Satan—A de wan ogri-ati sma di de trutru?

FU SENSI owruten sma di e denki dipi fu sani, du muiti fu kon sabi fa ogridu bigin. A Dictionary of the Bible, wan wortubuku di James Hastings ben skrifi, e taki: „Fu sensi di libisma bigin frustan sani, dan den kon si taki sani de na ini a libi di den no ben man basi, èn den sani disi ben abi krakti na den tapu na wan fasi di tyari rampu kon gi den.” A srefi wortubuku disi e taki sosrefi: „Libisma fu fositen ben lobi fu ondrosuku suma ben e meki taki son sani ben e pasa, èn furu tron den ben e si sani soleki winti nanga watra, leki sani di abi libi nanga frustan.”

Soleki fa historia skrifiman e taki, dan fu sensi a bigin fu a historia fu Mesopotamia, sma ben e bribi kaba na ini ogri-ati gado èn na ini ogri yeye. Den Babilonsma fu owruten ben e bribi na ini wan yeye kondre, noso wan „kondre fu pe sma no man komoto”. Den ben e taki dati a basi fu a kondre dati ben de Nergal, wan ogri-ati gado di sma ben sabi leki „a wan di e bron sani”. Den sma fu Babilon ben e frede ogri yeye sosrefi, èn den ben e suku fu plisi den ogri yeye dati nanga towfruwortu. Na ini den anansitori fu den Egeptesma yu ben abi a gado Set di ben de a gado fu ogridu. „A gado disi ben de leki wan aparti sortu meti di ben abi wan langa smara mofo di ben beni pikinso. Sosrefi a ben abi fokanti yesi di ben e tanapu leti-opo, èn a ben abi wan steifi tere di ben meki leki wan forku.”—Larousse Encyclopedia of Mythology.

Den Grikisma nanga den Romesma ben e anbegi bun gado èn sosrefi takru wan, toku den no ben abi wán spesrutu gado di ben e du soso ogri. Den filosofiaman fu den kondre dati, ben leri sma taki tu prenspari sani ben de di de kontrari fu makandra, ma di ben e tiri a libi fu libisma. A filosofiaman Empedocles ben taki dati den tu sani dati ben de Lobi nanga Pratifasi. Plato ben feni taki grontapu abi tu „Sili”, wan di e tyari bun èn wan trawan di e tyari ogri kon. Soleki fa Georges Minois e taki na ini en buku Le Diable (Didibri), dan den „sma [den Grikisma nanga Romesma] fu den fositen heiden bribi, no ben e bribi na ini wan Didibri”.

Na ini a kondre Iran, a Zoroaster bribi ben e leri taki a moro hei gado, Ahura Mazda, noso Ormazd, ben meki wan tra gado di nen Angra Mainyu, noso Ahriman. A gado disi ben drai go du ogridu èn na so fasi a ben kon tron a Yeye di e Pori sani.

San a Dyu bribi ben taki fu Satan ben makriki fu frustan. A ben e taki nomo dati Satan na a Feanti fu Gado di tyari sondu kon. Ma baka furu yarihondro a leri dati ben kon pori nanga ala sortu heiden denki. Na Encyclopaedia Judaica e taki: „Na a kaba fu a lasti yarihondro b.G.T., . . . wan bigi kenki ben kon. Na ini a pisi ten dati, a [Dyu] bribi . . . teki furu sani abra fu a heiden leri di sma ben abi, taki tu prenspari sani de di de kontrari fu makandra èn di abi krakti tapu a libi fu libisma. A heiden leri disi ben sori taki Gado makandra nanga den krakti di e tyari bun kon, ben e kisi gens fu tranga ogri krakti di ben e kori sma, èn taki disi ben e pasa na ini hemel èn na grontapu. A sori leki den Dyu teki a leri disi abra fu a bribi fu den Persiasma.” A buku The Concise Jewish Encyclopedia e  taki: „Efu sma ben wani kibri densrefi fu den ogri yeye, dan den ben musu hori densrefi na spesrutu wet èn den ben musu weri wan tapu na den skin.”

Kerki leri fu Kresten di fadon komoto na bribi

A Dyu bribi ben teki difrenti falsi leri abra di ben abi fu du nanga Satan èn nanga den ogri yeye, ma di no ben e kruderi nanga Bijbel. Na a srefi fasi Kresten di fadon komoto na bribi ben bigin bribi ala sortu tori di no e kruderi nanga san Bijbel e taki. Wan wortubuku di nen The Anchor Bible Dictionary e taki: „Wan fu den moro dangra kerki denki di sma ben abi fositen, ben de taki Gado ben man frulusu a pipel fu en fu di a pai Satan fu lusu den.” A man di ben kon nanga a prakseri disi ben de Irene-us (a di fu tu yarihondro G.T.). Bakaten, Origines (a di fu dri yarihondro G.T.) ben taki moro fini fu a tori disi. A ben feni taki „akruderi wet, Didibri ben kon abi reti tapu libisma” èn a ben e si „a dede fu Krestes . . . leki wan lusu-paiman di ben pai na Didibri”.—History of Dogma, by Adolf Harnack.

A buku The Catholic Encyclopedia, e taki dati „sowan dusun yari langa [a prakseri taki a lusu-paiman ben pai na Didibri] ben de wan prenspari kerkileri” èn a ben tan wan pisi fu san kerkisma ben e bribi. Tra Kerki Tata soleki Augustinus (a di fu fo te go miti a du fu feifi yarihondro G.T.), ben teki a leri disi abra, taki a lusu-paiman ben pai na Satan. Na ini a di fu 12 yarihondro G.T., dan den Lomsu sabiman fu kerki tori Anselm nanga Abelard ben kon si te fu kaba, taki a srakti-ofrandi fu Krestes no ben gi na Satan ma na Gado.

Fositen kruktubribi

Aladi furu fu den Kerki konmakandra di a Lomsu Kerki ben hori, no ben e taki noti fu Satan, toku na ini 1215 G.T., a di fu Fo Kerki Konmakandra fu Lateran ben kon nanga san a buku New Catholic Encyclopedia e kari wan „seryusu fruklari fu bribi”. Pisi 1 fu a fruklari e taki: „Di Gado meki Didibri nanga den tra ogri yeye, dan na a bigin den alamala ben bun, ma bakaten densrefi bigin du san ogri.” A e taki moro fara taki den e du ala san den man fu kori libisma. Na ini a pisi ten di sma ben e kari den Mindri Yarihondro, a denki disi ben e meki furu sma kon frede. Sma ben e denki taki Satan ben de frantwortu gi ala sani di pasa èn di den no ben man frustan, soleki siki, noso a dede di wan sma dede wantronso, èn te nyanyan sani di sma ben prani no ben e gro bun. Na ini 1233 G.T., Paus Gregorius IX ben teki wan tu bosroiti fu frufolgu sma di no ben e agri nanga den leri fu Kerki. Wan fu den bosroiti dati ben de fu tyari wan kaba kon na den sokari Lucifersma, dati na sma di den feni taki ben e anbegi Didibri.

A denki nomo taki Didibri noso tra ogri yeye ben kan kon na sma tapu, ben meki taki furu sma ben e kon frede. Iya, den ben e frede srefisrefi gi sani soleki bonuwroko nanga towfruwroko. Na ini a pisi ten na mindri a di fu 13 nanga a di fu 17 yarihondro, a frede gi sma di ben e du obia ben panya na heri Europa. Den sma fu Europa di ben e froisi go tan na Noord-Amerika na a ten dati, ben abi a frede disi tu. Srefi man soleki Martin Luther nanga Johannes Calvijn, di ben de fesiman fu a Protestant bribi, ben feni en bun taki sma ben e suku èn kiri den wan di ben e du obia. Na ini Europa a ben de so taki efu wan sma ben e fluku wan trawan na publiki èn srefi efu trawan ben e taki nomo dati wan sma ben e du obia, dan den Lomsu krutubangi noso tra krutubangi ben e krutu a sma fu den sani disi. Furu tron den ben e pina sma noso gi den skin-ati, soso fu dwengi den „fu taki dati den ben e du obiawroko, aladi a no ben tru”.

A strafu di den sma di ben e du obia ben kan kisi na ini Ingrisikondre èn na ini Skotland, ben kan de taki den ben o bron den kiri, noso den ben kan anga den. A buku The World Book Encyclopedia e fruteri omeni sma lasi den libi na a fasi disi: „Son historia sabiman e taki dati bigin nanga 1484 te go miti 1782, a Kresten kerki kiri sowan 300.000 uma di den ben si leki sma di ben e du obia.” Efu Satan ben de  frantwortu gi na ogri-ati sani disi, dan sortuwan fu den grupu ben de den wrokosani fu en? Den sma di ben lasi den libi, noso den fayafaya kerkisma di ben e frufolgu den sortu sma dati?

San sma e bribi noso san den no e bribi na ini a ten disi

Na ini a di fu 18 yarihondro a fasi fa sma ben e prakseri ben kon kenki. Na ini a pisi ten dati di den ben e kari a Verlichting, sma ben kon bribi soso na ini sani fu san krinkrin buweisi ben de. Na Encyclopædia Britannica e taki: „A filosofia nanga den kerkileri fu a pisi ten fu a sokari Verlichting, ben e meki Kresten bribi taki didibri no de. Sma ben e taki dati didibri ben de noti moro leki wan pisi fu wan anansitori di sma srefi ben meki na ini den Mindri Yarihondro.” Lomsu Kerki ben sori taki den no ben e agri nanga a tori disi èn na a Fosi Kerki Konmakandra fu a Vaticaan (1869-1870), den ben poti krakti na tapu taki Satan Didibri de trutru. Na a di fu Tu Kerki Konmakandra fu a Vaticaan (1962-1965) den ben sori ete wan leisi fa a Lomsu Kerki ben denki fu a tori disi.

A buku New Catholic Encyclopedia e agri taki „a Lomsu Kerki e tan bribi na ini engel èn na ini ogri yeye”. Ma a buku Théo, wan wortubuku fu Fransikondre di e taki fu a Lomsu bribi, e taki krin dati „furu Kresten na ini a ten disi e weigri fu taki dati didibri de frantwortu gi den ogri di e pasa na grontapu”. Na ini den yari di pasa Lomsu sabiman fu kerki tori no taki soifri fa den e prakseri fu a tori disi. Den taki sani na so wan fasi, taki a sori leki den e agri nanga a fasi fa furu sma fu a ten disi e denki, ma na a tra sei den e pruberi fu hori densrefi na den leri fu Lomsu Kerki. Na Encyclopædia Britannica e taki: „Furu tron sma di feni taki ala Kresten de fri fu bribi san den wani, e prakseri taki san Bijbel e taki fu Satan na wan ’agersitori’ nomo, di sma no musu si leki trutru sani. Den feni taki sma musu si den tori dati leki anansitori di sma meki fu fruklari fu san ede ogridu de na ala sei na grontapu.” A srefi buku disi e taki sosrefi fu den Protestantsma: „A disiten Protestant bribi di e leri taki ala sma de fri fu bribi san den wani, e sori taki a no de fanowdu fu bribi na ini wan didibri di de wan trutru sma.” Ma fa tru Kresten musu si a tori disi? Den musu si san Bijbel e taki fu Satan leki wan „agersitori” nomo?

San Bijbel e leri wi

Nowan filosofia noso kerkileri fu libisma ben man sori wi so soifri pe ogridu komoto, leki fa Bijbel sori wi dati. San Bijbel e taki fu Satan prenspari srefisrefi, fu di dati e yepi wi fu frustan pe ala ogridu komoto èn fu san ede libisma e pina. Wi e kon frustan tu fu san ede sma e tan du someni ogridu na so wan ogri-ati fasi.

Ma son sma kan aksi: ’Efu Gado na a lobi-ati Mekiman, dan fa a ben kan meki so wan ogri yeye leki Satan?’ Na ini Bijbel wi e feni a gronprakseri taki ala san Yehovah Gado meki, de volmaakti, èn taki ala den mekisani fu en di abi frustan, abi den eigi fri wani (Deuteronomium 30:19; 32:4; Yosua 24:15; 1 Kownu 18:21). Sobun, a musu de so taki a yeye di  ben tron Satan ben de volmaakti na ini a bigin. Ma bakaten a gowe libi a pasi fu waarheid nanga regtfardikifasi, fu di ensrefi ben wani dati.—Yohanes 8:44; Yakobus 1:14, 15.

Wi kan agersi a tranga-ede fasi fu Satan nanga a fasi fa „a kownu fu Tirus” ben tyari ensrefi. Nanga yepi fu wan puwema, Bijbel e taki dati a kownu disi ben de wan sma di ben „moi na wan volmaakti fasi” èn taki ’sensi di a ben meki a ben de sondro fowtu na ini a fasi fa a tyari ensrefi, teleki a ben sori taki onregtfardikifasi de na en ini’ (Esekièl 28:11-19). Satan no suku fu buweisi taki Yehovah no de almakti, noso taki Yehovah a no a Mekiman. A no de fu taki dati Satan no ben o man du dati tu, fu di na Gado ben meki en. Ma san Satan du, na taki a ben bigin krutu a fasi fa Yehovah e gebroiki a reti di a abi fu tiri. Na ini a dyari fu Eden, Satan du neleki Gado ben e kibri gi den tu fosi libisma wan sani di den ben abi reti na tapu èn di a tanbun fu den ben e anga fu dati (Genesis 3:1-5). A ben man fu meki Adam nanga Efa trangayesi Yehovah, fu di den no ben wani saka densrefi moro na ondro a regtfardiki tiri fu Yehovah, èn na so fasi a tyari sondu nanga dede kon na tapu den èn na tapu den bakapikin fu den (Genesis 3:6-19; Romesma 5:12). Na a fasi dati Bijbel e sori taki Satan na a rutu fu ala pina di libisma e ondrofeni.

Leti bifo a Frudu ben kon, dan tra engel ben teki a sei fu a tranga-ede Satan. Den ben teki libisma skin fu man gi densrefi abra na a lostu fu den fu abi seks nanga den umapikin fu libisma (Genesis 6:1-4). Di a Frudu kon, dan den trangayesi engel disi ben kenki densrefi kon tron yeye baka, ma den no ben man kisi a ’posisi baka di den ben abi biginbigin’ di den ben de nanga Gado na ini hemel (Yudas 6). Den ben kisi a strafu fu tan na ini deki dungru na yeye fasi (1 Petrus 3:19, 20; 2 Petrus 2:4). Den ben tron ogri yeye di no ben e libi moro na ondro a tiri fu Yehovah, a Sma di abi a reti fu tiri den, ma den ben kon de na ondro a tiri fu Satan. Aladi den ogri yeye disi no man teki libisma skin moro, toku den kan abi bigi krakti tapu a frustan èn tapu a libi fu libisma, èn a no de fu taki dati den de frantwortu fu bun furu fu den ogri-ati sani di wi e si e pasa na ini a ten disi.—Mateyus 12:43-45; Lukas 8:27-33.

Heri esi a tiri fu Satan sa kon na wan kaba

A de krin taki furu ogri sani e pasa na ini grontapu na ini a ten disi. Na apostel Yohanes ben skrifi: „Heri grontapu de na ini a makti fu na ogriwan.”—1 Yohanes 5:19.

Ma soleki fa Bijbel profeititori di kon tru kaba e sori, dan Didibri e meki den helu fu grontapu kon moro hebi fu di a sabi taki a abi ete „wan syatu pisi ten nomo” fu kori libisma, bifo a ten doro taki a no sa abi na okasi fu du dati moro (Openbaring 12:7-12; 20:1-3). Te a tiri fu Satan kon na wan kaba, dan wan regtfardiki nyun grontapu o kon, pe watra-ai, dede, nanga pen „no sa de moro”. Na a ten dati, a wani fu Gado sa „go doro na grontapo so leki na hemel”.—Openbaring 21:1-4; Mateyus 6:10, Njoe Testament nanga dem Psalm.

[Prenki na tapu bladzijde 4]

Den Babilonsma ben e bribi na ini Nergal (te na yu kruktu-anusei), wan ogri-ati gado; Plato (na yu kruktu-anusei) ben e bribi na ini tu „Sili” di ben de kontrari fu makandra

[Sma di abi a reti fu a prenki]

Cylinder: Musée du Louvre, Paris; Plato: National Archaeological Museum, Athens, Greece

[Prenki na tapu bladzijde 5]

Irene-us, Origines, nanga Augustinus ben e leri sma taki a lusu-paiman ben pai na Didibri

[Sma di abi a reti fu a prenki]

Origines: Culver Pictures; Augustine: A teki puru na ini a buku Great Men and Famous Women

[Prenki na tapu bladzijde 6]

Frede gi sma di ben e du obiawroko, meki taki someni dusun sma lasi den libi fu di trawan kiri den

[Sma di abi a reti fu a prenki]

A teki puru na ini a buku Bildersaal deutscher Geschichte