Fu san ede a muilek so fu aksi pardon?

NA INI yuli 2002, a Wetgevende Macht fu California State, na Amerkankondre (wan grupu sma di abi a makti fu meki nyun wet), kon nanga wan nyun wet. A wet disi e taki dati wan sma di ben de frantwortu gi a mankeri di wan trawan kisi, no sa abi fu pai butu noso koti strafu te a e aksi pardon na a sma di kisi mankeri. Fu san ede a nyun wet disi meki? A grupu sma di e meki nyun wet, ben kon si taki sma di de frantwortu gi a mankeri di trawan ben kisi, furu tron no de klariklari fu aksi den sma dati pardon fu di den frede taki a sani dati ben o tyari problema kon gi den te den musu go na fesi krutubangi. Na a tra sei, den sma di feni taki trawan musu gi den pardon wantewante, ben kan kisi atibron, èn a pikin sani di ben pasa ben kan tron wan bigi kesekese.

A no de fu taki, dati a no de fanowdu fu aksi wan sma pardon te yu no de frantwortu gi a mankeri di a ben kisi. Èn son leisi a bun fu prakseri bun bifo yu e taki wan sani. Wan owru odo e taki: „Te wan sma e taki furu wortu pasa marki, dan fowtu no e mankeri, ma a sma di e dwengi en mofobuba, e handri nanga koni” (Odo 10:19; 27:12). Toku yu kan sori taki yu abi bun maniri nanga switifasi, fu di yu e yepi a sma.

Ma a no tru, taki furu sma no gwenti moro fu aksi trawan pardon, srefi te sma no e tyari den go na krutu? Wan wefi ben kan  kragi na oso, ’Mi masra noiti no e aksi mi pardon gi wan sani di a du’. Wan fesiman ben kan kragi, ’Den wrokoman fu mi noiti no e agri taki den meki fowtu, èn wanwan leisi nomo den sa aksi pardon gi wan sani di den du’. Wan leriman ben kan taki na skoro, ’Papa nanga mama no e leri den pikin fu den fu taki: mi e aksi yu pardon’.

Wan sani di kan meki taki wan sma no de klariklari fu aksi wan trawan pardon, na fu di a e frede taki a sma dati sa tan hori en na ati. Kande wan sma no sa wani taki fa a e firi trutru, fu di a frede taki a sma o atibron na en tapu. Fu taki en leti, a sma di ben kisi mankeri kande no sa wani abi noti fu du nanga a sma di ben de frantwortu gi a sani di pasa nanga en, èn disi kan tapu den tu sma disi fu meki en bun baka nanga makandra.

Wan tra sani di kan meki taki sma no wani aksi trawan pardon, na fu di den no e broko den ede nanga den firi fu trawan. Den sma disi ben kan denki, ’Awansi mi e aksi pardon, toku dati no o kenki noti’. Ma tra sma de tu di no de klariklari fu aksi trawan pardon fu di den frede gi san ben kan pasa leki bakapisi fu dati. Den e aksi densrefi, ’A sma sa hori mi frantwortu gi a sani di pasa, èn a sa aksi mi fu pai den kostu di kon leki bakapisi fu dati?’ Awansi fa a no fa, a sani di e tapu sma moro furu fu aksi trawan pardon, na heimemre. Wan sma di no man taki „Mi e aksi pardon”, fu di a abi heimemre, fu taki en leti ben kan denki ’Mi no wani teki frantwortu gi a sani di pasa, bika mi no wani kisi syen. Sma no sa sori lespeki moro gi mi.’

Awansi fa a no fa, furu sma abi muiti fu aksi trawan pardon. Ma a de fanowdu trutru fu aksi pardon? Sortu wini wi e kisi te wi e du dati?

[Prenki na tapu bladzijde 3]

’Papa nanga mama no e leri den pikin fu den fu taki: mi e aksi yu pardon’

[Prenki na tapu bladzijde 3]

’Mi masra noiti no e aksi mi pardon gi wan sani di a du’

[Prenki na tapu bladzijde 3]

’Den wrokoman fu mi noiti no e agri taki den meki fowtu’