„Na Yehovah e frulusu sma”

TE PROBLEMA de na ini wan kondre, noso te kondre no man feni en nanga makandra, dan sma e fruwakti taki a tirimakti fu a kondre fu den sa sorgu taki ogri no e miti den. Tirimakti fu den sei e du ala sortu sani fu man bondru a pipel kon na wán. O moro den sani dati e gi sma deki-ati fu de getrow na a kondre fu den, o moro sma e hori fayafaya seremonia fu sori taki den abi tranga lobi gi a kondre fu den.

Te rampu miti wan kondre, dan furu tron a de so taki a tranga lobi di sma abi gi a kondre fu den e gi den a firi taki den de na ini wánfasi nanga makandra èn taki den musu feti gi a kondre fu den. A kan meki sosrefi taki sma e bigin wroko makandra fu du sani fu a bun fu a libimakandra. Ma soleki fa wan artikel na ini a tijdschrift The New York Times Magazine e taki, dan „te wan sma abi so wan tranga lobi gi a kondre fu en taki a no man hori ensrefi, dan a ben kan du sani di kan tyari takru bakapisi kon.” A lobi dati kan de so tranga taki sma e bigin du sani di kan meki taki son sma na ini a kondre sa lasi son reti di den abi, èn den no sa man anbegi a gado fu den moro soleki fa den wani. A de so moro furu taki tru Kresten e kisi kwinsi, fu di sma ben kan dwengi den fu du sani di no e kruderi nanga a bribi fu den. Fa tru Kresten e tyari densrefi te moro nanga moro sma na den lontu e sori taki den abi tranga lobi gi a kondre fu den? Sortu Bijbel gronprakseri e yepi den fu du soifri san Gado feni bun èn fu tan getrow na en?

„Yu no musu boigi gi den”

Son leisi, den sma di abi tranga lobi gi a kondre fu den e teki en leki wan gwenti fu taki a fraga fu a kondre odi. Ma fraga furu tron abi prenki fu sani di de fu si na hemel, soleki stari, èn sosrefi fu sani na grontapu. Fu di Gado ben wani sori a pipel fu en fa a ben feni en taki den ben e boigi gi den sortu sani dati, dan a gi den a komando disi: „Yu no musu meki wan popki gi yusrefi, di yu temre, noso wan skin di gersi iniwan sani di de na hemel na tapu, noso di de na grontapu na ondro, noso di de na ini den watra na ondro grontapu. Yu no musu boigi gi den, noso meki sma kori yu fu dini den, bika mi, Yehovah, yu Gado, na wan Gado di wani taki sma e dini en wawan.”—Exodus 20:4, 5.

Wan sma kan taki dati a e hori ensrefi na a komando fu anbegi Yehovah Gado wawan, te a e gi wan fraga odi noso te a e saka kindi gi wan fraga di e prenki a tirimakti fu wan kondre? A tru taki den Israelsma fu owruten ben abi „marki”, noso postu, èn a pipel dati di ben prati na ini grupu fu dri lo, ben e kon makandra lontu den marki dati na a ten di den ben de na ini a sabana (Numeri 2:1, 2). A buku McClintock and Strong’s Cyclopedia e taki fu den Hebrew wortu di gebroiki gi den sortu postu dati: „Ma nowan fu den Hebrew wortu disi e meki wi prakseri fu wan sani soleki wan fraga.” Boiti dati, den Israelsma no ben e si den postu dati leki santa sani, èn den no ben e gebroiki den postu disi na ini den seremonia fu den. Den postu disi ben de noti moro leki marki di ben e sori a pipel pe den ben musu kon makandra.

Den popki nanga den prenki fu kerubim di ben de fu si na ini a tabernakel èn na ini a tempel fu Salomo, moro furu ben de fu prenki den hemel kerubim (Exodus 25:18; 26:1, 31, 33; 1 Kownu 6:23, 28, 29; Hebrewsma 9:23, 24). A pipel srefi noiti no ben e kisi na okasi fu si den sani disi. Dati e sori krin taki den no ben musu anbegi den sani disi, èn boiti dati, libisma no musu anbegi engel tu.—Kolosesma 2:18; Openbaring 19:10; 22:8, 9.

 Poti prakseri sosrefi na a popki fu a kopro sneki di a profeiti Moses ben meki na a ten di den Israelsma ben e tan na ini a sabana. A popki dati ben e prenki wan spesrutu sani èn a ben abi fu du nanga wan profeititori di ben o kisi wan kontru (Numeri 21:4-9; Yohanes 3:14, 15). Sma no ben e anbegi a sneki disi. Ma hondrohondro yari baka di Moses dede, dan den Israelsma bigin anbegi a srefi kopro sneki dati, aladi Gado no ben feni a sani dati bun. Den ben e bron switismeri sani srefi gi en. Fu dati ede, Kownu Heskia fu Yuda meki sma broko a sneki dati na pisipisi.—2 Kownu 18:1-4.

A tru taki a fraga fu wan kondre na wan marki nomo di sma kan gebroiki fu du bun sani? San a fraga disi e prenki? A skrifiman J. Paul Williams ben taki: „Gi den sma di abi tranga lobi gi a kondre fu den, a fraga na a moro prenspari sani di e prenki a frutrow di den abi na ini a kondre fu den, èn a de sosrefi a moro prenspari sani di den e anbegi.” A buku The Encyclopedia Americana e taki: „A fraga na wan santa sani, neleki fa a kroisi na wan santa sani.” A fraga e prenki a tirimakti fu wan kondre. Fu dati ede, te sma e boigi gi en, noso te sma e taki en odi, dan nanga dati den e sori taki den e anbegi a tirimakti. Te sma e du dati, dan den e sori taki den e bribi taki a tirimakti sa frulusu den, èn a sani dati no e kruderi nanga san Bijbel e taki fu afkodrei.

Bijbel e taki krin: „Na Yehovah e frulusu sma” (Psalm 3:8). Wan sma no musu gi grani na den seti fu libisma noso na sani di e prenki den seti disi, fu di a e bribi taki na den sa frulusu en. Na apostel Paulus ben gi Kresten a rai disi: „Mi lobiwan, no abi noti fu du nanga na anbegi fu kruktu gado” (1 Korentesma 10:14). Den fosi Kresten no ben e anbegi a tirimakti fu a kondre pe den ben e tan. Na ini a buku Those About to Die (Den wan di de fu lasi den libi), Daniel P. Mannix e skrifi: „Den Kresten ben e weigri fu tyari ofrandi gi a yeye di, soleki fa sma ben e bribi, ben e kibri a kèiser [fu Rome]. A sani disi ben de pikinmoro a srefi leki a weigri di sma e weigri fu taki a fraga odi na ini a ten disi.” Na so a de tu nanga tru Kresten na ini a ten disi. Fu di den wani anbegi Yehovah wawan, meki den no e taki nowan enkri fraga fu nowan enkri kondre odi. Fu di den no e du dati, dan den e poti Gado na a fosi presi, aladi den e tan lespeki tirimakti nanga den tiriman fu den. Iya, den sabi taki den musu gi yesi na den „hei tirimakti” di e tiri a kondre (Romesma 13:1-7). Ma san Bijbel e taki fu den singi di sma e singi fu sori taki den abi tranga lobi gi a kondre fu den? San Bijbel e taki fu kondresingi?

San na kondresingi?

A buku The Encyclopedia Americana e taki dati „kondresingi na singi di sma e singi fu sori taki den abi tranga lobi gi a kondre fu den èn furu tron den singi disi abi wortu na ini di e aksi Gado fu yepi èn fu kibri a pipel noso den tiriman fu den”. Fu taki en leti, wan kondresingi na wan singi di sma e singi fu prèise wan kondre, noso fu begi gi en. Na ini a singi disi sma gwenti fu aksi taki a kondre e kon gudu èn taki sani e tan waka bun nanga a kondre. Tru Kresten musu singi den sortu singi disi?

A profeiti Yeremia ben libi na mindri sma di ben e taki dati den ben e dini Gado. Toku Yehovah ben gi en a komando disi: „No begi gi a pipel disi, èn yu no musu krei gi a bun fu den noso begi wan tranga begi gi den, èn yu no musu kon na mi fu aksi mi nomonomo fu du wan sani gi den, bika mi no sa arki yu” (Yeremia 7:16; 11:14; 14:11). Fu san ede Gado ben gi Yeremia a komando disi? Fu di furu sma na ini a libimakandra dati ben e fufuru, den ben e kiri sma, den ben e du sutadu, den ben e meki falsi pramisi, èn den ben e anbegi kruktu gado.—Yeremia 7:9.

Yesus Krestes ben gi a yoisti eksempre di a taki: „Na fu den ede mi e begi yu; mi no e begi yu fu grontapu ede, ma fu den wan di yu gi mi” (Yohanes 17:9). Den Buku fu Bijbel e taki dati „heri grontapu de na ini a makti fu na ogriwan” èn a „e pasa gowe” (1 Yohanes 2:17; 5:19). Efu dati de so, dan fa tru Kresten kan begi nanga wan krin konsensi fu aksi Gado taki sani e tan waka bun nanga a seti fu sani dati?

A no de fu taki, dati a no ala kondresingi abi wortu di e begi Gado fu aksi spesrutu sani. Soleki fa a buku Encyclopædia Britannica e taki, dan „sma kan begi gi difrenti sani na ini wan kondresingi. Den kan begi taki sani e waka bun nanga kownu, den kan taki fu prenspari feti noso opruru fu a kondre . . . , èn den kan taki sosrefi fu a  tranga lobi di sma abi gi a kondre fu den”. Ma den sma di wani du san Gado feni bun kan breiti trutru nanga den orloku èn nanga den revo fu iniwan kondre? Yesaya ben taki fu tru anbegiman: „Den sa musu naki den feti-owru fu den kon tron plugu èn den lansri fu den kon tron grasi-nefi” (Yesaya 2:4). Na apostel Paulus ben skrifi: „Aladi wi e waka na skinfasi, toku wi no e feti na skinfasi. Bika den fetisani fu a feti fu wi no de na skinfasi.”—2 Korentesma 10:3, 4.

Den kondresingi di sma e singi, furu tron e sori taki sma lobi soso den eigi kondre, noso taki den e denki taki a kondre fu den bun moro tra kondre. A denki disi no e kruderi nanga Bijbel. Di na apostel Paulus ben e hori wan taki na tapu na Areopagus, dan a taki den wortu disi: „Fu wán sma, [Yehovah Gado] meki ibri nâsi fu libisma, fu libi na tapu a heri grontapu” (Tori fu den Apostel 17:26). Na apostel Petrus ben taki: „Gado no e teki sma partèi, ma na ini ibri nâsi a sma di e frede en èn di e du san de regtfardiki, bun na en ai.”—Tori fu den Apostel 10:34, 35.

Fu di furu sma e frustan Bijbel, meki den teki a bosroiti fu no taki a fraga odi èn fu no singi kondresingi. Ma san den e du te den kon na ini situwâsi di abi fu du nanga den afersi disi?

Weigri na wan lespeki fasi fu teki prati

Fu di Kownu Nebukadnesar fu owruten Babilon ben wani tranga a wánfasi na ini a gran kownukondre fu en, meki a poti wan bigi gowtu popki na tapu na opo presi fu Dura. Baka dati a hori wan seremonia so taki sma ben kan gi grani na a popki disi, èn a kari ala en tiriman, heiman, granman, raiman, nanga tra hei tiriman kon. Te a poku ben bigin prei, dan ala sma di ben kon makandra drape, ben musu boigi fu anbegi a popki. Sadrak, Mesak, nanga Abednego, dri Hebrew yonkuman, ben de drape tu. Fa den sori taki den no ben e teki prati na a seremonia disi di ben abi fu du nanga anbegi? Di a poku bigin prei, dan den sma di ben de drape go didon langalanga na tapu a gron na fesi a popki, ma den dri Hebrew yonkuman tan tanapu.—Danièl 3:1-12.

Na ini a ten disi, sma gwenti fu langa den anu te den e taki a fraga odi, noso den e poti den anu na den fesi-ede noso na tapu den borsu. Son leisi den e tanapu na wan spesrutu sortu fasi. Na ini son kondre, pikin musu kindi fu bosi a fraga te den de na skoro. Te tru Kresten e tanapu èn e tan pî te trawan e taki a fraga odi, dan den e sori nanga dati taki den abi lespeki gi a sani di den sma dati e du.

 Ma fa a de te sma e hori a seremonia fu a fraga na so wan fasi, taki a tanapu di wan sma ben o tanapu nomo ben o sori taki a e teki prati na a seremonia disi? Fu gi wan eksempre, kon meki wi taki dati wan studenti fu wan skoro musu teki presi gi a heri skoro fu taki a fraga odi di e anga na wan postu na tapu a skorodyari. Na a ten te a e du dati, dan den tra studenti di de na ini a klas musu opo tanapu. A tanapu wawan di den pikin e tanapu na a okasi disi, e sori taki den e agri taki a studenti di de na tapu a dyari e teki presi gi ibriwan fu den fu taki a fraga odi. Wan studenti di e tanapu, awansi na sortu fasi, ben o sori nanga dati taki a e teki prati na a seremonia. Efu dati de so, dan den sma di no wani teki prati na a seremonia disi, musu tan sidon, aladi den e tan pî. Ma fa a de efu den pikin na ini a klas e tanapu kaba te so wan seremonia e bigin? Te dati de so, dan a no sa wani taki dati den e teki prati te den e tan tanapu.

Kon meki wi taki dati wan sma no taki a fraga odi, ma a musu hori en nomo, so taki tra sma kan gi a fraga dati odi. Dati ben kan de na ini wan waka, na ini wan klas, noso na wan tra presi. Te wan sma e du dati, dan a sa abi wan bigi prati na a seremonia dati, na presi taki a e gi yesi na a komando di Bijbel e gi fu ’no abi noti fu du nanga na anbegi fu kruktu gado’. Wan sma ben o abi wan prati na falsi anbegi tu te a e teki prati na waka di sma e hori fu sori taki den abi tranga lobi gi a kondre fu den. Te a ben o du dati, dan a ben o sori nanga dati taki a e horibaka gi a sani di sma e gi grani nanga yepi fu a waka dati, èn fu dati ede tru Kresten e weigri fu teki prati na den sortu waka dati fu di den wani abi wan krin konsensi.

Te kondresingi e prei, dan furu tron wan sma musu opo tanapu nomo fu sori taki a e agri nanga den wortu fu a singi. Na ini den sortu situwâsi disi, Kresten e tan sidon. Ma te den e tanapu kaba na a ten te a kondresingi e bigin prei, dan a no de fanowdu taki den e go sidon, bika den no abi fu hari a prakseri fu trawan. A no de so taki den opo tanapu spesrutu gi a kondresingi. Na a tra sei, te den de na ini wan grupu di musu opo tanapu fu singi a kondresingi, dan den ben kan opo tanapu makandra nanga a grupu disi soso fu di den wani sori lespeki, ma den no e singi a kondresingi. A  sani disi no sa wani taki dati den e agri nanga a kondresingi.

„Hori wan krin konsensi”

A psalm skrifiman ben taki dati den popki di libisma meki fu anbegi no man du noti, èn a ben taki moro fara: „Den sma di e meki den sa kon de neleki den, ala den sma di e frutrow na den tapu” (Psalm 115:4-8). Fu dati ede a krin fu si taki tru anbegiman fu Yehovah no ben o teki nowan enkri wroko pe den sa musu meki sani di sma e anbegi, èn den no ben o meki fraga fu kondre tu (1 Yohanes 5:21). Tra situwâsi kan miti Kresten tu na wrokope te den musu sori na wan lespeki fasi taki den no e anbegi a fraga noso a sani di a fraga e prenki, ma taki den e anbegi Yehovah wawan.

Wan wrokobasi, fu gi wan eksempre, kan aksi wan wrokoman fu heisi noso fu saka a fraga di poti na wan gebow. A fasi fa a wrokoman srefi e si a tori, sa meki a bosroiti efu a o du san a wrokobasi ben aksi fu en. Te a wrokoman musu heisi noso saka a fraga na a ten fu wan spesrutu seremonia, aladi sma e tan tanapu lontu a fraga noso e taki a fraga odi, dan dati ben sa wani taki dati a e teki prati na a fraga seremonia.

Na a tra sei, efu nowan seremonia e hori na a ten di wan sma e saka noso e heisi wan fraga, dan den sani disi di a e du na a srefi leki te a ben o sreka sani so taki trawan kan gebroiki a gebow, èn a ben o de a srefi tu leki te a ben o opo èn sroto den doro, noso opo èn sroto den fensre. Na ini den sortu situwâsi dati, dan a fraga na wan sani nomo di e prenki a tirimakti, èn wan sma di kisi leri fu Bijbel musu meki a konsensi fu en tiri en fu kon sabi efu a kan heisi noso saka a fraga (Galasiasma 6:5). Wan sma ben kan aksi a wrokobasi fu en fu meki wan tra wrokoman heisi noso saka a fraga, fu di a konsensi fu en no e gi en pasi fu du den sani dati. Wan tra Kresten ben kan feni taki a konsensi fu en no e trobi en te a e heisi noso saka a fraga, so langa wan seremonia no de ini a tori. Awansi sortu bosroiti tru anbegiman e teki, den musu „tan hori wan bun konsensi” na fesi Gado.—1 Petrus 3:16.

Bijbel no e taki dati sma no musu du lantiwroko, noso taki den no musu de na ini presi soleki brandweer-oso, lantikantoro, noso skoro, pe a fraga fu a kondre de fu si. Wan fraga kan de fu si sosrefi na tapu stampu di sma e poti tapu brifi, na tapu kenteken fu oto, noso na tapu tra sani di lanti meki. Te sma e gebroiki den sani dati, dan dati no wani taki dati den e teki prati na sani di abi fu du nanga anbegi. San de prenspari ini a tori disi, a no a fraga noso wan prenki fu a fraga, ma san a sma e du nanga a fraga dati.

Furu tron fraga de fu si na tapusei fu fensre, fu doro, na tapu oto, tafra, noso na tapu tra sani. Sma kan bai krosi sosrefi di abi fraga na tapu. Na ini wan tu kondre, wet no e gi pasi taki sma e weri den sortu krosi dati. Srefi efu wan sma no ben o pasa a wet te a ben weri den sortu sani dati, dan san dati ben o sori fu a denki di a sma dati abi fu grontapu? Yesus ben taki fu den bakaman fu en: „Den no de wan pisi fu grontapu, neleki fa mi no de wan pisi fu grontapu” (Yohanes 17:16). Wi no musu frigiti sortu krakti dati kan abi tapu tra bribiman te wan Kresten ben o weri den sortu krosi dati. A sani dati ben kan trobi a konsensi fu sonwan fu den? A ben kan meki taki den e bigin tweifri efu den sa tan na ini waarheid? Paulus e gi Kresten a rai disi: „Sorgu taki unu sabi bun san na den moro prenspari sani, so taki unu kan de sondro fowtu èn taki unu no e meki tra sma fadon.”—Filipisma 1:10.

„Abi switifasi gi ala sma”

Fu di grontapu e kon moro ogri na ini a „muilek ten disi”, dan a no de fu taki dati sma sa du moro nanga moro sani fu sori taki den abi tranga lobi gi a kondre fu den (2 Timoteyus 3:1). Meki den wan di lobi Gado noiti frigiti taki Yehovah wawan e frulusu sma. Yehovah wawan warti fu kisi anbegi. Di sma ben aksi den apostel fu Yesus fu du wan sani di no ben kruderi nanga a wani fu Yehovah, dan den taki: „Wi musu gi yesi na Gado leki tiriman moro leki na libisma.”—Tori fu den Apostel 5:29.

„Wan srafu fu Masra no abi fu feti, ma a musu abi switifasi gi ala sma”, na so na apostel Paulus ben skrifi (2 Timoteyus 2:24). Fu dati ede, Kresten e du muiti fu meki vrede, fu sori lespeki, èn fu abi switifasi gi trawan aladi den e meki a konsensi fu den di kisi leri fu Bijbel, tiri den te den musu bosroiti efu den sa taki a fraga odi noso efu den sa singi kondresingi.

[Prenki na tapu bladzijde 23]

Den dri Hebrewsma ben abi a fasti bosroiti fu du san Gado feni bun èn den du dati na wan lespeki fasi

[Prenki na tapu bladzijde 24]

Fa wan Kresten musu tyari ensrefi te sma e hori seremonia fu sori taki den abi tranga lobi gi a kondre fu den?