kotoigi tyari kon na doro. Yu kan leri furu te yu e luku fa den publikâsi disi e gebroiki agersitori. * Teki leki eksempre, na agersitori di de fu feni na ini paragraaf 11 fu kapitel 17 fu a Sabi-buku. A e agersi a fasi fa den memre fu a gemeente e difrenti fu makandra, nanga den difrenti sortu wagi di e rei na yu sei na tapu wan pasi. San e meki taki na agersitori disi e fiti so moi na ini a pisi tori disi? Luku taki a abi fu du nanga wan sani di e pasa na ini na aladei libi èn taki na difrenti fasi a e kruderi nanga a pisi tori di e kon na fesi drape. Boiti dati, a de krin tu san wi musu leri fu na agersitori disi. Te wi e gi leri, dan wi kan gebroiki agersitori di de fu feni na ini den publikâsi fu wi. Efu a de fanowdu wi kan kenki den fu fiti wan bijbelstudenti, noso wi kan kenki den fu gebroiki den na ini wan lezing.

21. Sortu blesi wi kan kisi te wi de bun leriman fu a Wortu fu Gado?

²¹ Den blesi di wan sma kan kisi te a de wan bun leriman, furu srefisrefi. Te wi e gi sma leri, dan wi e prati san wi abi nanga trawan, èn wi e gebroiki san wi abi fu yepi den. Te wi e gi sma sani na a fasi dati, dan dati kan tyari blesi kon gi wi, fu di Bijbel e taki: „Wan sma sa de moro koloku te a e gi sani, leki te a e kisi sani” (Tori fu den Apostel 20:35). Leki leriman fu a Wortu fu Gado, a koloku dati na a prisiri di wi abi fu di wi sabi taki den sani di wi e leri sma na trutru wan warti sani, wan sani di sa tan, namku a waarheid fu Yehovah. Wi sa prisiri sosrefi fu di wi sabi taki wi teki na eksempre fu a Gran Leriman, Yesus Krestes.

[Futuwortu]

Yu e memre disi ete?

• Fa wi kan gi leri na wan fasi di makriki fu frustan te wi e hori oso-bijbelstudie, èn te wi e hori lezing na ini a gemeente?

• San na wan moi fasi fa wi kan gebroiki aksi te wi e preiki oso fu oso?

• Fa wi kan gebroiki krinkrin buweisi fu poti prakseri na a fasi fa Yehovah de èn tapu a fasi fa a e du sani?

• Pe wi kan feni agersitori di e fiti a sani di wi wani leri sma?

[Aksi fu a tori disi]

 [Faki/Prenki na tapu bladzijde 23]

Yu e memre den agersitori disi ete?

Dyaso wi abi wan tu moi agersitori di ben abi krakti tapu sma. Fu san ede yu no e suku a buku noso tijdschrift pe na agersitori skrifi, fu luku fa a yepi fu poti krakti tapu a pisi tori gi san den ben gebroiki en?

• Neleki fa wan dronman nanga wan singiman, noso tu man di e puru hebi dosu na ini wan wagi musu man wroko makandra fu du den wroko bun, na so a de tu taki yu musu man feni a yoisti trowpatna efu yu wani abi wan koloku trowlibi.​—A Waktitoren, 15 mei 2001, bladzijde 16.

• Te yu e fruteri wan sma fa yu e firi, dan a de leki te yu e iti wan bal go na en. Yu kan iti a bal safri, noso yu kan fringi a bal nanga so wan krakti taki a e gi a trawan mankeri.​—Sabi di e tjari joe go na têgo libi, bladzijde 144.

• Fu leri sori lobi, de a srefi leki fu leri wan nyun tongo.—A Waktitoren, 15 februari 1999, bladzijde 18, 22, 23.

• Gi den ogri yeye, afkodrei e du a srefi leki san beti e du gi wan ontiman. A beti e hari a meti kon di na ontiman wani kisi.—Sabi di e tjari joe go na têgo libi, bladzijde 111.

• Wi kan agersi a fasi fa Yesus puru den bakapikin fu Adam na ini a nowtu fu den, nanga a fasi fa wan guduman e pai a paiman fu wan wrokope (wan basi di kruka ben meki a paiman dati). Dati e meki taki den wrokoman man tan na wroko fu di a guduman e opo a fabriki baka. Na so wan fasi a e du bun gi den furu wrokoman di e wroko drape.​—A Waktitoren, 15 februari 1999, bladzijde 16.

[Prenki na tapu bladzijde 20]

Tru Kresten na leriman fu a Wortu fu Gado

[Prenki na tapu bladzijde 21]

Owruman kan gebroiki aksi fu yepi brada nanga sisa fu kisi trowstu fu a Wortu fu Gado