Aksi fu leisiman

• Lucifer na a nen di Bijbel e gebroiki gi Satan?

A nen Lucifer de fu feni wán leisi na ini den Buku fu Bijbel èn a de fu feni na ini wan tu vertaling fu Bijbel nomo. Fu gi wan eksempre, Yesaya 14:12 skrifi na a fasi disi na ini Da Bijbel na ini Sranantongo: „O fa joe ben fadon komopo foe hemel, O Lucifer, manpikin foe mamanten!”

A Hebrew wortu di vertaal leki „Lucifer” wani taki „a wan di e skèin”. A Septuaginta e gebroiki a Griki wortu di wani taki „tyariman fu deibroko”. Fu dati ede, wan tu Bijbel e gebroiki wortu di vertaal komoto fu a fosi Hebrewtongo, èn den wortu disi wani taki „mamanten stari” noso „Dei stari”. Ma a Latijn Vulgaat fu Hièronimus e gebroiki a wortu „Lucifer” (tyariman fu leti), èn leki bakapisi fu dati a wortu dati de fu feni na ini difrenti sortu Bijbel.

Suma na a Lucifer disi? Den wortu „a wan di e skèin”, noso a wortu „Lucifer”, de fu feni na ini wan odo di Yesaya ben komanderi den Israelsma fu taigi a kownu fu Babilon, èn a komando dati ben de wan profeititori. Fu dati ede, a wortu „Lucifer” na wan pisi fu wan odo di ben abi fu du na a fosi presi nanga den kownu fu Babilon, bigin nanga Nebukadnesar. Den wortu „a wan di e skèin” no abi fu du nanga wan yeye mekisani, ma den abi fu du nanga wan libisma. Dati de krin fu si na den wortu: „Den sa tyari yu go na ini Syeol”. Syeol na a grebi fu libisma, a no de wan presi pe Satan Didibri e tan. Boiti dati, den wan di e si te a sani disi pasa nanga Lucifer, e aksi: „Na disi na a man di ben bruya grontapu?” A krin fu si taki a wortu „Lucifer” abi fu du nanga wan libisma. A no abi fu du nanga wan yeye mekisani.—Yesaya 14:4, 15, 16.

Fu san ede Bijbel e taki na so wan aparti fasi fu den kownu fu Babilon? Wi musu frustan taki sma ben musu kari a kownu fu Babilon ’a wan di e skèin’, soso baka di a ben fadon, èn den ben musu du dati na wan spotu fasi sosrefi (Yesaya 14:3). Fu di den kownu fu Babilon ben abi heimemre, meki den ben denki taki den ben hei moro leki den sma na den lontu. Den kownu ben abi bun furu heimemre, èn Bijbel e sori fa den ben e meki bigi: „Mi sa opo go na hemel. Mi sa opo a kownusturu fu mi kon hei moro den stari fu Gado, èn mi sa sidon na tapu a bergi pe den e kon makandra, na den moro farawe pisi fu a noordsei. . . . Mi sa meki misrefi gersi a Moro Heiwan.”—Yesaya 14:13, 14.

„Den stari fu Gado” na den kownu fu a kownu lo fu David (Numeri 24:17). Bigin nanga David, den „stari” disi ben e tiri komoto fu a Sionbergi. Baka di Salomo bow wan tempel na ini Yerusalem, dan sma bigin kari a heri foto Sion. Ala den mansma fu Israel di ben de na ondro a Wetfrubontu ben musu go na Sion dri leisi na ini wan yari. Fu dati ede, Sion ben tron „a bergi pe [sma] e kon makandra”. Fu di Nebukadnesar ben abi a fasti bosroiti fu teki a makti abra fu den kownu fu Yuda èn fu puru den fu a bergi dati, meki a e meki bekènti taki a sa opo ensrefi hei moro den „stari” dati. Na presi taki a e gi Yehovah grani fu di a wini den kownu dati, dan a e sori bigifasi fu di a e poti ensrefi na ini a presi fu Yehovah. Sobun, baka di a kownu lin fu Babilon fadon, dan Bijbel e kari en na wan spotu fasi „a wan di e skèin”.

A bigifasi fu den tiriman fu Babilon trutru ben sori sortu denki „a gado fu a seti fu sani disi”, Satan Didibri, abi (2 Korentesma 4:4). A e angri tu fu kisi makti èn fu opo ensrefi moro hei leki Yehovah Gado. Ma Bijbel no e gebroiki a nen Lucifer fu taki fu Satan.

• Fu san ede 1 Kroniki 2:13-15 e kari David a di fu seibi manpikin fu Isai, aladi 1 Samuel 16: 10, 11 e sori taki David ben de a di fu aiti pikin fu en papa?

Baka di Kownu Saul fu owruten Israel ben drai baka gi a tru anbegi, dan Yehovah Gado seni a profeiti Samuel fu salfu wan fu den manpikin fu Isai, so taki a ben kan tron kownu. Samuel srefi ben skrifi a tori disi di ben pasa na ini owruten, èn a ben du dati nanga yepi fu a santa yeye na ini a di fu erfu yarihondro b.G.T. A tori disi e sori taki David ben de a di fu aiti manpikin fu Isai (1 Samuel 16:10-13). Ma a priester Esra ben skrifi a srefi tori disi 600 yari bakaten, èn a tori dati e taki: „Isai, fu en sei, ben tron papa fu en fosi gebore manpikin Eliab, nanga Abinadab a di fu tu manpikin, nanga Shimea a di fu dri manpikin, Netanel a di fu fo manpikin, Radai a di fu feifi manpikin, Osem a di fu siksi manpikin, David a di fu seibi manpikin” (1 Kroniki 2:13-15). San ben pasa nanga wan fu den brada fu David, èn fu san ede Esra no skrifi a nen fu a brada disi?

Bijbel e taki dati Isai „ben abi aiti manpikin” (1 Samuel 17:12). Soleki fa a sori, dan wan fu den manpikin fu en no ben libi langa nofo fu trow èn fu kisi pikin. Fu di a no ben abi bakapikin, meki a no ben o abi reti tapu a famirigudu fu en lo, èn a no ben o de fanowdu sosrefi taki a nen fu en ben poti na ini den lolo di ben e sori suma ben de fu a famirilin fu Isai.

Meki wi poti prakseri now na a ten fu Esra. Luku san ben de a situwâsi na a ten di a ben e skrifi den buku Kroniki. Sowan 77 yari na fesi, den Dyu ben komoto na ini katibo na Babilon èn den go libi baka na ini a kondre fu den. A kownu fu Persia ben taigi Esra fu poti sma na wroko leki krutuman nanga leriman fu a Wet fu Gado, èn fu moi na oso fu Yehovah. Na a ten dati a ben de fanowdu fu sabi soifri sortu sma ben abi reti tapu den famirigudu fu den lo èn fu sorgu sosrefi taki den sma wawan di ben abi a reti ben e dini leki priester. Sobun, Esra ben skrifi finifini fu a historia fu a pipel, èn a ben skrifi soifri sosrefi sortu sma ben de fu a famirilin fu Yuda nanga David. A no ben o de fanowdu fu skrifi a nen fu a manpikin fu Isai di dede sondro taki a ben kisi pikin. Fu dati ede Esra no skrifi a nen fu a manpikin dati.