Aksi fu leisiman

A bun taki Kresten e dòbel, srefi efu na gi pikinso moni nomo?

Gado Wortu no e taki finifini fu a dòbel di sma e dòbel, ma a e sori krin taki nowan-enkri sortu fasi fu dòbel e kruderi nanga Bijbel gronprakseri. * Fu gi wan eksempre, furu sma e agri taki wan sma kan kisi bigi-ai te a e dòbel. A sani dati wawan prenspari nofo gi Kresten fu hori na prakseri, fu di Bijbel e taki dati „sma di abi bigi-ai” no sa kisi a Kownukondre fu Gado, èn a e taki sosrefi dati wan sma di abi bigi-ai, fu taki en leti, e du afkodrei.—1 Korentesma 6:9, 10; Kolosesma 3:5.

Wan sma di e dòbel sa bigin prakseri ensrefi nomo èn a sa kisi a takru gwenti fu strei nanga trawan fu di a wani wini nomonomo. Na apostel Paulus ben warskow gi den sortu sani disi di a ben skrifi: „No meki wi tron sma di e prakseri densrefi nomo, fu di wi e wiki strei nanga makandra èn e dyarusu tapu makandra” (Galasiasma 5:26). Boiti dati, son sma di e dòbel e bribi ala sortu sani soso fu di den wani abi bun bakapisi. Sma di e dòbel e kisi ala sortu kruktubribi, fu di den wani wini. Den sortu sma disi e meki wi prakseri den Israelsma di no ben de getrow èn di ben „e sreka wan tafra gi a gado fu Koloku èn di [ben] e kanti win di moksi, gi a gado fu a Lot”.—Yesaya 65:11.

Son sma ben kan feni taki den no e du nowan ogri te den e gebroiki pikinso moni wanwan leisi fu prei karta noso wan tra sortu plèi nanga famiriman noso bun mati. A no de fu taki, dati wan sma di e gebroiki pikinso moni fu dòbel, kande no e si ensrefi leki wan sma di abi bigi-ai, di lobi strei nanga trawan, noso di abi kruktubribi. Ma sortu krakti a dòbel di a sma disi e dòbel ben kan abi tapu den tra sma di e dòbel nanga en? Furu sma di lobi dòbel ben bigin du dati nanga pikinso moni nomo, ’soso fu di den ben wani abi prisiri’ (Lukas 16:10). Ma a sani disi di den ben si leki wan prisiri sani nomo kon tron wan bun bigi problema gi den.

A sani disi tru srefisrefi te a abi fu du nanga pikin. Furu pikin di ben dòbel nanga pikinso moni, ben firi fa a switi fu wini, èn a sani disi kori den fu dòbel nanga moro moni (1 Timoteyus 6:10). Na ini Amerkankondre, na Arizona Council on Compulsive Gambling (wan grupu fu sma di e ondrosuku fu san ede sma lobi dòbel) ben tyari wan raportu kon na doro fu wan ondrosuku di ben du wan heri pisi ten. A raportu disi e taki dati furu sma di no man tapu nanga a dòbel di den e dòbel, ben bigin nanga a sani dati di den ben de pikin ete. Den sma disi ben bigin „poti pikinso moni tapu sportwega, noso den ben bigin prei karta nanga mati noso famiriman. Wan tra raportu e taki dati „pikin e bigin dòbel na oso, èn furu tron dati e kon fu di den e prei karta nanga den famiriman nanga mati fu den”. A raportu e taki moro fara dati „35 procent fu den pikin di ben e dòbel, ben bigin nanga a sani dati bifo den ben doro erfu yari”. Wan ondrosuku di nen Why Do People Gamble Too Much—Pathological and Problem Gambling (Fu san ede sma e dòbel so furu—Sma di abi muiti fu tapu nanga dòbel) e taki dati tini boi nanga meisje di e dòbel, gwenti fu du ogri nanga tranga, noso den gwenti fu du hurudu fu man feni moni fu dòbel. Disi na trutru wan takru bakapisi fu wan sani di sma no ben si leki wan ogri na ini a bigin!

Fu di wi e libi na ini wan grontapu di lai kaba nanga trapu èn nanga tesi, dan fu san ede wi ben o poti wisrefi na ini wan tra problema? (Odo 27:12) Te wi e dòbel, awansi pikin e teki prati noso efu den no e teki prati, awansi na gi pikinso moni noso gi furu moni, toku a sani dati kan pori a yeye fasi fu a sma, èn fu dati ede wi no musu dòbel. A ben o moro bun te Kresten e skrifi nomo na tapu papira fa a plèi e waka te den e prei karta noso tra plèi. Noso den kan prei soso fu abi prisiri, sondro taki den e broko den ede suma e wini noso suma e lasi. Kresten di koni wani tan abi wan bun yeye fasi, èn den wani a srefi gi den mati nanga den famiriman fu den. Fu dati ede den no e dòbel, srefi efu na gi pikinso moni nomo.

[Futuwortu]