„Kon na mi, . . . èn mi sa gi unu krakti baka”

Yongu sma di de leki switi dowdropu

A NO de fu taki dati Yesus Krestes ben taki sosrefi fu den yongu bakaman fu en di a taki: „Kon na mi, . . . èn mi sa gi unu krakti baka” (Mateyus 11:28). Di sma ben bigin tyari den pikin fu den go na Yesus, dan den disipel fu en ben pruberi fu tapu den. Ma Yesus ben taki: „Meki den yongu pikin kon na mi; èn no pruberi fu tapu den.” Boiti dati, Yesus „ben teki den pikin ini den anu fu en èn a ben bigin blesi den” (Markus 10:14-16). A de krin taki yongu sma ben warti ini Yesus ai.

Bijbel e fruteri wi fu getrow yonkuman nanga yongu uma, èn sosrefi fu tini nanga yongu pikin, di ben de wan tumusi moi eksempre na ini a dini di den dini Gado. A buku Psalm ben taki na fesi fu wan grupu fu „yongu man” di ben o de neleki switi dowdropu. A buku dati e fruteri wi sosrefi fu „yonkuman” nanga „nyunwenke” di ben o prèise a nen fu Yehovah.—Psalm 110:3; 148:12, 13.

Wan presi pe yonguwan kan go na fesi

A fiti fu agersi yongu sma nanga dowdropu, fu di Bijbel e sori taki te dow e fadon, dan dati wani taki dati sani sa gro bogobogo èn taki furu blesi sa kon sosrefi (Genesis 27:28). Dowdropu no e hati, ma den e meki wi firi switi. Na ini a ten disi fu a denoya fu Krestes, bigi grupu fu yongu Kresten de klariklari fu gi densrefi. Neleki switi dowdropu, furu yonkuman nanga yongu uma e dini Gado nanga prisiri èn e horibaka gi tra bribiman.—Psalm 71:17.

Kresten yonguwan no e gi deki-ati na tra sma nomo; densrefi e kisi deki-ati tu fu a diniwroko di den e du. Na organisâsi fu Gado e gi den san den abi fanowdu fu go na fesi, fu abi bun bakapisi na ini den libi èn fu de koloku. Fu di den yonkuman nanga den yongu uma e hori densrefi na den hei markitiki fu Gado, meki den abi wan tranga banti nanga En (Psalm 119:9). Na ini a gemeente, den e teki prati na a diniwroko nanga tra sani di e meki den kisi wini, èn den e feni bun mati tu. Den sani disi e yepi den yonguwan fu abi wan koloku libi èn fu gebroiki a libi fu den na wan yoisti fasi.

A de leki ’wan dresi èn wan sani di e gi sma krakti’

Kresten yonguwan e si densrefi leki „dowdropu” trutru? Teki na eksempre fu Tania, wan yongu uma di e wroko tranga na ini a gemeente èn di e prisiri fu preiki moro leki 70 yuru ibri mun. Fa a e firi fu di a e du dati? „Mi e firi switi èn mi feni taki mi abi wan bun libi”, na so a e taki. „Fu di mi e anbegi Yehovah èn fu di mi de wan memre fu en organisâsi na grontapu, dan dati de leki ’wan dresi gi mi èn wan sani di e gi mi krakti’.”—Odo 3:8.

Ariel, wan tra yongu uma di de wan furuten preikiman, abi furu warderi gi a yeye nyanyan di a e kisi na ini a gemeente:  „Te mi e go na den Kresten konmakandra, na den kongres, èn na den bigi konmakandra, dan mi kan teki prati na a yeye nyanyan di wi e kisi na a tafra fu Yehovah, èn dati e gi mi krakti trutru”, na so a e taki. „A e gi mi deki-ati tu fu sabi taki na heri grontapu mi abi brada nanga sisa di e du a srefi wroko leki mi.” A yongu uma disi e fruteri san na a moro prenspari sani di e gi en krakti: „A switi srefisrefi fu abi Yehovah leki mati, spesrutu te mi e yere noso e si a takru krakti di a grontapu disi abi tapu sma.”—Yakobus 2:23.

Abishai di abi 20 yari e dini leki wan furuten preikiman èn leki wan dinari ini a diniwroko na ini a gemeente. A e fruteri fa a e feni den sani dati: „Mi e firi switi, fu di mi sabi fa fu kakafutu gi den furu problema di e miti yongu sma na ini a ten disi. Den tru tori fu Bijbel yepi mi fu tan poti prakseri na san mi musu du fu man dini Yehovah nanga mi heri ati.”

Na a bigin fu en tini yari, Antoine ben de wan sma di ben e kisi atibron esi-esi. Wan leisi a ben naki wan skoropikin nanga wan sturu, èn a ben dyuku wan trawan nanga wan potlood. A no ben switi srefisrefi fu abi demakandra nanga Antoine! Ma di a kisi leri fu Bijbel, dan a kenki den fasi fu en. Now a abi 19 yari, èn a e dini leki wan dinari ini a diniwroko èn leki wan furuten preikiman na ini a gemeente. A e taki: „Mi e taki Yehovah tangi taki a meki mi kon sabi en, èn sosrefi taki a yepi mi fu frustan taki mi musu dwengi misrefi èn taki mi musu kenki den fasi fu mi. Disi yepi mi fu wai pasi gi furu problema.”

Tra sma e si a switifasi nanga den bun maniri fu yongu Kresten. Matteo na wan yongu Kotoigi na ini Italiakondre. A skoromisi fu en ben wani taki iniwan sma na ini a klas di ben taki dotitaki, ben musu pai en wan pikin paiman. Wan pisi ten baka dati, den pikin ben aksi a skoromisi efu a no ben kan puru a wet disi, bika den taki dati „nowan sma no man taki wan sani sondro fu gebroiki dotitaki”. „Ma”, na so Matteo e fruteri, „a skoromisi taigi den taki dati no ben de so kwetikweti. A ben gebroiki mi, wan Kotoigi fu Yehovah, leki eksempre, èn a ben prèise mi na fesi ala den tra pikin fu a klas, fu di mi no e taki dotitaki.”

Na ini Thailand, a skoromisi fu wan klas pe den pikin ben lobi rigeri, kari Racha di abi 11 yari fu kon tanapu na fesi ala den tra pikin na ini a klas. A skoromisi prèise en fu a bun fasi fa a ben e tyari ensrefi. A ben taki: „Fu san ede unu no e teki a boi disi leki eksempre? A e studeri tranga èn a abi bun maniri.” Baka dati, a skoromisi taigi den studenti: „Mi denki taki unu ben o abi fu tron wan Yehovah Kotoigi, neleki Racha, fu man sabi fa fu tyari unsrefi na wan moro bun fasi.”

A de wan moi sani fu si taki dusundusun Kresten yonguwan e du muiti fu kon sabi moro fu Yehovah èn taki den e du a wani fu en. Den yongu sma disi e sori koni di de fu si moro furu na sma di moro owru. Gado kan yepi yongu sma fu abi bun bakapisi na ini a libi di den abi now, èn a kan gi den wan tumusi moi tamara tu na ini a nyun grontapu di sa kon dyonsro (1 Timoteyus 4:8). Te wi e luku den furu yonguwan di bruya èn di no de koloku na ini a grontapu disi, dan a e gi wi deki-ati trutru fu si a bun fasi fa Kresten yonguwan e tyari densrefi!