„Kakafutu gi Didibri”
„Kakafutu gi Didibri”
„Kakafutu gi Didibri èn a sa lon gowe libi unu.”—YAKOBUS 4:7.
1. San wi kan taki fu a disiten grontapu, èn fu san ede den salfuwan nanga den wan di e wroko makandra nanga den, musu de na ai?
„GADO no de moro, ma Didibri de ete.” Den wortu disi fu a Fransi skrifiman André Malraux, na wortu di e fiti san wi e si e pasa na ini a grontapu pe wi e libi. Iya, a gersi taki libisma e du a wani fu Didibri moro leki a wani fu Gado. Satan e kori libisma „nanga ibri krakti wroko nanga bedrigi marki nanga wondru èn nanga ibri onregtfardiki bedrigifasi gi den wan di e kisi pori” (2 Tesalonikasma 2:9, 10). Ma na ini den „lasti dei” disi, Satan e poti ala en prakseri na den futuboi fu Gado. A e du ala muiti fu kisi den wan di gi densrefi abra na Gado. Dati meki a e feti nanga den salfu Kresten, „di e hori den komando fu Gado èn [di] abi a wroko fu gi kotoigi fu Yesus” (2 Timoteyus 3:1; Openbaring 12:9, 17). Den salfu Kotoigi disi makandra nanga den sma di abi a howpu fu libi na grontapu èn di e wroko makandra nanga den, musu de na ai.
2. Fa Satan ben kori Efa, èn gi sortu sani na apostel Paulus ben e frede, soleki fa a ben taki?
2 Satan na basi fu den koriman. Nanga yepi fu wan sneki a ben kori Efa fu go prakseri taki a ben o abi moro bigi prisiri, te a ben o teki bosroiti sondro fu gi yesi na Gado (Genesis 3:1-6). Sowan fo dusun yari baka dati, na apostel Paulus ben sori taki a ben frede taki den salfu Kresten na ini Korente ben o fadon na ini den trapu fu Satan. Paulus ben skrifi: „Mi e frede taki na a wán noso tra fasi, neleki fa a sneki ben kori Efa nanga en trikifasi, a denki fu unu ben sa kan kon pori èn [taki unu] no ben sa tan ini na opregtifasi nanga a krinfasi di de fu a Krestes” (2 Korentesma 11:3). Satan e pori a frustan fu sma èn a e bruya a fasi fa den e denki. Neleki fa a ben kori Efa, na so a kan meki taki Kresten go denki na wan fasi di no fiti, èn taki den go prakseri taki a wan-enkri fasi fa den kan de koloku, na fu du sani di Yehovah nanga en Manpikin no feni bun.
3. Na sortu fasi Yehovah e kibri wi gi Didibri?
3 Wi kan agersi Satan nanga wan sma di e seti trapu fu fanga fowru. A e fanga den wan di no e fruwakti taki ogri o miti den. Efu wi no wani fadon na ini den trapu fu Satan, dan wi musu „tan na ini a kibripresi fu a Moro Heiwan”. Dati na wan sokari kibripresi di Yehovah seti, fu kibri den wan di e sori taki den e lespeki a reti di a abi fu tiri, èn di e saka densrefi na ondro a tiri dati (Psalm 91:1-3). A de prenspari srefisrefi taki Gado e gi wi kibri nanga yepi fu en Wortu, en santa yeye, nanga na organisâsi fu en, so taki wi „man tanapu kánkan gi den triki fu Didibri” (Efeisesma 6:11). A no de fu taki dati Didibri e gebroiki furu difrenti sortu triki te a e pruberi fu kisi den futuboi fu Yehovah.
Trapu di Satan ben seti gi den fosi Kresten
4. Fa a libi ben de na ini a ten fu den fosi Kresten?
4 Den Kresten di ben e libi na ini a fosi nanga a di fu tu yarihondro G.T., ben e libi na ini a pisi ten di ben de a moro bun ten fu a Gran Kownukondre Rome. A sokari vrede fu Rome ben e meki taki bisnis ben e drai heri bun. Fu di sani ben e waka so bun, meki den heihei sma fu a kondre ben abi moro ten fu meki prisiri, èn den tiriman ben e sorgu sosrefi taki a pipel fu a kondre ben abi nofo okasi fu meki prisiri, so taki den no ben o meki opruru. Son ten den ben abi so furu fesadei, taki a ben gersi leki afu fu a ten den ben e wroko, èn a tra afu den ben e meki prisiri. Den tiriman ben e gebroiki lantimoni fu gi a pipel nyanyan èn fu orga sani pe sma ben kan go fu meki prisiri. Na a fasi disi den ben e sorgu ala ten taki a bere fu a pipel ben furu èn taki nofo sani ben de fu meki den frigiti den broko-ede fu a libi.
5, 6. (a) Fu san ede a no ben fiti gi Kresten fu abi a gwenti fu go na den komedi-oso nanga den preigron fu Rome? (b) Sortu triki Satan ben e gebroiki, èn fa Kresten ben kan wai pasi gi dati?
5 A fasi fa sma ben e libi na a ten dati, ben tyari problema kon gi den fosi Kresten? Efu wi luku san skrifiman soleki Tertullianus di ben libi leti na baka a ten fu den apostel e taki, dan furu fu den fasi fa sma ben e meki prisiri na ini a ten dati, ben abi fu du nanga sani di ben kan pori na anbegi fu tru Kresten èn sosrefi a fasi fa den ben musu tyari densrefi. Wan fu den sani di meki taki dati ben de so, na taki furu fu den fesadei nanga den wega di sma ben e hori, ben de fu gi grani na heiden gado (2 Korentesma 6:14-18). Srefi den owruten komedi prei di den ben e hori na ini den komedi-oso, ben sori fa sma ben gi densrefi abra na fisti lostu fu a skin noso fa sma ben e feti nanga makandra teleki brudu lon. Baka wan pisi ten den owruten komedi prei no ben e hari sma prakseri so furu moro. Ne den sma bigin hori tra sortu komedi prei pe sma ben e singi aladi trawan ben e dansi fu meki sma si a tori di den ben e singi fu en. Ma furu tron den sani disi ben fisti srefisrefi. Na ini a buku Daily Life in Ancient Rome, a historia skrifiman Jérôme Carcopino e taki: „Den umasma di ben e prei na ini den komedi prei disi, ben abi primisi fu puru den krosi krinkrin . . . Sma ben e gi makandra hebi mankeri teleki brudu lon. . . . [Den komedi prei pe sma no ben e taki, ma pe den ben e sori sani na so wan fasi taki yu ben kan frustan a tori] ben sori krin o dipi den sma ben fadon go na ini a doti libi fu den, èn dati ben de fu si na ala sei na ini a mamafoto. Den no ben tegu gi den ogri sani di den ben e si, fu di den ben gwenti fu si den ogri-ati fasi fa sma ben e kiri makandra na den preigron. Den sani disi ben meki taki den ati ben kon tranga, èn taki den no ben man si a difrenti moro na mindri san bun noso san fowtu.”—Mateyus 5:27, 28.
6 Na den preigron, fetiman ben e feti nanga makandra teleki dede, noso den ben e feti nanga ogri meti teleki den ben kiri den meti noso den ogri meti ben kiri den. Sma ben e trowe ogriman di ben kisi dedestrafu, gi bigi krasi meti. Bakaten den ben du disi sosrefi nanga furu Kresten. Srefi na den ten dati, a triki di Satan ben e gebroiki ben de fu meki sma kon gwenti a hurudu nanga na ogridu. A bakapisi ben de taki sma no ben e tegu moro gi den sani dati. Na presi fu dati sma ben e bigin angri fu si den sortu sani disi. A wan-enkri fasi fa wan sma ben kan sorgu taki a no fadon na ini a trapu dati, ben de fu tan farawe fu den komedi-oso nanga den preigron.—1 Korentesma 15:32, 33.
7, 8. (a) Fu san ede a no ben fiti kwetikweti gi Kresten fu go na den asiwagi strei? (b) Fa Satan ben kan gebroiki den bigi publiki wasi-oso fu Rome fu kori Kresten?
7 Na ini owruten sma ben abi preigron di ben bigi èn langa, pe den ben lobi fu hori span asiwagi strei. Ma a no ben fiti srefisrefi gi Kresten fu go na den wega disi, fu di furu tron den sma di ben go luku den strei disi ben bigin feti nanga makandra. Wan skrifiman fu a di fu dri yarihondro ben taki dati son wan fu den sma di ben e kon fu luku den strei disi ben, e feti nanga makandra drape. Carcopino e taki dati den gadri fu den preigron disi, ben tron presi pe „lukuman di ben e luku den stari fu taki sani na fesi èn sosrefi den huru, ben e go fu du bisnis”. A no de fu taki dati den preigron disi no ben de bun presi gi Kresten.—1 Korentesma 6:9, 10.
8 Ma fa fu den barinen publiki wasi-oso fu Rome? A no de fu taki dati a no ben fowtu taki sma ben e wasi fu tan krin. Ma furu fu den bigi publiki wasi-oso fu Rome, ben de bun bigi oso pe sma ben kan go fu meki trawan hari den skin, noso fu go du sport. Sma ben kan go dòbel drape, èn presi ben de tu fu nyan èn dringi. Aladi a ben seti so taki spesrutu yuru ben de gi mansma noso umasma fu go wasi, toku sma ben e gi pasi taki man nanga uma ben e go wasi na a srefi ten. Clemens fu Aleksandria ben skrifi: „Den bigi publiki wasi-oso ben opo gi ibriwan sma, man nanga uma; èn drape den ben e puru den krosi fu gi densrefi abra na seks lostu.” Sobun, na wan makriki fasi Satan ben kan gebroiki den sortu presi disi srefi leki wan trapu fu kori Kresten, aladi sma na ini a libimakandra ben e si den presi disi leki bun presi fu go. Toku den koni Kresten no ben e go na den presi dati.
9. Gi sortu trapu den fosi Kresten ben musu luku bun?
9 Di sani ben waka bun na ini a Gran Kownukondre Rome, dan dòbel ben tron wan fu den sani di sma ben lobi kefalek. Furu tron a ben de so taki te sma ben e go na den asiwagi strei, dan den ben strei fu wini moni. A wan-enkri fasi fa den fosi Kresten ben kan koti pasi gi den sortu strei disi, na te den no ben o go na den presi dati. Sma ben e dòbel kibrikibri sosrefi na presi pe sma ben kan go yuru kamra èn na ini presi pe sma ben e sidon dringi sopi. Son leisi den dòbelman ben e strei fu taki omeni ston noso bonyo ben de na ini na anu fu wan tra dòbelman. Den sma na ini a ten dati ben lobi dòbel fu di dati ben meki a libi fu den kon moro switi; a ben e gi den a howpu fu meki moni na wan makriki fasi (Efeisesma 5:5). Furu tron a ben de so tu taki den uma di ben e wroko na den presi pe sma ben e go dringi sopi, ben de huru uma. A sani dati ben kan de leki wan trapu fu kori sma fu du seks hurudu. Disi ben de wan tu fu den trapu di Satan ben seti gi den Kresten di ben e libi na ini den foto fu a Gran Kownukondre Rome. Ma sma e du den srefi sortu sani na ini a ten disi?
Den trapu fu Satan na ini a ten disi
10. Fa a libi na ini a ten disi de a srefi leki fa a ben de na ini a ten fu a Gran Kownukondre Rome?
10 Den triki fu Satan no kenki so furu na ini ala den yarihondro di pasa. Fu sorgu taki „Satan no wini” den Kresten di ben e libi na ini a pori foto fu Korente, dan na apostel Paulus ben gi den seryusu warskow. A ben taki: „A no de so, taki wi no sabi san [Satan] abi na prakseri” (2 Korentesma 2:11). Na ini furu gudu kondre na ini a ten disi, a libi de a srefi leki fa a ben de di a Gran Kownukondre Rome ben e drai heri bun. Furu sma abi moro fri ten leki oiti bifo. Den loterij di lanti e orga, e gi howpu srefi na pôti sma. Furu difrenti fasi de fu meki prisiri di e hari a prakseri fu sma. Den bigi preigron pe sma e go luku sport wega, furu nanga sma, den sma dati e dòbel, son leisi den e feti, èn furu tron den sma di e prei den wega e feti nanga makandra. Sma e arki ala sortu poku di no bun, èn sma e du doti fisti sani na tapu den podium fu den komedi-oso èn sosrefi tapu telefisi èn na presi pe den e drai kino. Na ini son kondre, sma lobi fu go na presi pe mansma nanga umasma kan go wasi nanga makandra na ini faya watra noso na tra fasi. Den lobi fu go sosrefi na den se syoro pe sma e waka èn e swen sososkin. Neleki fa Satan suku fu kori futuboi fu Gado na ini den yarihondro di a tru Kresten fasi fu anbegi bigin, na so a e pruberi tu fu kori den disiten futuboi fu Gado nanga grontapu fasi fu meki prisiri.
11. Fa a firi di wi abi fu wani rostu pikinso èn fu teki bro, kan tron wan trapu gi wi?
11 Wi e libi na ini wan grontapu pe sma e kon weri noso e firi brokosaka. Dati meki a no e fruwondru wi te sma wani fu rostu pikinso noso te den wani go na tra presi fu go koiri. Ma neleki fa den fosi Kresten ben musu luku bun nanga den bigi publiki wasi-oso fu Rome di ben prati na ini difrenti kamra pe sma ben kan go fu du sani di no ben bun, na so a de tu na ini a ten disi taki son presi pe sma e go fu koiri, ben sori fu de leki trapu di Satan gebroiki fu kori Kresten fu go du hurudu, noso fu go dringi sopi pasa marki. Paulus ben skrifi den Kresten fu Korente taki: „No kori unsrefi. Takru kompe e pori bun gwenti. Unu wiki èn kon de na ai na wan regtfardiki fasi èn no tan du sondu, bika son wan de sondro sabi fu Gado.”—1 Korentesma 15:33, 34.
12. San na wan tu triki di Satan e gebroiki fu kisi futuboi fu Yehovah na ini a ten disi?
12 Wi si na ini a tori fu Efa, fa Satan gebroiki triki fu pori a frustan fu na uma dati (2 Korentesma 11:3). Wan fu den triki di Didibri e gebroiki na ini a ten disi, na fu kori Kresten fu bigin prakseri taki efu den e du ala san den man fu sori trawan taki Kotoigi fu Yehovah de a srefi leki ala tra sma, dan dati sa gi den na okasi fu yepi son sma fu si a Kresten waarheid. Ma son leisi den e go tumusi fara so taki densrefi e kon de leki den sma di no de na bribi (Hagai 2:12-14). Wan tra triki de di Satan e gebroiki fu kisi Kresten yonguwan èn sosrefi den moro owruwan di gi densrefi abra na Gado. A e du muiti fu meki den go libi wan dobru libi èn fu du sani di kan „meki a santa yeye fu Gado firi sari” (Efeisesma 4:30). Sonwan fu den fadon na ini a trapu dati fu di den gebroiki Internet na wan fowtu fasi.
13. Sortu kibri fasi fu kisi sma Didibri e gebroiki, èn sortu rai fu Odo e fiti na ini a tori disi?
13 Wan tra trapu fu Satan na taki a e pruberi fu meki sma horibaka gi afkodrei tori sondro fu den sabi. Nowan tru Kresten ben o go moksi ensrefi fu espresi nanga na anbegi fu Satan noso nanga afkodrei. Ma toku son sma abi wan mi-no-ke fasi te a abi fu du nanga felem di den e luku tapu telefisi, den video game di den e prei, èn srefi te den e luku pikin-nengre buku nanga anansitori di e poti prakseri na ogridu noso dangratori di abi fu du nanga afkodrei. Wi musu tan fara fu iniwan sani di abi fu du nanga afkodrei, srefi efu a gersi nomo leki den sani dati abi fu du nanga afkodrei. Wan odo di e gi koni rai e taki: „Maka nanga trapu de na tapu a pasi fu a wan di e bedrigi trawan; a sma di e kibri en sili, e hori ensrefi fara fu den” (Odo 22:5). Fu di Satan na „a gado fu a seti fu sani disi”, meki iniwan sani di grontapu sma lobi srefisrefi, kan abi fu du nanga wan fu den trapu fu Satan.—2 Korentesma 4:4; 1 Yohanes 2:15, 16.
Yesus ben kakafutu gi Didibri
14. San Yesus ben du fu kakafutu gi a fosi tesi fu Didibri?
14 Yesus gi wi wan moi eksempre fu a fasi fa wi musu kakafutu gi Didibri so taki a kan lon gowe libi wi. Baka di Yesus teki dopu èn baka di a ben tan sondro fu nyan 40 dei langa, dan Satan ben go na en fu tesi en (Mateyus 4:1-11). A fosi sani di a gebroiki fu tesi Yesus ben de na angri di Yesus ben e firi, baka di a ben tan so langa sondro nyan. Satan ben tyalensi Yesus fu du wan wondru fu feni nyanyan. Na so fasi a fosi wondru fu en ben o de fu plisi ensrefi. Ma Yesus gebroiki Deuteronomium 8:3 fu sori taki a no ben o gebroiki a makti fu en nomo fu du wan sani fu furu en bere. A ben sori taki yeye nyanyan ben moro prenspari gi en leki trutru nyanyan.
15. (a) Sortu lostu di ala libisma abi Satan ben gebroiki fu tesi Yesus? (b) San na wan fu den moro prenspari sani di Didibri e gebroiki fu kori futuboi fu Gado na ini a ten disi, ma fa wi kan kakafutu gi en?
15 San bun fu hori na prakseri na taki nanga a tesi disi, Didibri no ben pruberi fu kori Yesus fu du wan sondu di abi fu du nanga seks. Na a okasi disi Satan ben gebroiki na angri di Yesus ben firi fu tesi en, fu di dati ben de a moro tranga lostu di Yesus ben abi na a momenti dati. Sortu tesi Didibri e gebroiki fu kori a pipel fu Gado na ini a ten disi? We, furu difrenti tesi de, ma a e gebroiki tranga seks lostu leki wan fu den moro prenspari sani fu tesi a pipel fu Yehovah so taki a kan broko a soifri retifasi fu den. Efu wi waka baka na eksempre fu Yesus, dan wi kan kakafutu gi Didibri èn sosrefi gi den triki fu en. Neleki fa Yesus ben man memre den yoisti tekst di ben kan yepi en fu kakafutu gi Satan so taki a no ben man kisi en, na so wi kan memre tekst tu soleki Genesis 39:9 nanga 1 Korentesma 6:18 te Satan e tesi wi.
16. (a) Fa Satan pruberi fu tesi Yesus wan di fu tu leisi? (b) Na sortu fasi Satan ben kan kori wi fu tesi Yehovah?
16 Baka dati, Didibri tyalensi Yesus fu dyompo komoto fu a skotu fu a tempel, fu tesi a makti di Gado abi fu kibri a libi fu en nanga yepi fu den engel fu En. Nanga yepi fu den wortu di skrifi na Deuteronomium 6:16, Yesus ben sori krin taki a ben e weigri fu tesi a Tata fu en. Kande Satan no sa aksi wi fu dyompo komoto fu a skotu fu wan tempel, ma a kan suku fu kori wi fu tesi Yehovah. A de so kande taki wi e kisi a firi fu weri krosi noso fu moi wisrefi leki fa sma fu grontapu e du dati? Wi wani luku o fara wi kan go nanga a sani dati, sondro taki tra sma abi fu gi wi rai? A de so taki sani de di e hari wi fu go meki prisiri na wan fasi di no fiti? A kan taki wi e tesi Yehovah efu wi e du den sani disi. Efu wi abi den sortu firi disi, dan na presi taki Satan o lon gowe libi wi, a kan taki a tan krosibei fu wi, aladi a e tan pruberi fu kori wi fu teki a sei fu en.
17. (a) Fa Didibri ben tesi Yesus wan di fu dri leisi? (b) Fa wi kan ondrofeni a kontru fu Yakobus 4:7?
17 Di Satan ben taki dati a ben o gi Yesus ala den kownukondre fu grontapu efu a ben sa du wán sani nomo fu anbegi en, dan ete wan leisi Yesus gebroiki wan bijbeltekst fu kakafutu gi en, èn na so fasi a sori krinkrin taki a ben e anbegi en Tata wawan (Deuteronomium 5:9; 6:13; 10:20). Kande Satan no sa pristeri wi den kownukondre fu grontapu, ma a kan taki a e tan du muiti fu kori wi nanga gudu. Kande a e meki wi dren srefi fu wan kefalek bun libi nanga ala den gudu di wi ben sa wani. A de so taki wi e tyari wisrefi neleki Yesus, fu di wi e sori krin taki wi e anbegi Yehovah wawan? Efu wi du dati, dan wi sa ondrofeni soifri san Yesus ben ondrofeni. A tori fu Mateyus e taki: „Baka dati Didibri gowe libi en” (Mateyus 4:11). Satan sa gowe libi wi efu wi kakafutu gi en, fu di wi e memre wisrefi na prenspari Bijbel gronprakseri èn fu di wi e hori wisrefi na den gronprakseri dati. A disipel Yakobus ben skrifi: „Kakafutu gi Didibri, dan a sa lon gowe fu unu” (Yakobus 4:7). Wan Kresten brada ben skrifi go na a bijkantoro fu Yehovah Kotoigi na ini Fransikondre. A ben taki: „Satan lai triki srefisrefi. Aladi mi e meki muiti fu basi den firi nanga den lostu fu mi, toku mi feni taki a tranga gi mi. Ma toku nanga deki-ati, pasensi, èn moro prenspari srefi, nanga a yepi fu Yehovah, mi ben man tan hori mi soifri retifasi èn mi ben man tan hori steifi na a waarheid.”
Wi abi ala wrokosani fu man kakafutu gi Didibri
18. Sortu yeye fetisani e yepi wi fu kakafutu gi Didibri?
18 Yehovah sorgu taki wi abi ala den fetisani di de fanowdu fu man wini a feti fu wi na yeye fasi, so taki wi man „tanapu kánkan gi den triki fu Didibri” (Efeisesma 6:11-18). A lobi di wi abi gi a waarheid sa de leki wan banti di wi e weri gi wi mindribere, noso a sa sreka wi fu man du wi Kresten diniwroko. A bosroiti di wi teki fu tan hori den regtfardiki markitiki fu Yehovah, sa de leki wan isri sani di wi e weri na tapu wi borsu fu kibri wi ati. Efu wi weri a bun nyunsu leki wan susu na wi futu, dan den futu fu wi sa tan tyari wi go na ini a preikiwroko, èn disi sa tranga wi èn kibri wi na yeye fasi. A tranga bribi fu wi sa de leki wan bigi skilt di e kibri wi gi „den faya peiri fu na ogriwan”, dati na den triki fasi fa Satan e suku fu du wi ogri èn fu kori wi. A tranga howpu di wi abi taki den pramisi fu Yehovah sa kon tru, sa de leki wan fetimusu di e kibri wi frustan èn di e gi wi wan korostu firi (Filipisma 4:7). Efu wi du muiti fu tron sma di sabi fa fu gebroiki a Wortu fu Gado bun, dan a sa de leki wan feti-owru di wi e gebroiki na yeye fasi, fu yepi sma fu kon fri fu a katibo fu Satan. Wi kan gebroiki en tu fu opo taki gi wisrefi, neleki fa Yesus ben du dati te a ben e kisi tesi.
19. Sortu tra prenspari sani wi musu du sosrefi, boiti taki wi musu ’kakafutu gi Didibri’?
19 Efu wi tan weri „ala den pisi fu a fetisani fu Gado” èn efu wi tan begi doronomo, dan wi kan abi a fasti overtoigi taki Yehovah sa kibri wi te Satan e suku fu feti nanga wi (Yohanes 17:15; 1 Korentesma 10:13). Ma Yakobus sori wi taki a no nofo fu ’kakafutu gi Didibri’. San moro prenspari, na taki wi musu „saka [wisrefi tu] na Gado ondro”, a Sma di e sorgu gi wi (Yakobus 4:7, 8). A fasi fa wi kan du disi sa kon na fesi na ini na artikel di e kon.
San yu ben sa piki?
• Gi sortu trapu fu Satan den fosi Kresten ben musu wai pasi?
• Sortu triki Satan e gebroiki na ini a ten disi fu pruberi fu kori den futuboi fu Yehovah?
• Fa Yesus ben man kakafutu gi den tesi fu Didibri?
• Sortu yeye fetisani e yepi wi fu kakafutu gi Didibri?
[Aksi fu a tori disi]
[Prenki na tapu bladzijde 8, 9]
Na wan krakti fasi Yesus ben kakafutu gi Didibri
[Prenki na tapu bladzijde 10]
Den fosi Kresten no ben wani abi noti fu du nanga fasi fu meki prisiri di ben lai nanga ogridu èn nanga seks tori
[Sma di abi a reti fu a prenki]
The Complete Encyclopedia of Illustration/J. G. Heck