Wi e kisi trowstu te wi e teki soifri sabi fu Gado

DEN sani di Bijbel e taki fu a lobi nanga a sari-ati fu Gado e gi son sma broko-ede. Den sma disi e aksi densrefi: Efu Gado wani puru ogri, efu a sabi fa fu puru ogri, èn efu a abi a makti fu du dati, dan fu san ede so furu ogri e pasa ete? Den no man frustan fa ala den dri sani di o kari now kan de tru: (1) Gado abi ala makti; (2) Gado lobi libisma èn a bun; èn (3) problema nanga rampu e pasa ete. Den sma disi e agri taki a lastiwan fu den sani disi tru srefisrefi, èn fu dati ede den feni taki wan fu den tu tra sani no kan de tru kwetikweti. Den e bribi taki Gado no man puru ogri, èn efu dati no tru, dan a musu de so taki a no e broko en ede nanga libisma.

Wan tu dei baka di a World Trade Center na ini New York ben kisi pori, dan wan barinen kerki fesiman na Amerkankondre taki: „Sma aksi mi . . . bun furu tron kaba fu san ede Gado e gi pasi taki rampu e pasa èn taki sma e pina. Ma mi musu taki dati misrefi no sabi trutru fu san ede dati de so.”

Wan professor fu kerkileri ben skrifi taki „a yoisti leri fu Gado” di a kerki fesiman dati ben gi, ben naki en ati trutru. A ben agri sosrefi nanga a denki fu wan sabiman di ben skrifi: „Fu di wi no man frustan suma na Gado, meki wi no man frustan fu san ede sma e pina.” Ma a de so trutru taki wi no man kon sabi fu san ede Gado e gi pasi taki ogri de?

Fa ogridu bigin?

Tra fasi leki san son kerki fesiman e taki kande, Bijbel no e sori taki wi no man kon frustan fu san ede Gado e gi pasi taki ogri de. Fu man kon sabi fu san ede ogri de, dan a de prenspari fu sabi taki ogridu no ben de na grontapu na a ten di Yehovah ben meki en. A ben meki den fosi tu libisma leki volmaakti sma; den ben de sondro sondu. Yehovah ben luku den moi sani di a ben meki èn a ben kon si taki den ben de „heri bun” (Genesis 1:26, 31). A ben wani taki Adam nanga Efa ben musu meki a heri grontapu kon tron leki a Paradijs fu Eden. Boiti dati, den ben musu furu grontapu nanga koloku sma di ben o feni kibri fu di a Moro Heiwan fu hemel nanga grontapu ben o tiri den na wan lobi-ati fasi.—Yesaya 45:18.

Ogridu ben bigin nanga wan yeye sma. A yeye sma disi ben de getrow na Gado fosi, ma te fu kaba a ben wani nomonomo taki sma anbegi en (Yakobus 1:14, 15). A ben de krin fu si taki a ben opo ensrefi teige Gado, di a gi den fosi libisma na grontapu deki-ati fu drai den baka tu gi Gado. Adam nanga Efa no gi yesi na Gado di ben taigi den krinkrin taki den no ben musu nyan noso fasi a froktu fu a bon fu sabi bun nanga ogri. Na presi fu dati, den teki a froktu èn den nyan en (Genesis 3:1-6). Di den du dati, dan den no ben sori wawan taki den trangayesi Gado, ma den ben sori tu taki den no ben wani a tiri fu Gado.

 Wan prenspari tori ben tyari kon na fesi

Fu di Adam nanga Efa ben opo densrefi teige Gado na ini Eden, meki taki wan prenspari tori ben tyari kon na fesi. A tori disi ben o de prenspari gi hemel nanga grontapu. Den libisma di ben opo densrefi teige Gado ben tweifri efu Yehovah ben e tiri den mekisani fu en na a yoisti fasi. A Mekiman ben abi a reti fu fruwakti fu libisma taki den gi yesi na en na ini ala sani? Sani ben o waka moro bun nanga libisma te den ben o teki den eigi bosroiti?

A sani di Yehovah du di den tyalensi a tirimakti fu en, sori taki a e gebroiki en lobi, retidu, koni, nanga makti na a yoisti fasi. Gado ben kan gebroiki en makti fu pori Adam nanga Efa wantewante. Kande dati ben o de a moro bun sani fu du, fu di a abi a reti fu du dati. Ma dati no ben o gi piki tapu den aksi di ben opo kon. Na a tra sei, Gado ben kan tapu en ai gi a sondu dati. Son sma na ini a ten disi ben kan feni taki na so fasi a ben o sori taki a de wan lobi-ati Gado. Ma disi no ben o buweisi efu sani trutru ben o waka moro bun nanga libisma te den ben tiri densrefi, soleki fa Satan ben taki dati. Èn efu Yehovah ben tapu en ai gi a sondu dati, dan dati no ben o meki taki tra sma srefi ben o gowe libi a pasi fu En? A bakapisi ben o de taki libisma ben o pina fu têgo.

Fu di Yehovah na wan koni Gado, meki a gi pasi taki libisma waka den eigi pasi fu wan pisi ten. Aladi a sani disi wani taki dati a gi pasi taki ogri e tan fu wan pisi ten, toku dati gi libisma na okasi fu sori efu den man tiri densrefi bun sondro Gado. Fu taki en leti, den kisi okasi fu libi akruderi den eigi markitiki di e sori den san bun èn san ogri. San na a bakapisi fu dati? Na ini den yari di pasa, libisma kisi fu du doronomo nanga feti, kruktudu, kwinsi, nanga pina. Te fu kaba Yehovah sa gi wan piki tapu den prenspari aksi di ben opo kon na ini Eden.

Ma na a srefi ten, Gado sori libisma taki a lobi den fu di a gi en Manpikin, Yesus Krestes leki wan frulusu-ofrandi. Disi e meki taki libisma di e gi yesi kan kon fri fu a katibo fu sondu nanga dede di ben kon na den tapu fu di Adam ben trangayesi Gado. Nanga yepi fu a lusu-paiman,  ala sma di e sori bribi na ini Yesus e kisi na okasi fu kisi têgo libi.—Yohanes 3:16.

Wi e kisi trowstu fu di Yehovah gi wi a dyaranti taki a pina di libisma e ondrofeni, de fu wan syatu pisi ten nomo. „Ete wan syatu pisi ten èn na ogri sma no sa de moro”, na so a psalm skrifiman ben skrifi. „Yu sa luku seiker na a presi pe a ben de, èn a no sa de. Ma den safri-atisma srefi sa abi grontapu leki a gudu fu den, èn den trutru sa feni switi prisiri na ini vrede di sa de pasa marki.”—Psalm 37:10, 11.

Wan ten pe sma sa de koloku èn sondro broko-ede

A kontru fu Bijbel profeititori e sori taki heri esi Gado sa tyari wan kaba kon na siki, sari, nanga dede. Luku den moi sani di na apostel Yohanes ben kisi fu si na ini wan fisyun di ben abi fu du nanga den sani di wi kan fruwakti. Yohanes ben skrifi: „Mi ben si wan nyun hemel èn wan nyun grontapu; bika a fosi hemel èn a fosi grontapu ben pasa gowe, èn a se no de moro. . . . Èn Gado srefi sa de nanga [libisma]. Èn a sa figi puru ala watra na den ai, èn dede no sa de moro, nowan sari, nowan babari, nowan pen no sa de moro. Den fositen sani pasa kaba.” Fu sori taki wi kan poti frutrow na ini den pramisi disi, meki Yohanes ben kisi a komando: „Skrifi, bika den wortu disi de getrow èn tru.”—Openbaring 21:1-5.

Ma san o pasa nanga den milyardmilyard sma di dede sensi a ten di Adam nanga Efa ben opo densrefi teige Gado na ini Eden? Yehovah pramisi taki a sa tyari den sma di e sribi na ini dede now, kon na libi baka. Na apostel Paulus ben taki: „Mi poti mi howpu tapu Gado, . . . taki wan opobaka o de fu den regtfardikiwan nanga den onregtfardikiwan” (Tori fu den Apostel 24:15). Den sma disi sa abi a howpu fu libi na ini wan grontapu pe „regtfardikifasi sa de”.—2 Petrus 3:13.

Wan lobi-ati papa sa gi pasi taki en pikin e kisi wan oparâsi te a sabi taki a pikin fu en sa tan kisi wini fu na oparâsi dati. Neleki a lobi-ati papa dati, Yehovah e gi pasi tu taki libisma e ondrofeni ogri na grontapu gi wan pisi ten. Ma ala sma di e meki muiti fu du a wani fu Gado sa kisi blesi fu têgo. Disi na san Paulus e taki fu a tori dati: „Dem sani disi Gado ben meki tron soso sani, no nanga dem egi wani, ma bikasi foe da wani foe Hem disi ben meki dem saka na Hem ondro na ini hopoe. Bikasi san Gado ben meki srefi sa kom verloesoe foe da katibo foe porifasi toe, en kom na da glori fri foe dem pikin foe Gado.”—Romesma 8:20, 21.

Iya, disi na nyunsu trutru. A no a nyunsu di wi e si tapu telefisi noso di wi e leisi na ini koranti, ma disi na bun nyunsu. A de a moro bun nyunsu fu „a Gado fu ala trowstu” di trutru e broko en ede nanga wi.—2 Korentesma 1:3.

[Prenki na tapu bladzijde 6]

Ondrofeni sori taki libisma no man tiri densrefi na wan bun fasi sondro Gado

[Sma di abi a reti fu a prenki]

Wan osofamiri na ini Somalia: UN PHOTO 159849/M. GRANT; wan atoombom: USAF photo; wan strafuman kampu: U.S. National Archives photo