Fa fu kweki pikin na ini wan tra kondre—Den problema nanga den blesi

MILYUNMILYUN sma e froisi go tan na wan tra kondre fu di den wani bigin wan nyun libi na ini a kondre dati. Nownowde moro leki 20 milyun sma fu tra kondre e tan na ini Europa. Moro leki 26 milyun sma di gebore na ini tra kondre e tan na ini Amerkankondre, èn 21 procent fu a pipel fu Australia na sma di gebore na ini tra kondre. Furu tron, den famiri disi di froisi go tan na ini wan tra kondre musu du muiti fu leri wan nyun tongo èn den musu fiti densrefi na nyun gwenti èn sosrefi na wan nyun kulturu.

A de so moro furu taki pikin no abi nowan enkri muiti fu leri a tongo fu a nyun kondre pe den e tan, èn den sa bigin denki sosrefi na ini a nyun tongo dati. Ma kande den papa nanga mama fu den pikin disi musu du moro muiti fu leri a tongo dati. Te pikin e gro kon bigi na ini wan kondre di a papa nanga mama fu den no sabi bun, dan a papa nanga mama ben kan abi problema nanga a tongo fu a kondre dati. A sani disi ben kan meki taki papa nanga mama no sa man frustan so bun san den pikin fu den e taki, èn a problema disi no e lusu so makriki.

Boiti taki a nyun tongo abi krakti tapu a fasi fa pikin e denki, den gwenti fu a nyun kondre ben kan abi krakti tu tapu a fasi fa den e firi. Papa nanga mama ben kan abi muiti fu frustan den firi fu den pikin fu den, noso fu san ede den e du spesrutu sani. Fu dati ede, papa nanga mama di e komoto fu wan tra kondre e miti nanga nyun tyalensi te den e pruberi fu kweki den pikin fu den na ini „a trangaleri èn a seryusu frumane fu Yehovah”.—Efeisesma 6:4.

Fa fu abi krakti tapu a frustan èn tapu na ati

Kresten papa nanga mama abi a frantwortu fu leri den pikin fu den a „soifri tongo” fu a Bijbel waarheid, èn den trutru wani du dati tu (Sefania 3:9). Ma efu pikin no e leri sabi a tongo fu a papa nanga mama fu den bun, èn efu papa nanga mama no man taki a tongo bun di den pikin fu den kon gwenti fu taki, dan fa den kan meki a wet fu Yehovah kisi rutu na ini na ati fu den pikin fu den? (Deuteronomium 6:7). Kande den pikin e frustan den sani di den papa nanga mama fu den e taki, ma efu den sani dati no abi krakti tapu na ati fu den, dan kande den pikin no sa leri sabi den eigi papa nanga mama bun.

Pedro nanga Sandra froisi gowe libi Zuid-Amerika fu go tan na Australia, èn a srefi problema disi e miti den nanga den tu tini boi fu den di den e kweki. * Pedro e taki: „Te sma e taki Gado tori, dan den sani dati musu abi krakti tapu na ati èn tapu den firi fu trawan. A sa de fanowdu fu taki fu trutru prenspari sani, èn fu man fruklari den sani dati, dan yu sa musu sabi moro wortu.” Sandra e taki moro fara: „Efu den pikin fu wi no e frustan a mamatongo fu wi bun, dan kande den no sa man kisi moro sabi fu Gado so taki den kan dini en na a yoisti fasi. Kande a waarheid no sa abi krakti moro na den tapu, èn den no sa man frustan san  den sani di den e leri wani taki trutru. Den ben sa kan abi muiti fu frustan krin san Gado feni bun èn san a no feni bun, èn dati ben kan pori a banti di den abi nanga Yehovah.”

Gnanapirakasam nanga Helen froisi komoto fu Sri Lanka fu go tan na Doisrikondre, èn now den abi tu pikin. Den e taki: „Wi feni taki a prenspari trutru taki den pikin fu wi e taki a mamatongo fu wi, aladi den e leri Doisritongo. Den musu man taigi wi fa den e firi, èn den musu man taki san de tapu den ati.”

Miguel nanga Carmen froisi komoto fu Uruguay fu go tan na Australia, èn den taki: „Papa nanga mama di de na ini a srefi situwâsi leki wi musu du bun furu muiti. Den musu leri taki a nyun tongo so bun taki den kan frustan èn kan fruklari Gado tori na ini a tongo dati, èn efu dati no kan, dan den musu leri den pikin fu den fu taki a mamatongo fu den heri bun.”

Wan bosroiti di na osofamiri musu teki

Iniwan osofamiri di froisi go tan na wan tra kondre musu bosroiti na ini sortu tongo den o ’kisi leri fu Yehovah’ (Yesaya 54:13). Wan osofamiri musu du dati efu den wani tan abi wan tranga bribi. Efu wan gemeente de krosibei pe sma e taki a mamatongo fu na osofamiri, dan na osofamiri ben kan bosroiti fu go na a gemeente dati. Ma den ben kan bosroiti sosrefi fu go na wan gemeente pe sma e taki a tongo di moro furu sma fu a kondre dati e taki. San sa meki taki wan osofamiri e teki wan fu den bosroiti disi?

Demetrios nanga Patroulla froisi komoto fu Siprus fu go tan na Ingrisikondre, èn den kweki feifi pikin drape. Den e fruteri san den ben bosroiti èn fu san ede den ben du dati: „Na ini a bigin, wi osofamiri ben e go na wan Grikitongo gemeente. Aladi a sani disi ben de wan bigi yepi gi wi leki papa nanga mama, toku a no ben yepi den pikin fu wi fu kisi moro sabi so taki den ben kan go na fesi na ini na anbegi fu Gado. Aladi den ben man taki Grikitongo, toku den no ben man frustan ala sani di den ben e leri finifini. Wi kon si dati fu di den no ben e go na fesi so esi na ini na anbegi leki tra pikin. Fu dati ede, a heri osofamiri go na wan Ingrisitongo gemeente, èn wi si heri esi taki a sani dati ben de wan yepi gi den pikin fu wi. Den kisi wan moro tranga bribi. A no ben makriki gi wi fu froisi go na wan tra gemeente, ma soleki fa sori, dan wi teki wan koni bosroiti.”

Na osofamiri ben tan taki nanga makandra na ini a mamatongo fu a papa nanga mama, èn a sani dati tyari furu blesi kon gi den. Disi na san den pikin fu den e taki: „Wi e kisi wini fu di wi man taki moro leki wán tongo. Aladi wi gwenti fu taki Ingrisitongo, toku wi kon si taki wi abi wan tranga banti nanga den famiriman fu wi, spesrutu nanga wi granmama nanga granpapa, fu di wi man taki Grikitongo.Wi man frustan sma di froisi gowe libi a kondre fu den moro bun sosrefi, èn dati e gi wi na overtoigi taki wi ben o man leri wan tra tongo efu dati ben de fanowdu. Sobun, di wi ben kon moro bigi, dan wi famiri froisi fu go yepi wan Albaniatongo gemeente.”

Christopher nanga Margarita froisi komoto tu fu Siprus fu go tan na ini Ingrisikondre, èn den kweki dri pikin na ini a kondre disi. Den bosroiti  fu go na wan gemeente pe sma e taki Grikitongo. A manpikin fu den, Nikos, e dini now leki owruman na ini wan Grikitongo gemeente. A e taki: „Wi ben kisi a rai fu go na a nyun Grikitongo gemeente. Wi osofamiri ben si a sani dati leki wan wroko di den ben kisi fu Gado.”

Margarita e taki: „Di den tu boi fu wi ben abi seibi nanga aiti yari, dan den bigin teki prati na a Theokrasia Diniwroko-skoro. Wi leki papa nanga mama ben e broko wi ede pikinso fu di den no ben e taki Grikitongo so bun. Ma ibri leisi te den ben musu abi wan prati na a skoro, dan a heri famiri ben e span anu makandra, èn wi ben e teki wi ten fu yepi den fu sreka den lezing fu den.”

Joanna, na umapikin fu den, e taki: „Mi kan memre taki mi papa ben e skrifi a Grikitongo alfabet na tapu wan bord na oso fu leri wi a tongo dati, èn wi ben musu leri na alfabet bun. Gi furu sma a e teki furu yari langa bifo den e leri wan nyun tongo, ma fu di mi papa nanga mi mama ben e yepi wi, meki a no teki tumusi langa gi wi fu leri Grikitongo.”

Wan tu osofamiri sa bosroiti fu go na wan gemeente pe sma e taki a mamatongo fu den, fu di a papa nanga a mama feni taki den musu kisi leri na ini a mamatongo fu den fu man kisi „frustan fu sani di abi fu du nanga Gado” (Kolosesma 1:9, 10; 1 Timoteyus 4:13, 15). Noso na osofamiri ben kan gebroiki a mamatongo fu den fu yepi tra sma di komoto fu tra kondre èn di e taki a srefi tongo disi fu kon leri sabi a waarheid.

Na a tra sei, wan osofamiri ben kan feni en moro bun fu go na wan gemeente pe sma e taki a tongo di moro furu sma na ini a kondre pe den go tan e taki (Filipisma 2:4; 1 Timoteyus 3:5). Baka di a famiri edeman taki fu a tori disi nanga en osofamiri, dan a abi a frantwortu fu teki wan bosroiti  baka di a begi Gado fu sori en san a musu du (Romesma 14:4; 1 Korentesma 11:3; Filipisma 4:6, 7). Sortu rai ben kan yepi den osofamiri disi?

Wan tu bun rai

Pedro nanga Sandra, di ben kari na a bigin, e taki: „Wi bosroiti fu taki soso Spanyorotongo na oso fu sorgu taki wi no e frigiti a mamatongo fu wi. A no makriki fu hori wisrefi na a bosroiti disi, bika den boi fu wi sabi taki wi e frustan Ingrisitongo. Ma efu wi no ben e hori wisrefi na a bosroiti dati, dan den ben kan frigiti a Spanyorotongo heri esi.”

Miguel nanga Carmen, di ben kari tu na ini a bigin, e gi papa nanga mama a rai disi: „Te papa nanga mama e studeri Bijbel nanga den pikin fu den doronomo na ini a mamatongo fu den, èn te den e taki fu a deitekst ibri dei nanga den na ini a tongo disi, dan den pikin sa kon leri sabi a tongo heri bun. Den sa leri fu gebroiki a tongo dati te den e taki fu Bijbel tori èn fu sani di abi fu du nanga a bribi.”

Miguel e gi a rai disi sosrefi: „Du muiti fu meki den pikin abi prisiri na ini a preikiwroko. A kontren pe wi e preiki na wan bigi pisi fu a bigi foto pe wi e tan, èn wi musu rei oto wan heri pisi ten fu man doro den sma di e taki a tongo fu wi. Na a ten di wi de tapu pasi fu go na den sma disi, dan wi e poti aksi gi makandra di abi fu du nanga Bijbel tori èn wi e taki fu prenspari tori. Mi e pruberi fu seti sani bun so taki wi kan go baka na den sma di trutru wani sabi moro fu Bijbel. Ne, na a kaba fu a dei, den pikin kan prisiri fu di den ben man teki prati na wan bun takimakandra.”

Fa fu kakafutu gi den gwenti fu a kondre

Gado Wortu e gi yonguwan a rai disi: „Arki, mi manpikin, a trangaleri fu yu papa, èn no gowe libi a wet fu yu mama” (Odo 1:8). Ma problema kan kon te a trangaleri di a papa gwenti fu gi èn a „wet” fu a mama e difrenti fu den sani di den pikin fu den e kon gwenti. Dati de so bika den sma na ini a kondre pe den e tan now abi tra gwenti èn den e tyari densrefi na tra fasi sosrefi.

A no de fu taki dati ibri famiri edeman abi a frantwortu fu bosroiti fa a sa tiri en eigi osofamiri, èn a no musu du ala sani di tra osofamiri e du (Galasiasma 6:4, 5). Ma te papa nanga mama abi bun takimakandra doronomo nanga den pikin fu den, dan dati kan meki en moro makriki gi den papa nanga mama disi fu fiti densrefi na nyun gwenti.

Ma furu fu den gwenti di den sma na ini den  gudu kondre abi kan pori a banti di Kresten abi nanga Gado. Den poku, kino, nanga tra sani di e gi sma prisiri na ini a ten disi, furu tron e gi sma deki-ati fu du hurudu, fu abi bigi-ai, èn fu no hori densrefi na bun gwenti nanga wet (Romesma 1:26-32). Kresten papa nanga mama abi a frantwortu fu luku efu den pikin fu den e arki poku noso e luku kino di fiti, èn den no musu poti a frantwortu disi na wan sei, soso fu di den no man frustan a tongo so bun di den pikin fu den e taki. Den musu sori den pikin fu den krin san fiti èn san no fiti. Ma a sani disi ben kan de wan tyalensi gi den.

Carmen e taki: „Furu tron wi no e frustan den wortu fu den poku di den pikin fu wi e arki. Son leisi a poku sori fu de wan bun poku, ma efu den wortu kan gi sma wan heri tra denki sosrefi, noso efu doti-taki de fu yere na ini a poku, dan wi no ben o sabi dati.” Fa den kakafutu gi a problema disi? Miguel e taki: „Wi teki wi ten fu leri den pikin fu wi sortu kefar kan miti den te den e arki poku di no fiti. Boiti dati, wi e pruberi fu yepi den fu kon sabi sortu poku Yehovah ben o feni bun.” Iya, papa nanga mama di no abi den srefi gwenti leki den pikin fu den, musu de na ai èn den musu pruberi fu frustan fa den pikin fu den e firi.—Deuteronomium 11:18, 19; Filipisma 4:5.

Den blesi di den sa kisi

Furu muiti nanga pasensi de fanowdu fu man kweki pikin na ini wan tra kondre. A sani dati tru srefisrefi. Ma papa nanga mama èn sosrefi pikin kan kisi tra blesi tu fu di den e meki muiti so taki sani kan waka bun.

Azzam nanga en wefi, Sara, froisi gowe libi Torkukondre fu go tan na Doisrikondre, èn den kweki dri pikin drape. A moro bigi manpikin fu den e dini now na a bijkantoro fu Yehovah Kotoigi na ini Selters, na Doisrikondre. Azzam e taki: „Wan sani di de wan bigi blesi gi den pikin, na taki den kan kweki fasi nanga maniri di sa de wan bigi yepi gi den na ini ala tu kulturu.”

Antonio nanga Lutonadio froisi komoto fu Angola fu go tan na ini Doisrikondre, èn den e kweki neigi pikin drape. Na osofamiri disi e taki Lingalatongo, Fransitongo, nanga Doisritongo. Antonio e taki: „Fu di na osofamiri fu wi man taki difrenti tongo, meki wi man gi kotoigi na sma fu furu difrenti kondre. A sani disi e gi wi bigi prisiri trutru.”

Wan trowpaar fu Yapan di froisi go tan na Ingrisikondre abi tu pikin di feni taki den e kisi bun furu wini, fu di den man taki Yapantongo nanga Ingrisitongo. Den yongusma disi e taki: „Fu di wi man taki tu tongo, meki wi ben man feni wroko. Wi kisi wini fu den bigi kongres di ben hori na ini Ingrisitongo. Na a srefi ten, wi abi a grani fu dini na ini wan gemeente pe sma e taki Yapantongo, èn pe moro preikiman de fanowdu.”

Yu kan abi bun bakapisi

Fu sensi owruten, futuboi fu Gado miti nanga a tyalensi fu kweki pikin aladi den ben e libi na mindri sma di abi tra gwenti. Moses en papa nanga mama ben abi bun bakapisi, aladi Moses ben kweki na ini Egepte (Exodus 2:9, 10). Wan lo fu den Dyu di ben de na ini katibo na ini Babilon, ben kweki pikin di ben de klariklari fu drai go baka na Yerusalem fu seti a tru anbegi baka.—Esra 2:1, 2, 64-70.

Na ini a ten disi, Kresten papa nanga mama kan abi bun bakapisi tu. Kande den sa ondrofeni a blesi taki den pikin fu den e taigi den a srefi sani di wan manpikin nanga wan umapikin ben taigi a papa nanga mama fu den: „Ala sma na ini na osofamiri fu wi abi wan bun banti nanga makandra fu di unu sorgu wi na wan lobi-ati fasi. Boiti dati, wi ala ten ben man taki bun nanga makandra. Wi breiti taki wi na memre fu wan famiri na heri grontapu di e dini Yehovah.”

[Futuwortu]

[Prenki na tapu bladzijde 24]

Te yu e taki soso yu mamatongo te yu de na oso, dan dati sa yepi den pikin fu yu fu kon sabi a tongo bun

[Prenki na tapu bladzijde 24]

Te pikin e taki a srefi tongo di den granpapa nanga granmama fu den e taki, dan den sa tan abi wan bun banti nanga makandra

[Prenki na tapu bladzijde 25]

Te yu e studeri Bijbel nanga den pikin fu yu, dan den sa kon sabi den „sani di abi fu du nanga Gado” moro bun