Tan du muiti fu gi yesi, bika a kaba e kon krosibei

„Den pipel sa gi yesi [na Silo].”​—GENESIS 49:10.

1. (a) Na suma sma ben musu gi yesi furu tron te den ben gi yesi na Yehovah na ini owruten? (b) Sortu profeititori Yakob ben tyari kon na fesi di abi fu du nanga a gi di sma musu gi yesi?

FURU tron a de so taki sma di e gi yesi na Yehovah, musu gi yesi sosrefi na den wan di e teki presi gi En. Son leisi den wan di ben e teki presi gi Gado ben de engel, famiri-edeman, krutuman, priester, profeiti, nanga kownu. Fu dati ede a ben de leki den kownu fu Israel ben e sidon tapu a kownusturu fu Yehovah (1 Kroniki 29:23). Ma toku a de wan sari sani taki furu fu den tiriman fu Israel no ben e gi yesi na Gado, so taki den tyari helu kon tapu densrefi èn tapu den borgru fu den. Ma Yehovah no ben libi den getrow bakaman fu en sondro howpu; a ben trowstu den nanga a pramisi taki a ben o poti wan Kownu di ben o tan fu têgo, èn di den regtfardikiwan ben o gi yesi na en nanga prisiri (Yesaya 9:6, 7). Di a famiri-edeman Yakob ben o dede, dan a taki wan profeititori di ben abi fu du nanga a tiriman disi di musu kon ete. A ben taki: „A tiriman-tiki no sa komoto na Yuda, èn so tu a kownu-tiki [no sa komoto] na mindri den futu fu en, teleki Silo kon; èn na en den pipel sa gi yesi.”—Genesis 49:10.

2. San „Silo” wani taki, èn abra suma a ben o tiri leki kownu?

² „Silo” na wan Hebrew wortu di wani taki „A man di abi a reti”, noso „A man di musu abi en”. Iya, Silo ben o kisi ala reti fu tiri leki fa a tiriman-tiki e prenki, èn a kownu-tiki e prenki a makti di a ben o abi fu gi komando. Moro fara a ben o de so  taki a kownu tirimakti fu en no ben o abi fu du nomo nanga den bakapikin fu Yakob, ma sosrefi nanga ala „pipel”. Disi e kruderi nanga san Yehovah ben pramisi Abraham: „Yu siri sa teki den portu fu den feanti fu en abra. Èn nanga yepi fu yu siri ala [pipel] fu grontapu fu tru, sa blesi densrefi” (Genesis 22:17, 18). Na ini 29 G.T. Yehovah ben sori krin suma na a „siri” disi, di a ben salfu Yesus fu Nasaret nanga santa yeye.—Lukas 3:21-23, 34; Galasiasma 3:16.

A fosi Kownukondre fu Yesus

3. Sortu tirimakti Yesus kisi di a drai go baka na hemel?

³ Di Yesus go na hemel, dan a no bigin tiri den pipel fu grontapu wantewante (Psalm 110:1). Ma toku a ben kisi wan „kownukondre” di ben abi borgru, di ben e gi yesi na en. Na apostel Paulus ben taki san na a kownukondre dati, di a ben skrifi: „[Gado] ben fri wi [den Kresten di salfu nanga santa yeye] fu a makti fu a dungru, èn ben tyari wi kon abra na ini a kownukondre fu a Manpikin fu en lobi” (Kolosesma 1:13). A frulusu disi bigin na a Pinksterfesa fu 33 G.T., di santa yeye kanti go na tapu den getrow bakaman fu Yesus.—Tori fu den Apostel 2:1-4; 1 Petrus 2:9.

4. Na sortu fasi den fosi disipel fu Yesus sori taki den ben e gi yesi na en, èn san na a nen di Yesus gi den leki grupu?

⁴ Leki „sma di e teki presi gi Krestes”, den disipel di ben salfu nanga santa yeye bigin tyari tra sma kon makandra di ben o tron „borgru” fu a kownukondre dati (2 Korentesma 5:20; Efeisesma 2:19; Tori fu den Apostel 1:8). Boiti dati, den ben musu tan „makandra na ini wánfasi soleki fa a fiti, nanga a srefi denki èn nanga a srefi fasi fu prakseri” efu den ben wani taki Kownu Yesus Krestes feni den bun (1 Korentesma 1:10). Leki grupu, den de wan „getrow èn koni srafu”, noso wan getrow basya-grupu.—Mateyus 24:45; Lukas 12:42.

Sma kisi blesi fu di den gi yesi na a „basya” di Gado poti

5. Fa Yehovah gi a pipel fu en leri sensi owruten?

⁵ Ala ten Yehovah sorgu taki a pipel fu en ben abi leriman. Fu gi wan eksempre. Di den Dyu ben drai kon baka fu Babilon, dan Esra nanga wan tu tra sma di ben man gi bun leri, ben e leisi gi a pipel komoto fu a Wet fu Gado. Ma no dati wawan, den ben e „tyari [a wet] kon na krin” sosrefi, fu di den ben e ’sori den sma san den sani ben wani taki èn den ben e yepi sma fu kon frustan’ a Wortu fu Gado.—Nehemia 8:8.

6, 7. Fa a srafu grupu gebroiki a Tiri Skin fu sorgu gi yeye nyanyan na a reti ten, èn fu san ede a fiti taki wi saka wisrefi na ondro a srafu grupu disi?

⁶ Na ini a yari 49 G.T. fu a fosi yarihondro, a tori fu a besnij di sma musu besnij ben tyari problema kon. Na a ten dati a tiri skin fu a srafu grupu begi Gado fu yepi den na ini na afersi dati. Baka dati den teki wan bosroiti di ben e kruderi nanga den Buku fu Bijbel. Di a tiri skin fu a ten dati seni brifi go na den difrenti gemeente fu  taigi den brada sortu bosroiti den ben teki na ini na afersi disi, dan den gemeente gi yesi na den rai dati wantewante èn Gado blesi den trutru (Tori fu den Apostel 15:6-15, 22-29; 16:4, 5). Na ini a ten disi sosrefi, a getrow srafu gebroiki a Tiri Skin fu en fu tyari furu prenspari afersi kon na krin gi wi. Na so fasi wi kon frustan taki Kresten no musu teki sei na ini grontapu afersi èn taki brudu na wan santa sani; wi kon frustan sosrefi taki wi no musu tron srafu fu drugs nanga tabaka (Yesaya 2:4; Tori fu den Apostel 21:25; 2 Korentesma 7:1). Yehovah blesi a pipel fu en fu di den ben gi yesi na a Wortu fu en èn na a getrow srafu.

⁷ Te a pipel fu Gado ben o saka densrefi na ondro a srafu grupu, dan den ben o sori na a fasi dati taki den e saka densrefi na ondro Yesus Krestes, a Masra fu den. A fasi disi fa sma e gi yesi na Yesus Krestes kon moro prenspari srefi na ini a ten disi, fu di Yesus kisi moro makti, soleki fa Yakob ben taki na fesi di a ben o dede.

Silo e tron a sma di abi a reti fu tiri grontapu

8. Fa èn o ten Krestes ben kisi moro makti?

⁸ A profeititori fu Yakob ben taki na fesi taki ala ’pipel ben o abi fu gi yesi’ na Silo. A de krin taki Krestes no ben o tiri na Israel na yeye fasi nomo. Suma moro ben o de na ondro a tiri fu en dan? Openbaring 11:15 e piki: „A kownukondre fu grontapu ben tron a kownukondre fu wi Masra èn fu en Krestes, èn a sa tiri leki kownu fu têgo èn fu ala ten.” Den profeititori fu Bijbel e sori taki Yesus kisi a makti dati na a kaba fu den „seibi ten”, dati na „den fasti ten fu den nâsi”, di ben kon na wan kaba na ini 1914 * (Danièl 4:16, 17; Lukas 21:24). Na ini a yari dati, a „denoya” fu Krestes leki a Mesias Kownu bigin, èn dati na a pisi ten sosrefi di a bigin tiri „na mindri fu den feanti fu [en]”.—Mateyus 24:3; Psalm 110:2.

9. San Yesus du di a kisi a Kownukondre fu en, èn fa disi ben abi krakti tapu a libisma famiri, spesrutu tapu den disipel fu en?

⁹ A fosi sani di Yesus du baka di a bigin tiri leki kownu, na taki a teki Satan, di ala sma sabi heri bun leki a trangayesiwan, èn a trowe en makandra nanga ala den ogri yeye fu en, „kon na grontapu”. Fu sensi a ten dati den ogri yeye disi tyari ala sortu rampu kon tapu libisma, boiti taki den seti ala sortu sani fu meki a kon moro tranga gi sma fu gi yesi na Yehovah (Openbaring 12:7-12; 2 Timoteyus 3:1-5). Te yu luku en bun, dan a moro prenspari sani di Satan wani du na ini a feti fu en, na fu kisi den salfuwan fu Yehovah „di e hori den komando fu Gado èn [di] abi a wroko fu gi kotoigi fu Yesus”, èn sosrefi fu kisi den „tra skapu” di e wroko makandra nanga den.—Openbaring 12:17; Yohanes 10:16.

10. Sortu Bijbel profeititori di kon tru e gi wi a dyaranti taki Satan sa tron lasiman na ini a feti di a e feti nanga tru Kresten?

¹⁰ Satan sa tron lasiman fu tru, fu di wi e libi na ini a „dei fu Masra”, èn noti no kan tapu Yesus leki winiman fu „kaba a wini fu en” (Openbaring 1:10; 6:2). Wan fu den sani di Yesus o du, na taki a sa sorgu taki a tyari ala den 144.000 sma fu a yeye Israel, kon na wan. A sa kibri „wan bigi ipi [sosrefi], di nowan sma ben man teri èn di komoto na ala kondre nanga lo nanga pipel nanga tongo” (Openbaring 7:1-4, 9, 14-16). Ma tra fasi leki den  salfu brada fu den, a bigi ipi sa libi dyaso na grontapu leki borgru di e saka densrefi na ondro a tiri fu Yesus (Danièl 7:13, 14). A grupu fu sma disi de fu si kaba na grontapu, èn dati na wan krin buweisi taki Silo bigin tiri kaba leki Tiriman fu „a kownukondre fu grontapu”.—Openbaring 11:15.

Now na a ten fu „gi yesi na a bun nyunsu”

11, 12. (a) Suma na den wan-enkri sma di sa kisi frulusu na a kaba fu a seti fu sani disi? (b) Fa sma e bigin tyari densrefi te den e teki a „yeye fu grontapu” abra?

¹¹ Ibriwan sma di wani kisi têgo libi musu leri fu gi yesi na Gado, fu di Bijbel e taki krin dati ’den wan di no sabi Gado èn den wan di no e gi yesi na a bun nyunsu fu wi Masra Yesus’ no sa kisi frulusu tapu a dei di Gado sa teki refensi (2 Tesalonikasma 1:8). Ma a fasi fa na ogri seti fu sani disi de èn a fasi fa trangayesi sma e weigri fu libi akruderi den wet nanga gronprakseri fu Bijbel, e meki taki a de wan tyalensi fu tan gi yesi na a bun nyunsu.

¹² A fasi disi fa sma e weigri fu gi yesi na Gado, na san Bijbel e kari a „yeye fu grontapu” (1 Korentesma 2:12). Paulus ben skrifi den fosi yarihondro Kresten na ini Efeise fu sori den, sortu krakti a yeye disi abi tapu sma. A ben taigi den: „Fosi, unu ben libi leki den sma fu a grontapu disi, soleki fa a tiriman wani di e tiri a yeye di abi makti na tapu sma, a yeye di e wroko now na ini den sma di de leki trangayesi pikin. Iya, wan ten ben de taki neleki den, wi alamala ben libi soleki fa den lostu fu wi ben tyari wi, fu di wi ben du sani di a skin nanga a denki fu wi ben wani, èn wi kon de leki pikin di musu firi na atibron fu Gado, neleki den tra sma.”—Efeisesma 2:2, 3.

13. Fa Kresten kan kakafutu gi a yeye fu grontapu nanga bun bakapisi, èn sortu wini dati sa abi gi den?

¹³ Koloku taki den Kresten na ini Efeise no tan de leki srafu fu a yeye dati fu sma di trangayesi. Na presi fu dati, den tron pikin fu Gado di ben e gi yesi na en fu di den ben e meki a yeye fu Gado abi krakti na den tapu èn dati meki den ben man kweki den bun froktu fu a yeye (Galasiasma 5:22, 23). Na so a de tu na ini a ten disi, taki a yeye fu Gado, di na a moro tranga krakti di de, e yepi milyunmilyun sma fu tron den sortu sma di e gi yesi na Yehovah. A bakapisi fu dati na taki den kan ’abi a dyaranti, taki den sa abi howpu te na a kaba’.—Hebrewsma 6:11; Sakaria 4:6.

14. Fa Yesus sori ala Kresten di e libi na ini den lasti dei sortu problema den ben kan fruwakti, èn fa den problema disi ben o de wan tesi gi den te den ben o du muiti fu tan gi yesi na Gado?

¹⁴ Hori na prakseri sosrefi, taki Silo e horibaka gi wi na wan krakti fasi. A e wroko makandra nanga en Tata sosrefi fu sorgu taki nowan feanti, efu na ogri yeye noso libisma, kisi na okasi fu tesi wi so hebi taki a tranga tumusi gi wi fu gi yesi na Gado (1 Korentesma 10:13). Iya, Yesus ben kari wan tu problema di wi ben o kisi na ini den lasti dei disi, so taki wi ben kan sabi san wi kan fruwakti te wi e tan du muiti fu kakafutu gi a yeye fu grontapu. A ben du disi nanga yepi fu seibi brifi, di a ben gi na a apostel Yohanes na ini wan fisyun (Openbaring 1:10, 11). A no de fu taki dati, den brifi dati ben abi tumusi prenspari rai gi Kresten na ini a ten dati, ma toku den abi fu du moro furu nanga sani di ben o pasa na ini „a dei fu Masra”, di bigin na ini 1914. Fu dati ede, a fiti taki wi go poti prakseri na den boskopu disi! *

Tan farawe fu mi-no-ke-fasi, hurudu, nanga a lobi gi gudu

15. Fu san ede wi musu luku bun nanga a problema di ben abi krakti tapu a gemeente fu Efeise, èn fa wi kan du dati? (2 Petrus 1:5-8)

¹⁵ A fosi brifi fu Yesus ben de gi a gemeente na ini Efeise. Baka di Yesus prèise a gemeente gi a fasi fa den horidoro, dan a taigi den: „Ma toku mi abi disi teige yu, taki yu gowe libi a lobi di yu ben abi fosi” (Openbaring 2:1-4). Na ini a ten disi a de so tu taki sma di ben de fayafaya Kresten, kon lasi a tranga lobi di den ben abi gi Gado fosi. Te wi lasi a tranga lobi di wi ben abi fosi, dan dati kan meki a banti di wi abi nanga Gado kon swaki. Dati meki wi musu du wan sani fu lusu a problema wantewante. Fa wi kan kisi a tranga lobi dati baka? Dati na te wi meki a tron wan gwenti fu studeri Bijbel, fu go na den konmakandra, fu begi, èn fu denki dipi fu san wi leri (1 Yohanes 5:3). A tru taki wi musu „du ala san [wi] man” fu doro a marki dati,  ma wi sabi taki a no sa de fu soso (2 Petrus 1:5-8). Efu baka di yu ondrosuku yusrefi yu kon si taki a lobi fu yu kon kowru, dan du wan sani fu tyari kenki kon wantewante. Na so fasi yu sa gi yesi na a frumane di Yesus e gi: „Prakseri fu pe yu fadon komoto, èn abi berow èn du den sani di yu ben du fosifosi.”—Openbaring 2:5.

16. Sortu sani ben abi takru krakti tapu sma na ini den gemeente na ini Pergamum nanga Tiatira di ben de wan kefar gi den na yeye fasi? Fu san ede den sani di Yesus ben taigi den, bun sosrefi gi wi na ini a ten disi?

¹⁶ Den Kresten na ini Pergamum nanga Tiatira ben kisi prèise fu di den ben tan hori den soifri retifasi, fu di den ben horidoro, èn fu di den ben de fayafaya (Openbaring 2:12, 13, 18, 19). Toku den ben gi pasi meki sma nanga takru denki abi krakti na den tapu, neleki fa Bileam nanga Iseibel ben abi takru krakti tapu Israel fu owruten. Den tu sma disi ben kori Israel fu owruten nanga yepi fu seks hurudu èn nanga na anbegi fu Bâ-al (Numeri 31:16; 1 Kownu 16:30, 31; Openbaring 2:14, 16, 20-23). Ma fa a de nanga a ten fu wi, namku „a dei fu Masra”? Den srefi ogri krakti de fu si na ini a ten disi sosrefi? Iya, bika hurudu na a moro prenspari sani di e meki taki den musu puru sma na mindri fu a pipel fu Gado. Fu dati ede a prenspari srefisrefi taki wi weigri fu abi demakandra nanga iniwan sma na inisei noso na dorosei fu a gemeente di kan pori wi nanga a fasi fa a e tyari ensrefi! (1 Korentesma 5:9-11; 15:33) Den wan di wani fu de borgru di e saka densrefi na ondro a tiri fu Silo, musu tan fara fu prisiri di e meki na wan fasi di no fiti. Den musu tan fara sosrefi fu seksbuku èn fu sekstori di de fu si tapu Internet.—Amos 5:15; Mateyus 5:28, 29.

17. Fa den wan na ini a gemeente Sardes nanga Laodisea, ben e si den sani di den ben e du èn a fasi fa den ben e tyari densrefi? Ma fa Yesus ben e prakseri fu den?

¹⁷ Soso wan tu sma fu a gemeente na Sardes ben kisi prèise, ma a gemeente srefi no ben kisi prèise kwetikweti. Den sma fu a gemeente ben e tyari „a nen”, noso a ben gersi leki den ben de na libi, ma den ben abi so wan mi-no-ke fasi, taki Yesus ben taki dati den „dede”. Te den ben e gi yesi na a bun nyunsu, dan den ben e du dati soso fu di den ben abi a gwenti fu du dati. A krutu fu Yesus hebi srefisrefi! (Openbaring 3:1-3) Den sma fu a gemeente na ini Laodisea ben abi a srefi problema. Den ben e dyaf fu a gudu di den ben gudu èn den ben e taki: „Mi gudu.” Toku Yesus ben feni taki den ben de ’mofina sma èn taki sma ben e sari den èn taki den pôti èn breni èn taki den ben de nanga sososkin’.—Openbaring 3:14-17.

18. San wan sma kan du so taki a no tron wan sma di broko-kowru na yeye fasi na Gado ai?

¹⁸ Na ini a ten disi son getrow Kresten kon trangayesi tu. Kande den gi pasi taki a yeye fu a  grontapu disi meki den frigiti na ini sortu ten de e libi, èn dati meki taki den kon broko-kowru na ini a fasi fa den e si a studeri fu Bijbel, begi, Kresten konmakandra, èn a diniwroko fu den (2 Petrus 3:3, 4, 11, 12). A prenspari srefisrefi taki den sma disi gi yesi na Krestes fu di den o du muiti fu kisi gudu na yeye fasi, iya, fu ’go na Krestes fu bai gowtu di meki kon soifri nanga faya’! (Openbaring 3:18) Den sortu trutru gudu disi abi fu du sosrefi nanga den ’furu bun wroko di wi e du èn nanga a de di wi de klariklari fu gi èn sosrefi a prati di wi de klariklari fu prati sani nanga trawan’. Te wi e du muiti fu du den warti sani disi, dan dati e meki taki wi e ’kibri wan bun fondamenti gi a tamara leki wan gudu gi wisrefi, so taki wi kan hori a trutru libi steifi’.—1 Timoteyus 6:17-19.

Den kisi prèise fu di den gi yesi na Gado

19. Fa Yesus prèise den Kresten fu Smirna nanga Filadelfia èn sortu rai a gi den?

¹⁹ Den gemeente na ini Smirna nanga Filadelfia na bun eksempre fu sma di ben e gi yesi na Gado. Wi kan taki dati fu di Yesus no ben piri-ai gi den na ini den brifi di a seni go gi den. A ben taigi den wan fu Smirna: „Mi sabi a banawtu nanga a pôtifasi fu yu — ma yu gudu” (Openbaring 2:9). Den wan fu a gemeente na Smirna de heri tra fasi leki den wan na ini Laodisea di ben e dyaf taki den abi furu grontapu gudu, ma di ben kon de pôti sma te yu luku en bun! A no de fu taki dati Didibri no e breiti fu si taki wan sma e tan getrow na Krestes èn e gi yesi na en. Fu dati ede Yesus ben warskow: „No frede den sani di yu e go nyan pina fu den. Luku! Didibri sa tan trowe sonwan fu unu go na ini strafu-oso, so taki unu sa kisi tesi dorodoro èn so taki unu sa abi banawtu tin dei langa. Buweisi taki unu de getrow, srefi te na dede èn mi sa gi unu a kownu-ati fu libi” (Openbaring 2:10). Na so Yesus ben prèise den wan na ini Filadelfia tu, di a ben taki: „Yu ben hori mi wortu [noso, yu gi yesi na mi] èn yu no ben sori taki yu no de getrow na mi nen. Mi e kon esi. Tan hori tranga san yu abi, so taki nowan sma kan teki a kownu-ati fu yu.”—Openbaring 3:8, 11.

20. Fa milyunmilyun sma na ini a ten disi tan du san Yesus taki, èn sortu tesi den ben abi fu pasa fu man du dati?

²⁰ Fu sensi „a dei fu Masra” bigin na ini 1914, wan getrow fikapisi makandra nanga tra skapu di e wroko makandra nanga den èn di doro milyunmilyun sma kaba, tan du san Yesus taki fu di den du a diniwroko fu den fayafaya, èn fu di den tan hori a soifri retifasi fu den. Neleki den brada na ini a fosi yarihondro, na so son brada nanga sisa na ini a ten disi nyan pina fu di den gi yesi na Krestes. Son wan fu den ben doro te na ini strafu-oso srefi èn na ini strafuman kampu. Trawan du san Yesus taki, fu di den hori den „ai soifri”, srefi te den ben abi na okasi fu kon gudu èn te den ben e si fa trawan na den lontu ben e feti baka den eigi gridi lostu (Mateyus 6:22, 23). Iya, awinsi pe tru Kresten de èn awinsi fa sani e waka gi den, toku den e tan prisiri na ati fu Yehovah, fu di den e tan gi yesi na en.—Odo 27:11.

21. (a) Sortu frantwortu a srafu grupu sa tan tyari na yeye fasi? (b) Fa wi kan sori taki wi wani gi yesi na Silo trutru?

²¹ Now di a bigi benawtu e kon krosibei, dan „a getrow èn koni srafu” e tan hori densrefi na a bosroiti fu den fu gi yesi na Krestes, a Masra fu den. Disi wani taki dati den e go doro fu sreka yeye nyanyan na a reti ten gi na osofamiri fu Gado. Sobun, meki wi tan sori warderi gi a tumusi moi organisâsi di Yehovah seti èn gi den sani di na organisâsi disi e gi wi. Na a fasi disi, wi e sori taki wi e gi yesi na Silo, di sa gi têgo libi na ibriwan sma di e gi yesi na en èn di e saka ensrefi na ondro a tiri fu en.—Mateyus 24:45-47; 25:40; Yohanes 5:22-24.

[Futuwortu]

Yu e memre disi ete?

• Sortu frantwortu Yesus ben o tyari soleki fa Yakob ben taki di a ben o dede?

• Fa wi kan sori taki wi e si Yesus trutru leki Silo, èn sortu yeye wi no wani teki abra?

• Sortu rai di wi kan gebroiki bun na ini a ten disi, de fu feni na ini den brifi gi den seibi gemeente fu Openbaring?

• Na sortu fasi wi kan teki na eksempre fu den wan na ini den gemeente fu Smirna nanga Filadelfia?

[Aksi fu a tori disi]

[Prenki na tapu bladzijde 18]

Yehovah e blesi a pipel fu en, fu di den e gi yesi na a getrow „basya”

[Prenki na tapu bladzijde 19]

A krakti di Satan abi tapu sma, e meki taki a de wan tyalensi fu tan gi yesi na Gado

[Prenki na tapu bladzijde 21]

Te wi abi wan tranga banti nanga Yehovah, dan dati e yepi wi fu tan gi yesi na en