Kresten di no e teki sei ini grontapu afersi na ini den lasti dei disi

„Den no de wan pisi fu grontapu, neleki fa mi no de wan pisi fu grontapu.”​—YOHANES 17:16.

1, 2. San Yesus ben taki fu a fasi fa den bakaman fu en musu si grontapu, èn sortu aksi e opo kon fu dati ede?

A LASTI neti di Yesus ben de na grontapu leki wan volmaakti libisma, dan a ben begi wan langa begi, aladi den disipel fu en ben e arki en. Na ini a begi dati a taki fu wan sani di ala tru Kresten sa ondrofeni na ini a libi. A ben taki fu den bakaman fu en taki: „Mi gi den a wortu fu yu, ma grontapu no ben wani si den na ai, bika den no de wan pisi fu grontapu, neleki fa mi no de wan pisi fu grontapu. Mi no e begi yu fu puru den na grontapu, ma mi e begi yu fu kibri den gi na ogriwan. Den no de wan pisi fu grontapu, neleki fa mi no de wan pisi fu grontapu.”—Yohanes 17:14-16.

² Tu tron Yesus ben taki dati den bakaman fu en no ben o de wan pisi fu grontapu. Boiti dati, grontapu ben o abi bita-ati gi den te den ben o hori densrefi aparti fu grontapu afersi. Toku Kresten no ben o abi fu lasi-ati bika Yehovah ben o luku  den (Odo 18:10; Mateyus 24:9, 13). Nanga den wortu fu Yesus na prakseri wi kan aksi wisrefi: ’Fu san ede tru Kresten no de wan pisi fu grontapu? San a wani taki fu no de wan pisi fu grontapu? Efu grontapu abi bita-ati gi tru Kresten, dan fa tru Kresten musu si grontapu? Fu taki en moro krin, fa den e prakseri fu den tirimakti fu grontapu?’ Den Bijbel piki tapu den aksi disi prenspari srefisrefi, fu di den abi fu du nanga a libi fu wi alamala.

„Wi komoto fu Gado”

3. (a) San e meki taki wi de aparti fu grontapu? (b) San e sori wi krin taki grontapu de „na ini a makti fu na ogriwan”?

³ A banti di wi abi nanga Yehovah na wan fu den sani di e meki taki wi no de wan pisi fu grontapu. Na apostel Yohanes ben skrifi: „Wi sabi taki wi komoto fu Gado, ma heri grontapu de na ini a makti fu na ogriwan” (1 Yohanes 5:19). A de krin taki a sani disi di Yohanes ben taki fu grontapu, na wan tru tori. Na ini a ten disi wi e si furu orloku, ogridu, ogri-ati sani di sma e du, a kwinsi di sma e kwinsi trawan, a bedrigifasi fu sma, nanga hurudu di de na ala sei. Den sani disi e sori krin taki na Satan e meki sma du den sani disi èn taki a no Gado (Yohanes 12:31; 2 Korentesma 4:4; Efeisesma 6:12). Te wan sma e tron wan Kotoigi fu Yehovah, dan a no sa du den sortu sani disi, noso a no sa horibaka gi den sortu ogri disi, èn dati e meki taki a no de wan pisi fu grontapu.—Romesma 12:2; 13:12-14; 1 Korentesma 6:9-11; 1 Yohanes 3:10-12.

4. Na sortu fasi wi kan sori taki wi de fu Yehovah?

⁴ Yohanes ben taki dati Kresten de heri tra fasi leki grontapu, fu di den „komoto fu Gado”. Ibriwan sma di gi ensrefi abra na Yehovah, de fu en. Na apostel Paulus ben taki: „Bika efu wi e libi, dan wi e libi gi Yehovah, èn sosrefi efu wi dede, dan wi dede gi Yehovah. Dati meki, awansi wi e libi èn awansi wi dede, wi na fu Yehovah” (Romesma 14:8; Psalm 116:15). Fu di wi de fu Yehovah, meki wi e anbegi en wawan (Exodus 20:4-6). Fu dati ede wan tru Kresten no e gi en heri libi na wan sani di abi fu du nanga grontapu afersi. Aladi a abi lespeki gi sani soleki a fraga fu a kondre, toku a no e anbegi den sani disi. Nôno, a no e du nowan sani di ben sa sori taki a e anbegi den èn a no e anbegi den na ini en ati tu. Sondro tweifri a no e anbegi sportman noso tra sma di trawan na ini a ten disi e si leki gado. A no de fu taki dati a abi lespeki gi a reti di trawan abi fu du san den wani, ma ensrefi e anbegi a Mekiman wawan (Mateyus 4:10; Openbaring 19:10). A sani disi e meki sosrefi taki a de aparti fu grontapu.

„Mi kownukondre no de wan pisi fu a grontapu disi”

5, 6. Na sortu fasi wi de aparti fu grontapu te wi e saka wisrefi na ondro a Kownukondre fu Gado?

⁵ Wan tra sani di e meki taki Kresten no de wan pisi fu grontapu, na taki den de bakaman fu Krestes Yesus èn sosrefi borgru fu a Kownukondre fu Gado. Di Yesus ben de na krutubangi na fesi Pontius Pilatus, dan a ben taki: „Mi kownukondre no de wan pisi fu a grontapu disi. Efu mi kownukondre ben de wan pisi fu a grontapu disi, dan den dinari fu mi ben sa feti, so taki sma no ben sa gi mi abra na den Dyu. Ma soleki fa a de, mi kownukondre no de fu a fonten disi” (Yohanes 18:36). A Kownukondre na a wrokosani di Yehovah sa gebroiki fu meki a nen fu en kon santa, fu sori krin taki en na a sma di abi ala reti fu tiri, èn sosrefi fu meki a wani fu en pasa na grontapu soleki fa a pasa na ini hemel (Mateyus 6:9, 10). Na ini a heri diniwroko fu Yesus, a ben preiki a bun nyunsu fu a Kownukondre, èn a ben taki dati den bakaman fu en ben o du a wroko disi tu teleki a seti fu sani disi kon na wan kaba (Mateyus 4:23; 24:14). Na ini 1914 den profeiti wortu fu Openbaring 11:15 ben  kon tru: „A kownukondre fu grontapu ben tron a kownukondre fu wi Masra èn fu en Krestes, èn a sa tiri leki kownu fu têgo èn fu ala ten.” Dyonsro a Kownukondre fu hemel sa de a wan-enkri tirimakti di sa tiri a libisma famiri (Danièl 2:44). Te fu kaba, srefi den grontapu tiriman sa musu kon sabi taki na a tirimakti disi abi a reti fu tiri.—Psalm 2:6-12.

⁶ Nanga ala den sani disi na prakseri, tru Kresten na ini a ten disi e saka densrefi na ondro a Kownukondre fu Gado, èn den e waka baka a rai di Yesus gi den fu „tan suku fosi a kownukondre nanga en regtfardikifasi” (Mateyus 6:33). Disi no e meki taki den e wisiwasi den kondre pe den e libi, ma toku dati e meki taki na yeye fasi den de aparti fu grontapu. Neleki fa a ben de nanga Kresten na ini a fosi yarihondro, na so a de tu taki a moro prenspari frantwortu fu Kresten na ini a ten disi, na fu „gi kotoigi finifini fu a kownukondre fu Gado” (Tori fu den Apostel 28:23). Nowan libisma tirimakti abi a reti fu tapu a prenspari wroko disi di Gado ben gi wi.

7. Fu san ede tru Kresten no e teki sei ini grontapu afersi, èn fa den sori dati?

⁷ Yehovah Kotoigi sabi taki den de fu Yehovah, èn taki den na bakaman fu Yesus èn sosrefi sma di e saka densrefi na ondro a Kownukondre fu Gado. Fu dati ede, meki den no e teki sei na ini den kesekese fu grontapu di feni presi na ini a di fu 20, nanga a di fu 21 yarihondro. Den no teki a sei fu nowan grupu, den no opo go feti nanga nowan sma èn den no bariwroko gi nowan sani di abi fu du nanga grontapu afersi. Di den ben e kisi hebi frufolgu, dan den sori taki den abi tranga bribi. Kande a ben gersi leki den no ben o man nanga a frufolgu dati, ma toku den hori densrefi na Bijbel gronprakseri di den ben opo taki gi densrefi na fesi den Nazi tiriman fu Doisrikondre na ini 1934: „Wi no wani moksi wisrefi nanga politiek afersi, ma wi e wroko fayafaya gi a Kownukondre fu Gado na ondro a tiri fu Krestes a Kownu di Gado poti. Wi no sa du ogri noso gi mankeri na nowan sma. Nanga prisiri wi wani libi na ini vrede èn du bun gi ala libisma, so langa leki wi abi na okasi fu du dati.”

Den wan di e teki presi gi Krestes èn den boskopuman fu en

8, 9. Na sortu fasi wi kan taki dati Yehovah Kotoigi na ini a ten disi, na sma di e teki presi gi a Kownukondre èn taki den na boskopuman? San dati abi fu du nanga a teki di den no e teki sei ini afersi fu den pipel fu grontapu?

⁸ Paulus ben taki dati en nanga den tra salfu Kresten, ben de „sma di e teki presi gi Krestes, neleki Gado ben [e] gebroiki [den] fu aksi wan sani na wan seryusu fasi” (2 Korentesma 5:20; Efeisesma 6:20). Fu sensi 1914 wi kan taki nanga leti taki den Kresten di salfu nanga santa yeye, na sma di e teki presi gi a Kownukondre fu Gado, èn taki den na „manpikin” fu a Kownukondre dati (Mateyus 13:38; Filipisma 3:20; Openbaring 5:9, 10). Boiti dati, Yehovah puru „wan bigi ipi” fu „tra skapu” komoto fu den pipel fu grontapu. Disi na Kresten di abi a howpu fu libi na grontapu èn den musu horibaka gi den salfu manpikin te den e du a wroko fu den fu teki presi gi a Kownukondre (Openbaring 7:9; Yohanes 10:16). Wi kan kari den „tra skapu” disi „boskopuman” fu a Kownukondre fu Gado.

⁹ Te wan sma de na ini wan tra kondre fu teki presi gi en eigi kondre, dan en nanga den sma di e wroko makandra nanga en, no e moksi densrefi nanga den afersi fu a kondre pe den e wroko. Na so a de tu, taki Kresten no e teki sei ini politiek afersi fu den pipel fu grontapu. Den no e teki sei ini afersi fu nowan kondre, nowan ras, nowan spesrutu grupu na ini a libimakandra, èn sosrefi fu nowan bisnis grupu (Tori fu den Apostel 10:34, 35). Na presi fu dati, den e „du bun gi ala sma” (Galasiasma  6:10). Yehovah Kotoigi no e teki sei na ini nowan grontapu afersi. Dati meki nowan sma kan taki nanga reti taki a no wani arki a boskopu fu den fu di a feni taki den na sma di e horibaka soso gi sma fu wan tra ras, fu wan tra kondre, noso fu wan spesrutu lo.

Sma kon sabi den fu di den e sori lobi

10. O prenspari lobi de gi wan tru Kresten?

¹⁰ Boiti den sani di kon na fesi didyonsro, dan Kresten no e teki sei ini grontapu afersi fu di den e hori na prakseri taki den abi wan banti nanga tra Kresten brada nanga sisa. Yesus ben taigi den bakaman fu en: „Na a fasi disi ala sma o sabi taki unu na mi disipel, te unu lobi makandra” (Yohanes 13:35). Brada lobi na wan prenspari sani di wan tru Kresten musu sori (1 Yohanes 3:14). Neleki fa a lobi disi abi fu du nanga a banti di so wan Kresten abi nanga Yehovah èn nanga Yesus. Na so a de tu taki a abi fu du nanga a tranga banti di a abi nanga den Kresten brada nanga sisa fu en. Ma a no e sori lobi gi den brada nanga sisa na ini en eigi gemeente nomo. A e sori lobi tu gi ’ala den brada fu en na heri grontapu’.—1 Petrus 5:9.

11. Na sortu fasi a lobi di Yehovah Kotoigi abi gi makandra, abi krakti tapu a fasi fa den e tyari densrefi?

¹¹ Na ini a ten disi, Yehovah Kotoigi e sori lobi gi den brada nanga sisa fu den fu di den e meki Yesaya 2:4 kon tru, pe skrifi: „Den sa musu naki den feti-owru fu den kon tron plugu èn den lansri fu den kon tron grasi-nefi. [A wan pipel] no sa opo feti-owru fu feti nanga [wan tra pipel], sosrefi den no sa leri orloku moro.” Fu di tru Kresten e kisi leri fu Yehovah meki den e libi na ini vrede nanga Gado èn nanga makandra (Yesaya 54:13). Fu di den lobi Gado èn sosrefi den brada nanga sisa fu den, meki noiti den no ben o teki fetisani fu go feti nanga den tra Kresten brada nanga sisa, noso nanga tra sma fu tra kondre. A vrede nanga a wánfasi fu den na wan prenspari pisi fu na anbegi fu den. Disi e sori taki a yeye fu Gado de nanga den trutru (Psalm 133:1; Mika 2:12; Mateyus 22:37-39; Kolosesma 3:14). Den e „suku vrede . . . èn du muiti fu kisi en”, fu di den sabi taki „den ai fu Yehovah de na tapu den regtfardiki sma”.—Psalm 34:14, 15.

Fa tru Kresten e si grontapu

12. Na sortu fasi a denki fu Kotoigi fu Yehovah e kruderi nanga a di fu Yehovah te a abi fu du nanga sma fu a grontapu disi, èn fa den e sori dati?

¹² Yehovah leisi krutustrafu kaba gi a grontapu disi, ma a no bigin ete fu krutu ibriwan sma na grontapu. Dati na wan sani di a sa du na a ten di ensrefi poti èn nanga yepi fu Yesus (Psalm 67:3, 4; Mateyus 25:31-46; 2 Petrus 3:10). Ma nownow kaba a e sori bigi lobi gi a libisma famiri. A ben gi en wan-enkri gebore manpikin srefi, so taki ibriwan sma kan abi na okasi fu kisi têgo libi (Yohanes 3:16). Leki Kresten wi e du muiti fu sori a srefi lobi di Gado e sori, fu di wi e fruteri trawan fu den sani di a seti fu frulusu libisma, èn wi e tan du dati srefi te sma e weigri fu arki wi te wi e suku fu yepi den.

13. Fa wi musu si den tirimakti fu grontapu?

¹³ Fa wi musu si den tiriman fu grontapu?  Paulus ben gi piki tapu na aksi dati di a ben skrifi: „Meki ibri sili saka ensrefi na ondro den hei tirimakti, bika nowan tirimakti no de, boiti efu Gado gi den pasi fu de; den tirimakti di de, na Gado poti den na ini den posisi fu den di skotu” (Romesma 13:1, 2). Libisma abi makti fu tiri ma a makti dati „skotu” (kande den abi wan moro hei noso wan moro lagi posisi leki tiriman, ma ala ten Gado hei moro den), èn dati de so nomo fu di na Almaktiwan e gi den na okasi fu tiri. Wan Kresten e saka ensrefi na ondro a tiri fu den grontapu tirimakti, fu di dati na wan fasi fa a e gi yesi na Yehovah. Ma san o pasa efu a musu bosroiti efu a o hori ensrefi na den markitiki fu Gado noso na den di fu libisma tirimakti?

A Wet fu Gado èn di fu Caesar

14, 15. (a) Na sortu fasi Danièl ben man wai pasi gi wan problema di ben abi fu du nanga a gi di a ben musu gi yesi? (b) San den dri Hebrewman ben du di den ben musu bosroiti na suma den ben o gi yesi?

¹⁴ Danièl nanga den dri mati fu en, na moi eksempre di e sori wi fa wi kan tan saka wisrefi na ondro a makti fu Gado, aladi wi e saka wisrefi na ondro libisma tirimakti tu. Di den fo yongu Hebrewman disi ben de na ini katibo na ini Babilon, dan den gi yesi na den wet fu a kondre dati èn heri esi sma ben teki den fu gi den spesrutu leri. Fu di Danièl ben e si taki a leri di a ben e kisi ben kan meki taki a du sani di no e kruderi nanga a Wet fu Yehovah, meki a go taki a tori disi nanga a lantiman di ben abi a frantwortu leki fesiman. Leki bakapisi fu dati, spesrutu sani ben seti fu no meki den fo Hebrewman disi du sani di no e kruderi nanga a konsensi fu den (Danièl 1:8-17). Yehovah Kotoigi e teki na eksempre fu Danièl te den e gebroiki koni fu taki nanga den heihei-man fu a kondre, fu fruteri den fa den e prakseri fu son sani, so taki den no kisi problema bakaten.

¹⁵ Ma na wan tra okasi, wan problema ben opo kon pe den ben musu bosroiti nomonomo na suma den ben o gi yesi. A kownu fu Babilon ben meki wan bun bigi popki na ini a lagipresi fu Dura. Ne a gi wan komando na ala den heihei man fu a kondre, èn sosrefi den distrikt komsarsi, fu kon makandra a fosi leisi di den ben o anbegi a popki dati. Na a ten dati den ben poti den dri mati fu Danièl na wroko leki distrikt komsarsi fu a kontren fu Babilon, èn dati meki a komando ben de gi den tu. Baka di sma ben du difrenti sani na fesi a popki, dan ala den sma di ben kon makandra ben musu boigi gi a popki. Ma den dri Hebrewman ben sabi taki a sani disi no ben e kruderi nanga a wet fu Gado (Deuteronomium 5:8-10). Sobun, di ala tra sma boigi gi a popki, dan den tan tanapu. Te den ben o trangayesi a komando fu a kownu, dan den ben kan dede na wan ogri-ati fasi, èn soso nanga yepi fu wan wondru den ben sa kan tan na libi; ma den ben frukisi fu dede na presi fu trangayesi Yehovah.—Danièl 2:49–3:29.

16, 17. San den apostel ben du di den ben kisi a komando fu tapu nanga a preikiwroko, èn fu san ede den ben du dati?

¹⁶ Na ini a fosi yarihondro, sma ben tyari den apostel fu Yesus Krestes go na fesi fu den Dyu tiriman na ini Yerusalem èn den ben kisi a komando fu tapu nanga a preiki di den ben e preiki ini a nen fu Yesus. San den ben du? Yesus ben gi den a komando fu meki disipel fu sma fu ala pipel, èn dati ben wani taki sosrefi fu meki disipel fu sma na ini Yudea. A ben taigi den sosrefi fu de Kotoigi fu en na ini Yerusalem èn na ala tra presi fu grontapu (Mateyus 28:19, 20; Tori fu den Apostel 1:8). Den apostel ben sabi taki den komando fu Yesus ben tyari kon na krin san Gado ben wani den fu du  (Yohanes 5:30; 8:28). Dati meki den ben taki: „Wi musu gi yesi na Gado leki tiriman moro leki na libisma.”—Tori fu den Apostel 4:19, 20; 5:29.

¹⁷ A no ben de so taki den apostel ben trangayesi (Odo 24:21). Toku a de so, taki di libisma tirimakti taigi den fu tapu fu du a wani fu Gado, dan den ben kan taki nomo: ’Wi musu gi yesi na Gado èn no na libisma’. Yesus ben taki dati wi musu „pai Caesar den sani baka di de fu Caesar, ma Gado den sani di de fu Gado” (Markus 12:17). Ma efu wi no e gi yesi na wan komando fu Gado, fu di wan libisma taigi wi fu no du dati, dan wi e gi na libisma san de fu Gado. Na presi fu dati, wi e pai ala san wi musu gi na Caesar baka na Caesar, ma wi no e frigiti taki Yehovah na a Moro hei tiriman. En na a Sma di abi ala reti fu tiri hemel nanga grontapu, èn En na a Mekiman, a sma di abi ala makti.—Openbaring 4:11.

Wi sa tan tanapu kánkan

18, 19. Sortu fasti bosroiti furu fu den brada nanga sisa fu wi teki, èn fa wi kan teki na eksempre fu den?

¹⁸ Na ini a ten disi, moro furu fu den grontapu tirimakti sori taki den e hori na prakseri taki Yehovah Kotoigi no e teki sei, èn wi breiti fu dati. Ma na ini son kondre Kotoigi kisi hebi frufolgu. Bigin nanga a di fu 20 yarihondro te nanga now, sonwan fu den brada nanga sisa fu wi pina srefisrefi. Na yeye fasi den ben abi fu feti „a tumusi bun feti fu a bribi”.—1 Timoteyus 6:12.

¹⁹ Fa wi kan tanapu kánkan neleki den? Na a fosi presi, wi musu hori na prakseri taki wi musu fruwakti taki wi sa kisi frufolgu. Wi no musu bruya noso fruwondru srefi efu dati e miti wi. Paulus ben warskow Timoteyus: „Ala sma di wani dini Gado na wan getrow fasi na ini wánfasi nanga Krestes Yesus, sa kisi frufolgu tu” (2 Timoteyus 3:12; 1 Petrus 4:12). Na Satan e tiri a grontapu disi, a no so? Fa wi kan fruwakti dan, taki wi no sa kisi frufolgu? (Openbaring 12:17). So langa leki wi de getrow, dan son sma sa de di ’o fruwondru fu dati èn den o tan kosi wi’.—1 Petrus 4:4.

20. Sortu tru tori wi musu hori na prakseri, di kan gi wi deki-ati?

²⁰ Leki di fu tu sani, wi sabi taki Yehovah nanga den engel fu en sa horibaka gi wi. Soleki fa Elisa ben taki na ini owruten, dan „moro de di de nanga wi leki den wan di de nanga den” (2 Kownu 6:16; Psalm 34:7). A kan taki Yehovah abi wan marki fu san ede a e gi pasi fu wan pisi ten, taki gensman go doro fu kwinsi wi. Toku a sa tan gi wi a krakti di wi abi fanowdu fu horidoro (Yesaya 41:9, 10). Sonwan fu den brada nanga sisa fu wi dede srefi, ma dati no e tapu skreki gi wi. Yesus ben taki: „No frede den wan di e kiri a skin, ma di no kan kiri a sili; ma na presi fu dati, frede a sma di kan kiri a sili nanga a skin na ini Gehena” (Mateyus 10:16-23, 28). Wi na sma di e „tan wan pisi ten nomo” na ini a seti fu sani disi. Wi e gebroiki a ten di wi de na ini a seti fu sani disi fu „kan hori a trutru libi steifi”, èn fu kisi têgo libi na ini a regtfardiki nyun grontapu fu Gado (1 Petrus 2:11; 1 Timoteyus 6:19). So langa leki wi tan getrow na Gado, dan nowan libisma kan tapu wi fu kisi a blesi dati.

21. San wi musu tan hori na prakseri ala ten?

²¹ Sobun, meki wi hori na prakseri taki wi abi a bigi grani fu abi wan banti nanga Yehovah Gado. Meki wi tan abi warderi gi a grani fu kan de bakaman fu Krestes èn borgru fu a Kownukondre. Meki wi lobi den brada nanga sisa fu wi nanga wi heri ati, èn meki wi prisiri ala ten nanga a lobi di den e sori gi wi. Boiti dati, meki wi du san a psalm skrifiman ben taki: „Howpu tapu Yehovah; hori deki-ati èn meki yu ati de tranga. Iya, howpu tapu Yehovah” (Psalm 27:14; Yesaya 54:17). Dan wi sa man tanapu kánkan neleki furu tra Kresten di ben du dati kaba, fu di wi sa abi wan tranga howpu. Wi sa tyari wisrefi leki ala den tra getrow Kresten brada nanga sisa di no e teki sei ini grontapu afersi, fu di den no de wan pisi fu grontapu.

Yu kan tyari disi kon na krin?

• Fa a banti di wi abi nanga Yehovah e meki taki wi de aparti fu a grontapu disi?

• Fa wi kan sori taki wi leki sma di e saka wisrefi na ondro a tiri fu a Kownukondre fu Gado, no e teki sei ini afersi fu a grontapu disi?

• Na sortu fasi, lobi gi wi brada nanga sisa kan meki taki wi no teki sei, ma taki wi tan aparti fu grontapu?

[Aksi fu a tori disi]

[Prenki na tapu bladzijde 15]

Sortu krakti a sa abi tapu a matifasi fu wi nanga grontapu, te wi saka wisrefi na ondro a Kownukondre fu Gado?

[Prenki na tapu bladzijde 16]

Wan Hutu nanga wan Tutsi e wroko makandra nanga prisiri

[Prenki na tapu bladzijde 17]

Dyu brada makandra nanga brada fu Arabia

[Prenki na tapu bladzijde 17]

Kresten brada fu Serfia, Bosnia, nanga Krowâsia e nyan bun fu a demakandra di den abi leki brada

[Prenki na tapu bladzijde 18]

San na a yoisti fasi fu tyari wisrefi te tiriman e aksi wi fu poti den wet fu Gado na wan sei?