Wan ten fu prisiri na ini den Balkan kondre

A ben de a yari 1922. Den Bijbel Ondrosukuman, soleki fa sma ben sabi Yehovah Kotoigi na a ten dati, ben e hori wan konmakandra na ini a foto Innsbruck, na ini Oostenrijk. Wan yonkuman di ben nen Franz Brand, ben de na a konmakandra disi tu. A yonkuman disi ben de fu a foto Apatin di ben de wan pisi fu a kontren Vojvodina, na ini Serfia. A momenti di a takiman kari Gado nen, Yehovah, dan wan grupu sma bigin meki babari, èn leki bakapisi fu dati den brada ben musu tapu a konmakandra. Ma den sani di Franz ben yere ben naki en ati trutru, èn leki bakapisi fu dati, a bigin preiki a bun nyunsu drape. Disi ben de a fasi fa a wroko ben bigin na ini wan fu den kondre fu den Balkan kondre, èn a wroko disi go na fesi na wan tumusi moi fasi te fu kaba.

FURU sma na ini a ten disi wantewante e bigin prakseri orloku nanga ipi-ipi dedesma te den e yere a nen Yugoslafia. Den sma disi e bigin prakseri den ipi-ipi sma di trawan kiri na wan ogri-ati fasi, loweman di e firi sari èn di abi furu broko-ede, oso di kisi pori, èn sosrefi pikin di e pina fu di den papa nanga mama dede. Wortu no man taki omeni pina nanga sari miti den sma na ini den Balkan kondre fu di orloku ben de drape fu 1991 te kon miti 1995. A sani dati meki taki sma lasi ala howpu di den ben abi taki libisma oiti ben sa man sorgu taki a libi na ini den kondre dati ben o waka bun, èn taki problema no ben o de moro. Leki bakapisi fu na orloku, a pipel fu a kondre di ben nen Yugoslafia fosi e pina fu di na ekonomia no e drai bun srefisrefi èn fu di den sma drape pôti sote. *

Fu di so furu pina e miti a pipel fu a pisi disi fu grontapu, meki wan sma no ben o fruwakti srefisrefi taki koloku sma de fu feni drape. Toku yu kan feni den sortu sma dati drape. Fu taki en leti, den koloku sma dati ondrofeni wan dei fu bigi prisiri na a kaba fu a di fu 20 yarihondro. San Franz Brand, a yonkuman di ben kari na a bigin, ben abi fu du nanga a prisiri dei disi?

Moro sma e kon sabi a waarheid na ini den Balkan kondre

Franz Brand ben prisiri nanga den nyun tru tori di a ben yere, èn a bosroiti taki a ben musu prati a bun nyunsu disi. A feni wroko leki wan barbir na ini Maribor, wan foto na ini Slofeinia di ben de krosibei fu a lanki fu Oostenrijk. Drape a bigin preiki gi den sma di ben e kon na en fu koti den wiwiri. Den sma disi furu tron ben e sidon èn den ben e arki nomo, aladi a ben e puru barba gi den. Fu di a ben du a muiti disi fu preiki gi tra sma,  meki wan pikin grupu fu Kownukondre preikiman ben kon de na ini Maribor na ini den yari 1925 te go miti 1930. Den ben e hori Bijbel lezing na ini wan restaurant di bakaten ben kisi wan nen di ben fiti, namku „Novi svet”, san wani taki („Nyun Grontapu”) Restaurant pe sma kan go nyan fisi fu se.

Baka wan pisi ten, a bun nyunsu ben prati na ini a heri kondre. Dati ben pasa moro furu fu di den preikiman ben e gebroiki a „Photo-Drama der Schepping” (wan pristeri fu felem, atosigi, nanga poku, di ben e teki aiti yuru langa). Ne, na ini den yari na mindri 1930 nanga 1940, di Yehovah Kotoigi bigin kisi hebi frufolgu na ini Doisrikondre, dan den Kotoigi na ini a Kownukondre Yugoslafia kon moro furu fu di pionier fu Doisrikondre di ben lowe komoto fu a kondre fu den, gowe go libi drape. Fu di den Kotoigi disi no ben e suku den eigi bun nomo, meki den go preiki na den moro farawe presi fu a kondre disi di ben lai nanga bergi. Na ini a bigin, a ben gersi leki sma no ben wani arki a boskopu fu den. Na ini den yari syatu baka 1940, dan 150 preikiman nomo ben e teki prati na a preikiwroko.

Na ini 1941, Kotoigi na ini Yugoslafia fu fosi kisi hebi frufolgu, èn dati go doro teleki 1952. Te fu kaba, tapu 9 september 1953, Kotoigi fu Yehovah prisiri trutru fu di a komunist tirimakti fu Generaal Tito ben kon si den leki wan trutru bribi akruderi a wet! A yari dati, 914 preikiman fu a bun nyunsu ben de na ini a kondre dati, èn a nomru fu den ben e tan gro. Na ini a yari 1991, a nomru fu preikiman ben gro kon tron 7420 sma, èn 16.072 sma ben de na a Memrefesa a yari dati.

Fu 16 te go miti 18 augustus 1991, wan internationaal kongres fu Yehovah Kotoigi ben hori fu a fosi leisi na ini a kondre disi, èn dati ben de na ini a foto Zagreb, na Krowâsia. Den sma di ben kon na a kongres disi ben doro 14.684, èn den ben de sma fu a kondre dati, èn sosrefi sma fu tra kondre. A kongres disi di sma noiti no ben o man frigiti, ben sreka a pipel fu Yehovah gi den tesi di ben o miti den. Den bus di ben e tyari den Kotoigi di ben komoto fu Serfia go baka na den eigi kondre, ben de den lastiwan fu den bus di ben pasa a lanki na mindri Krowâsia nanga Serfia. Baka di a lasti bus ben pasa a lanki, dan nowan sma ben kisi primisi moro fu pasa, èn baka dati na orloku bigin.

A pipel fu Yehovah abi reide fu prisiri

Den yari di orloku ben de, ben sori fu de wan ten fu hebi tesi gi Yehovah Kotoigi di ben e libi na ini den Balkan kondre. Toku den abi prisiri fu di Yehovah blesi a pipel fu en di e libi drape so taki a nomru fu den gro kon bigi srefisrefi. Fu sensi 1991 a nomru fu den preikiman di e tan na ini a kontren fu a Yugoslafia fu fosi, gro moro leki 80 procent. Na ini a dienstyari 2001, den ben abi wan heimarki fu 13.472 preikiman.

Fosi den bijkantoro na ini Zagreb nanga Belgrado (Serfia) ben e sorgu gi a wroko fu Yehovah Kotoigi na ini heri Yugoslafia fu fosi. Fu di a nomru fu Kotoigi ben gro, èn fu di wan tra tirimakti ben teki a kondre abra, meki a ben de fanowdu fu meki nyun bijkantoro na ini Ljubljana (Slofeinia), nanga Skopje (Masedonia). Boiti dati, nyun bijkantoro ben de fanowdu sosrefi na ini Belgrado nanga Zagreb. Sowan 140 Kotoigi e dini na ini den bijkantoro disi. Furu fu den Kotoigi disi na yongu sma di abi furu faya nanga lobi gi Yehovah. Bun furu fu den e yepi fu vertaal Bijbelstudie publikâsi na ini Krowâsiatongo, Masedoniatongo, Serfiatongo, nanga Slofeiniatongo. A de wan blesi trutru taki furu fu den tijdschrift nanga publikâsi di Yehovah Kotoigi e meki na ini den tongo disi e tyari kon na doro na a srefi ten leki den wan na ini Ingrisitongo! Den publikâsi disi e yepi furu sma fu feni trowstu nanga howpu.

 Wan tra sani di e gi Yehovah Kotoigi furu prisiri, na a yepi di den e kisi fu wan bigi nomru fu preikiman di de na ini a furuten diniwroko di komoto fu tra kondre. Na ini den yari di pasa, den Kotoigi bow wan tu moi Kownukondre zaal, èn a sani dati gi den gemeente moro prisiri. Ma tra sani ben o pasa di ben o gi den moro bigi prisiri. Fa so?

Wan tumusi moi wroko

Furu preikiman ben gwenti fu aksi densrefi, ’Wi oiti sa abi a Nieuwe-Wereldvertaling na ini wi eigi tongo?’ Ibri yari baka, den ben howpu fu yere taki a sani disi ben e meki bekènti na a distrikt kongres. Ma fa so wan bigi wroko ben musu du? Den vertaalgrupu fu den tongo disi ben seti wan tu yari bifo nomo, èn wan tu sma nomo ben man du a wroko disi.

Baka di den brada fu a Tiri Skin ondrosuku a tori, dan den gi primisi taki a vertaalgrupu fu Krowâsia ben o wroko makandra nanga a di fu Masedonia nanga Serfia. Den grupu disi ben o wroko makandra sei nanga sei fu man kisi wini fu a wroko nanga a muiti di iniwan fu den grupu disi ben o du. A vertaalgrupu fu Krowâsia ben o teki fesi na ini a wroko disi.

Wan dei fu prisiri

Yehovah Kotoigi na ini den Balkan kondre noiti no sa frigiti a dei 23 yuli 1999. Den „A profeiti wortu fu Gado” Distrikt Kongres ben o hori na a srefi ten na ini Belgrado, Sarayefo (Bosnia-Hersegofina), Skopje, nanga Zagreb. Wan pisi ten den brada no ben sabi seiker efu a kongres ben kan hori na ini Belgrado, fu di na a ten di NATO ben e sutu bom tapu a kondre, nowan sma ben abi primisi fu hori publiki konmakandra. Den brada nanga sisa ben firi koloku trutru fu di den ben o kisi na okasi fu miti makandra, baka di den ben e tweifri furu mun langa efu dati ben o pasa! Ma tra sani pasa sosrefi di den no ben fruwakti kwetikweti.

Tapu freida bakadina, wan spesrutu sani ben meki bekènti tapu ala den fo kongres di ben e hori. Den 13.497 sma di ben de na den fo kongres disi ben tan pî, aladi den ben angri fu yere san ben o kon. Te fu kaba, a takiman taki dati a Nieuwe-Wereldvertaling van de Christelijke Griekse Geschriften ben tyari kon na doro na ini Krowâsiatongo èn sosrefi na ini Serfiatongo, èn a taigi den arkiman taki a no ben o teki langa moro bifo a vertaling na ini Masedoniatongo ben o tyari kon na doro tu. A sani disi meki taki den sma di ben de na a kongres no ben man hori densrefi moro langa. Den naki anu so tranga, taki a takiman no ben kisi okasi srefi fu taki ala sani di a ben musu taki. Na a kongres fu Sarayefo, den arkiman tan pî wantronso, fu di den no ben man bribi san den ben yere. Baka dati den naki anu wan heri pisi ten. Na ini Belgrado furu sma ben e krei, èn ibri leisi baka a takiman ben musu wakti pikinso bifo a ben kan taki ala sani di a ben musu taki. Ala den sma drape ben de nanga prisiri trutru!

Den Kotoigi ben abi moro bigi warderi gi a presenti disi, fu di den ben kisi primisi fu lanti fu tyari wan Bijbel kon na doro na ini Krowâsiatongo èn sosrefi na ini Serfiatongo. Sobun, a Nieuwe-Wereldvertaling van de Christelijke Griekse Geschriften na ini ibriwan fu den tongo disi ben tyari kon na doro, èn ibriwan fu den Bijbel disi ben abi wan vertaling fu den Hebrew Buku fu Bijbel na ini a srefi tongo. Boiti dati, a Serfiatongo Bijbel ben meki na ini na alfabet fu den Romesma èn sosrefi na ini na alfabet fu Cyrillus.

A pipel fu Yehovah na ini den Balkan kondre de nanga tangi na ati gi den moi presenti nanga a tiri di den kisi fu Gado, èn den trutru e agri nanga den wortu fu David: „Awansi mi e waka na ini a lagi presi pe furu dungru de, toku mi no e frede nowan ogri, bika yu [Yehovah] de nanga mi.” Aladi problema e tan miti den, toku den abi a fasti bosroiti fu meki ’a prisiri fu Yehovah de a fortresi fu den’.—Psalm 23:4; Nehemia 8:10.

[Futuwortu]

[Prenki na tapu bladzijde 20]

A fosi grupu fu preikiman fu a foto Maribor, na ini Slofeinia, na a ten di den go preiki na ini wan farawe kontren