Aksi fu leisiman

Kotoigi fu Yehovah ben o moksi densrefi nanga tra bribi te den e bai wan gebow fu wan tra kerkigrupu èn te den e kenki a gebow dati kon tron wan Kownukondre zaal?

Yehovah Kotoigi no gwenti fu bai gebow fu tra kerki. Ma srefi te den ben o du dati, dan dati no wani taki dati den e moksi densrefi nanga tra bribi. Wi kan si a sani disi leki wan bisnis afersi nomo. A no de so taki a gemeente fu Yehovah Kotoigi e wroko makandra nanga wan tra kerkigrupu fu bow wan presi fu anbegi di ala tu grupu sa gebroiki.

O ten Yehovah Kotoigi ben o moksi densrefi nanga tra bribi, soleki fa Yehovah e si dati? Luku a rai di na apostel Paulus ben gi: „No tai unsrefi makandra nanga sma di no de na bribi. Bika sortu kruderi regtfardikifasi abi nanga kruktudu? Noso san leti abi fu du nanga dungru? Moro fara, sortu wánfasi de na mindri Krestes nanga Belial? Noso sortu prati wan getrow sma abi nanga wan sma di no de na bribi? Èn sortu kruderi a tempel fu Gado abi nanga den kruktugado? . . . ’Fu dati ede komoto na den mindri, èn poti yusrefi aparti,’ na so Yehovah taki, ’èn no fasi moro san no krin’, ’èn mi sa teki unu’” (2 Korentesma 6:14-17). San Paulus ben wani taki nanga a wortu „kruderi” èn san a ben wani taki nanga den wortu „abi fu du nanga”?

Paulus e sori krin taki wi no musu anbegi makandra nanga sma di e anbegi kruktu gado èn nanga sma di no de na bribi. Sosrefi wi no musu teki prati na yeye afersi makandra nanga den sma disi. Paulus ben warskow den Korentesma fu no „nyan na . . . a tafra fu den ogri yeye” (1 Korentesma 10:20, 21). Sobun, tru anbegiman e moksi densrefi nanga tra bribi te den e anbegi makandra nanga tra kerkigrupu, noso te den e wroko makandra nanga den (Exodus 20:5; 23:13; 34:12). Te Yehovah Kotoigi e bai wan gebow di wan kerkigrupu ben gebroiki, dan den e du dati soso fu di den abi wan gebow fanowdu di den kan gebroiki leki wan Kownukondre zaal. Bifo den e bigin gebroiki a gebow leki wan Kownukondre zaal, dan den e puru iniwan sani na ini di abi fu du nanga falsi anbegi. Te den tyari den kenki disi kon na a gebow, dan den e gi en abra na Yehovah, èn den sa gebroiki a gebow dati soso fu anbegi en. Na so fasi den no e moksi a tru anbegi nanga falsi anbegi.

Te tru anbegiman e du bisnis nanga wan tra kerkigrupu, fu di den wani bai wan gebow fu den, dan den no musu abi tumusi furu demakandra nanga a kerkigrupu dati, èn a kontakti di den abi musu de soso fu a bisnis afersi ede. Den memre fu a Kresten gemeente musu hori a warskow fu Paulus na prakseri taki den no musu „tai densrefi makandra nanga sma di no de na bribi”. Aladi wi no e denki taki wi hei moro den sma di abi wan tra bribi, toku wi no e moksi wisrefi nanga den, èn wi e luku bun taki den no e hari wi fu anbegi makandra nanga den. *

Ma kon meki wi taki dati wan gemeente wani yuru wan gebow di de fu wan kerkigrupu. San Bijbel e taki fu a tori disi? Efu wi e yuru so wan gebow, dan wi sa musu abi kontakti doronomo nanga sma fu a kerkigrupu dati, èn wi no wani dati. Srefi te wi ben o yuru a gebow dati gi wán okasi nomo, dan a komte fu owruman musu poti prakseri na den sani disi: A de so taki popki nanga tra sani di den sma dati e gebroiki ini na anbegi fu den sa de na inisei noso na dorosei fu a gebow? San sma ini a libimakandra o denki te wi e gebroiki a gebow dati? Sma ini a gemeente ben sa kan naki futu fu di wi e gebroiki a gebow disi? (Mateyus 18:6; 1 Korentesma 8:7-13). Baka te den owruman luku den tori disi bun, dan den e bosroiti san den sa du. Den musu hori den eigi konsensi na prakseri èn sosrefi a di fu den brada nanga sisa ini a gemeente, bifo den e bosroiti fu bai so wan gebow èn fu kenki en kon tron wan Kownukondre zaal.

[Futuwortu]

[Prenki na tapu bladzijde 27]

Yehovah Kotoigi bai a gebow disi di ben de wan snoga fosi, èn den kenki en kon tron wan Kownukondre zaal