Yehovah e sorgu gi yu

„Trowe ala un broko-ede na [Gado] tapu, bika a e sorgu gi unu.”​—1 PETRUS 5:7.

1. Na sortu prenspari fasi Yehovah nanga Satan e difrenti krinkrin fu makandra?

WAN bigi difrenti de na mindri Yehovah nanga Satan. Iniwan sma di lobi Yehovah sa tegu gi Didibri. Na Encyclopædia Britannica (1970) na wan buku di e sori sani di sma ben ondrosuku. A buku disi e taki fu a bigi difrenti disi èn a e taki fu den sani di Satan ben du soleki fa a Bijbel buku Yob e fruteri. A e taki: ’A wroko fu Satan na fu waka lontu na grontapu fu suku sani di sma e du noso fu suku libisma di a kan feni fowtu na tapu; na so fasi, a wroko di a e du e difrenti krinkrin fu a di fu Masra. Bika den „ai fu Masra” e luku lontu heri grontapu fu horibaka gi ala sani di bun (II Kron. xvi, 9). Satan no e frutrow nowan sma di e du san bun èn di no e prakseri ensrefi nomo. Gado gi Satan primisi sosrefi fu tesi a bunfasi fu libisma, te so fara leki Gado e gi en na okasi.’ Iya wan bigi difrenti de na mindri Gado nanga Satan!—Yob 1:6-12; 2:1-7.

2, 3. (a) Fa a sani di pasa nanga Yob e sori wi krin san a nen „Didibri” wani taki? (b) Fa Bijbel e sori taki Satan e tan taki ogri fu den futuboi fu Yehovah na grontapu?

² A Griki wortu di vertaal nanga „Didibri” wani taki „wan kragiman di e tyari falsi kragi kon na fesi”, „wan ogri-ati leiman”. A buku Yob e sori taki Satan ben krutu Yob, di ben de wan getrow futuboi fu Yehovah. Satan ben feni taki Yob ben e dini Yehovah soso fu di dati ben e tyari wini gi en. A ben taki: „Na fu soso Yob sori taki a e frede Gado?” (Yob 1:9) A tori fu a buku Yob e sori  taki a no meki den tesi di a ben e kisi, tapu en fu kon kisi wan moro tranga banti nanga Yehovah (Yob 10:9, 12; 12:9, 10; 19:25; 27:5; 28:28). Baka di a pasa den tesi disi a taigi Gado: „Na yere nomo mi ben yere san tra sma taki fu yu, ma now mi eigi ai si yu.”—Yob 42:5.

³ A de so taki baka a ten fu Yob, Satan ben tapu fu taki ogri fu den getrow futuboi fu Gado? Nôno. A buku Openbaring e sori taki na ini a ten disi fu a kaba, Satan e tan taki ogri fu den salfu brada fu Krestes èn sosrefi fu den getrow wan di e horibaka gi den salfu brada dati (2 Timoteyus 3:12; Openbaring 12:10, 17). Sobun, ibriwan fu wi leki tru Kresten musu saka ensrefi na ondro Yehovah, a Gado di e sorgu gi wi, aladi wi e dini en nanga dipi lobi. Na a fasi dati wi e sori taki den kragi fu Satan na falsi kragi. Efu wi du dati, dan wi sa prisiri na ati fu Yehovah.—Odo 27:11.

Yehovah e suku fasi fu yepi wi

4, 5. (a)  San na den sani di Yehovah e poti prakseri na tapu te a e luku grontapu, èn fa dati e difrenti fu den sani di Satan e luku? (b) San wi fu wi sei musu du efu wi wani taki Yehovah feni wi bun?

⁴ Didibri e waka lontu na grontapu, aladi a e suku sma di a kan taki ogri fu den èn di a kan swari (Yob 1:7, 9; 1 Petrus 5:8). Ma Yehovah de heri tra fasi. A e suku fu yepi den wan di abi a krakti fu en fanowdu. A profeiti Hanani ben taigi Kownu Asa: „Fu Yehovah en sei, den ai fu en e luku a heri grontapu lontu fu gebroiki a krakti fu en fu a bun fu den sma di lobi en nanga den heri ati” (2 Kroniki 16:9). Fu tru, wan bigi difrenti de na mindri a bita-ati fasi fa Satan e krutu sma èn a lobi-ati fasi fa Yehovah e sorgu gi sma!

⁵ Yehovah no e luru wi fu si ibri pikin fowtu di wi e meki. A psalm skrifiman ben skrifi: „Efu na fowtu yu ben musu luku, o Yah, o Yehovah, dan suma ben kan tan tanapu?” (Psalm 130:3) A piki tapu na aksi dati na: nowan sma (Preikiman 7:20). Efu nanga wi heri ati wi e suku fu abi wan tranga banti nanga Yehovah, dan den ai fu en sa de na wi tapu. A no sa luku wi fu feni fowtu na wi tapu, ma fu si den muiti di wi e du èn fu piki den begi fu wi te wi e aksi en fu yepi wi èn fu gi wi pardon. Na apostel Petrus ben skrifi: „Den ai fu Yehovah de na tapu den regtfardikiwan, èn den yesi fu en e arki den tranga begi fu den; ma Yehovah no e luku den sma kwetikweti di e du takru sani.”—1 Petrus 3:12.

6. Na sortu fasi a sani di David ben ondrofeni, de leki wan trowstu èn wan warskow gi wi?

⁶ David no ben de volmaakti èn a ben du seryusu sondu (2 Samuel 12:7-9). Ma a puru en ati kon na doro gi Yehovah èn a suku yepi na en nanga yepi fu fayafaya begi (Psalm 51:1-12). Yehovah ben arki a begi fu David, èn a gi en pardon, aladi David ben abi fu ondrofeni den takru bakapisi fu a sondu fu en (2 Samuel 12:10-14). Disi musu de wan trowstu gi wi èn wi musu si en leki wan warskow sosrefi. A de wan trowstu fu sabi taki Yehovah de klariklari fu gi wi pardon fu wi sondu, efu wi abi berow trutru. Ma toku a de wan sari sani te wi musu ondrofeni den takru bakapisi fu sondu (Galasiasma 6:7-9). Efu wi wani abi wan tranga banti nanga Yehovah, dan wi musu tan farawe fu iniwan sani di a no lobi.—Psalm 97:10.

Yehovah e hari a pipel fu en kon na En

7. Sortu sma Yehovah e suku fu yepi, èn fa a e hari den sma disi kon na en?

⁷ Na ini wan fu den psalm David ben skrifi: „Yehovah hei, èn toku a e si a sakafasiwan; ma den wan di abi bigimemre, a sabi soso fu farawe” (Psalm 138:6). Na wan srefi sortu fasi wan tra psalm e taki: „Suma de leki Yehovah wi Gado, En di e meki en tanpresi na loktu? A e saka ensrefi fu luku hemel nanga grontapu. A e opo a mofinawan puru na doti srefi” (Psalm 113:5-7). Iya, na almakti Mekiman fu hemel nanga grontapu e saka ensrefi fu luku grontapu, èn den ai fu en e si den „sakafasiwan”, den „mofinawan”, den ai fu en e si sosrefi den sma di e „soktu èn e geme fu ala den tegu sani di e pasa” (Esekièl 9:4). Nanga yepi fu en Manpikin a e hari den sortu sma disi kon na En. Di Yesus ben de na grontapu, a ben taki: „Nowan sma kan kon na mi, efu a Tata di seni mi kon, no e hari a sma dati . . . Nowan sma kan kon na mi, efu a Tata no e gi en pasi.”—Yohanes 6:44, 65.

8, 9. (a) Fu san ede wi alamala musu kon na Yesus? (b) San e meki taki a seti fu a frulusu-ofrandi de so wan tumusi aparti sani?

 ⁸ Ala libisma musu kon na Yesus èn den musu poti bribi na ini a frulusu-ofrandi fu en, bika den ben gebore leki sondari di de farawe fu Gado (Yohanes 3:36). Den musu kon bun baka nanga Gado (2 Korentesma 5:20). Gado no ben wakti meki den sondari begi en fu seti wan sani gi den, so taki den ben kan libi baka na ini vrede nanga en. Na apostel Paulus ben skrifi: „Gado e rikomanderi en eigi lobi na wi na ini disi, taki Krestes dede gi wi, aladi wi ben de sondari ete. . . . Bika efu, di wi ben de feanti, wi ben kon bun baka nanga Gado nanga yepi fu a dede fu en Manpikin, dan, now di wi kon bun baka nanga En, o moro wi sa kisi frulusu fu en libi ede.”—Romesma 5:8, 10.

⁹ Na apostel Yohanes ben taki fu a tumusi prenspari waarheid taki Gado e suku fu meki libisma tron mati fu en baka. Yohanes skrifi: ’Na so a lobi fu Gado ben kon na krin gi wi, fu di Gado ben seni en wan-enkri Manpikin di ensrefi meki, kon na grontapu so taki nanga yepi fu en wi ben kan kisi libi. Lobi no wani taki dati na wi ben sori lobi gi Gado, ma taki en ben sori lobi gi wi, èn a seni en Manpikin kon leki wan ofrandi di e tapu den sondu fu wi’ (1 Yohanes 4:9, 10). Gado na a Sma di ben kon nanga a prakseri fu du a sani disi, a no libisma. Fa yu e prakseri fu so wan Gado di sori lobi gi wi leki libisma, aladi wi na „sondari” di de „feanti” fu en sosrefi? Yu no wani tron mati fu so wan Gado?—Yohanes 3:16.

A de fanowdu taki wi suku Yehovah

10, 11. (a) San wi musu du fu suku Yehovah? (b) Fa wi musu si a seti fu sani fu Satan?

¹⁰ A no de fu taki dati Yehovah no e dwengi wi fu kon na en. Wi musu suku en, „firifiri en èn trutru feni en, aladi, te yu luku en bun, a no de fara fu ibriwan fu wi” (Tori fu den Apostel 17:27). Wi musu sori taki wi sabi taki Yehovah abi a reti fu aksi wi fu saka wisrefi na en ondro. A disipel Yakobus ben skrifi: „Saka unsrefi na Gado ondro; ma kakafutu gi Didibri èn a sa lon gowe libi unu. Kon krosibei na Gado, èn en sa kon krosibei na unu. Krin un anu, un sondari, èn meki un ati kon soifri, unu di no man teki bosroiti” (Yakobus 4:7, 8). Wi no musu draidrai fu teki a bosroiti fu kakafutu gi Didibri èn fu tanapu na a sei fu Yehovah.

¹¹ Disi wani taki dati wi musu tan farawe fu na ogri seti fu sani fu Satan. Yakobus ben skrifi sosrefi: „Unu no sabi taki matifasi nanga grontapu na feantifasi nanga Gado? Fu dati ede, a sma di wani fu de wan mati fu grontapu, e meki ensrefi tron wan feanti fu Gado” (Yakobus 4:4). Na a tra sei, efu wi wani de mati fu Yehovah, dan wi musu fruwakti taki a grontapu fu Satan no sa lobi wi kwetikweti.—Yohanes 15:19; 1 Yohanes 3:13.

12. (a) Sortu wortu di e gi trowstu David ben skrifi? (b) Sortu warskow Yehovah ben gi nanga yepi fu a profeiti Asarya?

¹² Efu a grontapu fu Satan e gens wi na wan noso tra fasi, dan a prenspari taki wi begi Yehovah fu aksi en fu a yepi wi. Wi kan kisi trowstu fu den wortu fu David, di ben si fa Yehovah ben frulusu en someni leisi. A ben skrifi: „Yehovah de krosibei fu ala den wan di e kari en, fu ala den wan di e kari en na ini trufasi. A sa gi den wan di e frede en ala san den wani, a sa yere a babari di den e meki fu kisi yepi, èn a sa frulusu den.  Yehovah e kibri ala den wan di lobi en, ma ala den ogriwan a sa pori” (Psalm 145:18-20). A psalm disi e sori taki Yehovah man kibri ibriwan fu wi te wi e kisi tesi, èn taki a sa kibri en heri pipel na a pisi ten fu a „bigi banawtu” (Openbaring 7:14). Yehovah sa tan krosibei fu wi efu wi tan krosibei fu en. A „yeye fu Gado” ben tiri a profeiti Asarya fu taki san wi kan si leki tru tori di yu kan fiti tapu difrenti kontren fu a libi: „Yehovah de nanga unu so langa leki unu sa sori fu de nanga en; èn efu unu suku en, a sa meki taki unu feni en, ma efu unu gowe libi en, dan ensrefi sa gowe libi unu tu.”—2 Kroniki 15:1, 2.

Yehovah musu de wan trutru Sma gi wi

13. Fa wi kan sori taki wi e si Yehovah leki wan trutru sma?

¹³ Na apostel Paulus ben skrifi taki Moses „ben tan stanfaste neleki a ben e si a Sma di wi no man si” (Hebrewsma 11:27). A no de fu taki dati Moses noiti no si Yehovah trutru (Exodus 33:20). Ma fu di Moses ben sabi taki Yehovah na wan trutru sma, meki a ben de neleki a ben e si En trutru. Na so a ben de tu taki baka di Yob kisi tesi, a ben gersi leki a bribi fu en ben meki a kon si sani moro krin. A ben kon si taki Yehovah na wan Gado di e gi pasi taki den getrow futuboi fu en e kisi tesi, ma taki noiti a no e gowe libi den (Yob 42:5). Fu Noa nanga Heinok wi e leisi taki den ben e ’waka nanga Gado’. Den ben sori dati fu di den ben e du muiti fu prisiri na ati fu Gado èn fu di den gi yesi na en (Genesis 5:22-24; 6:9, 22; Hebrewsma 11:5, 7). Efu a de so taki Yehovah de wan trutru sma gi wi, neleki fa a ben de wan trutru sma gi Heinok, Noa, Yob, nanga Moses, dan wi sa „poti prakseri na en” na ini ala san wi e du, èn En sa „meki [wi] pasi kon reti”.—Odo 3:5, 6.

14. San a wani taki fu „hori steifi” na Yehovah?

¹⁴ Leti bifo den Israelsma ben de fu go na ini a  Pramisi Kondre, dan Moses gi den a frumane: „Baka Yehovah un Gado unu musu waka, èn na en unu musu frede, èn na en komando unu musu hori, èn na en sten unu musu arki, èn en unu musu dini, èn na en unu musu tan hori steifi” (Deuteronomium 13:4). Den ben musu waka baka Yehovah, den ben musu frede en, gi yesi na en, èn hori steifi na en. Wan Bijbel sabiman ben taki dati ini a Hebrewtongo, a wortu di vertaal nanga „hori steifi”, „abi fu du nanga wan bun èn tranga banti”. A psalm skrifiman ben taki: „A tranga banti nanga Yehovah de gi den wan di e frede en” (Psalm 25:14). Wi sa tan abi a tumusi warti banti disi nanga Yehovah efu wi e si en leki wan trutru sma èn efu wi lobi en sote, taki wi e frede fu du sani di a no feni bun.—Psalm 19:9-14.

Yu sabi taki Yehovah e sorgu gi yu?

15, 16. (a) Fa Psalm 34 e sori taki Yehovah e sorgu gi wi? (b) San wi musu du efu a tranga gi wi fu memre den okasi pe Yehovah ben sori bun-ati gi wi?

¹⁵ Wán fu den triki fu Satan, na fu pruberi fu meki wi frigiti taki Yehovah wi Gado e sorgu gi den getrow futuboi fu en doronomo. Kownu David fu Israel ben sabi heri bun taki Yehovah ben e kibri en, srefi na den okasi pe a ben kan lasi en libi. Wan leisi di a ben de na fesi Kownu Akis fu a kondre Gad, dan a ben musu du leki a law. Ne a ben meki wan singi fu a tori dati. Iya, a ben skrifi wan tumusi moi psalm, pe a ben taki den wortu disi di e sori a bribi fu en: „O meki Yehovah kon bigi makandra nanga mi, un pipel, èn meki wi alamala makandra hei a nen fu en. Mi ben aksi Yehovah, èn a ben piki mi, èn a frulusu mi na ala mi nowtu. Na engel fu Yehovah e seti ensrefi lontu den wan di e frede En, èn a e frulusu den. Tesi èn si taki Yehovah bun, O un pipel; koloku fu a tranga man di e suku kibri na en. Yehovah de krosibei fu den wan di den ati broko; èn den wan di masi na ini yeye, a e frulusu. Den rampu fu a regtfardikiwan furu, ma Yehovah e frulusu en fu den alamala.”—Psalm 34:3, 4, 7, 8, 18, 19; 1 Samuel 21:10-15.

¹⁶ Yu e bribi trutru taki Yehovah abi a makti  fu kibri yu? Yu sabi taki a e kibri yu nanga yepi fu den engel fu en? A de so taki yusrefi tesi fu si taki Yehovah bun? O ten ben de a lasti leisi di yu si krin taki Yehovah du bun gi yu? Pruberi fu memre o ten dati ben de. Dati ben de kande na a lasti oso di yu ben go na ini a preikiwroko, yoisti na a momenti di yu ben firi leki yu no man go doro? Kande yu ben abi wan moi takimakandra nanga na ososma na a okasi dati. Yu ben memre fu taigi Yehovah tangi di a gi yu a krakti di ben de fanowdu fu go doro èn sosrefi fu di a ben blesi yu? (2 Korentesma 4:7) Na a tra sei, a kan de so taki yu no man memre trutru na sortu spesrutu fasi Yehovah ben sori bun-ati gi yu. Kande a lasti leisi di yu ondrofeni so wan sani ben de wan wiki, wan mun, wan yari pasa, noso moro langa srefi. Efu disi de so, dan fu san ede yu no ben sa meki muiti trutru fu kisi wan moro tranga banti nanga Yehovah, aladi yu e pruberi fu si fa a e tiri yu èn fa a e sori yu a pasi? Na apostel Petrus ben gi Kresten a rai: „Saka unsrefi . . . na ondro a makti anu fu Gado . . . aladi unu e trowe ala un broko-ede na en tapu, bika a e sorgu gi unu” (1 Petrus 5:6, 7). Fu tru, a sa fruwondru yu fu si o furu a e broko en ede nanga yu!—Psalm 73:28.

Tan suku Yehovah

17. San de fanowdu fu man tan suku Yehovah?

¹⁷ Wi musu tan du muiti fu meki a banti di wi abi nanga Yehovah kon moro tranga. Na ini begi Yesus ben taigi en Tata: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3). Wi musu du tranga muiti doronomo fu man teki sabi fu Yehovah èn fu en Manpikin. Wi abi begi èn a santa yeye fanowdu fu man frustan „den dipi sani fu Gado” (1 Korentesma 2:10; Lukas 11:13). Wi abi a tiri fu „a getrow èn koni srafu” fanowdu tu fu man furu wi frustan nanga yeye nyanyan di wi e kisi „na a reti ten” (Mateyus 24:45). Nanga yepi fu a koni srafu dati, Yehovah e frumane wi fu leisi a Wortu fu en ibri dei, fu de doronomo na den Kresten konmakandra, èn fu abi wan fayafaya prati na a preiki fu a „bun nyunsu disi fu a kownukondre” (Mateyus 24:14). Te wi e du dati dan wi sa sori taki wi e tan suku Yehovah, a Gado di e sorgu gi wi.

18, 19. (a) Wi musu teki a fasti bosroiti fu du san? (b) Sortu blesi wi sa kisi te wi tan kakafutu gi Didibri èn te wi tan suku Yehovah?

¹⁸ Na ala sortu fasi Satan e du muiti fu tyari frufolgu, gens, nanga kwinsi kon tapu a pipel fu Yehovah. A e du muiti tu fu bruya wi libi èn a e suku fu pori a bun nen di wi abi na Gado. A no wani kwetikweti taki wi musu go doro nanga a wroko di wi e du, fu suku opregti sma èn fu yepi den fu teki a sei fu Yehovah fu di den o si en leki a wan-enkri sma di abi ala reti fu tiri grontapu. Ma wi musu tan getrow na Yehovah, aladi wi abi a frutrow taki a sa frulusu wi fu na ogriwan. Te wi meki a Wortu fu Gado tiri wi èn te wi tan wroko makandra fayafaya nanga a pisi fu na organisâsi fu en di wi kan si, dan wi kan abi a frutrow taki a sa de drape ala ten fu horibaka gi wi.—Yesaya 41:8-13.

¹⁹ Meki wi alamala tanapu kánkan, fu dati ede, fu kakafutu gi Didibri èn gi den triki fu en, aladi wi e tan suku Yehovah, a lobi Gado fu wi, di sa sorgu ala ten taki ’wi de kánkan èn taki wi kon tranga’ (1 Petrus 5:8-11). Na a fasi dati, wi sa sorgu taki wi ’tan na ini a lobi fu Gado, aladi wi e wakti a sari-ati fu wi Masra Yesus Krestes, nanga têgo libi na prakseri’.—Yudas 21.

San yu ben sa piki?

• San a wortu „Didibri” wani taki, èn fa Didibri e sori taki a nen disi fiti na en?

• Fa Yehovah e difrenti krinkrin fu Didibri na ini a fasi fa En e si den sma di e libi na grontapu?

• Fu san ede wan sma musu poti bribi fosi na ini a lusu-paiman, te a wani de wan mati fu Yehovah?

• San a wani taki fu „hori steifi” na Yehovah, èn fa wi kan tan suku en?

[Aksi fu a tori disi]

[Prenki na tapu bladzijde 15]

Aladi Yob ben kisi tesi, toku a ben kon frustan heri bun taki Yehovah ben e sorgu gi en

[Prenki na tapu bladzijde 16, 17]

Te wi e leisi Bijbel doronomo, e go na den konmakandra doronomo, èn de fayafaya na ini a preikiwroko, dan dati sa memre wi taki Yehovah e sorgu gi wi