Fa den trutru santawan kan yepi yu?

NA SUMA a Griki wortu di vertaal nanga „santawan” e sori go na ini den Buku fu Bijbel? Wan buku, An Expository Dictionary of New Testament Words, e taki fu a Griki wortu disi: „Te sma e gebroiki a Griki wortu gi ’santawan’ te den e taki fu moro leki wán bribiman, dan den e sori go na ala bribiman. A no de so taki sma e gebroiki a wortu disi nomo te den e taki fu sma di santa na wan spesrutu fasi. A no de so tu taki sma e gebroiki a wortu soso gi sma di dede èn di kisi grani fu den tumusi bun sani di den du.”

Dati meki na apostel Paulus ben kari ala fosi Kresten trutru santawan. Fu eksempre, na ini a fosi yarihondro G.T. Paulus ben skrifi wan brifi go „na a gemeente fu Gado di de na ini Korente, makandra nanga ala den santawan di de na ini heri Akaye [wan kondre di ben de na ondro a tiri fu Rome]” (2 Korentesma 1:1). Bakaten, Paulus ben skrifi wan brifi go „na ala den wan di de na ini Rome leki lobiwan fu Gado, èn di kisi a kari fu de santawan” (Romesma 1:7). Soleki fa a sori, dan den santawan disi no ben dede ete. Moro fara, a no de so taki den ben kisi spesrutu grani, fu di den du tumusi bun sani di bun moro leki san den tra bribiman ben du. San meki taki sma ben kan kari den santawan?

Na Gado e fruklari sma santa

Gado Wortu e sori taki a no de so taki wan libisma, noso wan organisâsi, e fruklari wan sma santa. Bijbel e taki: „[Gado] frulusu wi èn a kari wi nanga wan santa kari. A no du dati fu wi wroko ede, ma fu en eigi wani nanga en bun-ati ede” (2 Timoteyus 1:9). Wan santawan e kon santa fu di Yehovah e gi a sma a kari dati, akruderi a bun-ati fu Gado èn sosrefi akruderi a wani fu En.

Den santawan fu a Kresten gemeente de na ini „wan nyun frubontu”. A brudu di Yesus Krestes trowe, meki taki a frubontu disi bigin wroko èn a brudu fu en e santa den wan di de na ini a frubontu dati (Hebrewsma 9:15; 10:29; 13:20, 24). Den sma disi di kon krin ini Gado ai, na ’wan santa priestergrupu, èn den e tyari srakti-ofrandi na yeye fasi di Gado feni bun nanga yepi fu Yesus Krestes’.—1 Petrus 2:5, 9.

Sma e begi den santawan fu dini leki mindriman gi den

Fu di milyunmilyun sma e bribi taki „santawan” kan gi spesrutu krakti na den sma di abi bribi, dati meki den e anbegi den. Fu man du dati, dan den sma disi e gebroiki wan sani di ben de fu den santawan, noso den e begi den santawan fu dini leki mindriman gi den. Bijbel e leri sma fu du dati? Na ini a Bergitaki, Yesus ben leri den bakaman  fu en fa fu begi Gado. A ben taki: „Unu musu begi, fu dati ede, na a fasi disi: ’Wi Tata na hemel, meki yu nen kon santa’” (Mateyus 6:9). A fiti fu seni begi go na Yehovah Gado wawan.

Wan tu sabiman fu kerki tori e kari Romesma 15:30 fu sori taki den „santawan” e dini leki mindriman gi libisma. A bijbeltekst dati e taki: „Mi e frumane unu, brada, nanga yepi fu wi Masra Yesus Krestes èn nanga yepi fu a lobi fu a yeye, taki unu span unsrefi makandra nanga mi fu seni begi go na Gado gi mi.” A de so taki Paulus ben gi den bribiman dati deki-ati fu begi en, noso fu taki na ini a nen fu en te den ben wani aksi Gado wan sani? Nôno. Aladi Bijbel e gi wi deki-ati fu begi gi den trutru santawan, toku nowan bijbeltekst e sori taki Gado taigi wi fu begi den, noso fu begi na ini a nen fu den fu man aksi wan sani.—Filipisma 1:1, 3, 4.

Ma Gado poti wan Mindriman gi wi, so taki wi kan seni den begi fu wi go na Gado nanga yepi fu en. „Mi na a pasi nanga a waarheid nanga a libi”, na so Yesus Krestes ben taki. „Nowan sma e kon na a Tata sondro a yepi fu mi.” Yesus ben taki tu: „Iniwan sani di unu e aksi na ini mi nen, mi sa du disi, so taki a Tata kan kisi glori nanga yepi fu a Manpikin. Efu unu aksi iniwan sani na ini mi nen, mi sa du dati” (Yohanes 14:6, 13, 14). Wi kan abi na overtoigi taki Yehovah de klariklari fu arki wi te wi e begi en na ini a nen fu Yesus. Bijbel e taki fu Yesus: „A man frulusu sosrefi, den wan di e go na Gado nanga yepi fu en, èn a man frulusu den dorodoro, bika ala ten a de na libi fu opo taki [fu dini leki mindriman] gi den.”—Hebrewsma 7:25.

Efu Yesus de klariklari fu dini leki mindriman gi wi, dan fu san ede sma na ini Krestenhèit e aksi sani na ini a nen fu „santawan” te den e begi? A historia skrifiman Will Durant ben fruteri na ini a buku fu en The Age of Faith, fu pe a gwenti disi komopo. Aladi Durant sori taki sma ben abi bigi frede gi na Almakti Gado, èn a gersi leki sma ben e taki moro makriki nanga Yesus, toku Durant taki: „Sma no ben abi deki-ati fu taki langalanga nanga [Yesus] fu di den no gi ben yesi kwetikweti na den sani di a ben fruklari na ini a Bergitaki fu en. Den ben denki taki a ben o moro bun fu fruteri wan santawan san den ben wani aksi na ini begi. Fu di a Kerki fruklari a sma santa, meki den ben bribi taki a santawan disi ben de na hemel, fu kan dini leki  mindriman gi den fu taki nanga Krestes.” A de so taki sma musu frede fu taki langalanga nanga Gado nanga yepi fu Yesus?

Bijbel e leri wi dati nanga a yepi fu Yesus wi man ’taki fri èn wi man kon na fesi Gado nanga ala frutrow’ te wi e begi Gado (Efeisesma 3:11, 12). Na Almakti Gado no de tumusi fara fu libisma fu man yere den begi fu wi. A psalm skrifiman David ben begi nanga overtoigi: „O Yereman fu begi, na yu sma fu ala sortu skin sa kon srefi” (Psalm 65:2). Fu man gi sma krakti, Yehovah no e gebroiki sani di ben de fu den „santawan” di dede. Na presi fu dati, Yehovah e gi en santa yeye na den sma di e aksi en fu dati nanga wan ati di abi bribi. Yesus ben taki: „We, efu unu leki ogri sma, sabi fa fu gi bun presenti na den pikin fu unu, o moro dan a Tata na hemel, sa gi santa yeye na den wan di e aksi en fu dati!”—Lukas 11:13.

A frantwortu fu den santawan

Den santawan di Paulus ben skrifi brifi go na den, dede someni yarihondro kaba. Baka wan pisi ten den ben o kisi „a kownu-ati fu libi”. Dati wani taki dati den ben o kisi wan opobaka fu go na hemel (Openbaring 2:10). Srefi den moro fayafaya anbegiman fu Gado e erken taki awansi wi ben o anbegi den trutru santawan disi, toku dati no kan gi wi a dyaranti taki den sa kibri wi gi siki, rampu, problema na ekonomia sei, na owru di sma e kon owru, noso dede. Fu dati ede yu kan aksi yusrefi: ’Den santawan fu Gado trutru e broko den ede nanga wi? Wi musu bribi taki den sa du wan sani fu yepi wi?’

Na ini wan profeititori, Danièl ben taki wan prenspari sani fu santawan. Na ini a di fu siksi yarihondro b.G.T., a ben si wan fisyun di ben naki en ati trutru. A kontru fu a profeititori disi de fu si te na ini a ten fu wi. Fo bigi meti ben komoto na ini a se. Den meti disi e prenki den libisma tirimakti di no man gi libisma trutru san den abi fanowdu. Ne Danièl ben taki a profeititori disi: „Ma den santawan fu a Moro Heiwan sa kisi a kownukondre, èn den sa abi a kownukondre te ten di no skotu, iya, fu ten di no skotu te go miti ten di no skotu.”—Danièl 7:17, 18.

Paulus ben sori krinkrin taki na „erfenis gi den santawan” wani taki dati den sa kisi a grani fu tiri makandra nanga Krestes na ini hemel (Efeisesma 1:18-21). A brudu fu Yesus opo a pasi gi 144.000 santawan fu kisi libi na ini hemel. Na apostel Yohanes ben fruklari: „Koloku èn santa ibri sma de, di abi wan prati na a fosi opobaka; na tapu den wan disi a di fu tu dede no abi makti, ma den sa de priester fu Gado èn fu Krestes èn den sa tiri leki kownu makandra nanga en, dusun yari langa” (Openbaring 20:4, 6; 14:1, 3). Na ini wan fisyun, Yohanes ben yere wan bigi grupu fu yeye na ini hemel, singi na fesi Yesus di kisi glori: „Nanga a brudu fu yu, yu ben bai gi Gado sma fu ibri lo nanga tongo nanga pipel nanga nâsi, èn yu ben meki den kon tron wan kownukondre nanga priester gi wi Gado, èn den sa tiri grontapu leki kownu” (Openbaring 5:9, 10). Disi na trutru wan bigi trowstu! Yehovah Gado srefi luku finifini bifo a teki den man nanga den uma disi puru na mindri libisma. Boiti dati, den sma disi dini na wan getrow fasi na grontapu, pe den ben kisi fu du nanga pikinmoro ala den problema di e miti libisma (1 Korentesma 10:13). Fu dati ede wi kan abi na overtoigi taki den santawan disi di kisi wan opobaka, sa de tiriman di abi sari-ati gi sma èn di e frustan fa libisma e firi. Den sa de sma di sa hori den swakifasi fu wi na prakseri, èn den o sabi san wi man du èn san wi no man du.

Den blesi di a Kownukondre tiri sa tyari kon

Dyonsro a Kownukondre tiri sa puru ala ogri nanga pina fu grontapu. Na a ten dati, libisma sa kon abi wan banti nanga Gado di tranga moro leki oiti bifo. Yohanes ben skrifi: „Ne mi ben  yere wan tranga sten di komoto na a kownusturu, e taki: ’Luku! A tenti fu Gado de na libisma, èn a sa tan nanga den, èn den sa de en pipel. Èn Gado srefi sa de nanga den.’” Leki bakapisi fu dati, libisma sa kisi furu blesi srefisrefi: „Èn a sa figi puru ala watra na den ai, èn dede no sa de moro, nowan sari, nowan babari, nowan pen no sa de moro. Den fositen sani pasa kaba.”—Openbaring 21:3, 4.

Dati trutru sa de wan prisiri ten! Mika 4:3, 4 e fruteri moro fara san na a bakapisi fu a kefalek bun fasi fa Krestes Yesus nanga den 144.000 santawan sa tiri. Drape e taki: „Fu tru, [Yehovah] sa hori krutu na mindri furu pipel èn poti sani reti ini a tori fu makti nâsi di de farawe. Èn den sa abi fu naki den feti-owru fu den kon tron prugu èn den lansri fu den kon tron grasinefi. Nâsi teige nâsi, den no sa opo feti-owru moro, èn den no sa leri feti moro. Èn den sa sidon trutru, ibriwan na ondro en droifibon èn na ondro en figabon, èn nowan sma sa de di e meki den beifi; bika na a mofo fu Yehovah fu den legre srefi di taki disi.”

Den santawan e gi wi a kari fu teki prati na den blesi dati. Bijbel e prenki den trutru santawan leki wan trowmisi di e tan taki: „Kon!” A bijbeltekst e taki moro fara: „Èn meki ibriwan sma di e yere, taki: ’Kon!’ Èn meki ibriwan sma di e drei watra, kon; meki ibriwan sma di wani so, teki a watra fu libi fu soso” (Openbaring 22:17). San na wan fu den sani di „a watra fu libi” disi wani taki? Wan sani na a soifri sabi fu den sani di Gado abi na prakseri. Di Yesus ben e begi Gado, dan a taki: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3). Wi kan kisi a sabi disi te wi e studeri Bijbel doronomo. Wi kan prisiri srefisrefi taki nanga yepi fu Gado Wortu wi kan si suma na den trutru santawan, èn sosrefi fa Gado sa gebroiki den fu blesi libisma fu têgo!

[Prenki na tapu bladzijde 4]

Paulus ben skrifi brifi nanga yepi fu santa yeye, go na sma di ben de trutru santawan

[Prenki na tapu bladzijde 4, 5]

Den getrow apostel fu Yesus ben tron trutru santawan

[Prenki na tapu bladzijde 6]

Wi kan begi Gado nanga yepi fu Yesus Krestes sondro fu frede

[Prenki na tapu bladzijde 7]

Den santawan di kisi wan opobaka, sa abi sari-ati nanga libisma te den sa tiri grontapu