Ondrofenitori

Wi tan du a diniwroko di wi kisi fu du

SOLEKI FA HERMANN BRÜDER FRUTERI

Mi ben kan du tu sani nomo: mi ben kan wroko feifi yari leki srudati na ini a Fransi legre, noso mi ben kan koti strafu na ini wan strafu-oso na Maroko. Meki mi fruteri fa mi kon na ini a muilek situwâsi disi.

MI BEN gebore na ini a foto Oppenau na Doisrikondre. Dati ben de na ini 1911, soso dri yari bifo a Fosi Grontapufeti broko. Mi papa nanga mama, Joseph nanga Frida Brüder, ben abi 17 manpikin nanga umapikin. Mi ben de a di fu 13 pikin fu den.

Mi kan memre ete taki mi ben e luku fa wan grupu srudati ben waka e prei poku na tapu strati na ini a foto pe wi ben tan. A moi poku ben hari mi so, taki mi bigin waka nanga den pokuman go na a loko-station. Mi ben doro biten fu si mi papa nanga tra man na ini srudatikrosi go na ini a loko. Wan tu uma bigin krei di a loko bigin rei. Wan syatu pisi ten baka dati, a priester fu wi ben hori wan langa preiki na ini kerki, dan a kari den nen fu fo man di ben lasi den libi na ini a feti gi a kondre fu den. „Now den de na ini hemel”, a priester ben taki. Wan uma di ben tanapu na mi sei fadon flaw.

Na a ten di mi papa ben e du srudatiwroko na a lanki fu Rosiakondre, dan a ben kisi wan siki di ben e meki a kisi hebi korsu nanga lusubere. A ben de so swaki di a drai kon baka na oso, taki a ben musu go wantewante na ati-oso. „Go na a kerki na sei fu a beripe, dan yu musu begi a Wi Tata Begi 50 tron èn yu musu begi Maria 50 tron”, na so a priester taigi mi. „Efu yu e du dati, dan yu papa sa kon betre.” Mi ben du san a taigi mi fu du, ma mi papa dede a dei baka dati. Srefi gi wan yongu boi leki mi, na orloku ben de wan tranga ondrofeni srefisrefi.

 Fa mi kon feni a waarheid

A ben tranga fu feni wroko na ini Doisrikondre na ini a pisi ten fu 1919 te go miti 1939. Ma baka di mi ben kaba skoro na ini 1928, dan mi ben feni wan wroko leki dyariman na ini a foto Basel na Switserland.

Neleki mi papa, mi ben de wan fayafaya Lomsusma. Mi ben wani tron wan kapucijner moniki fu go dini na India. Na a ten dati, mi brada Richard ben tron wan Kotoigi fu Yehovah. Di a yere san mi ben wani du, dan a kon na Switserland spesrutu fu pruberi fu meki mi kenki mi prakseri. A ben warskow mi fu luku bun taki mi no poti mi frutrow tapu libisma, èn spesrutu taki mi no poti frutrow tapu kerki tiriman. A ben gi mi deki-ati fu leisi Bijbel èn fu frutrow na ini dati wawan. Aladi mi no ben e bribi ala sani di a ben taigi mi, toku mi bai wan Nyun Testament èn mi bigin leisi en. Safrisafri mi kon frustan taki furu fu den sani di mi ben e bribi no ben kruderi nanga den leri fu Bijbel.

Wan sonde na ini 1933, di mi ben de na Richard oso na ini Doisrikondre, dan a meki mi kon leri sabi wan trowpaar di ben de Yehovah Kotoigi. Di den kon sabi taki mi ben e leisi a Bijbel, dan den gi mi wan pikin buku di nen The Crisis (A muilek ten). * Mi leisi a buku teleki mindrineti, dan fosi mi poti en na wan sei. Mi ben abi na overtoigi taki mi ben feni a waarheid!

Yehovah Kotoigi na ini Basel ben gi mi tu fu den buku di nen Studies in the Scriptures *, èn sosrefi tijdschrift nanga tra publikâsi. Fu di den sani di mi ben e leisi ben naki mi ati trutru, meki mi go na a priester èn mi aksi en fu a puru mi nen na ini a kerkibuku. A priester ben atibron srefisrefi èn a ben warskow mi taki mi ben o lasi mi bribi. Ma mi no ben lasi mi bribi kwetikweti. Fu a fosi leisi na ini mi libi mi bigin kisi trutru bribi.

Na a kaba fu a wiki dati, den brada na ini Basel ben seti sani fu go na Fransikondre fu go preiki drape. Wan fu den brada ben taigi mi na wan switi fasi taki mi no ben kisi wan kari fu go preiki fu di mi no ben de nanga a gemeente so langa ete. Ma dati no ben meki mi lasi-ati, èn mi taigi en taki mi ben wani bigin preiki trutru. Baka di a taki nanga wan tra owruman, dan a gi mi wan kontren na ini Switserland pe mi ben kan preiki. Frukufruku sonde mamanten, mi teki mi baisigri go na Kersatz, wan dorpu krosibei fu Basel. Mi ben abi 4 buku, 28 tijdschrift, nanga 20 brochure na ini mi tas. Furu fu den dorpusma ben de na kerki di mi doro. Ma toku, di 11 yuru doro, mi tas ben leigi kaba.

Di mi taigi den brada taki mi ben wani dopu, dan den ben abi wan seryusu takimakandra nanga mi, èn den ben e poti aksi gi mi fu si fa mi ben denki fu a waarheid. Den brada disi ben de fayafaya èn den ben e dini Yehovah nanga en organisâsi na wan getrow fasi, èn dati naki mi ati trutru. Fu di a ben de winterten, meki wan brada dopu mi na ini wan bigi tobo na ini na oso fu wan owruman. Mi sabi ete taki mi ben firi koloku srefisrefi èn mi ben firi tranga. Disi ben de na ini 1934.

A wroko tapu a Kownukondre boerderij

Na ini 1936 mi yere taki Yehovah Kotoigi ben bai wan pisi gron na ini Switserland. Mi taigi den taki mi ben de klariklari fu wroko leki dyariman. Mi ben prisiri srefisrefi di mi kisi a kari fu wroko tapu a Kownukondre boerderij na Steffisburg, sowan 30 kilometer fu Bern. Ala ten te a ben de fanowdu, dan mi ben yepi trawan tu nanga a wroko fu den tapu a boerderij. Bethel leri mi frustan o prenspari a de fu wroko makandra nanga trawan.

 Wan heimarki na ini den yari di mi ben de na Bethel, ben de a ten di Brada Rutherford kon na a Kownukondre boerderij na ini 1936. Di a si o bigi den tomati fu wi ben de èn o bun den gruntu ben e gro, dan a lafu èn a taki fa a ben breiti srefisrefi. A ben de wan lobi brada trutru!

Mi ben e dini pikinso moro leki dri yari na a boerderij kaba, di wan dei na a mamanten nyanyan wan sma leisi wan brifi fu na edekantoro fu Yehovah Kotoigi na ini Amerkankondre. A brifi ben sori krin taki a ben de prenspari srefisrefi fu du a preikiwroko, èn iniwan sma di ben wani dini na ini wan tra kondre leki pionier ben kan gi en nen. Sondro draidrai mi gi mi nen. Na ini mei 1939 mi yere pe mi ben o go: Brasyonkondre!

Na a ten dati, mi ben e go na den konmakandra na Gemeente Thun, krosibei fu a Kownukondre boerderij. Tapu den sonde, wan grupu fu wi ben e rei tu yuru langa nanga baisigri go na den Alpenbergi fu go preiki. Margaritha Steiner ben de na ini a grupu dati tu. Wantronso mi bigin prakseri wan sani: A no de so taki Yesus ben seni den disipel fu en go tu na tu? Di mi taigi Margaritha taki mi ben o go fu dini na Brasyonkondre, dan a fruteri mi taki ensrefi ben wani dini pe moro preikiman ben de fanowdu. Wi trow tapu 31 yuli 1939.

Wan presi pe wi no ben fruwakti fu tan

Wi komopo nanga sipi fu Le Havre, Fransikondre, fu go na a foto Santos na ini Brasyonkondre. Dati ben de na a kaba fu a mun augustus 1939. Ala den kamra nanga tu bedi ben furu kaba, dati meki wi ben musu tan na ini tu aparti kamra. Di wi ben de na pasi, dan wi ben kisi a nyunsu taki Ingrisikondre nanga Fransikondre ben o bigin feti nanga Doisrikondre. Wan grupu fu 30 Doisrisma di ben de tapu a srefi sipi ben bigin singi a Doisri kondresingi. A sani dati ben meki a kapten atibron so te, taki a kenki pasi èn a ankra a sipi na ini a foto Safi na Maroko. Den sma di ben abi Doisri papira ben kisi feifi miniti fu komopo na a sipi. Wi ben de na mindri den sma dati tu.

Wi ben musu tan wán dei na skowtu-oso. Baka dati, den poti wi na ini wan owru bus di ben e sekiseki na ala sei, èn den seni wi go na wan strafu-oso na ini Marrakech, sowan 140 kilometer farawe. Den dei baka dati ben tranga srefisrefi. Den strafu-oso kamra ben abi tumusi furu sma, èn den kamra ben dungru. A toilet ben de wan olo na ini a gron, èn a ben furu ala ten. Ibriwan fu wi ben kisi wan doti saka fu sribi na tapu, èn na neti den alata ben e betibeti wi na wi koiti. Tu leisi na ini wan dei wi ben e kisi pikinso nyanyan na ini wan frustu kan.

Wan legre ofsiri ben taigi mi taki den ben o lusu mi efu mi ben agri fu wroko feifi yari leki srudati na ini a Fransi legre. Fu di mi weigri fu du dati, meki mi pina 24 langa yuru fu di mi no ben sabi san ben o pasa nanga mi. Furu fu a ten dati mi gebroiki fu begi.

Baka aiti dei, den edeman fu a strafu-oso gi mi pasi fu si Margaritha baka. Margaritha ben mangri srefisrefi èn a ben e tan krei nomo. Mi du ala san mi ben man fu gi en deki-ati. Den ben aksi wi wan lo sani èn baka dati den poti wi tapu wan loko go na Casablanca pe Margaritha ben kon fri. Den ben seni mi go na wan strafu-oso na Port Lyautey (now Kenitra), sowan 180 kilometer moro fara. A consul fu Switserland ben taigi Margaritha fu a drai go baka na Switserland, ma a no ben wani gowe sondro mi. Na ini den tu mun di mi ben de na Port Lyautey, dan Margaritha ben e komopo ibri dei na Casablanca fu kon luku mi èn fu tyari nyanyan gi mi.

Wan yari na fesi, Yehovah Kotoigi ben tyari wan buku kon na doro di nen Kreuzzug gegen das Christentum (A feti teige Krestenhèit). A buku disi ben tyari kon na doro fu yepi sma frustan taki den Kotoigi no ben abi noti fu du nanga a Nazi tirimakti. Di mi ben de na strafu-oso, dan a bijkantoro fu Yehovah Kotoigi na ini a foto Bern ben skrifi wan brifi go na den Fransi tiriman. Den ben seni wan fu den buku dati makandra nanga a brifi, fu sori den taki wi no ben e horibaka gi a Nazi tirimakti. Margaritha ben du wan trutru bun wroko tu, fu di a ben e go na den heihei lantiman, pe a ben e pruberi fu overtoigi den taki wi no du nowan ogri. Te fu kaba, na a kaba fu 1939, wi ben kisi primisi fu gowe libi Maroko.

Ete wan leisi wi ben gowe nanga sipi go na Brasyonkondre. Ma wan syatu pisi ten nomo  baka dati, wi kon sabi taki den Doisri ondrowatra fetiboto ben e feti nanga den sipi na ini na Atlantisch Se, èn wi ben de wan fu den sipi di den ben wani pori. Aladi sma ben gebroiki a Jamaique, a sipi fu wi, soso fu tyari sani fu seri, toku a sipi ben abi wan tu gon na fesisei èn na bakasei. Na deiten, a kapten ben meki a sipi waka fu wan sei go na wan tra sei èn a ben sutu gon doronomo. Na neti wi ben musu kiri ala faya, so taki den Doisri no ben man si a sipi. Wi ben breiti srefisrefi di wi doro te fu kaba na a lanpresi fu a foto Santos na Brasyonkondre tapu 6 februari 1940. Sobun, dati ben de moro leki feifi mun sensi wi komopo na Europa!

Agen na ini strafu-oso

A fosi presi pe wi ben musu go fu preiki ben de Montenegro, wan foto na ini a distrikt Rio Grande do Sul na zuidsei fu Brasyonkondre. A ben musu de so, taki sma taigi den kerki tiriman taki wi ben kon na ini a foto. Baka di wi preiki soso tu yuru nomo, skowtu hori wi èn den teki ala den gramofonplaat fu wi di ben abi Bijbel lezing na tapu. Den ben teki ala den publikâsi fu wi sosrefi, èn srefi den tas fu kameili-buba di wi ben bai na Maroko gi a preikiwroko. Wan priester èn sosrefi wan kerki fesiman di ben taki Doisritongo ben e wakti wi na a skowtu-oso. Den ben e arki wan fu den lezing fu Brada Rutherford di a skowtu-edeman ben e prei tapu a gramofon fu wi di a ben teki tu. Brada Rutherford trutru ben taki sani soleki fa den de! Di a bigin taki fu a Vaticaan, dan a priester kisi so wan bigi atibron taki en fesi kon redi, èn a waka gowe wantewante.

A beskopu fu Santa Maria ben aksi den skowtu fu tyari wi go na Pôrto Alegre, a mamafoto fu a distrikt. Wan syatu pisi ten baka dati, Margaritha ben kon fri, èn a go suku yepi na a consul fu Switserland. A consul ben gi en a rai fu drai go baka na Switserland. Ma agen a no ben wani gowe libi mi. Ala ten Margaritha ben e horibaka gi mi. Dritenti dei na baka den poti wan lo aksi gi mi, èn baka dati den lusu mi. Skowtu ben taigi wi taki wi ben kan du tu sani: wi ben kan gowe libi a distrikt na ini tin dei, noso wi ben kan „tan drape èn ondrofeni den bakapisi fu dati”. Na edekantoro na ini Brooklyn ben gi wi a rai fu go na Rio de Janeiro.

„Grantangi, yu kan leisi a karta disi?”

Aladi wi ben kisi so furu problema fosi wi ben man bigin a preikiwroko na Brasyonkondre, toku wi ben de nanga prisiri srefisrefi! Wi ben  kan taki dati, fu di wi ben de na libi, den tas fu wi ben lai nanga publikâsi baka, èn wi ben abi fu preiki na ini heri kontren fu Rio de Janeiro. Ma fa wi ben o preiki aladi wi no ben man taki a Potogisitongo? We, nanga yepi fu wan kotoigi karta. “Por favor, leia este cartão” („Grantangi, yu kan leisi a karta disi?”) na den fosi Potogisi wortu di wi ben man taki na ini a preikiwroko. Wi ben abi bun bakapisi srefisrefi nanga a karta dati! Wi ben prati moro leki 1000 buku na ini wán mun nomo. Furu fu den sma di ben teki den Bijbel publikâsi fu wi, teki a waarheid bakaten. Fu taki en leti, den publikâsi fu wi ben e gi wan moro bun kotoigi leki san wisrefi ben sa man du. Disi meki mi kon frustan o prenspari a de fu tyari den publikâsi go na den sma di wani sabi moro.

Na a ten dati, Rio de Janeiro ben de a mamafoto fu Brasyonkondre, èn spesrutu den sma na ini den lantikantoro ben e arki a boskopu fu wi. Mi ben abi a grani srefi fu gi kotoigi na a minister fu moni afersi èn sosrefi na a minister fu legre afersi. Na den okasi disi, mi ben si krin taki Yehovah en yeye ben de na wroko.

Wan leisi, di mi ben e preiki na wan pren na ini a foto Rio, dan mi waka go na ini a Krutu-oso. Na wan noso tra fasi mi waka go na ini wan kamra pe wan lo mansma nanga blaka krosi ben de. A ben gersi leki den ben e hori wan beri. Mi waka go na wan man di ben luku leki a ben de wan prenspari sma drape, èn mi gi en a kotoigi karta fu mi. A no wan beri den ben e hori. Fu taki en leti, mi ben kon na mindri fu wan krutu afersi di den ben hori, èn a man di mi ben e taki nanga en ben de a krutuman. A lafu èn a taigi den waktiman taki den no ben abi fu broko den ede. Nanga prisiri a teki a buku Children (Pikin-nengre) * èn a gi mi wan bijdrage. Di mi waka go na dorosei, dan wan fu den waktiman sori mi den wortu tapu a doro di ben taki krin: Proibida a entrada de pessoas estranhas (Sma no mag kon inisei sondro primisi).

Wan tra kontren pe wi ben abi bun bakapisi na ini a preikiwroko, ben de a lanpresi fu den sipi. Wan leisi wi ben miti wan matrosi di ben teki wan tu publikâsi bifo a drai go baka na se. Bakaten, wi ben miti en na wan bigi konmakandra. En heri famiri ben teki a waarheid, èn ensrefi ben go na fesi heri bun. Dati ben gi wi furu prisiri.

Ma a no ala sani ben waka so bun. Den ben gi wi primisi fu tan siksi mun na ini a kondre èn a ten dati ben kon na wan kaba. Dati wani taki dati den ben kan aksi wi fu gowe libi a kondre. Baka di wi skrifi go na a edekantoro fu fruteri den fu a situwâsi fu wi, dan wi kisi wan brifi fu Brada Rutherford. Na ini a moi brifi dati, a ben gi wi deki-ati fu horidoro èn a ben gi wi wan tu rai san wi ben kan du. Wi ben wani tan na Brasyonkondre, èn nanga a yepi fu wan afkati wi ben kisi wan visum te fu kaba na ini 1945, so taki wi ben man tan fu ala ten.

Wan wroko di ben de fu wan langa pisi ten

Ma bifo a ten dati, Jonathan, a manpikin fu wi gebore na ini 1941, Ruth na ini 1943, èn Esther na ini 1945. Fu man sorgu gi mi osofamiri di ben e kon moro bigi, dan mi ben musu bigin du grontapuwroko. Margaritha ben go doro nanga a furuten preikiwroko teleki a ten di a di fu dri pikin fu wi ben gebore.

Sensi a bigin, wi wroko makandra leki osofamiri na ini a preikiwroko. Wi ben du preikiwroko na den pren fu den foto, na den loko-station, na strati, èn sosrefi na ini den bisnis kontren. Satra  neti wi ben wroko makandra fu prati A Waktitoren nanga Ontwaakt!, èn den okasi disi ben gi wi prisiri trutru.

Ibri pikin ben abi wan wroko fu du na oso. Ibri dei, Jonathan ben musu krin na onfu nanga a kukru. Den meisje ben abi a wroko fu krin na ijskasi, fu sibi a dyari, èn fu krin den susu fu wi. Disi ben yepi den fu leri fa fu orga sani èn du sani na wan fasi di fiti. Den ben leri tu fa densrefi kan du sani. Now, den pikin fu wi e wroko tranga èn den e sorgu bun gi den oso fu den èn gi tra sani di den abi. Disi e gi mi nanga Margaritha furu prisiri.

Wi ben wani tu taki den pikin tyari densrefi na wan bun fasi na den konmakandra. Bifo a konmakandra bigin, dan den ben dringi pikinso watra èn baka dati den ben go na toilet. Te a konmakandra ben hori, dan Jonathan ben sidon na mi kruktu-anusei èn Ruth na mi leti-anusei, dan Margaritha ben sidon sei fu Ruth, èn Esther ben sidon na a leti-anusei fu Margaritha. Disi ben yepi den fu arki san ben taki na den konmakandra èn fu bigin teki a yeye nyanyan na ini den yongu yari fu den.

Yehovah blesi den muiti fu wi. Ala den pikin fu wi e dini Yehovah na wan getrow fasi, èn den e prisiri fu teki prati na a preikiwroko. Now Jonathan na wan owruman na ini Gemeente Novo Méier na ini Rio de Janeiro.

Na a pisi ten fu 1970, ala den pikin fu wi ben trow kaba èn den alamala ben komopo na oso. Dati meki mi nanga Margaritha bosroiti fu froisi so taki wi ben kan dini pe moro preikiman de fanowdu. A fosi presi pe wi go ben de Poços de Caldas na ini a distrikt Minas Gerais. Na a ten dati den ben abi wan pikin grupu fu 19 Kownukondre preikiman. A ben hati mi srefisrefi di mi si a konmakandra presi a fosi tron. A ben de wan ondrogron kamra sondro fensre èn furu sani na ini a presi ben musu meki kon bun baka. Wantewante wi ben bigin suku wan moro bun Kownukondre zaal èn heri esi wi ben feni wan moi presi na wan bun kontren. Dati ben tyari wan bigi kenki kon! Fo nanga afu yari baka dati, wi ben abi 155 preikiman. Na ini 1989 wi froisi go na a foto Araruama na ini a distrikt Rio de Janeiro, pe wi dini neigi yari langa. Na ini a pisi ten dati, wi si tu nyun gemeente opo.

Wi kisi wini fu di wi tan du a diniwroko di wi kisi fu du

Na ini 1998 wi froisi go na a foto São Gonçalo na ini a distrikt Rio de Janeiro, fu di wi ben kisi problema nanga a gosontu, èn wi ben wani de krosibei tu fu den pikin fu wi. Mi e dini ete leki wan gemeente owruman. Wi e du ala san wi man fu teki prati doronomo na a preikiwroko. Margaritha e prisiri fu gi kotoigi na sma na ini wan bigi wenkri krosibei fu wi oso, èn a gemeente sori switifasi fu di a gi wi wan pikin kontren krosibei fu wi oso, so taki a moro makriki gi wi fu preiki te a gosontu fu wi e gi pasi fu du dati.

Mi nanga Margaritha e dini Yehovah fayafaya moro leki 60 yari kaba. Wisrefi ondrofeni taki ’nowan tiri, nowan sani di de now noso wan sani di musu kon ete, nowan makti, nowan hei noso dipi, nowan tra mekisani sa man prati wi fu a lobi fu Gado, di de na ini Krestes Yesus, wi Masra’ (Romesma 8:38, 39). Boiti dati, wi prisiri fu si fa den „tra skapu” tyari kon makandra, di abi a kefalek moi howpu fu libi fu têgo na ini wan volmaakti grontapu nanga ala den moi sani di Gado meki! (Yohanes 10:16) Di wi doro na Rio de Janeiro na ini 1940, dan a foto dati ben abi wán gemeente nomo nanga 28 preikiman. Now sowan 250 gemeente de nanga moro leki 20.000 Kownukondre preikiman.

Wan tu leisi wi ben kisi na okasi fu drai go baka na den famiri fu wi na ini Europa. Ma a presi pe Yehovah poti wi na wroko na dyaso, Brasyonkondre. Wi breiti srefisrefi taki wi tan pe a poti wi fu du diniwroko!

[Futuwortu]

[Prenki na tapu bladzijde 21]

Na a Kownukondre boerderij na Steffisburg na ini Switserland, syatu bifo 1940 (mi de te na a kruktu-anusei)

[Prenki na tapu bladzijde 23]

Syatu bifo a trowdei fu wi na ini 1939

[Prenki na tapu bladzijde 23]

Casablanca na ini a pisi ten fu 1940 te go miti 1949

[Prenki na tapu bladzijde 23]

Wi ben e preiki nanga a heri osofamiri

[Prenki na tapu bladzijde 24]

Wi e teki prati na a preikiwroko doronomo na ini a ten disi