Trowstu na ini ten fu banawtu

A NYUNSU na ini a ten disi no e gi sma trowstu kwetikweti. Wan sma ben skrifi: „Den sani di e pasa na ini a ten disi e meki wi firi so brokosaka, taki furu tron wi no sabi efu wi musu luku a nyunsu.” Grontapu lai nanga feti, ogridu, pina, nanga siki, èn heri esi wisrefi kan ondrofeni den takru sani disi. Kande wi e ondrofeni den kaba srefi.

Bijbel ben sori krinkrin taki a situwâsi disi ben o opo kon. Yesus ben taki dati na ini ten fu wi bigi feti, pestsiki, nanga angriten ben o de, èn a ben taki sosrefi dati gronseki ben o pasa (Lukas 21:10, 11). Na apostel Paulus ben skrifi tu taki „muilek ten [ben o] kon, di tranga fu pasa”, èn libisma ben o abi wan krasi fasi fu du sani, den ben o lobi moni, èn den no ben o lobi bun sani. Paulus ben kari a pisi ten dati „den lasti dei”.—2 Timoteyus 3:1-5.

Sobun, a nyunsu di e taki fu den sani di e pasa na grontapu, e kruderi pikinso nanga san Bijbel ben taki na fesi fu a ten fu wi. Ma Bijbel e taki fu tra sani sosrefi di no de fu yere na ini a nyunsu. A Wortu fu Gado di skrifi nanga yepi fu santa yeye, kan yepi wi fu kon frustan fu san ede so furu ogri de, èn san o pasa na ini a ten di e kon.

Fa Gado e denki fu ogridu?

Bijbel e tyari kon na krin fa Gado e denki fu den takru sani di e pasa na ini a ten disi. Aladi a ben si na fesi taki den problema disi ben o opo  kon, toku a no e feni den bun èn a no sa gi pasi taki den e tan fu ala ten. „Gado na lobi”, na so na apostel Yohanes ben skrifi (1 Yohanes 4:8). Yehovah e broko en ede trutru nanga sma èn a no lobi nowan enkri ogridu. Sobun, a fiti fu suku trowstu na Gado, fu di Gado bun èn fu di a abi sari-ati nanga sma. Boiti dati, a abi a makti fu puru ogri na grontapu, èn a wani du dati tu. A psalm skrifiman ben taki: „[A Kownu di Gado poti na hemel] sa frulusu a pôtiwan di e bari fu kisi yepi, sosrefi a sma di e kisi kwinsi èn ibri sma di no abi yepiman. A sa firi sari gi a mofinawan èn gi a pôtiwan, èn a sa frulusu den sili fu den pôtiwan. Fu kwinsi èn fu ogri di e du nanga tranga a sa frulusu a sili fu den, èn a brudu fu den sa de warti na ini en ai.”—Psalm 72:12-14.

Yu e firi sari gi den sma di e pina? A kan de so taki yu e firi sari gi den. Yehovah meki wi na so wan fasi taki wi man sori den srefi fasi leki en, èn leki bakapisi fu dati wi man frustan fa trawan e firi (Genesis 1:26, 27). Fu dati ede wi kan abi na overtoigi taki Yehovah abi sari-ati nanga libisma di e pina. Yesus di ben sabi Yehovah moro bun leki fa tra sma ben sabi en, ben e leri sma taki Yehovah e broko en ede trutru nanga wi èn taki a abi furu sari-ati nanga wi.—Mateyus 10:29, 31.

Srefi den sani di Gado meki e sori taki A e broko en ede nanga libisma. Yesus ben taki dati Gado „e meki en son opo kon gi den ogri sma èn gi den bun sma èn a e meki alen fadon gi den regtfardiki sma nanga den onregtfardiki sma” (Mateyus 5:45). Na apostel Paulus ben taigi den sma fu a foto Listra: „A no de so . . . , taki [Gado] no ben gi kotoigi fu ensrefi fu di a ben du bun, fu di a e gi unu alen fu hemel nanga bun yariten, èn fu di a e furu un ati bogobogo nanga nyanyan èn nanga bigi prisiri.”—Tori fu den Apostel 14:17.

Suma de frantwortu gi ogridu?

A bun fu sabi taki Paulus ben taigi den sma fu Listra sosrefi: „Na ini ala den yari di pasa, [Gado] gi pasi taki ala den nâsi waka den eigi pasi.” Sobun, den nâsi, noso libisma srefi, moro furu de frantwortu gi wan lo fu den problema di den no man lusu. A no Gado de frantwortu gi den sani dati.—Tori fu den Apostel 14:16.

Fu san ede Yehovah e gi pasi taki takru sani e pasa? Oiti a sa tyari wan kaba kon na den sani dati? A piki tapu den aksi disi de fu feni soso na ini a Wortu fu Gado. Dati de so fu di a piki abi furu fu du nanga wan tra yeye sma èn sosrefi nanga wan prenspari tori di a yeye sma dati ben tyari kon na fesi na ini hemel.

[Prenki na tapu bladzijde 4]

Efu libisma man frustan fa trawan e firi, dan Gado srefi no sa abi sari-ati nanga libisma di e pina?

 [Sma di abi a reti fu a prenki na tapu bladzijde 2]

Tapusei na a kruktu-anusei, Krowâsia: UN PHOTO 159208/S. Whitehouse

[Sma di abi a reti fu a prenki na tapu bladzijde 3]

Wan pikin di e dede fu angri: UN PHOTO 146150 BY O. MONSEN