„A tjari mi kom na dem tiri watra”

NA INI a faya kontren fu Palestina, den skapu musu dringi watra ibri dei. Fu dati ede, wan tumusi prenspari sani di wan skapuman musu du, na fu gi watra na a ipi skapu fu en. Sontron skapuman e go na wan peti fu kisi watra gi den ipi fu den. Den e kanti a watra na ini dringibaki, so taki den skapu kan dringi (Genesis 29:1-3). Ma spesrutu ini alenten, dan den kontren lontu den kriki nanga den liba e tron switi „presi fu rostu pe furu watra e lon”.—Psalm 23:2.

Wan skapuman di e du en wroko bun, musu sabi pe a kan feni watra nanga weigron pe na ipi skapu fu en kan feni bun grasi fu nyan. Te a sabi wan kontren heri bun, dan dati na wan dyaranti taki den skapu fu en o tan na libi. Furu yari langa David ben e sorgu skapu na ini a kontren fu den pikin bergi fu Yudea. David ben agersi a fasi fa Gado e tiri sma na yeye fasi, nanga a fasi fa wan skapuman e tyari den skapu fu en na weigron pe den kan feni bun grasi nanga watra di e hori den na libi. Soleki fa wán vertaling skrifi, dan David ben taki: „A tjari mi kom na dem tiri watra.”—Psalm 23:1-3, Da Bijbel na ini Sranantongo.

Furu yari baka dati, dan Yehovah ben gebroiki en profeiti Esekièl fu taki wan srefi sortu agersitori. A ben pramisi taki a pipel fu en ben o komoto fu ala den kondre pe den ben panya go. Yehovah ben o tyari den kon makandra, neleki fa wan skapuman e tyari den skapu fu en kon makandra. Yehovah ben gi den a dyaranti disi: „Mi sa tjari dem . . . kom na dem egi kondre, en Mi sa gi dem njanjan na tapoe dem bergi foe Israël na sei foe dem liba.”—Esekièl 34:13, Da Bijbel na ini Sranantongo.

Wan sani nanga san Yehovah Gado e broko en ede trutru, na fu gi watra na yeye fasi. A buku Openbaring e fruteri fu „wan liba nanga libi watra” di e lon kon fu a kownusturu fu Gado (Openbaring 22:1). Ala pipel kisi a kari fu dringi fu a liba disi: „Meki ibriwan sma di wani so, teki a watra fu libi fu soso.”—Openbaring 22:17.

Na agersi watra fu libi e prenki den sani di Gado seti so taki libisma man kisi têgo libi. Iniwan sma kan bigin dringi fu a watra disi te a ’e teki sabi na ini en fu a wan-enkri tru Gado èn fu a sma di a seni kon, Yesus Krestes’.—Yohanes 17:3.