Tan du den sani di yu leri

„Du den sani di unu ben leri èn di unu ben feni bun èn den sani di unu ben yere èn di unu ben si fu mi; dan a Gado fu vrede sa de nanga unu.”​—FILIPISMA 4:9.

1, 2. A de so taki furu sma di e kari densrefi bribiman e libi trutru akruderi san skrifi na ini Bijbel? Fruklari dati.

„BRIBIMAN e kon moro furu, ma toku a fasi fa sma e tyari densrefi e kon moro takru.” Dati na a nen fu wan tori na ini wan koranti di nen Emerging Trends. A nen fu a tori disi e sori syatu san ben kon na krin, baka wan ondrosuku di sma ben du na ini heri Amerkankondre. Soleki fa a sori, dan moro sma na ini a kondre dati e go na kerki now èn den sma disi e taki dati a bribi fu den na wan sani di prenspari na ini den libi. Toku a tori e sori: „Aladi bun furu sma e go na kerki, toku furu Amerkansma e aksi densrefi sortu krakti a bribi fu den kerkiman disi abi tapu a libi fu ibriwan fu den èn tapu a heri libimakandra.”

² Disi a no wan sani di e pasa na ini wan kondre nomo. Na heri grontapu a de so taki furu sma no e libi akruderi san skrifi na ini Bijbel, aladi den srefi sma disi e taki dati den abi lespeki gi Bijbel èn taki den na bribiman (2 Timoteyus 3:5). A fesiman fu wan fu den grupu di ben du na ondrosuku disi ben taki: „Te now ete wi abi bigi lespeki gi Bijbel, ma fu teki ten trutru fu leisi en, fu studeri en èn fu fiti den sani di wi leri na ini wi libi, dati na fositen sani.”

3. (a) Sortu krakti Bijbel abi tapu den wan di tron tru Kresten? (b) Fa den bakaman fu Yesus e du muiti fu libi akruderi a rai fu Paulus di de fu feni na ini Filipisma 4:9?

 ³ Ma tru Kresten de tra fasi. Fu di den du muiti fu du san a Wortu fu Gado leri den, meki den kenki a fasi fa den e prakseri èn a fasi fa den e tyari densrefi. Tra sma kan si wantewante taki den Kresten disi drai den libi (Kolosesma 3:5-10). Gi den bakaman fu Yesus, Bijbel a no wan buku di e didon na tapu wan bukuplanga nomo, nanga anansi-titei. Na presi fu dati, na apostel Paulus ben taigi den Kresten fu Filipi: „Du den sani di unu ben leri èn di unu ben feni bun èn den sani di unu ben yere èn di unu ben si fu mi; dan a Gado fu vrede sa de nanga unu” (Filipisma 4:9). Kresten no e taki nomo dati a Wortu fu Gado na waarheid. Ma den e du san den e leri, fu di den e tan libi akruderi den rai fu Bijbel, iya, den e gebroiki den na ini den osofamiri, te den de na wrokope, na ini a gemeente, èn na ala tra kontren fu den libi.

4. Fu san ede a de wan tyalensi fu libi akruderi den wet fu Gado?

⁴ A no makriki fu libi akruderi den wet nanga den gronprakseri fu Gado. Wi e libi na ini wan grontapu di de na ini a makti fu Satan Didibri, di Bijbel e kari „a gado fu a seti fu sani disi” (2 Korentesma 4:4; 1 Yohanes 5:19). Fu dati ede wi musu luku bun nanga iniwan sani di ben kan tapu wi fu tan hori wi soifri retifasi na Yehovah Gado. Fa wi kan tan hori wi soifri retifasi?

Tan hori yusrefi na „a eksempre fu gosontu wortu”

5. San Yesus wani taki nanga den wortu: „Waka na mi baka doronomo”?

⁵ Wan fasi fa wi e sori taki wi e tan du san wi e leri, na taki wi e tan getrow na a tru anbegi, awinsi wi e kisi gens fu sma di no de na bribi. Wan sma musu du tranga muiti efu a wani horidoro. Yesus ben taki: „Efu wan sma wani kon na mi baka, meki a drai en baka gi ensrefi èn teki en pina-udu èn waka na mi baka doronomo” (Mateyus 16:24). Yesus no ben taki dati wi musu waka na en baka fu wan spesrutu pisi ten nomo. Na presi fu dati, a ben taki: „Waka na mi baka doronomo.” Den wortu fu en e sori taki wi no kan de disipel fu en fu wan syatu pisi ten nomo, noso taki wi abi a firi fu dini Gado na wan getrow fasi tide, ma tamara wi no e firi fu du dati moro. Fu tan getrow na a tru anbegi wani taki dati wi e horidoro na wan getrow fasi awinsi san e pasa. Fa wi kan du dati?

6. San na a eksempre fu gosontu wortu di Paulus ben leri den fosi yarihondro Kresten?

⁶ Paulus ben gi Timoteyus di ben e wroko makandra nanga en, a rai disi: „Tan hori na eksempre fu gosontu wortu di yu ben yere fu mi, nanga a bribi nanga lobi di abi fu du nanga Krestes Yesus” (2 Timoteyus 1:13). San Paulus ben wani taki nanga dati? A Griki wortu di sma vertaal nanga „eksempre” abi fu du nanga wan skedrei di wan sma e ferfi frafra. Aladi a sma dati no meki a skedrei so soifri taki yu kan si wantewante san na a sani di a ferfi, toku a skedrei meki na so wan fasi taki wan sma di abi a koni fu man si sani krin, sa man frustan san na a prenki di a trawan meki. Na so a de tu, taki den tru tori di Paulus ben e fruteri Timoteyus èn di a ben fruteri na tra sma tu, no ben e gi piki langalanga tapu ala den aksi di sma abi. Toku ala den tru tori disi e gi reti-ati sma den rai di den abi fanowdu so taki den kan kon frustan san Yehovah e aksi fu den. A no de fu taki dati efu den wani prisiri na ati fu Gado, dan den sa abi fu tan hori densrefi na den tru tori dati, fu di den o tan du san den leri.

7. Fa Kresten kan tan hori densrefi na a eksempre fu gosontu wortu?

⁷ Na ini a fosi yarihondro, dan sma leki Himeneyus, Aleksander, nanga Fileitus ben fruteri sma wan lo sani di no ben e kruderi nanga „na eksempre fu gosontu wortu” (1 Timoteyus 1:18-20; 2 Timoteyus 2:16, 17). San den fosi Kresten ben kan du fu no meki taki sma di ben fadon komoto na bribi, kori den? Den ben musu studeri den buku di Gado meki sma skrifi nanga yepi fu santa yeye èn den ben musu du san den ben leri. Den wan di ben e waka baka na eksempre fu Paulus èn sosrefi a di fu tra getrow sma, ben man si sortu sani no ben e kruderi nanga den tru tori di den ben leri, èn den ben man tan farawe fu den sani dati (Filipisma 3:17; Hebrewsma 5:14). Na presi fu kon „siki na yeye fasi na ini sani di abi fu du nanga aksi di e tyari trobi kon èn a hari di sma e haritaki nanga wortu”, dan den tan go doro fu dini Gado fayafaya (1 Timoteyus 6:3-6). Te wi e tan libi akruderi  den tru tori di wi e leri, dan wi e du a srefi sani. A e tranga a bribi fu wi te wi e si fa milyunmilyun sma di e dini Yehovah na heri grontapu e tan hori densrefi na den tru tori fu Bijbel di den kon sabi.—1 Tesalonikasma 1:2-5.

Weigri fu arki „tori di no tru”

8. (a) Fa Satan e pruberi fu pori a bribi fu wi na ini a ten disi? (b) Sortu warskow Paulus e gi na ini 2 Timoteyus 4:3, 4?

⁸ Satan e pruberi fu broko wi soifri retifasi fu di a e meki wi tweifri na den sani di wi leri. Neleki na ini a fosi yarihondro, sma di fadon komoto na bribi èn sosrefi tra sma na ini a ten disi, e suku fu pori a bribi fu den sma di e dini Gado nanga wan krin ati (Galasiasma 2:4; 5:7, 8). Son leisi den e gebroiki sani soleki radio, telefisi, noso koranti, fu prati ogri-ati lei fu den sani di a pipel fu Yehovah abi na prakseri èn den sani di den e du. Paulus ben warskow wi taki sonwan ben o drai gowe fu a tru anbegi. „Bika wan pisi ten sa kon”, Paulus ben skrifi, „pe den no sa frudrage a gosontu leri, ma akruderi den eigi lostu, den sa tyari bun furu leriman kon makandra fu switi den yesi fu den; èn den sa drai den yesi puru fu a waarheid èn den sa drai go na tori di no tru.”—2 Timoteyus 4:3, 4.

9. San Paulus ben kan abi na prakseri di a ben e taki fu „tori di no tru”?

⁹ Na presi fu hori densrefi na a eksempre fu gosontu wortu, dan son sma ben gi pasi taki trawan hari den prakseri nanga yepi fu „tori di no tru”. San ben de den tori disi di no ben de tru? Kande Paulus ben abi den fositen leitori na prakseri, soleki di fu a buku fu Tobit, wan buku di no e kruderi nanga Bijbel èn di no de wan pisi fu Bijbel. * Den tori di no tru kan abi fu du sosrefi nanga ala sortu kefalek konkru tori di sma ben e fruteri èn di ben de leitori. A kan tu, taki son sma na ini a ten dati ben handri „akruderi den eigi lostu”, fu di den ben e gi pasi taki sma kori den nanga triki. Kande den sma di ben e kori den no ben e hori densrefi kwetikweti na den markitiki fu Gado, noso den ben e krutu den wan di ben teki fesi na ini a gemeente (3 Yohanes 9, 10; Yudas 4). Awinsi san ben meki taki den ben e naki futu, a de krin taki sonwan ben lobi leitori moro leki den tru tori fu a Wortu fu Gado. Heri esi den tapu fu du den sani di den ben leri, èn disi ben abi takru bakapisi gi den na yeye fasi.—2 Petrus 3:15, 16.

10. Gi wan tu eksempre fu leitori di sma e fruteri na ini a ten disi, èn fa Yohanes ben sori krin taki wi musu de na ai gi a kefar disi?

¹⁰ Na ini a ten disi wi kan sorgu taki wi no go arki tori di no tru, fu di wi e ondrosuku sani fosi, èn fu di wi e luku bun sosrefi san wi e arki èn san wi e leisi. Fu gi wan eksempre, furu tron radio nanga telefisi e gi sma deki-ati fu du hurudu. Furu sma wani meki trawan bribi taki nowan Gado no de. Sabiman di e ondrosuku a fasi fa Bijbel skrifi, e spotu nanga a prakseri taki Gado ben meki sma  skrifi Bijbel. Sma di e fadon komoto na bribi na ini a ten disi e tan pruberi fu meki Kresten tweifri na den tru tori fu Bijbel, so taki den lasi a bribi fu den. Na ini a fosi yarihondro na apostel Yohanes ben warskow gi wan srefi sortu kefar di ben e kon fu falsi profeiti. A ben taki: „Un lobiwan, no bribi ibri boskopu di gersi wan boskopu fu Gado, ma ondrosuku den boskopu disi fu si efu den komoto fu Gado trutru, bika furu falsi profeiti kon na grontapu” (1 Yohanes 4:1). Sobun, wi musu luku bun san wi e du.

11. San na wán fasi fa wi kan luku efu wi de na bribi ete?

¹¹ Ini a tori disi, Paulus ben skrifi: „Tan luku efu unu de trutru na ini a bribi” (2 Korentesma 13:5). Na apostel ben gi wi deki-ati fu tan ondrosuku efu wi e tan hori wisrefi na ala den Kresten leri. Efu wi lobi fu arki sma di e krutukrutu nomo, dan a bun fu go ondrosuku wisrefi nanga yepi fu begi (Psalm 139:23, 24). Wi na sma di lobi fu suku fowtu na a pipel fu Yehovah? Efu dati de so, dan fu san ede wi e du dati? A de so kande taki wan sma ben taki, noso ben du wan sani di hati wi? Efu dati de so, dan fa wi e krutu a tori? Wi e du dati na wan leti fasi? Awinsi sortu banawtu wi e kisi na ini a ten disi, a sa de fu wan syatu pisi ten nomo (2 Korentesma 4:17). Srefi efu sani e pasa na ini a gemeente di de wan tesi gi wi, dan fu san ede wi sa meki dati tapu wi fu dini Gado? San wi o du te wan sani pasa di e meki wi lasi-ati? A no ben o moro bun fu du ala san wi man fu lusu a problema, èn baka dati fu libi na afersi na ini Yehovah anu?—Psalm 4:4; Odo 3:5, 6; Efeisesma 4:26.

12. Na sortu fasi den Bereasma de wan bun eksempre gi wi?

¹² Na presi fu de sma di lobi krutukrutu nomo, dan meki wi tan warderi a yeye nyanyan di wi e kisi te wi e studeri èn te wi e go na den gemeente konmakandra (1 Korentesma 2:14, 15). Na presi fu bigin krutu den sani di wi e leri na ini a Wortu fu Gado, dan a moro bun fu de leki den Bereasma fu a fosi yarihondro, di ben e ondrosuku den Buku fu Bijbel finifini! (Tori fu den Apostel 17:10, 11) Sobun, meki wi du san wi e leri, aladi wi e weigri fu arki den tori di no tru, èn e tan hori na a waarheid.

13. Fa wi ben sa kan panya tori di no tru, sondro taki wi sabi srefi?

¹³ Wi musu luku bun sosrefi nanga wan tra sortu tori di no tru. Nanga yepi fu computer, sma e panya ala sortu kefalek span tori. A de wan koni sani fu luku bun nanga den sortu tori disi, spesrutu efu wi no sabi soifri pe den boskopu disi komoto. Awinsi a sma di seni a boskopu noso na ondrofenitori kon gi wi na wan Kresten di wi kan frutrow, toku a kan taki a sma no sabi soifri fa a tori de trutru bika kande na yere a sma yere en fu tra sma. Fu dati ede a prenspari fu kon sabi fosi efu wan tori tru, bifo wi panya en go moro fara. A no de fu taki dati wi no wani panya „soso taktaki en soso tori”, noso ’leitori di no de santa’ (1 Timoteyus 4:7; Njoe Testament nanga dem Psalm). Fu di wi abi a frantwortu sosrefi fu taki soso fu sani di tru te wi e taki nanga makandra, meki a de  wan koni sani fu luku bun nanga iniwan sani di ben kan meki wi panya tori di no tru, kande sondro taki wi sabi srefi.—Efeisesma 4:25.

Sma e kisi wini te den e libi akruderi a waarheid

14. Sortu wini wi kan kisi te wi e du den sani di wi e leri fu a Wortu fu Gado?

¹⁴ Wi sa kisi furu wini te wi e du den sani di wi e leri te wi e studeri Bijbel èn te wi e go na den Kresten konmakandra. Wan fu den wini dati kan de taki wi e kisi wan moro bun banti nanga den wan di abi a srefi bribi leki wi (Galasiasma 6:10). Wi o tron moro bun sma te wi e libi akruderi den gronprakseri fu Bijbel (Psalm 19:8). Boiti dati, te wi e du san wi e leri, dan wi e ’meki a leri fu wi Gado kon moi’ èn na so fasi wi kan hari tra sma fu kon na a tru anbegi.—Titus 2:6-10.

15. (a) Fa wan yongu wan ben teki deki-ati fu gi kotoigi na skoro? (b) San yu leri fu na ondrofenitori disi?

¹⁵ Na mindri den Kotoigi fu Yehovah yu abi yongu sma sosrefi. Furu fu den e libi akruderi den sani di den e leri di densrefi studeri Bijbel nanga tra Kresten publikâsi, èn fu di den e go na den gemeente konmakandra doronomo. A moi fasi fa den e tyari densrefi de wan bun kotoigi gi skoromeester èn gi tra studenti na skoro (1 Petrus 2:12). Prakseri na eksempre fu Leslie, wan yongu uma di abi 13 yari èn di e libi na ini Amerkankondre. A e taki dati wan pisi ten a ben tranga gi en fu taki fu a bribi fu en nanga den skoromati fu en, ma wan dei a sani dati kenki. „Den pikin na ini mi klas ben e taki fu a fasi fa sma e pruberi fu seri sani gi trawan. Wan meisje ben sutu en finga èn a ben kari Yehovah Kotoigi leki eksempre.” San Leslie ben du, fu di en na wan Kotoigi? „Mi opo taki gi a bribi fu mi”, a e taki, „wan sani di ben musu fu fruwondru ala sma na ini klas, fu di mi no gwenti fu taki furu te mi de na skoro.” San ben de a bakapisi fu a deki-ati di Leslie ben sori fu opo taki gi a bribi fu en? „Mi ben man prati wan brochure nanga wan traktaat gi a pikin di ben sutu en finga, fu di a ben abi tra aksi tu”, na so Leslie e taki. A musu e gi Yehovah bigi prisiri te yongu sma e du den sani di den leri fu di den e teki deki-ati fu preiki gi trawan na skoro!—Odo 27:11; Hebrewsma 6:10.

16. Sortu wini wan yongu Kotoigi kisi fu a Theokrasia Diniwroko-skoro?

¹⁶ Wan tra eksempre na di fu Elizabeth. Fu sensi di a ben abi seibi yari èn na ini a heri pisi ten di a ben de na lagiskoro, a yongu meisje disi ben abi a gwenti fu gi den skoromeester noso skoromisi fu en wan kari fu kon na a Kownukondre zaal fu arki te a ben abi wan prati na a Theokrasia Diniwroko-skoro. Efu wan fu den no ben man kon, dan Elizabeth ben tan baka skoro fu hori a lezing gi en. A lasti yari di Elizabeth ben de na heiskoro, a ben musu skrifi wan tori gi a skoro fu en. Na tapu tin bladzijde a ben skrifi ala den winimarki di a ben kisi fu a Theokrasia Diniwroko-skoro. Sosrefi a ben abi fu fruteri na fesi wan grupu fu wán skoromeester nanga dri skoromisi, fu den sani di a ben skrifi. Den ben aksi en tu fu hori wan lezing fu sori den fa a ben e du dati na a Theokrasia Diniwroko-skoro. A ben bosroiti fu taki fu a pisi tori: „Fu san ede Gado gi pasi taki ogridu de?” Elizabeth kisi wini fu a Theokrasia Diniwroko-skoro di de wan pisi fu a leriprograma fu Yehovah Kotoigi. En na soso wan fu den someni yongu Kresten di e gi Yehovah glori, fu di den e du den sani di den leri fu a Wortu fu En.

17, 18. (a) Sortu rai Bijbel e gi wi fu no bedrigi trawan? (b) Sortu wini wan man ben kisi, fu di wan Kotoigi fu Yehovah ben tyari ensrefi na wan fasi di e sori taki a no wani bedrigi trawan?

¹⁷ Bijbel e gi Kresten a rai fu tyari densrefi na wan opregti fasi na ini ala sani (Hebrewsma  13:18). Te wi e bedrigi trawan, dan dati kan pori a banti di wi abi nanga den, èn moro leki dati srefi, a kan pori a banti di wi abi nanga Yehovah (Odo 12:22). Te wi e tyari wisrefi na wan fasi di e sori taki sma kan frutrow wi, dan dati e sori taki wi e du san wi e leri, èn dati meki taki furu sma kon kisi moro bigi lespeki gi Yehovah Kotoigi.

¹⁸ Luku san wan srudati di nen Phillip ben ondrofeni. Phillip ben lasi wan tyèk fu go teki moni na bangi. A ben skrifi en nen na en tapu ma a no ben skrifi omeni moni a ben o teki. Dati wani taki dati iniwan sma di ben o feni en ben kan skrifi omeni moni a wani èn ben kan go teki a moni na bangi. Phillip no ben sabi taki a ben lasi a tyèk, teleki wan sma seni en kon gi en nanga post. Wan Kotoigi fu Yehovah ben feni a tyèk disi, èn na ini wan pikin brifi di a ben seni makandra nanga a tyèk, a ben fruteri a man taki a bribi fu en ben meki taki a seni a tyèk go gi a man. Phillip ben fruwondru srefisrefi. A ben taki: „Den ben kan fufuru mi fu sowan 9000 Amerkan dala!” Na wan tra okasi a ben lasi-ati fu di sma ben fufuru en ati na ini kerki. Soleki fa a sori, dan wan sma di a ben sabi heri bun ben teki na ati fu en. Ma now wan sma di a no ben sabi kwetikweti ben seni a tyèk fu en kon baka gi en, aladi a ben warti someni dusun Amerkan dala! Fu tru, Kresten di no e bedrigi trawan e gi glori na Yehovah Gado!

Tan abi a gwenti fu du san yu leri

19, 20. Fa wi kan kisi wini te wi e du den sani di wi e leri fu Bijbel?

¹⁹ Den wan di e du san den leri fu a Wortu fu Gado e kisi furu wini. A disipel Yakobus ben skrifi: „A sma di e luku finifini na ini a volmaakti wet di e meki wi kon fri, èn di e tan na ini, a sma disi, fu di a no tron wan sma di e frigiti san a yere, ma a tron wan duman fu a wroko, meki a sa de koloku te a e du en” (Yakobus 1:25). Iya, efu wi e du san wi e leri fu Bijbel, dan wi sa de koloku trutru èn wi sa man libi nanga den problema fu na aladei libi. Ma moro prenspari srefi, Yehovah sa feni wi bun èn wi sa abi a howpu fu libi fu têgo!—Odo 10:22; 1 Timoteyus 6:6.

²⁰ Fu dati ede, du ala san yu man fu tan meki muiti fu studeri a Wortu fu Gado. Tan kon makandra nanga tra anbegiman fu Yehovah, èn poti prakseri na den sani di yu e yere na den Kresten konmakandra. Du san yu e leri, tan libi akruderi den sani dati, èn „a Gado fu vrede sa de nanga [yu]”.—Filipisma 4:9.

[Futuwortu]

Yu e memre disi ete?

• San na „a eksempre fu gosontu wortu”, èn fa wi kan tan hori wisrefi na dati?

• Sortu „tori di no tru” wi musu weigri fu arki?

• Sortu wini den sma sa kisi di e tan du den sani di den e leri fu a Wortu fu Gado?

[Aksi fu a tori disi]

[Prenki na tapu bladzijde 17]

San den fosi Kresten ben kan du fu no meki sma di ben fadon komoto na bribi, kori den?

[Prenki na tapu bladzijde 18]

Sani soleki telefisi, radio, Internet, nanga sma di fadon komoto na bribi na ini a ten disi, kan meki wi bigin tweifri na a Wortu fu Gado

[Prenki na tapu bladzijde 19]

A no de wan koni sani fu panya tori sondro fu kon sabi fosi efu den tori tru

[Prenki na tapu bladzijde 20]

Na wrokope, na skoro, èn na tra presi, Yehovah Kotoigi e du den sani di den e leisi na ini a Wortu fu Gado